’Oqaatsip oqaluussissutiginera’ nakussatsitsisarpoq
„Ornissinga . . . qasuertissavassi“
’Oqaatsip oqaluussissutiginera’ nakussatsitsisarpoq
NAAMMALLUINNARTUUVOQ pingaartumillu naammassiniagassaqarluni. Ilinniartitseriaasia ‘inuit tupigusuutigingaarpaat’. (Matthæusi 7:28) Oqaluussisartutut qasusuitsuuvoq. Piffissami annersaa, nukini, periarfissanilu Guutip naalagaaffiata oqaluussissutigineranut atortarpai. Aap, Jiisusip tamanit annermik nunamini avingarusimasut tamaasa oqaluussilluni ilinniartitsillunilu angalaarfigai. — Matthæusi 9:35.
Jiisusip suliassaa tassaavoq nalimini inunnut „Naalagaaffimmik iivangkiiliu“ oqaluussissutigissallugu ajoqersukkanilu nunarsuarmi tamarmi taamaaliornissaanut ilinniartissallugit. (Matthæusi 4:23; 24:14; 28:19, 20) Ajoqersugaasa naammalluinnanngitsut akisussaaffimmik tunineqarnertik nanertuutigissanerpaat, suliassallu nukinginnartup annertussusiata sapiissuseerutitissanerpai?
Naamerluinnaq. Jiisusip ajoqersukkani ’katersuinermi naalagaasumut’, Jehova Guutimut, katersuisussanik aallartitseqqullugu qinunissaat peqqussitigereeramiuk inuit ajoqersoqullugit aallartippai. (Matthæusi 9:38; 10:1) Tamatuma kingorna neriorsorpai akisussaaffik taakkununnga tunniussani, imminut ajoqersugaanerat oqaluussinerallu, iluaqutaallunilu napatitsisuussasoq. Jiisusi oqarpoq: „Ornissinga . . . qasuertissavassi.“ — Matthæusi 11:28.
Nuannaarnissamut pissutissaq
Jiisusip inussiarnersumik qaaqqussutaa ajoqersukkaminut asannittumik isumassuineranut soqutiginninneranullu ersiutaavoq. Guutip Naalagaaffia pillugu ‘nutaarsiassaq nuannersoq’ oqaluussissutigalugu akisussaaffitsik naammassigaangamikku nukissaqalertarput. Piviusumik nuannaarnermik nalerisimaarnermillu misigisarput. — Johannesi 4:36.
Jiisusip nunarsuarmukarnissaa sioqquterujussuarlugu, Allakkat erseqqissarpaat kiffartorneq illernartoq nuannaarnermik malunnaateqassasoq. Tamanna tussiaammi tussiaasiortup unnersiutiginnilluni erinarsungaani erserpoq: „Nillerit [Jehova] nersornartillugu, nunarsuarmi tamarmi! [Jehova] kiffartorfigisiuk tipaatsuummik erinarsorlusi, sassaritsi kiinaata saanut qiimmattarlusi!“ (Tussiaat 100:1, 2) Ullumikkut inuiaqatigiinnit tamaneersut Jehova ataqqinartippaat, unnersiutiginninnerallu sakkortoqaaq, aap, soorlu sakkutuut ajugaasut nuannaarlutik nillianerat. Guutimut tunniulluinnarsimasut, ’sassarput kiinaata saanut qiimmattarlutik’. Tamannalu tulluarpoq Jehovap, ’Guutip pilluartup’, kissaatigimmagu kiffami imminut tunniulluinnarnermik eqquutitinnera nuannaarutigissagaat. — 1 Timotheusi 1:11.
Nammineq nakussatsinneqartarput
Oqaluussilluni suleruloorneq sooq qasunanngila, akerlianilli nakussatsinnarluni? Jiisusimut Jehovap peqqusaanik iliorneq tassaasimavoq soorlu ‘nerisassaq’ nukissaqalersitsisoq. Oqarpoq: „Uanga nerisassara tassaavoq aallartitsisima piumasaa malillugu iliornissaq suliassarititaatalu naammassinissaa.“ — Johannesi 4:34.
Aamma ullumikkut kristumiut ilungersortut ‘oqaatsip oqaluussissutiginera’ nuannaarutigaat. (2 Timotheusi 4:2) Connie, kristumiu arnaq utoqqasaaq qaammammut nalunaaquttap akunneri 70-it sinnerlugit kristumiutut kiffartornermini angusaqartartoq, oqarpoq: „Oqaluussisimagaangama nalerisimaangaarneq qamanngalu nuannaarneq misigisarpakka, aamma ulloq naallugu oqaluussisimallunga qasugaangami.“
Taavami „Naalagaaffimmik nutaarsiassaq“ ilassineqanngikkaangat? Connie nangippoq: „Inuit tusarnaarsimagaluarpata tusarnaarsimanngikkaluarpataluunniit, oqaluussisimanera peqqissimissutiginngisaannarpara. Nalunngiinnanngilara taamaaliornera Jehovap iluarigaa, kisianni sallusuissutip oqaluussissutiginera
nuannaarutigisaqaara, taamaaliornikkummi neriuutiga nakussatsissutigisarpara.“Aammattaaq ilaasa misigisimavaat allanik Guutimik ilisarsinissamut ikiuinerup inuunertik siunertaqalersikkaat. Meloney, arnaq inuusuttoq qaammammut nalunaaquttap akunneri 50-it sinnerlugit oqaluusinermi angusaqartartoq, oqarpoq: „Kiffartorneq inuummarissinartuuvoq inuuneralu siunertaqalersillugulu imaqalersippaa. Kiffartoraangama ajornartorsiutikka minnerulersutut misinnartarput ulluinnarnilu tamaviaarnartut oqinnerulertarlutik.“
Millicent, aamma Jehovamut kiffaasoq ilungersortoq, oqarpoq: „Guutip inunnut siunertaa pillugu Paradiisilu nunami pilersinneqaqqittussaq allanut oqaluussissutigigaangakkit ullut taakkua immikkut ittuusarput. Taamatut ullunni Jehova ilaatittarpara, qamuunalu eqqississutigalugu nuannaarnerlu, misigisaq allatut anguneqarsinnaanngitsoq, misigisarlugu.“
Allat nakussatsittarpaat
Qularutissaanngilaq Guutip naalagaaffianik oqaluussissutiginnittut, kristumiutut kiffartorneq nutaanik nukissaqalissutigisaraat, aamma tusarliussamik inuunartumik ilassinnittut, nuannaalerlutillu qiimmassarneqartut. Portugalimi ilinniartitsisoq mattuttunit palasinillu ilinniartinneqarsimagaluarluni misigisimanngilaq oqaluffiup anersaakkut pisariaqartitani matussusersinnaagai. Apeqqutai Biibilimut tunngasut akineqanngillat. Jehovap Nalunaajaasuisa ilaannit aalajangersimasumik Biibilimik atuaqqissaaqatigineqarnermigut Allakkat imarisaannik paasinninnera annertusiartuinnarpoq. Nuannaarutigingaarpaa. Pingasunngornerit tamaasa atuaqqissaarnissara qilanaarisarpara, tassami apeqqutikka Biibilimut tunngasut tamarmik naammaginartumik akineqartarput,“ oqarpoq. Ullumikkut arnaq taanna Jehovamut kiffaavoq tunniulluinnarsimallunilu kuisimasoq, maannalu sallusuissut Biibilimeersoq iluaqutigalugu allat nakussatsinneqarnissaannut nammineq peqataavoq.
Ersarippoq Jehovap Nalunaajaasuisa akisussaaffimmik tunineqarsimanertik artorsaatiginngikkaat, suliassallu nukinginnartup annertussusia nikalluutiginnilluinnarpaat. Soqutiginninnginnerup akerlilersorneqarnerulluunniit ilungersornerat annikillisissinnaanngilaat. Naalagaaffiup oqaluussissutiginissaanik peqqussut naalanniarlugu ilungersorput. Inuit nutaarsiassamik nuannersumik avitseqatigiumallugit sumiluunniit ujartarpaat — USA-mi qasuersaarallarfimmiugaluarpat (1), Koreami timmisartoqarfimmiugaluarpat (2), qaqqani Andesini (3) imaluunniit Londonip niuffattarfiani (4). Ullumikkut Jiisusip ajoqersugai nunarsuarmi tamarmi nuannaarlutik oqaluussiuarput. Aap, Jiisusi neriorsuutiminut ilumoorluni ’qasuertippai’ allanillu nakussatsitsisillugit. — Saqqummersitat 22:17. (wE 1/15 02)