Utoqqaanertat — Allat akisussaaffeqalersinniarlugit piginnaanngorsarsigit

SILARSUARMI tamarmi angutit Jehovap Nalunaajaasuisa ilagiivini akisussaaffimmik tigusisinnaasut pilertortumik pisariaqartinneqarput. Pingartumik pingasunik peqquteqarpoq.

Siullermik, Jehovap neriorsuutini ’nukarlersaat tassaalissaaq inuiaat pissaasut’, maannakkut piviusunngortippaa. (Esaja 60:22) Saammaannera pissutaalluni ajoqersukkat millionillit nutaat ukiut pingasut ingerlanerini Jehovap nalunaajaasuisut kuisissimapput. Angutit akisussaassuseqarluartut, kuiseqqammisunit kristumiutut inersimallualernissamut ineriartortitsinissaannik ikiuisinnaasut pisariaqartinneqarput. — Hebræerit 6:1.

Aappaattut, ukiuni qulikkaani utoqqaanertaasimasut ilagiinni kiffartornertik annikillisittariaqarsimavaat utoqqalineq peqqiilliornerluunniit pissutigalugit.

Pingajuattut, utoqqaanertarpassuit aallussilluartut maannakkut Napparsimmavinnut attaveqartitatut, sanaartortitsinermik ataatsimiititaliani, ataatsimeersuartarfinnut ataatsimiititaliani allanilluunniit piffissamik atuinartunik suliaqalersimapput.

Utoqqaanertanik amerlanerujussuarnik pisariaqartitsineq qanoq ililluni matussuserneqarsinnaava? Akissut tassaavoq piginnaanngorsaaneq. Biibilimi kristumiut nakkutilliisut kajumissaarneqarput ’[angutit] tatiginartut aammattaaq allanik ajoqersuisinnaajumaartut’ piginnaanngorsaqqullugit. (2 Timotheusi 2:2) Oqaatsinik ujarlerfissiaq naapertorlugu oqaluut „piginnaanngorsaaneq“ isumaqarpoq allanik ilinniartitsineq, taakku pisinnaanngortillugit, piukkunnaateqalersillugit naammassinnissinnaassuseqalersillugillu. Utoqqaanertat angutinik piukkunnaatilinnik qanoq ilillutik piginnaanngorsaasinnaanersut maannakkut sammissavarput.

Jehovap maligassiuinera ilaaruk

Jiisusi Kristusi qularnaateqanngitsumik suliaminut ’pisinnaassuseqarluni, piukkunnaateqarluni naammassinnissinnaassuseqarpoq’ — tamannalu tupinnanngilaq. Jehova Guutimimmi piginnaanngorsagaavoq! Piginnaanngorsagaanerata iluatsilluarneranut suna pissutaava? Pissutaasut pingasut Jiisusip Johannesi 5:20-mi allassimasut eqqaavai: „Ataatammi [1] Erneq asavaa [2] namminerlu iliuutsiminik tamanik takutittarlugu; [3] sulianillu suli annerusunik takutikkumaarpaa.“ Pissutaasunik pingasunik taakkuninnga misissueqqissaarnerup piginnaanngorsaaneq pillugu oqaluttuussinnaavaatigut.

Jiisusip oqaasia siulleq malugiuk: „Ataatammi Erneq asavaa.“ Jehova erneralu pinngortitsinerup aallartinneraniilli imminnut qanimut attaveqarput. Ussatit 8:30-p attaveqatigiinnerat ersersippaa: „Tatigisaatut [Jehovap] sanianiippunga [Jiisusi]. Taassumunnga nuannaarutaavunga ullut tamaasa, kiinaatalu saani qitittuarpunga.“ Jiisusip Jehovamit asaneqarnini qularutiginngilaa. Jiisusillu Ataataminik suleqateqarnerminik nuannarinninnini isertunngilaa. Ila nuannertassusia utoqqaanertat kristumiut piginnaanngorsarneqartullu akunnerminni qanimut ikinngutigiileraangata!

Jiisusip pissutaasut aappaattut taasaa tassaavoq Ataatap ’nammineq iliuutsiminik tamanik takutitsisarnera’. Oqaatsit taakkua Ussatit 8:30-mi allassimasoq uppernarsarpaat, tassa Jiisusi Jehovap ’sanianiittoq’ silarsuaq avataaniittullu pinngortinneqarmata. (1 Mosesi 1:26) Maligassiaq pitsaasoq taanna utoqqaanertat malissinnaavaat ilagiinni kiffartortut qanimut suleqatigalugit, suliatillu qanoq ilillutik pitsaanerpaamik suliarisinnaaneraat takutillugit. Ilagiinnili kiffartortunngorlaat kisimik siuariartortumik piginnaanngorsagaanissamik pisariaqartitsinngillat.  Qatanngutinut angutinut ukiorpassuarni utoqqaanertanngorusuttunut sulili utoqqaanertanngorsimanngitsunut tunngatillugu aamma taamaapoq. (1 Timotheusi 3:1) Utoqqaanertat qatanngutit taakku sukumiisumik ilitsersortariaqarpaat, suna sulissutigissanerlugu paasiniassammassuk.

Assersuutigalugu ilagiinni kiffartortoq suliaminik nakkutiginninnermini immaqa tatiginartuuvoq, piffissamik paarsilluartuuvoq peqqissaartuullunilu, ilinniartitsillaqqissuuvoq. Immaqa ilagiinni arlalitsigut naammassisaqarluartarpoq, immaqali misiginngitsoorluni qatanngutiminut angutinut arnanullu inussiarniilaartarpoq. Utoqqaanertammi ’ilisimasutut piuaattussaapput’. (Jaaku 3:13) Inussiarnisaarnerussannginnerpa utoqqaanertap ilagiinni kiffartortoq oqaloqatigalugu ajornartorsiutip suuneranik nassuiaallugu, assersuutissanik erseqqissunik taasaqarluni pitsaanerusumik iliuuseqarsinnaaneranik atoriaannaasunik siunnersussallugu? Utoqqaanertap ’oqaatsini tarajulimmik’ oqaatigippagit, ilagiinni kiffartortup ilitsersuut tigulluassagunaarpaa. (Kolossemiut 4:6) Soorunami ilagiinni kiffartortup pissutsit utoqqaanertamut oqinnerulersissinnaavai ammanermigut ilitsersoruminartuunermigullu. — Tussiaat 141:5.

Ilagiit ilaanni utoqqaanertat ilagiinni kiffartortut ulluinnarni suliassanik atoriaannaasunik piginnaanngorsarneqartuarnissaat isumagisarpaat. Assersuutigalugu napparsimasunut utoqqarnulluunniit pulaaraangamik ilagiinni kiffartortut piukkunnaatillit ilagisarpaat. Ilagiinni kiffartortut taamaalillutik paarsisutut pulaarnerit misilittagaqarfigilertarpaat. Soorunami ilagiinni kiffartortoq anersaakkut siumukarniarluni arlalitsigut nammineerluni iliuuseqarsinnaavoq. — Ungalusaq ataaniittoq takuuk, „Ilagiinni kiffartortoq qanoq iliuuseqarsinnaasoq“.

Jiisusip piginnaanngorsagaanerata iluatsilluarneranut pissutaasut pingajuat tassaavoq Jiisusip siumukarnerunissaa eqqarsaatigalugu Jehovap piginnaanngorsaanera. Jiisusi oqarpoq Ataatap Erneq ’sulianik suli annerusunik takutikkumaaraa’. Jiisusip nunarsuarmiilluni misilittagaasa siunissami suliassaanut piginnaanngorsarpaa. (Hebræerit 4:15; 5:8, 9) Assersuutigalugu Jiisusi qanittukkut suliarujussuaq suliarissavaa inuit milliardillit maannakkut toqungasut makitillugillu eqqartuutissagamigit! — Johannesi 5:21, 22.

Utoqqaanertat ilagiinni kiffartortunik piginnaanngorsaagaangamik siunissami pisariaqartitsinissaq eqqarsaatigisariaqarpaat. Immaqa maannakkorpiaq utoqqaanertanik ilagiinnilu kiffartortunik amerlanerusunik pisariaqartitsisoqarpasinngikkaluarpoq, ilagiinnilli nutaanik pilersitsisoqassappat aamma taamaassava? — Ukiut pingasut ingerlanerini silarsuarmi ilagiit 6000-t nutaat pilersinneqarsimapput. Utoqqaanertat ilagiinnilu kiffartortut amerlasuut taakkuninnga isumaginnittussat pisariaqartinneqarput!

Ilissi utoqqaanertaasusi piginnaanngorsakkassinnut ikinngutaalluarniarlusi Jehovap maligassiuinera malippisiuk? Suliatik qanoq naammassissaneraat takutittarpisiuk? Siunissami pisariaqartinneqartussat eqqarsaatigaasigit? Jehovap Jiisusimik piginnaanngorsaanera ilaaraanni amerlasuut pilluaqqusaangaarnerannik kinguneqassaaq.

 Suliassanik agguaanissamut tunuarsimaarnak

Utoqqaanertat pikkorissut suliassarpassuarnik pingaarutilinnik suliaqartartut, akisussaaffinnik allanut tunioraanissartik nangaassutigilaartarunarpaat. Immaqa misilikkaluarsimavaat — naammaginanngitsumik kinguneqartumik. Tamatuma imatut isiginnittaaseqalersissinnaavaat, ’iluamik suliarineqassappat, nammineerlunga suliarisariaqarpara’. Taamatulli isiginnittaaseqarneq Jehovap piumasaanut naapertuuppa, tassa angutit misilittagakinnerit misilittagaqarnerusunit piginnaanngorsagaasariaqartut? — 2 Timotheusi 2:2.

Apustili Paulusi pakatsivoq angalaqatimi ilaasa, Johannes Markusip, Pamfyliami suliani qimammagu angerlarlunilu. (Apustilit Suliaat 15:38, 39) Tamannali allanik piginnaanngorsaanissaminut unissutiginngilaa. Qatanngut alla inuusuttoq, Timotheusi, ajoqersuiartortitassatut piginnaanngorsarniarlugu toqqarpaa. * (Apustilit Suliaat 16:1-3) Ajoqersuiartortitat Berøamiillutik akerlilersorneqangaarmata Paulusi aallartariaqarpoq. Ilagiinnut pilersinneqaqqammersumut akisussaaffik Silasimut, qatanngut angut utoqqasaaq anersaakkut inersimalluartumut, Timotheusimullu tunniuppaa. (Apustilit Suliaat 17:13-15) Qularnanngitsumik Timotheusip Silasi ilinniarfigilluarpaa. Timotheusi kingusinnerusukkut akisussaaffimmik annerusumik tigusisinnaalermat Paulusip Thessalonikamut aallartippaa ilagiit nakussatsikkiartoqqullugit. — 1 Thessalonikamiut 3:1-3

Paulusi Timotheusilu niuernerpalaartumik, inussiarniitsumik inuppalaanngitsumillu attaveqatigiinngillat. Imminnut qanimut attaveqatigiipput. Paulusi Korinthimi ilagiinnut allakkami Timotheusi, Korinthimut aallartitassani pillugu allappoq „naalakkami qitornarisara asanartoq ilumoortorlu“. Nangippoq: „[Timotheusip] Kristusi-Jiisusimi ingerlavigisannik eqqaasissavaasi.“ (1 Korinthimiut 4:17) Timotheusip Paulusimit piginnaanngorsarneqarnini ilassilluarpaa suliassanilu suliarilluarsinnaalerlugit. Paulusip Timotheusimik isumaginninneratut, qatanngutinit utoqqaanerusunit isumaginnilluartunit isumagineqarnertik pissutigalugu qatanngutit angutit inuusuttut arlallit ilagiinni kiffartortunngorsimapput, utoqqaanertanngorsimapput imaluunniit nakkutilliisunngorsimallutik angalasartut pikkorissut.

Utoqqaanertat, allanik piginnaanngorsaagitsi!

Siulittuutip Esaja 60:22-miittup ullutsinni eqquunnera ersarilluinnarpoq. Jehovap ’minnersaat tuusintilinngortippaa’. Inuiaat ’tuusintilinngussaguni’ aaqqissugaalluartariaqarpoq. Ilissi utoqqaanertaasusi qatanngutit angutit pisussaassutsiminik pingaartitsisut piukkunnaatillillu qanoq ilillusi annerusumik piginnaanngorsarsinnaanerlugit eqqarsaatigeqqissaarsinnaavarsi. Ilagiinni kiffartortut tamarmik siumukarniarlutik suna sulissutigissanerlugu erseqqissumik ilisimaneraat qulakkeertariaqarparsi. Ilissilu qatanngutit angutit kuisissimasusi nammineq utoqqaanertanit isumagineqarnersi tamakkiisumik pissarsiffiginiartariaqarparsi. Pikkorinnerulernissamut ilisimasaqarnerulernissamut misilittagaqarnerulernissamullu periarfissat atorluarsigik. Jehovap qularnanngivissumik taamatut ikiuiniarluni pilersaarut pilluaqqussavaa. — Esaja 61:5. (wE 1/1 02)

[Quppernerup ataani ilanngussaq]

[Qupp. 18-mi ungalusaq]

Ilagiinni kiffartortut qanoq iliorsinnaasut

Utoqqaanertat ilagiinni kiffartortut piginnanngorsagaanissaat isumagisariaqarpaat, ilagiinnili kiffartortut anersaakkut siumukarniarlutik namminneq arlalitsigut iliuuseqarsinnaapput.

— Ilagiinni kiffartortut suliaminnik nakkutiginninnerminni peqqissaartuullutik tatiginartuusariaqarput. Siumukarniaraanni atuaqqissaartarneq ilikkakkallu malillugit iliuuseqartarnissaq pingaaruteqarluinnarpoq.

— Ilagiinni kiffartortoq tamanut ammasumik oqalugiartussanngoruni, oqalugiaatip qanoq saqqummiunneqarsinnaanera pillugu utoqqaanertamit pikkorissumit siunnersoqqunissamut nangaasariaqanngilaq.

— Ilagiinni kiffartortup oqalugiaatini qanoq saqqummiunnerlugu utoqqaanertamut maluginiaqqusinnaavaa, kingornalu pitsannguallaataasinnaasunik siunnersuuteqaqqullugu.

Ilagiinni kiffartortut utoqqaanertanit siunnersoqqusariaqarput, siunnersuutaallu akueralugit malillugit. Taamaaliorunik siumukarnerat ’tamanit takuneqarsinnaassaaq’. — 1 Timotheusi 4:15.