„Annernalaarsinnaavoq“

TAAMATUT oqarfigitissimassaatit? Immaqa nakorsaq peqqissaasorluunniit arlaannik passutilertinnak taamatut oqarpoq.

Annernassagunarnera pinngitsoorniaannarlugu passunneqarnissat itigartissimagunanngilat. Naamik, naammagalugu atorsimassagunarpat nalunnginnakku ungasinnerusoq eqqarsaatigalugu iluaqutigissallugu. Ajortoqavitsillugu nuanniitsumik passunneqarneq passunneqarumannginnerluunniit inuunermik toqumilluunniit kinguneqarsinnaavoq.

Immaqa nakorsiakulasariaqanngilagut. Inuttulli naammalluinnanngitsutut pinngitsoorsinnaanngisarput tassaavoq oqaaqqissaarneqarneq naqqissorneqarnerluunniit, naak ilaannikkut annerisinnaagaluarlutigu. (Jeremia 10:23) Meeqqanut tunngatillugu tamatuma pisariaqassusia erseqqissarniarlugu Biibilimi ima allassimavoq: „Ernerit sukannersumik perorsarniaruk, taava isumakkut eqqissiumaarputit nuannaarutissillutillu.“ — Ussatit 29:17.

Oqaaseq ’perorsaaneq’ Biibilimi atorneqaraangat pingaarnerpaamik pineqartarpoq oqaaqqissaarineq, ilinniartinneqarneq avoqqaarineqarnerlu. Ilumoorpoq tamanna meeqqat ikittuinnaat kissaatigigaat. Arlaatigut pillaanertaqassappat immaqa meeraq akerliuniassaaq. Angajoqqaalli asannillutillu silatuut meeqqap ajuallassutigisai paasisinnaavaat meeqqamullu pitsaanerusussaq eqqarsaatigalugu. Angajoqqaat kristumiut nalunngilaat Guutip oqaasiani ima allassimasoq ilumoortoq: „Perorsagaaneq sunaluunniit atuutsilluni iluaaginartuusaraluarpoq nuannersortaqarnani, kingunerisarpaali eqqissineq iluarnerlu.“ — Hebræerit 12:11; Ussatit 13:24.

Soorunami oqaaqqissaarneqarneq meeqqat kisimik atorfissaqartinngilaat. Inersimasut aamma atorfissaqartippaat. Taakkua Biibilimi ima allaffigineqarput: „Ajoqersuussutit tamatigut aalajangiussimaniakkit, annaanaveersaarniakkit ilinnut inuussutaammata.“ (Ussatit 4:13) Aap, silatuut — inuusuttut utoqqaanerusullu — Guutip oqaasia, Biibili, tunngavigalugu oqaaqqissaarut ilassissavaat, taamaaliorunik ungasinnerusoq eqqarsaatigalugu inuunertunerussapput. (wE 03/01 02)