Guutip inatsisai iluaqutigaavut

„Ilami inatsisitit nuannareqaakka.“ — TUSSIAAT 119:97.

1. Inuppassuit Guutip inatsisaanut naalanneq qanoq isimaqarfigaat?

ULLUMIKKUT Guutip inatsisaanut naalanneq nuannarineqarpallaanngilaq. Inuppassuit isumaqarput takussaanngitsumut oqartussaasumut qutsissumut naalanneq iluaqutaanavianngitsoq. Anersaakkut inooriaatsip naleerukkiartorfiani inuuvugut, suup ajunngitsuunera suullu ajortuunera immikkoortikkuminaatsinneqarlutik. (Ussatit 17:15; Esaja 5:20) Qanittukkut isumasiuinermi takutinneqarpoq ’Amerikamiut amerlanersaasa suup eqqortuunera, ajunngitsuuneralu siunertaqarluartuuneralu’ namminneq aalajangerusukkaat, taamatullu isiginnittaaseqarneq nunani amerlasuuni nalinginnaavoq. Amerlanerit „maleruutiasumik aalajangersimasunik inatsiseqanngitsumik Guuteqarusunnerupput. Ileqqussatigut allatigulluunniit Guutimik naalagaqarusunngillat“. Inuiaqatigiilerinermik ilisimatooq oqarsimavoq ullumikkut „ilimagineqartartoq inuup assuarnaalluni ileqqorissaarlunilu inuuneq qanoq paasisariaqarnersoq nammineq aalajangissagaa“. Imalu nangippoq: „Oqartussaasut qutsinnerusut kikkulluunniit inatsisitik inuit atugarisaannut naleqqussartariaqarpaat.“

2. Biibilimi inatsisit eqqartorneqaqqaarnerat Guutimit pilluaqqusaanermut iluarineqarnermullu qanoq attuumassuteqarluinnarpa?

² Inuppassuit Jehovap inatsisaasa iluaqutaanerat apeqqusertarmassuk, Guutip najoqqutassiaasa iluaqutaanerannik qularinninnginnerput nakussatsittariaqarparput. Biibilimi inatsisit eqqartorneqaqqaarnerat immikkut soqutiginaateqarpoq. Mosesimik allakkat siulliit 26:5-imi Guuti nalunaarpoq: ’Aaperaap naalappaanga inassutikka, naalakkiutikka, ileqqoreqqusakka inatsisikkalu maleruarlugit.’ Jehova taama oqarpoq Aaperaap kinguaaviisa inatsisinik sukumiisunik ukiunik hundredelikkuutaanik tuninissaat sioqqullugu. Aaperaap Guutimut naalannini inatsisaanullu naalakkusunnini qanoq akilerneqaatigaa? Jehova Guutip ima neriorsorpaa: „Illit kinguaassakkut nunarsuarmi inuiaat tamarmik pilluaqqunarsissapput, naalakkamma.“ (1 Mosesi 22:18) Taamaattumik Guutip inatsisaanut naalanneq Guutimit pilluaqqusaanermut iluarineqarnermullu attuumassuteqarluinnarpoq.

3. (a) Tussiaasiortut ilaata Guutip inatsisai qanoq misigissuseqarfigai? (b) Apeqqutit suut soqutigisariaqarpavut?

³ Tussiaasiortut ilaata — immaqa Judami kunngissap kingusinnerusukkullu kunnginngortup — oqaatsimut inatsimmut attuumassuteqarajunngitsumik misigissuseqarnini ersersippaa. Guutimut ima oqarpoq: „Ilami inatsisitit nuannareqaakka.“ (Tussiaat 119:97) Taamatut oqarneq misigissutsinik oqaatiginninnerinnaanngilaq. Guutip piumasaanik inatsisaani eqqaaneqartunik nuannarinninnini oqaatigaa. Jiisusi Kristusi, Guutip ernera naammalluinnartoq, tamatumunnga assingusumik misigissuseqarpoq. Siulittuummi Jiisusi ima oqarnerarneqarpoq: „Guuti, piumasat malillugu iliornissaq tassa kajungerisara; inatsisitit uanga ilunni ipput.“ (Tussiaat 40:9; Hebræerit 10:9) Uagummi? Guutip piumasaatut  iliorneq kajungeraarput? Qularinngivipparput Jehovap inatsisai atoriaannaallutillu iluaqutaasut? Pallorfiginninnitsinni, ulluinnarni inuunitsinni, allanullu attaveqarnitsinni aalajangigassaqaraangattalu Guutip inatsisaanut naalanneq qanoq pingaaruteqartigaa? Guutip inatsisai kajungerissagutsigik, paasisariaqarparput sooq Guuti inatsisiliorsinnaatitaallunilu inatsisinik unioqqutitsaalisitsisussaatitaasoq.

Jehova — Inatsisiliortussavik

4. Sooq Jehova inatsisiliortussaviua qutsinnerpaaq?

⁴ Pinngortitsisuugami Jehova silarsuarmi Inatsisiliortussaviuvoq qutsinnerpaaq. (Saqqummersitat 4:11) Pruffiiti Esaja allappoq: „[Jehova] naalakkersortigaarput.“ (Esaja 33:22) Jehova pinngortitami inatsisiliorsimavoq uumassusilinnut uumassuseqanngitsunullu tamanut. (Jobi 38: 4-38; 39: 1-12; Tussiaat 104:5-19) Inuit Guutimit pinngortitaagamik Jehovap pinngortitami inatsisaanut naalattussaapput. Naallu inuit ileqqussatigut kiffaanngissuseqartitaagaluarlutik namminnerlu eqqarsarsinnaassuseqarlutik, aatsaat Guutip ileqqussatigut anersaakkullu inatsisaanut naalakkunik pilluarsinnaapput. — Romamiut 12:1; 1 Korinthimiut 2:14-16.

5. Qanoq takuneqarsinnaava najoqqutassiaq Galatiamiut 6:7-imi allassimasoq Guutip inatsisaanut atatillugu atortuuttoq?

⁵ Nalunngisatsitut Jehovap pinngortitami inatsisai unioqqutinneqarsinnaanngivipput. (Jeremia 33:20, 21) Inuup pinngortitami inatsisit — soorlu nunarsuup nutsuinera — unioqqutikkunigit kingunera misigingaassavaa. Guutip ileqqussatigut inatsisai aamma taamaapput. Taakku aamma atortuujuartuupput pillarneqaratalu unioqqutissinnaanngilavut. Guutip pinngortitami inatsisaatulli unioqqutitsaalineqassapput, unioqqutitsinerup kinguneri ingerlaannaq malugineqartanngikkaluartut. „Guuti mitaatigeqqunngilaq. Inuup siaruartikkani aamma katersorumaarpai.“ — Galatiamiut 6:7; 1 Timotheusi 5:24.

Guutip inatsisaasa tamatigoortuunerat

6. Guutip inatsisai qanoq tamatigoortigippat?

⁶ Inatsisit Guutimeersut ilaat immikkut ittut tassaapput Mosesip inatsisai. (Romamiut 7:12) Kingusinnerusukkut Jehova Guutip Mosesip inatsisai ’Kristusip inatsisaanik’ taarserpai. * (Galatiamiut 6:2; 1 Korinthimiut 9:21) Kristumiutut ’kiffaanngissutsip inatsisaanut naammalluinnartunut’ naalatsigititaagatta paasivarput Guutip inatsisini inuunermi aalajangersimasunuinnaq atuutitinngikkai, assersuutigalugu upperisarsiornermut tunngatillugu ajoqersuutinut ileqqulersuutinulluunniit. Najoqqutassiai inuunermi atukkanut tamanut atuupput, assersuutigalugu ilaqutariinni pissutsinut, niuernermut tunngasunut, angutit arnanut arnallu angutinut pissusilersornerannut, uppeqatinik isiginnittaatsimut pallorfiginninnermilu ilumoortumi peqataanermut. — Jaaku 1:25, 27.

7. Guutip inatsisaasa pingaaruteqartut ilaannik taasaqarit.

⁷ Assersuutigalugu Biibilimi allassimavoq: „Kinguaassiuutitigut inuunerluttut guutipilussiortulluunniit, allasiortut anguteqatiminnoortartulluunniit, tillittut piumatuulluunniit, imerajuttut mitaatilliisulluunniit piiaasulluunniit Guutip naalagaaffia kingornussarsiarissanngilaat.“ (1 Korinthimiut 6:9, 10) Allasiorneq kinguaassiuutitigullu kanngunartuliorneq „aapparinngisamik atoqateqarnerinnaanngilaq“. Anguteqatinoortarneq arnaqatinoortarnerlu tassaaginnanngillat „inooriaaseq alla“. Taamaaliorneq Guutip inatsisaanik unioqqutitsineruvoq. Tillinneq, salluneq mamarliinerlu aamma taamaapput. (Tussiaat 101:5; Kolossemiut 3:9; 1 Petrusi 4:15) Jaakup usorsitsaarneq avoqqaaraa, Paulusillu siunnersorpaatigut sianiitsunik quiasaarnipalaanillu oqaluttaqqunata. (Efesosimiut 5:4; Jaaku 4:16) Kristumiunut maleruagassiat taakku tamarmik Guutip inatsisaanut naammalluinnartunut ilaapput. — Tussiaat 19:8.

8. (a) Guutip inatsisai qanoq oqaatigineqarsinnaappat? (b) Hebræerit oqaaseq „inatsimmut“ tunngavigisaat qanoq isumaqarpa?

⁸ Guutip oqaasiani aalajangersakkat tunngaviusut taamaattut takutippaat inatsisai tassaaginnanngitsut inatsisit inuppalaanngitsut akueriinnagassat . Inatsisai inuunermi oqimaaqatigiissaarinissamut tunngaviliipput, pissusilersornerit tamarmik ajunngitsumik sunnerneqaatigisaannik. Guutip inatsisai ineriartornartuupput, ileqqulersuutitigut eqqortuullutik ilinniutaallutillu. (Tussiaat 119:72)  Oqaaseq „inatsit“ tussiaasiortup uani atugaa Hebræerit oqaasiannit tōrahʹ-mit nutserneqarpoq. Biibilimik misissueqqissaartartoq oqarpoq: „Oqaatsip nagguia tassaavoq oqaluut isumaqartoq siulersuivoq, siunnersuivoq, umerpoq, igippoq. Taamaattumik oqaaseq isumaqarpoq inuit qanoq ileqqoqarnissaannik siunnersuineq, najoqqutassiuineq.“ Tussiaasiortup inatsisit tunissutitut Guutimeersutut isigai. Uaguttaaq taassumatut pingaartitsigisariaqannginnerpavut inuunitsinnullu sunniuteqartingaartariaqannginnerlugit?

9, 10. (a) Sooq ilumoortumik siunnersorneqarnissarput pisariaqartipparput? (b) Nalerisimaarluni pilluarlunilu inuunissamut suna aqqutissatuaava?

⁹ Pinngortitat tamarmik ilumoortumik tatiginartumillu siunnersorneqarnissartik pisariaqartittarpaat. Taamaapputtaaq Jiisusi inngilillu, inunnit qutsinnerusut. (Tussiaat 8:6; Johannesi 5:30; 6:38; Hebræerit 2:7; Saqqummersitat 22:8, 9) Pinngortitat naammalluinnartut taakkua Guutip siunnersuinera iluaqutigisinnaappassuk, inuit naammalluinnanngitsut iluaqutiginerungaassannginnerpaat? Inuit oqaluttuarisaanerata namminerlu misilittakkatta takutippaat pruffiiti Jeremia ilumoortoq oqarami: „Nalunngilara, [Jehova], inuup ingerlavissani nammineq aalajangigassarinngikkaa, angalaartup aalajangigassarinngilaa allorarnermi aalajaatsuutinnissaat.“ — Jeremia 10:23.

¹⁰ Nalerisimaarluta pilluarlutalu inoorusukkutta Guutimit siulersortittariaqarpugut. Nammineq najoqqutassiat malillugit inuunerup Guutimillu siulersorneqarani inuunerup navianaatai kunngi Salomop paasisimavai. Oqarpoq: „Ingerlavik inuup eqqortuusorisaralua tassaasinnaavoq toqumut aqqutaasoq.“ — Ussatit 14:12.

Jehovap inatsisaanik nuannarinninnissamut pissutaasut

11. Sooq Jehovap inatsisai paaserusuttariaqarpavut?

¹¹ Jehovap inatsisaanik paasiniaaqqissaarnerunissamik kissaateqangaarnissarput silatusaarneruvoq. Tussiaasiortup taama paasisaqarusungaarnini ima oqaatigaa: „Isikka uisikkit, takoqqullugit tupinnartut inatsisinni ittut.“ (Tussiaat 119:18) Jehova aqqutigeqqusaalu paasinerujartortillugit, Esajap oqaasiisa ilumoornerat paasinerujartussavarputtaaq: „Uanga tassa [Jehova], Guutit, iluaqutaasunik ilinnik ajoqersuisoq, illit ingerlavigisassakkut ingerlatitsisoq. Ilumulli inassutikka tusaaniarsimagaluarukkit.“ (Esaja 48:17, 18) Jehovap kissaatigilluinnarpaa innuttami ajutuunnginnissaat inatsisiminillu eqqumaffiginninnermikkut inuunermik nuannaarutiginninnissaat. Guutip inatsisaanik nuannarinnittariaqarnitsinnut pissutaasut pingaarnerit ilaat misissoriartigik.

12. Sooq Jehova uatsinnut Inatsisiliortuua pitsaanerpaaq?

¹² Guutip inatsisai uatsinnik ilisarisimanninnerpaamit pipput. Jehova Pinngortitsisigaarput. Taamaattumik allanit tamanit nalunnginneruaatigut. (Tussiaat 139:1, 2; Apustilit Suliaat 17:24-28) Ikinngutinnaatta, eqqarlitta, aap, allaat angajoqqaatta  Jehovatut nalunngitsiginngilaatigut. Allaat imminut nalunnginnitsinnit nalunngineruvaatigut. Pinngortitsisoq anersaakkut, misigissutsikkut, eqqarsartaatsikkut timikkullu sunik pisariaqartitaqarnitsinnik asseqanngitsumik paasinnittuuvoq. Maluginiaraangamisigut inuttut pissusivut, kissaatigisavut neriugisavullu paasilluinnartarpai. Jehovap pisinnaasatta killeqarnerat nalunngilaa, aammali nalunngilaa ajunngitsumik naammassisaqarsinnaasugut. Tussiaasiortoq oqarpoq: „Nalunngilaami pinngortitaasugut, eqqaamavaa pujualaasugut.“ (Tussiaat 103:14) Taamaattumik anersaakkut toqqissisimavugut Guutip inatsisai maleruarniarsarigatsigik kajumillutalu taassuma siunnersuineranut naalatsigitilluta. — Ussatit 3:19-26.

13. Uagutsinnut suut pitsaanerunersut Jehovap soqutigilluinnarai sooq tatigisinnaavarput?

¹³ Guutip asagamisigut inatsisiliuussimavaatigut. Jehovap naassaanngitsumik ingerlalluarnissarput soqutigilluinarpaa. Ernini ’akissatut tunniukkamiuk amerlasuut utertinneqaatissaattut’ akisunaanngilaa? (Matthæusi 20:28) Neriorsunnginnerpaatigut ’artukkatsinnik usserneqarnissarput akuersaarumanagu’? (1 Korinthimiut 10:13) Biibilimi erseqqissarneqarpoq ’isumassoraatigut’? (1 Petrusi 5:7) Jehovap soqutiginninneratut allanit taama asaneqartigalutalu soqutigineqartiginngilagut, taassumalu inuiaat tamaasa iluaqutaasunik najoqqutassaqartippai. Nalunngilaa uagutsinnut suut pitsaanerunersut, suna aliasunnarnersoq pilluarnarnersorlu nalunagu. Naapertuilluassuseq noqqaassutigigutsigu asassavaatigut inuuneqaatissatsinnik pilluaatissatsinnillu, naak naammalluinnanngitsuullutalu kukusaraluartugut. — Ezekieli 33:11.

14. Guutip inatsisai pingaartutigut sutigut inuit najoqqutassiaannit allaaneruppat?

¹⁴ Guutip inatsisai allanngujuitsuummata toqqissisimanaqaaq. Ulluni eqqissiviilliornartuni makkunani Jehova qaarsutut aalajaatsutut ippoq. Naassaanngilluinnartumik Guutiuvoq. (Tussiaat 90:2) Imminut ima oqaatigaaq: „Uanga [Jehova] allanngorsimanngilanga ilissili suli Jaakup erneraasi!“ (Malaki 3:6) Guutip najoqqutassiai Biibilimi allassimasut tatiginarluinnartuupput — inuit najoqqutassiaattut allanngorartuartutut innginnamik. (Jaaku 1:17) Assersuutigalugu ukiorpassuarni psykologit maleruutialluni meeqqanik perorsaaneq siunnersuutigisarpaat, kingusinnerusukkulli ilaasa isumartik allanngortippaat nassuerutigalugu kukkusumik siunnersuisarsimallutik. Meeqqanik perorsaaneq eqqarsaatigalugu silarsuarmi matumani siunnersuutit najoqqutassiallu allanngorartuarput. Jehovalli oqaasii aalajaapput. Ukiuni hundredelikkuutaani meeqqanik asannittumik perorsaaneq pillugu Biibilimi siunnersuuteqarpoq. Apustili Paulusi allappoq: „Ilissilu ataatat, qitornasi narrutsatseqinasigik, perorsartuarlugilli Jehovap ileqqoreqqusai oqaaqqissaarutaalu malillugit.“ (Efesosimiut 6:4, NV) Toqqissisimanarpoq nalunagu Jehovap najoqqutassiai tatiginartuusut. Allanngunngisaannassapput!

Guutip inatsisaanut naalattunut pilluaqqussutissat

15, 16. (a) Guutip najoqqutassiai maleruarutsigik qanoq kinguneqassava? (b) Guutip inatsisai aappariittut qanoq pillualersitsisarpat?

¹⁵ Pruffiiti Esaja aqqutigalugu Guuti oqarpoq: „Taama ippoq oqaasera qaninnit anisoq: . . . suliareqqusakka suliarissavai naammasseqqusakkalu naammassissallugit.“ (Esaja 55:11) Aamma qularutissaanngilaq Guutip oqaasiani najoqqutassiat ilumoorluta maleruarniartarutsigik inuunitsinni iluatsitsissasugut, pingaarutilinnik suliaqassasugut pilluassasugullu.

¹⁶ Eqqarsaatigiuk Guutip inatsisaani siunnersuutit pitsaasut aappariittut qanoq pillualersikkaatigut. Apustili Paulusi allappoq: „Aappariinneq tamani ataqqisassaatinneqarli aappariillu innarfiat minguitsuutinneqarli, Guutip kanngunartuliortut allasiortullu eqqartuukkumaarmagit.“ (Hebræerit 13:4, NV) Aappariit imminnut asallutillu ataqqissapput: „Tamassi immikkut nuliasi immissisut asasussaavasi, nuliaasullu uini mianerisussaavaa.“ (Efesosimiut 5:33) Asanninneq tamanna Korinthimiunut allakkani siullerni 13:4-8-mi ima  oqaatigineqarpoq: „Asanninneq kamagittartuuvoq, asanninneq saamasuuvoq, asanninneq sinngasarinngilaq; pingaakujuttarnanilu perroortarinngilaq. Kanngunartuliortarinngilaq, namminissarsiortarinngilaq; puffassartarinngilaq puttarsisaqartarnanilu. Iluaanneq nuannarisarinagu sallusuissut tipaatsuutigisarpaa. Tamatigut naammagittartuuvoq, tamatigut uppertarpoq, tamatigut neriuttarpoq, tamatigut ilalaartarpoq. Asanninneq soraanngisaannassaaq.“ Aappariit taamatut asaqatigiikkunik iluatsinngitsuussanngillat.

17. Imigassaq pillugu Jehovap najoqqutassiai sutigut iluaqutissartaqarpat?

¹⁷ Jehovap najoqqutassiaasa iluaqutaanerannut uppernarsaatit ilagaat imerajunnermik assuarinninnera. ’Viinnisorajunnerinnarluunniit’ iluarinngilaa. (1 Timotheusi 3:3, 8; Romamiut 13:13) Inuppassuit tamatumunnga atatillugu Guutip najoqqutassiaanik maleruaajumanngitsut imerajunnermik nappaateqarput, imaluunniit nappaataat ajorsiartorsimapput. Ilaasa ingasaassinaveersaarneq pillugu Biibilimi kajumissaarutigineqartoq sumiginnarpaat imerujoornerlu ileqquliutiinnarlugu ’qasuernarmat’. Imerpallaarneq ajornartorsiuterpassuaqalersitsisinnaavoq. Allat imerajuttoq ataqqiunnaassavaat, ilaqutariit artorsaatissinneqarsinnaallutik, ilaqutariillu allaat avissaartuussinnaallutik, aningaasarsiat nungulussinnarneqarsinnaallutik, immaqalu imerajuttoq suliffissaarussinnaalluni. Imigassaq pillugu Jehovap najoqqutassiai uagutsinnut illersuutaanngillat?

18. Aningaasanut tunngatillugu Guutip inatsisai aamma atoriaannaappat? Nassuiaruk.

¹⁸ Aningaasat tungaatigut Guutip najoqqutassiai aamma atoriaannaasut paasinarpoq. Biibilimi kristumiut unneqqarissooqqullugit eqiasuitsooqqullugillu kajumissaarneqarput. (Lukasi 16:10; Efesosimiut 4:28; Kolossemiut 3:23) Kristumiut amerlasuut  siunnersuut tamanna maleruaramikku suliffimminni qaffatsitaasimapput, imaluunniit allat soraarsitaasut soraarsitaanngillat. Inuk ileqqunik Biibilimut naapertuutinngitsunik ingalassimannikkaangami aningaasanoornermik, pujortarnermik ikiaroornartutornermillu pinngitsuuisinnaajunnaanngitsoortarpoq, aamma aningaasat tungaatigut iluaqutigisarpaa. Qularnanngitsumik Guutip najoqqutassiaasa silatusaartuunerannik atoriaannaanerannillu assersuutinik allanik nammineq eqqaasaqarsinnaavutit.

19, 20. Sooq Guutip najoqqutassiaasa maleruarnissaat aalajangiunnissaallu silatusaarnerua?

¹⁹ Inuit naammalluinnanngitsut Guutip inatsisaanik najoqqutassiaanillu maleruaajunnaariartuaarsinnaapput. Israelikkut Sinajip Qaqqaaniinnerat eqqarsaatigeriaruk. Guutip oqarfigai: „Naalakkussinga angeruseralu aalajangiullugu inuiaqatigiinnit tamanit immikkoortillusi pigisassarsiariumaarpassi, nunarsuaq tamaat uanga pigigakku.“ Inuit akipput: „[Jehovap] oqaasii tamaasa malillugit iliorumavugut.“ Toraagassaminnilli toqqaanerat allamik takutitsivoq. (2 Mosesi 19:5, 8; Tussiaat 106:12-43) Israeilikkut assiginagit, Guutip najoqqutassiaanik maleruaanissaq akueriinnarnagu aalajangiuttariaqarparput.

²⁰ Ilisimassuseqalissagutta pillualissaguttalu, Guutip inatsisai nalissaqanngitsut inuunitsinni najoqqutassiai aalajangiuttariaqarpavut. (Tussiaat 19:8-12) Taamaaliussagutta Guutip najoqqutassiaasa pingaaruteqassusiat akuerisariaqarparput. Tamanna allaaserisami tulliuttumi sammineqarpoq.

[Quppernerup ataani ilanngussaq]

Uku eqqaamavigit?

• Sooq tatigisinnaavarput Guutip inatsisai uagutsinnut iluaqutaasut?

• Suut pissutigalugit Jehovap inatsisai nuannarisariaqarpavut?

• Guutip inatsisai qanoq iluaqutigisarpavut?

[Atuaqqissaarnermi apeqqutit]

[Qupp. 21-mi assiliartaq]

Aaperaat pilluaqquneqangaarpoq Jehovap inatsisaanut naalakkami

[Qupp. 23-mi assiliartaq]

Ulluinnarni isumakuluutinit inuppassuit Guutip inatsisaanit allamut saatsinneqartarput

[Qupp. 25-mi assiliartaq]

Qaarsumi naaralaartitsivittut Guutip inatsisai aalajaallutillu allanngujuipput