Guutip najoqqutassiaanit siulersortigit
Guutip najoqqutassiaanit siulersortigit
„[Jehova], iluaqutaasunik ilinnik ajoqersuisoq.“ — ESAJA 48:17.
1. Pinngortitsisup qanoq siulersortarpaatigut?
MISISSUEQQISSAARTARTUT silarsuup isertugaataanik paasiniaaniarsarisut silarsuarmi nukipparujussuaqarnera tupigusuutigaat. Seqinerput — ulloriaq akunnattumik angissusilik — „sekundimut brintimik qaartartuliat 100 milliardillit qaartarnerattut“ nukiliortarpoq. Pinngortitsisup pissaanerinnarminik ulloriarsuit aqussinnaallugillu nakkutigisinnaavai. (Jobi 38:32; Esaja 40:26) Inuimmi? Guutip piumasatsinnik iliorsinnaatippaatigut, ileqqussatigut sianissuseqartilluta, eqqarsarsinnaassuseqartilluta anersaakkullu ittunik paasisaqarsinnaatilluta. Pinngortitsisorput qanoq siulersorniarluta aalajangersimava? Inatsisini naammalluinnartut, najoqqutassiani qutsissut nalunngeqatiginnissuserpullu ajoqersugaalluartoq atorlugit asannittumik siulersuisarpoq. — 2 Samueli 22:31; Romamiut 2:14, 15.
2, 3. Naalanneq qanoq ittoq Guutip nuannaarutigaa?
2 Pinngortitat silasorissut imminut naalakkumallutik aalajangeraangata Guutip nuannaarutigisarpaa. (Ussatit 27:11) Jehovap robottitut eqqarsarsinnaanngitsutut imminut naalalluinnartussatut pinngortinnata, paasisutissat naleqqutut tunngavigalugit eqqortumik iliornissatsinnik nammineq aalajangiisinnaatillutalu piumasamik iliorsinnaatippaatigut. — Hebræerit 5:14.
3 Jiisusi, Ataataminik naammalluinnartumik ilisarititsisoq, ajoqersukkaminut oqarpoq: „Inassutikka malillugit iliorussi tassaassaasi ikinngutikka. Kiffamik taasarunnaarpassi.“ (Johannesi 15:14, 15) Itsaq inussiat kiffalluunniit naalakkaminnut naalattussaannaapput. Tamatumali akerlianik allap uummataata iluarisaanik pissuseqaraanni ikinngutigiinneq ineriartortinneqartarpoq. Jehovamut ikinngutaalersinnaavugut. (Jaaku 2:23) Ikinngutigiinneq taama ittoq asaqatigiinnikkut nakussatsinneqartarpoq. Jiisusip Guutimut naalanneq asanninnermut atassuteqartippaa oqarami: „Uannik asannittup oqaatsikka aalajangiutissavai, taannalu Ataatama asassavaa.“ (Johannesi 14:23) Tamanna pissutigalugu — Jehovap aamma toqqissisimatilluta siulersorumagamitigut — kajumissaarpaatigut inuunitsinni najoqqutassiani maleruaqqullugit.
Guutip najoqqutassiai
4. Najoqqutassiaq qanoq nassuiarneqarsinnaava?
4 Najoqqutassiaq sunaava? Najoqqutassiaq ima nassuiarneqarsinnaavoq: „Ilumoortoq tamanut tunngasoq imaluunniit tunngaviusoq; inatsit tamatigut atuuttoq imaluunniit tunngaviusoq, isuma pingaarnerusoq inatsisinut allanut tunngaviusoq imaluunniit inatsisinut allanut nagguiusoq“. (Webster’s Third New International Dictionary) Biibilimik atuaqqissaarnerup takutippaa Ataatatta qilammiusup maleruaqqusaanik tunngaviusunik inuunermi assigiinngitsorpassuartigut iluaqutigineqarsinnaasunik tunisimagaatigut. Taamaaliorsimavoq naassaanngitsumik inuulluarnissarput siunertaralugu, kunngi ilisimatuup Salomop allagaanut naapertuuttumik: „Tusaagit, ernera, oqaatsikka ilassiniakkit, taava ukiorpassuarni inuussaatit. Ilisimassutsip aqqutaanik ajoqersuutissavakkit peqqusersuissutsip ingerlaviisigut ingerlatillutit.“ (Ussatit 4:10, 11) Jehovap uatsinnut najoqqutassiai tunngaviusut taassumunnga inoqatitsinnullu attaveqarnitsinnut, pallorfiginninnitsinnut ulluinnarnilu inuunitsinnut pingaaruteqarput. (Tussiaat 1:1) Najoqqutassiat tunngaviusut taakkua ilaat misissoriartigik.
5. Najoqqutassiat tunngaviusut ilaannik taasaqarit.
5 Jehovamut attaveqarnerput pillugu Jiisusi oqarpoq: „[Jehova] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.“ (Matthæusi 22:37) Guutip aamma inoqatitsinnut attaveqarneq pillugu najoqqutassippaatigut, soorlu Maleruagassiaq Atortuujuaannartoq: „Taamaattumik: Inunnut qanorluunniit iliorfigeqqugussi ilississaaq taamatut iliorfigisigit.“ (Matthæusi 7:12; Galatiamiut 6:10; Titusi 3:2) Guutisiornerput eqqarsaatigalugu ima oqaaqqissarneqarpugut: „Immitsinnut isumageqatigiinniarta asaqatigiinnermut ajunngitsuliornermullu kajumissaaqatigiittarluta, ilagiittut katisimasarnivut tamatigut peqataanngitsoorfigisarnatigit.“ (Hebræerit 10:24, 25) Ulluinnarni inuunerput pillugu Paulusi oqarpoq: „Nerigussi imerussiluunniit qanorluunniillu iliorlusi taamaaliussaasi Guutip ataqqinaatissaanik.“ (1 Korinthimiut 10:31) Guutip oqaasiani allanik najoqqutassiarpassuaqarpoq.
6. Najoqqutassiat qanoq inatsisinit allaaneruppat?
6 Najoqqutassiat tassaapput sallusuissutit tunngaviusut atoriaannaasut, kristumiullu ilisimassusillit tamakku nuannarilissavaat. Jehovap kunngi Salomo isumassarsisillugu allatsippaa: „Oqaatsikka naalaarniakkit, siutitit manillugit oqaasissakka tusaaniakkit! Aanngaanaveersaarniakkit uummatinnilu paaralugit! Tamakkumi nanisisiminnut inuussutaapput timimullu tamarmut peqqissaataallutik.“ (Ussatit 4:20-22) Najoqqutassiat qanoq inatsisinit allaaneruppat? Inatsisit najoqqutassianik tunngaveqarput. Inatsisit maleruaqqusallu, aalajangersimasuugajuttut, pissutsinut piffissanulluunniit immikkut ittunut tunngasinnaapput, najoqqutassialli atortuujuartuupput. (Tussiaat 119:111) Guutip najoqqutassiai pisoqalinngisaannarlutillu atorunnaanngissaannarput. Pruffiitip Esajap isumassarsisitaalluni oqaasii ilumoorput: „Ivikkat panertarput naasullu toqusarlutik, Guutittali oqaasia naassaanngitsumik atassaaq.“ — Esaja 40:8.
Eqqarsaatitit iliuutsitillu najoqqutassianik tunngaveqartikkit
7. Najoqqutassianik tunngaveqarluta eqqarsassasugut iliuuseqassasugullu Guutip oqaasiani qanoq kajumissaarneqarpugut?
7 ’Guutitta oqaasiani’ kajumissaarneqartuarpugut najoqqutassianik tunngaveqarluta eqqarsassasugut iliuuseqassasugullu. Jiisusi Inatsisinik pingaarnersiueqquneqarami, oqaaseqatigiit naatsut marluk oqaatigai. Oqaaseqatigiinni siullerni Jehovamut asanninneq pingaartinneqarpoq, oqaaseqatigiillu aappaanni tullermut asanninneq pingaartinneqarluni. (Mattæusi 22:37-40) Taamaalilluni Jiisusip Mosesip inatsisaani ajoqersuutit pingaarnerit Mosesimik allakkat tallimaanni 6:4, 5-imi allassimasut issuarpai: „[Jehova] Guuterput, [Jehova] ataasiuvoq. Taamaattumik [Jehova] Guutit asassavat uummatikkut iluunngarlutit tarnikkullu iluunngarlutit nukitillu tamakkerlugit.“ Jiisusip Guutip aalajangersagai Mosesimik allakkat pingajuini 19:18-imi allassimasut eqqarsaatigigunarpai. Oqaluussisartup oqaasii naatsumik, ersarissumik sunniilluartumillu naggaserlugit kunngi Salomop Guutip inatsisaasa ilarpassui ataatsimut eqikkarpai: „Tamaasa tusareerukkit ima ataatsimut katinneqartissavatit: Guuti mianeruuk inatsisaalu maleruarlugit, inuit tamarmik taamaaliortussaapput! Guutimmi akisussaatissavaatit qanoq iliorninnut tamarluinnarnut, isertortunut tamanut, ajunngitsunut ajortunulluunniit.“ — Oqaluussisartup oqaasii 12:13, 14; Mika 6:8.
8. Biibilimi najoqqutassianik tunngaviusunik paasinnilluarneq sooq illersuutigissavarput?
8 Najoqqutassiat tunngaviusut taamaattut paasilluasimagutsigik, maleruagassat aalajangersimasut paasinissaannut maleruarnissaannullu iluaqutigisinnaavarput. Najoqqutassiat tunngaviusut paasilluarsimanngikkutsigik akuerinagillu, immaqa sianiilliorluta aalajangersinnaavugut, uppernitsigullu nakimalersinnaalluta. (Efesosimiut 4:14) Najoqqutassiat taamaattut isummatsinni uummatitsinnilu aalajangiussinnaagutsigik, aalajangigassaqaraangatta atoriaannaassavavut. Silatusaarluta atortarutsigik iluaqutigingaassavavut. — Josva 1:8; Ussatit 4:1-9.
9. Biibilimi najoqqutassianik eqqumaffiginninneq maleruaanerlu sooq tamatigut oqitsuusanngila?
9 Biibilimi najoqqutassianik eqqumaffiginninneq maleruaanerlu inatsisinik maleruaanertut oqitsiginngilaq. Inuttut naammalluinnanngitsutut najoqqutassiat naapertorlugit aalajangiinissarput immaqa ilungersuutigerusuttanngilarput. Nalornisooraangatta aalajangigassaqaraangattaluunniit, ajornannginnerusumik immaqa aaqqiissutissarsiorusunnerusarpugut, tassa maleruagassamik aalajangersimasumik maleruaarusunnerulluta. Ilaannikkut kristumiu inersimalluartoq — assersuutigalugu ilagiinni utoqqaanertaq — siunnersortissarsiarisarparput, ilimagalugu maleruagassaq aalajangersimasoq atorsinnaasarput innersuussutigissagaa. Immaqali Biibilimi atuagassianilu Biibililersaarutini taama ittumik maleruagassaqanngilaq, naallu maleruagassaqaraluartoq, immaqa tamatigut pissutsinilu tamani atorneqarsinnaanngilaq. Eqqaamassagunarpat inuppassuit ilaata Jiisusi oqarfigigaa: „Ajoqersuisoq, qatanngutiga oqarfigiuk kingornussassatsinnik aviffigissagaanga.“ Jiisusili angutip taassuma qatanngutaatalu isumaqatigiinngissutaannut aaqqiissutaasinnaasumik inatsisiliupallaannarnani najoqqutassiaq qutsinnerusoq issuarpaa: „Sissueritsi mianersorlusilu piumatussusermut sumulluunniit.“ Jiisusip angut najoqqutassippaa pisumi tassani atorsinnaasaanik, najoqqutassiarlu taanna ullumikkut suli taama atoriaannaatigaaq. — Lukasi 12:13-15.
10. Guutip najoqqutassiaanit siulersortinnerput qamuuna pissutiginiakkatta suunerannik qanoq takutitsiva?
10 Nalunngisaqarunarputit inatsisinik maleruaasunik, kajuminnatilli taamaaliortunik pillarneqarnissartik qunugiinnarlugu. Najoqqutassianik ataqqinninnerup taamatut isiginnittaaseqarnaveersaartissavaatigut. Najoqqutassiaq paasisimagaanni maleruaanissaq aamma pissusissamisuussaaq. Najoqqutassiamik sumiginnaaneq amerlanertigut ingerlaannaq pillarneqaataasanngilaq. Taamaattumik periarfissinneqarpugut sooq Jehovamut naalannersugut, qamuuna pissutiginiakkatta suunerannik, takutitsinissatsinnut. Assersuutigeriartigu Josefi Potifarip nulianik ileqqorlulluni qaninniartumik itigartitsisoq. Naak Jehovap innuttani suli allassimasunik allasiunnginnissamik inatsiseqartinngikkaluarai, allallu nulianik kinguaassiuutitigut atoqateqartup qanoq pillarneqarnissaanik ilisimatitsinngikkaluartoq, Jehovap aappariit ilumoorfigeqatigiinnissaannut najoqqutassiai Josefip nalunngilai. (1 Mosesi 2:24; 12:18-20) Josefip qisuariarnerata takutippaa najoqqutassiat tamakku maleruaqqissaarusukkai: „Qanoq taama kanngunartigisumik iliussaanga Guutimut ajortuliorlunga?“ — 1 Mosesi 39:9.
11. Sutigut kristumiut Jehovap najoqqutassiaanit siulersortikkusuppat?
11 Ullumikkut kristumiut imminnut tunngasuni, soorlu ilagisartakkanik, aliikkutassanik, nipilersukkanik atuagassanillu qinersinermi, Jehovap najoqqutassiaanit siulersortikkusupput. (1 Korinthimiut 15:33; Filippimiut 4:8) Jehovamik najoqqutassiaanillu ilisimasaqarnerujartortilluta, paasisaqarnerujartortilluta pingaartitsinerujartortillutalu, nalunngeqatiginnissusitta ileqqussatigullu sianissusitta qanorluunniit pisoqassagaluarpat Biibilimi najoqqutassianik maleruaatissavaatigut, aamma immitsinnut tunngalluinnartuni. Biibilimi najoqqutassianit siulersortikkutta Guutip inatsisaani maleruaanngitsoorfissamik ujaasissanngilagut. Aamma inatsimmik aalajangersimasumik unioqqutitsinngikkaluarlutik qanoq ’sinerpartertigisinnaanerlutik’ misileraasut ilaarnavianngilavut. Paasivarput taamatut isiginnittaaseqarneq navianarlunilu ajoqutaasoq. — Jaaku 1:22-25.
12. Guutip najoqqutassiaanik maleruaanissamut suna aalajangiisuulluinnarpa?
12 Kristumiut inersimalluartut nalunngilaat Jehovatut isiginnittaaseqarusussuseq najoqqutassiaanik maleruaarusunnermut aalajangiisuulluinnartoq. Tussiaasiortup ima kajumissaarpaatigut: „Ilissi [Jehovamik] asannittusi ajortoq umigissavarsi.“ (Tussiaat 97:10) Ussatit 6:16-19-imi Guutip ajortuuneragaasa ilai eqqaaneqarput: „Arfiniliusut [Jehovap] uumigai, arfineq-marluusut qinngarsugarai: Isit makitarpaluttut, oqaq sallutooq, assaat pinngitsup aavanik kuisisut, uummat pilersaarutipiloqartoq, isikkat tuaviusukaartut siunertaralugu ajortussaq, sallulluni nalunaajaasoq qatanngutigiinnillu saqitsaatilersitsisoq.“ Jehovap tunngaviusunut tamaattunut isiginnittaasiatut isiginnittaaseqarusunnerup inuunerput sunnerpagu, najoqqutassiat naapertorlugit inuujuassaagut. — Jeremia 22:16.
Ajunngitsumik pissutiginiagaqarneq pisariaqarpoq
13. Eqqarsartaaseq qanoq ittoq Jiisusip qaqqami oqaluutsimini innersuussutigaa?
13 Guutip najoqqutassiai ilisimallugillu maleruartarutsigik pallorfiginninnerput imaqanngitsunngortinnaveersaassavaa qeratasuunngortinnaveersaassallugulu. Najoqqutassianit siulersortinneq inatsisinillu maleruaaqqissaarniarneq, tassa inatsisit oqaasertaannik pingaartitsivallaarneq, assigiinngitsorujussuupput. Tamanna Jiisusip qaqqami oqaluusaani erseqqippoq. (Matthæusi 5:17-48) Eqqaamajuk tusarnaartui tassaasut juutit Mosesip inatsisaanik maleruaasariaqaraluartut. Inatsisinulli eqqunngitsumik isiginnittaaseqarput. Inatsisit oqaasertaat anersaavannit pingaartinneruaat. Ileqqutoqqatik Guutip oqaasiini ajoqersuutigineqartunit pingaartinneruaat. (Matthæusi 12:9-12; 15:1-9) Taamaattumik inuit najoqqutassiat tunngavigalugit eqqarsarnissaminnut ajoqersorneqanngillat.
14. Jiisusip tusarnaartini najoqqutassianit tunngaveqarlutik eqqarsarnissaannut qanoq ikiorpai?
14 Tamatuma akerlianik Jiisusi qaqqami oqaluutsimini ileqqussanut tunngasut assigiinngitsut tallimat pillugit najoqqutassiivoq: kamanneq, aappariinneq avinnerlu, neriorsuutit, akiniaaneq, asanninneq uumissuinerlu pillugit. Taakkununnga najoqqutassianik maleruaaneq qanoq iluaqutaatigisoq Jiisusip takutippaa. Taamaalilluni Jiisusip ajoqersukkami ileqqussatigut najoqqutassiaat qutsinnerulersippai. Assersuutigalugu allasiorneq pillugu najoqqutassiaa eqqunngitsuliunnginnissamut illersuutaaginnanngilaq, aammali eqqarsaatinut kissaatinullu eqqunngitsunut illersuutaavoq: „Kialuunniit allap nulia pilerigalugu isigiguniuk taanna uummatimigut allasiorfigereerpaa.“ — Matthæusi 5:28.
15. Inatsisit oqaasertaannik pingaartitsivallaarneq qanoq pinngitsoortissinnaavarput?
15 Assersuutip tamatuma takutippaa eqqarsaatigiuartariaqaripput Guutip najoqqutassiaasa siunertaat anersaavallu suunersut. Isumaqassanngilagut ileqqussatigut najoqqutassiat qallikkuinnaq maleruarutsigik Guutimit iluarisaasinnaalluta. Guutip nallittuinera asanninneralu erseqqissaramigit isiginnittaaseq taamaattoq salloqittaanerusoq Jiisusip qulaarpaa. (Matthæusi 12:7; Lukasi 6:1-11) Biibilimi najoqqutassianik maleruaagaangatta, Biibilimi ajoqersuutigineqanngitsunik, soqqusaanitsinnik soqqusaannginnitsinnillu inatsinik ingasaassisunik qeratasuunillu maleruaanissamut pisussaasutut misigisanngilagut — allanilluunniit tatisiniartarnata. Guutimut asanninnermut naalannermullu atatillugu najoqqutassiat qallikkuinnaq pallorfiginninnermit soqutiginerussavavut. — Lukasi 11:42.
Iluaqutaasut
16. Najoqqutassiat Biibilimi inatsisinut tunngaviusut ilaannik taasaqarit.
16 Jehovamut naalanniarnitsinni inatsisai najoqqutassianik tunngaviusunik tunngaveqartut paasissallugu pingaaruteqarpoq. Assersuutigalugu kristumiut guutipilussiussanngillat, kinguaassiuutitigut inuunerlussanngillat aammillu atornerluissanatik. (Apustilit Suliaat 15:28, 29) Tamakkuninnga kristumiut aalajangiusimanninnerat sumik tunngaveqarpa? Guuti tunniusimalluinnarfigisariaqarparput; aapparput ilumoorfigisariaqarparput, Jehovalu Inuunermik tunisisuuvoq. (1 Mosesi 2:24; 2 Mosesi 20:5; Tussiaat 36:10) Najoqqutassianik tunngaviusunik paasinnikkaangatta inatsisit tamakkuninnga tunngaveqartut akueriuminarnerutittarpavut maleruaruminarnerutittarlugillu.
17. Biibilimi najoqqutassiat eqqumaffigigutsigik maleruarlugillu qanoq iluaqutigisinnaavavut?
17 Najoqqutassiat tunngaviusut eqqumaffigigutsigik maleruarlugillu, paasissavarput uagutsinnut iluaqutissaasut. Anersaakkut pilluaqqussutit Guutip innuttaasa nuannaarutigisinnaasaat aamma tigussaasunik pitsaaquteqarajupput. Assersuutigalugu pujortartanngikkaanni, ileqqussatigut minguitsumik inuugaanni aallu illernassusia ataqqigaanni nappaatit ilaat nappaatigineqalinngitsoorsinnaapput. Tamatumunnga assingusumik Biibilimi sallusuissutinut naapertuuttumik inuunerput aningaasatigut, inuttut atugarisatigut ilaqutariinnilu iluaqutigisinnaavarput. Iluaqutaasut tigussaasut taamaattut Jehovap najoqqutassiaasa naleqangaarnerannut atoriaannaanerannullu ersiutaapput. Guutilli najoqqutassiaasa maleruarnerannut pissutiginiagaq pingaarnerusoq tassaannanngilaq tigussaasunik iluaqutissarsiorneq. Kristumiut ilumoortut Jehova naalappaat asagamikku, pisassarimmagu eqqortuliornerummallu. — Saqqummersitat 4:11.
18. Kristumiut pilluarusukkunik sunit siulersortittariaqarpat?
18 Biibilimi najoqqutassianit siulersortikkutta, ajunnginnerusumik inooriaaseqalissaagut, tamannaannarlu allat sallusuissummut kajungerinnilissutigisinnaavaat. Pingaarneruvorli Jehovap ataqqinaatissaanik inuunissarput. Nalunngilarput tassaasoq Guuti asannittoq uatsinnut ajunnginnerpaamik kissaassisoq. Biibilimi najoqqutassianut naapertuuttumik aalajangigaqaraangatta, misigalugulu Jehovap qanoq pilluaqqugaatigut, qaninnerulissavarput. Aap, misigissaagut Ataatatsinnut qilammiusumut asannittumik attaveqarnerput nakussatsinneqaqqittoq. (wE 4/15 02)
Eqqaamavigit?
• Najoqqutassiaq suua?
• Najoqqutassiat inatsisinit qanoq allaaneruppat?
• Najoqqutassiat tunngavigalugit eqqarsarneq iliuuseqarnerlu sooq iluaqutaava?
[Atuaqqissaarnermi apeqqutit]
[Qupp. 28-mi ungalusaq]
Wilson, kristumiu Ghanamiuusoq, nalunaarfigineqarpoq ullualuit qaangiuppata suliffimminit soraarsitaassasoq. Suliffimmini ullormi kingullermi pisortap nammineq biilianik asaaqquneqarpoq. Wilson biilimi aningaasanik nassaarmat naalagaa oqarpoq aningaasat Guutimeersuusimassasut Wilson ulloq taanna suliunnaartussaammat. Wilsonilli peqqusersuinermik Biibilimi najoqqutassiat maleruarlugit aningaasat pisortamut tunniuppai. Pisortap tupigusuttup killinneqaatigingaaramiuk ingerlaannaq Wilson aalajangersimasumik sulilernissaanik neqeroorfigaa suliffimmilu sulisutut sivisunerusumik sulisimasutut qaffatsillugu. — Efesosimiut 4:28.
[Qupp. 29-mi ungalusaq]
Rukia arnaavoq Albaniamiu 60-it sinnerlugit ukiulik. Ilaqutariinni isumaqatigiinngissuteqarneq pissutigalugu anini ukiut 17-it sinnerlugit oqaloqatigisimanngilaa. Jehovap Nalunaajaasui ilagalugit Biibili atuaqqissaartalerpaa paasillugulu kristumiut ilumoortut allanik eqqisseqateqartussaasut puttarsisaqartassanngitsullu. Unnuaq naallugu Guutimut qinoriarluni uummatini kassussuataartoq animi illuanukarpoq. Rukiap soraluaata matu ammarpaa. Soraluaa tupaallalluni Rukia aperaa: „Kina toqugami? Tamaani suit?“ Rukiap anini apeqqutigaa. Eqqissisimalluni nassuiaavoq Biibilimi najoqqutassianik Jehovamillu ilinniarsimanini, animi eqqisseqatiginissaanut kajumississutigalugu. Qiareeramik eqitaareeramillu ataatsimuuleqqinnertik nuannaarutigaat. — Romamiut 12:17, 18.
[Qupp. 31-mi assiliartaq]
[Qupp. 31-mi assiliartaq]
[Qupp. 31-mi assiliartaq]
[Qupp. 31-mi assiliartaq]
„Jiisusip inuit takugamigit qaqqamut majuarpoq ingillunilu, ajoqersugaasalu ornippaat. Taava oqalulerpoq ajoqersorlugillu:“ — Matthæusi 5:1, 2