Nakimaatsumik uummateqarlutit Jehova kiffartorfigiuaruk

„Uummatiga nakimanaveerpoq, Guuti, uummatiga nakimanaveerpoq.“ — Tussiaat 57:8.

1. Sooq Daavitulli qulanngitsigisinnaavugut?

JEHOVAP kiffani tunniulluinnarsimasut upperluartunngortissinnaavai kristumiullu ilumoortut ajoqersuutaannik aalajangiussisimatittuarlugit. (Romamiut 14:4) Taamaattumik Daavitulli qulanngitsigisinnaavugut, taanna ima erinarsorusussimavoq: ’Uummatiga nakinanaveerpoq, Guuti-aa.’ (tugsiaut 108:2) Uummaterput nakimaakkuni tunniulluinnarnitsinnik eqqortitsinissatsinnut kajumissisissavaatigut. Siunnersuutinillu nukissatsinnillu Jehova aallerfigisarutsigu aalajaalluinnarsinnaavugut, assuarnaattuaannarnissarput uppissuseqartuaannarnissarpullu aalajangiusimalluinnarlugit ’tamaviaarluta Naalagaq kiffartuutiitigalugu’. — 1 Korinthimiut 15:58.

2, 3. Korinthimiunut allakkani siullerni 16:13-imi Paulusip kajumissaarutaa qanoq isumaqarpa?

² Apustili Paulusip itsaq Korinthimi Jiisusip ajoqersugai, ullumikkut aamma atorluarsinnaasumik, ima kajumissaarpai: „Eqqumagitsi, uppernissinni aalajaagitsi, angutivittut ilioritsi, nakuugitsilu!“ (1 Korinthimiut 16:13) Grækerit oqaluutaat uani atorneqartoq pisorsiutaavoq inatsiniut taamaalillunilu iliuuseqartuarnissamut kajumissaarutaalluni. Sunaana oqaassutigineqartoq?

³ Anersaakkut ’eqqumasinnaavugut’ Diiaavulu akerartorlugu Guutimullu qanilluta. (Jaaku 4:7, 8) Jehova tatigigutsigu, ataasiussuseqarsinnaavugut ’kristumiutullu uppernitsinni aalajaassinnaalluta’. ’Angutivittut iliorsinnaavugut’ Guutip Naalagaaffianik oqaluussisartutut sapiilluta  Guuti kiffartorfigalugu, akornatsinni arnarpassuit taamaaliorput. (Tussiaat 68:12) ’Nakuussaagut’ Ataatarput qilammiusoq piumassaanik iliorniarluta nukissatsinnik aallerfigiuartarutsigu. — Filippimiut 4:13.

4. Kristumiutut kuisinnginnitsinni susoqarpa?

⁴ Upperisaq ilumoortoq aalajangiupparput Jehovamut tamakkiisumik tunniulluinnaratta tamannalu kuisinnitsigut tamanut takutikkatsigu. Imermulli morsutsitaalluni kuisitsittoqannginnerani susoqartarpa? Siullermik Guutip oqaasia pillugu eqqortumik ilisarsivugut. (Johannesi 17:3) Uppertunngorpugut allamillu isumataarluta, siornatigut ajortuliarisimasatsinnik ilumoorluta peqqissimissutiginnilluta. (Apustilit Suliaat 3:19; Hebræerit 11:6) Iliuuserisaq tulleq tassaavoq saanneq. Saappugut eqqunngitsuliussaarluta Guutillu piumasaanut naapertuuttumik inuulerluta. (Romamiut 12:2; Efesosimiut 4:23, 24) Malitsigaalu Jehovamut qinunikkut uummammik tamakkiisumik tunniulluinnarneq. (Matthæusi 16:24; 1 Petrusi 2:21) Ilerasunnaveerutissatsinnik Guuti qinnuigaarput tassungalu tunniulluinnarnitsinnut assersuutaasumik kuisilluta. (1 Petrusi 3:21) Iliuuserisimasatsinnik tamakkuninnga eqqarsaatiginnittarnerup tunniulluinnarnitsinnik eqqortitsinissatsinnut iliuuseqartittuarsinnaavaatigut nakimaatsumillu uummateqarluta Jehovamut kiffartortuartissinnaalluta.

Eqqortumik ilisarsinerit alliartortittuaruk

5. Ilisarsinerput Biibilimeersoq sooq alliartortittuartariaqarparput?

⁵ Tunniulluinnarnerput eqqortissagutsigu uppernerulissaguttalu Biibilimeersunik ilisarsiniartuartariaqarpugut. Salluisuissut Guutimeersoq ilinniaqqaaleratsigu nuannaringaarlugu anersaakkut nerisarpugut. (Matthæusi 24:45-47) Anersaakkut nerisassaapput mamartut inuussutissartaqarluartut. Jehovap kiffaasut tunniulluinnarsimasutut nakimaatsumik uummateqartuaannassagutta pingaaruteqarpoq peqqinnartunik anersaakkut neriuartarnissarput.

6. Salluissummik Biibilimeersumik qanoq immaqa pingaartitsilersinneqarpit?

⁶ Ilisarsineq Biibilimeersoq alliartortittuarniarlugu iliuuseqartariaqarpoq. Erlinnartunik ujarlernertut ippoq — ilungersortariaqarpoq. ’Guutimik ilisimasaqalerneq’ imminut akilersinnaavoq. (Ussatit 2:1-6) Biibili atuaqqissaartalerakku immaqa atuagaq Ilisarsineq inuunermut naassaanngitsumut sammisoq oqaluussisartorlu atuarparsi. Qularnanngitsumik kapitalit tamaasa sivisuumik sammivasi. Immaqa kapitali ataaserluunniit tamatigut naaneq ajorparsi. Allassimaffiit innersuussutigineqartut atuarneri oqaloqatigiissutiginerilu iluaqutigingaarpatit. Paasiuminaatsoqaraangat nassuiarneqartarput. Ilinnik Biibilimik atuaqqissaaqatiginnittartoq piareersarluartarpoq, Guutip anersaavanik qinnusarluni sallusuissummillu pingaartitsingaalersillutit.

7. Guutip sallusuissutaanik allanik ajoqersuinissannut qanoq piukkunnaateqalersinnaavit?

⁷ Taamaaliorneq ajunngitsuuvoq eqqortuliornerullunilu, Paulusimi allappoq: „Oqaatsimik ajoqersorneqartup ajoqersortini ajunngitsunik tamanik agguaqatigissavaa.“ (Galatiamiut 6:6) Uani Grækerisoornerani paasinarpoq Guutip oqaasiani ajoqersuut „oqaatsimik ajoqersorneqartup“ isumaanut uummataanullu ikkunneqartartoq. Ajoqersorneqaravit illittaaq allanik ajoqersuisinnaalerputit. (Apustilit Suliaat 18:25) Tunniulluinnarnerit ilumooruttuassagukku Guutip  oqaasianik atuaqqissaartuarnikkut anersaakkut peqqissuunerit sernissortariaqarpat uppernikkullu aalajaattuarlutit. — 1 Timotheusi 4:13; Titusi 1:13; 2:2.

Allamik isumataarnerit saannerillu eqqarsaatigisakkit

8. Guutip iluarisaatut qanoq inuujuartoqarsinnaava?

⁸ Sallusuissut ilikkarakku, allamik isumataaravit paasigakkulu Jiisusip utertitsissutitut pilliutaa tunngavigalugu Guutimit isumakkeerfigineqarsinnaallutit oqiliallannerit eqqaamaviuk? (Tussiaat 32:1-5; Romamiut 5:8; 1 Petrusi 3:18) Soorunami inuunerluleqqikkusunngilatit. (2 Petrusi 2:20-22) Aalajangersimasumik qinusarneq iluaqutigisinnaavat Guutip iluarisaatut inuuniartuarninni, tunniulluinnarninnik eqqortitsiniartuarninni Jehovamullu aalajaallutit kiffartortuarniarninni. — 2 Petrusi 3:11, 12.

9. Iliuutsit ajortut taamaatereerutsigit suna aqqutigisariaqarparput?

⁹ Iliuutsit ajortut taamaatinnerisigut saareeruit, nakimaatsumik uummateqartuarniarlutit Guutimut ikioqqusariaqarputit. Tassami aqqutikkut eqqunngitsukkooraluarputit, aqqullu eqqortoq apersuutigereerlugu ingerlavigilersimavat. Maanna tammaqqinnaveersaartariaqarputit. Guutip siulersuinera ujartortuarlugu inuussutip aqqutaaniittuarnissat aalajangiusimajuk. — Esaja 30:20, 21; Matthæusi 7:13, 14.

Tunnilluinnarnerit kuisinnerillu puiunngisaannakkit

10. Guutimut tunniulluinnarnitsinnut atatillugu suna puiussanngilarput?

¹⁰ Eqqaamajuk Jehovamut qinunikkut tunniulluinnaravit, aalajaallutit naassaanngitsumut kiffartorfigerusukkakku. (Judasi 20, 21) Tunniulluinnarneq isumaqarpoq siunertamut illernartumut immikkoortinneqarneq. (3 Mosesi 15:31; 22:2) Tunniulluinnarnerit utaqqiisaannaanngilaq. Inunnut akisussaaffeqaliinnanngilatit. Silarsuarmi kisimi oqartussaasumut tunniulluinarneruvoq ataavartoq, eqqortissagaannilu inuuneq naallugu Guutimut ilumoortariaqarpoq. Aap, ’inuugutta [Jehovamut] inuuvugut, toquguttalu [Jehovamut] toquvugut’. (Romamiut 14:7, 8) Pilluassagutta Jehovap piumasaanut naalannersugut uummamillu nakimaatsumik kiffartorfigiuarneripput apeqqutaavoq.

11. Kuisinnerput tamatumalu isumaa sooq eqqaamasariaqarparput?

¹¹ Puiunngisaannaruk Guutimut uummammik tamakkiisumik tunniulluinnarnermut assersuutitut kuisikkavit. Pinngitsaalineqanngilatit — nammineq aalajangigaraat. Aammattarli aalajangiusimalluinnarpiuk inuunerpit sinnera Guutip piumasaanut naapertuuttumik piumasannik iliorsinnaatitaanerit atorumallugu? Ilerasunnaveerutissannik Guuti qinnuigaat tassungalu tunniulluinnarninnut assersuutaasumik kuisillutit. Tunniulluinnarnerpit eqqortinneratigut ilerasuuteqanngittuarit — taava Jehovap pilluaqqusingaarnera malugissavat. — Ussatit 10:22.

Piumasamik iliorsinnaatitaaneq aalajangiisooqataavoq

12, 13. Tunniulluinnarneq kuisinnerlu piumasamik iliorsinnaatitaanermut qanoq attuumassuteqarpat?

¹² Nunarsuaq tamakkerlugu millionilikkuutaat tunniullinnarnermikkut kuisinnermikkullu pilluaqquneqangaarput. Guutimut tunniulluinnarnerput imermut kuisinnikkut takutikkaangatsigu, inooriaaserisimasatsinnut atatillugu toquvugut, piumasatsinnilli iliorsinnaanitsinnut atatillugu toqunngilagut. Ilinniartitaalluareerluta piumasatsinnik iliorsinnaatitaanerput atorlugu Guutimut qinunikkut tunniulluinnarpugut kuisillutalu. Iliuuserisassat pingaarutillit taakku iliuuseritinnagit Guutip piumasaa suunersoq paaseqqaartariaqarpoq taavalu nammineq kajumissutsimik iliuuseralugit. (Efesosimiut 5:17)  Taamaalilluta Jiisusi piumasaminik iliorsinnaatitaanini atorlugu sanasuujunnaartoq, kuisittoq Ataatamilu qilammiusup piumassaanik iliorniarluni tunniulluinnartoq malipparput. — Tussiaat 40:8, 9; Johannesi 6:38-40.

¹³ Jehova Guutip siunertaraa Erni „naalliuutitigut“ naammalluinnartunngussasoq. Jiisusip naalliunnermini aalajaattuarnissani nammineq kajumissutsiminik aalajangerpaa. Pisariaqartumik nukissaqarumalluni „nillingaarluni qullilillunilu qinuvoq torlulallunilu . . . qinnutaalu tusarneqarpoq Guutimik mianerinnittuummat“. (Hebræerit 2:10, 18; 5:7, 8) Taamatulli Guutimik mianerinnikkutta, ’qinnutitta tusarneqarnissaat’ aamma qularissanngilarput, Jehovalu tatigisinnaavarput nalunaajaasumisut tunniulluinnarsimasutut nakimaatsissagaatigut aalajaatsillutalu. — Esaja 43:10.

Nakimaatsumik uummateqartuaannarsinnaavutit

14. Sooq ullut tamaasa Biibilimi atuartariaqarpugut?

¹⁴ Qanoq nakimaatsumik uummateqartuaannarsinnaavit taamaalillutillu Guutimut tunniulluinnarninnik eqqortitsillutit? Guutip oqaasianik ilisarsinerujartuinnarneq siunertaralugu  ullut tamaasa Biibilimik atuartarnikkut. Taamaaliornissaq ’kiffap ilumoortup silatuullu’ kajumissaarutigiuarpaa. Tunniulluinnarnerpummi eqqortissagutsigu Guutip sallusuissutaani saqiuartariaqarpugut. Jehovap peqatigiissortaasa nalunagu piaaralutillu eqqunngitsumik ajoqersuisuugunik Jehovap Nalunaajaasui taakkualu oqaluussiffigisaat nammineq Biibilimik atuarnissaannik kajumissaarnavianngilaat.

15. (a) Aalajangiinermi suna eqqarsaatigineqartariaqarpa? (b) Sooq oqartoqarsinnaava aningaasarsiorneq kristumiut saniatigut suliffiinnarigaat?

¹⁵ Eqqarsaatigiuaruk aalajangiinitit Jehovamut tunniulluinnarnerpit eqqortinnissaanut attuumassuteqartut. Suliffeqarneq assersuutigisinnaavarput. Pallorfiginninnermik ilumoortumik siuarsaajuarnissannut ajoqutaatinnaveersaarpiuk? Sulisitsisut isumaqarajupput kristumiut tunniulluinnarsimasut tatiginartuusut sulilluartartullu, malugisarpaattaarli Jehovap Nalunaajaasui silarsuarmi anguniagaqarusussuseqarneq ajortut, atorfiillu iluanaarnarnerpaat pillugit allat unammillerneq ajoraat. Taamaappoq Jehovap Nalunaajaasuisa pigissaarneq, tusaamasaaneq ataqqisaaneq pissaaneqarnerluunniit anguniagarineq ajormassuk. Guutimut tunniulluinnarnerminnik eqqortitsisut inuuneranni Guutip piumasaanik iliornissaq pingaarnerpaavoq. Inuunermi pisariaqavissuinnarnut aningaasarsiorneq pingaannginneruvoq, saniatigut suliffiinnaavoq. Apustili Paulusitulli qaaqquneqarnerat, pingaarnertut suliaat, tassaavoq kristumiutut kiffartornerat. (Apustilit Suliaat 18:3, 4; 2 Thessalonikamiut 3:7, 8; 1 Timotheusi 5:8) Guutip Naalagaaffiata soqutigisai inuuninni salliutippigit? — Matthæusi 6:25-33.

16. Ingassaasilluta isumakululluta Guutimut tunniulluinnarnitta eqqortinnissaa ajornakusoortikkutsigu qanoq iliorsinnaavugut?

¹⁶ Immaqa ilaasa sallusuissut ilikkanngikkallaramikku isumakuluutinit artorsinneqartarput. Guutip Naalagaaffianilli neriuut ilikkaramikku nuannaangaalerput, qujamasungaalerlutik Guutimullu asanningaalerlutik. Taamanimiilli pilluaqqussutisiatsinnik eqqarsaatiginninneq Guutimut tunniulluinarnitsinnik eqqortitsinissatsinnut iluaqutigissavarput. Taavami ulluinnarni ajornartorsiutinik ingasaassilluni isumakulunnerup „Guutip oqaasia“ ipiteqqajaappagu — naasupiluit kapinartullit naatsiiassanik inerititaqanngitsoortitsinerattulli? (Lukasi 8:7, 11, 14; Matthæusi 13:22; Markusi 4:18, 19) Taamaalisuulersoriguit ilaquttatilluunniit taamaalisuulersorigukkit, isumakuluutitit Jehovamut tunniutikkit, qinnuigiullu asanninnerulernissannik qujamasunnerulernissannillu ikioqqullutit. Nanertuutigisatit Jehovamut tunniukkukkit, isumagissavaatit nukissaqalersillutillu nuannaarlutit nakimaatsumillu uummateqarlutit kiffartortuarsinnaalersillutit. — Tussiaat 55:23; Filippimiut 4:6, 7; Saqqummersitat 2:4.

17. Sualuttumik misilinneqarnerit qanoq anigorneqarsinnaappat?

¹⁷ Jehova Guutimut tunniulluinnaravit qinunittulli aalajangersimasumik qinujuartarit. (Tussiaat 65:3) Eqqunngitsuliornissat ussernartorsiorfigigukku, sualuttumilluunniit misilinneqaruit qinunikkut Guutimit siulersortigit siulersuineratalu malinnissaanut ikioqqullutit. Malugiuk ajoqersugaq Jaaku uppernerup pingaaruteqarnera pillugu ima allattoq: „Ilisimassutsimigut inorsartumik ilaqarussi taassuma qinnutigissavaa ilisimassuseq Guutimit avoqqaarlernani naammalluinnartunik tamanut tunisisartumit, taava piumaarpaa. Upperlunili qinussaaq, qularnani; qulartummi assigaa immap malinga anorip aalatitaa qaraartitaalu. Inuk taama ittoq isumaqanngikkili [Jehovamit] sumik tunineqassalluni, isummani saqittuartuummat inuuserisanilu allanngorartuartuulluni.“ (Jaaku 1:5-8) Misilinneqarneq artorsaatigigutsigu, qularutigissanngilarput Korinthimiunut allakkat siulliit 10:13-imi allassimasutut pisoqassasoq: „Usserneqaatigisimasasi inuit atortagaattut iinnarput, Guutilu unneqqarippoq; akuersaarumanngilaa artukkassinnik usserneqarnissarsi, kisianni usserneqarnermut ilagitillugu aniguiffissaq pilersissavaa artorsartitaaqqunasi.“

18. Jehovamut tunniulluinnarnitsinnik eqqortitsiniarluta aalajangernerput sualuttumik ajortuliap isertukkap sanngiillisippagu qanoq iliorsinnaavugut?

¹⁸ Taavami sualuttumik ajortuliap isertukkavit ilerasutsippatit Guutimullu tunniulluinnarninnik  eqqortitsiniarlutit aalajangernerit sanngiillisippagu? Allamik isumataaruit tuppallersaatigissavat nalunnginnakku Jehovap ’uummat peqqissimisoq artorsaateqangaartorlu itigartittarinngikkaa’. (Tussiaat 51:19) Utoqqaanertanut kristumiunut asannittunut ikiortissarsiorit. Jehova ilaarniassavaat Ataatannullu qilammiusumut attaveqarlualeqqikkusunnerit pimoorutissavaat. (Tussiaat 103:10-14; Jaaku 5:13-15) Anersaakkut nukissaqaqqilerlutit nakimaatsumillu uummateqarlutit narlusuukkut ingerlasinnaalissaatit, Guutimullu tunniulluinnarninnik eqqortitseqqissinnaalerlutit. — Hebræerit 12:12, 13.

Nakimaatsumik uummateqarlutit kiffartortuarit

19, 20. Tunniulluinnarnitta eqqortittuarnissaa sooq pingaaruteqarpa?

¹⁹ Ulluni atugarliungaarfiusuni makkunani ilungersortariaqarpugut tunniulluinnarnerput eqqortinniarlugu nakimaatsumillu uummateqarluta Guuti kiffartorfigiuarumallugu. Jiisusi oqarpoq: „Naggatissamut nikallujuitsuusoq annaanneqassaaq.“ (Matthæusi 24:13) „Ullussani kingullerni“ inuugatta naggatissaq nalliuteriaannaavoq. (2 Timotheusi 3:1) Aammattaaq arlaannattaluunniit qulakkeersinnaanngilaa aqagu inuussanerluni. (Jaaku 4:13, 14) Taamaattumik pingaaruteqarpoq tunniulluinnarnitsinnik ullut tamaasa eqqortitsiniarnissarput!

²⁰ Tamanna apustili Petrusip allakkami aappaanni erseqqissarpaa. Takutippaa guutiitsut Ulersuarmi piuneerussaanerattulli assersuutaasumik nuna, imaluunniit inuiaat ajortut, ’Guutip ullussaani’ piuneerunneqarumaartut. Taamaattumik Petrusi oqarpoq: „Taava tamatigut illernartuullusilu Guutimillu mianerinnillusi inuusariaqarpusi.“ Aamma ima kajumissaarivoq: „Asasakka, tamakku ilisimareerassigit mianersoritsi soqqusaatsut tammartarnerini peqataaqqunasi tunngavissinnillu kataqqunasi.“ (2 Petrusi 3:5-17) Alianassaqaaq kuisimasoq uppernerminik tunussippat inuunermilu naanerani nakimaatsumik uummateqanngippat!

21, 22. Daavi pillugu Tussiaat 57:8 sumik takutitsiva, ullumikkullu kristumiut ilumoortut aamma taamaappat?

²¹ Kuisikkavit ulloq pilluarnartoq puiunngisaannarukku Guutilu ikiortisiarisarukku oqaatsitit iliuutsitillu Guutimut nuannaarutaatillugit tunniulluinnarninnik eqqortitsiumallutit aalajangernerit nakussatsinneqassaaq. (Ussatit 27:11) Jehovap innuttani ajattunngisaannassavai, uagullu aalajaaffigiuartariaqarparput. (Tussiaat 94:14) Daavimut nallittuivoq misiginneqataallunilu akeraasa pilersaarutaannik unitsitsinermigut aniguisinneratigullu. Daavi qujamasulluni Aniguisitsisiminut nakimaatsumik asannilluinnarnini nalunaarpaa, ima erinarsorluni: „Uummatiga nakimanaveerpoq, Guuti, uummatiga nakimanaveerpoq, erinarsorlungalu nipilersussaanga.“ — Tussiaat 57:8.

²² Daavitulli kristumiut ilumoortut Guutimut asannilluinnarput. Nakimaatsumik uummateqarlutik Jehova aniguisitsisiginerarpaat annatsitsisiginerarlugulu nuannaarlutillu nersorneqaatissaa erinarsuutigalugu. Nakimaatsumik uummateqaruit Guuti tatigissavat, ikiuineratigullu tunniulluinnarnerit eqqortissinnaallugu. Aap, ’iluartutut’, tussiaasiortup erinarsuutigisaatut, issinnaavutit: „Ajunaarnermik nalunaarut annilaarutiginngilaa, uummataat eqqissisimalluinnarpoq [Jehova] tatigalugu.“ (Tussiaat 112:6, 7) Jehovamut uppernerit tatiginnilluinnarnerillu tunniulluinnarninnik eqqortitsinissannut nakimaatsumillu uummateqarlutit kiffartorfigiuarnissaanut iluaqutigissavat. (wE 4/1 02)

Eqqaamavigit?

• Biibili pillugu sooq eqqortumik ilisarsiniarunnaassanngilagut?

• Allamik isumataarnermut saannermullu atatillugu qanoq pisoqarnera sooq puiunngisaannassavarput?

• Tunniulluinnarnitta kuisinnittalu eqqarsaatiginerat qanoq iluaqutigisinnaavarput?

• Nakimaatsumik uummateqarluta Jehovamut kiffartortuarnissatsinnut suna iluaqutigissavarput?

[Atuaqqissaarnermi apeqqutit]

[Qupp. 18-mi assiliartat]

Anersaakkut peqqissuujuarniarlutit upperluartuuniarlutillu eqiasuillutit Guutip oqaasia atuaqqissaartarpiuk?

[Qupp. 18-mi assiliartaq]

Kristumiutut kiffartorneq suliffitsitut pingaarnertut isigigutsigu nakimaatsumik uummateqarluta Jehovamut kiffartortuarsinnaavgut