Upperisaq siuneqassusermik tunngaveqartariaqarpa?

„Uppernerartut amerlavallaat namminneq eqqarsarusunnatik upperisaqarneraannartarput,“ USA-mi palasinngorniartut ilinniarfianni atorfilik allappoq. „Suut tamaasa akuersaaginnarusuppaat,“ nangippoq.

TAAMAALILLUNI oqarporlusooq upperisaqarnerartut amerlanersaasa upperisaminnut pissutaasut imaluunniit upperisartik tunngavissaqarnersoq eqqarsaatigeqqissaartanngikkaat. Taamaammat upperisap amerlasuunit eqqartorneqarusuppallaarunnaarnera tupinnanngilaq.

Assilissanik upperisarsiorpalaartunik atuisarneq uteqattaarillunilu alanngaarluni qinusarnerit ajoraluartumik tunngaveqarluartumik eqqarsalersitsineq ajorput. Amerlasuut upperisamik ilisimanninnerat ileqqulersuutinut, illuliarsuarnut tupinnartunut, oqaluffiit igalaavinut alutornarsakkanut nipilersuutinullu killissimanartunut killeqarpoq. Ilagiissoqatigiit ilaasa upperisartik Biibilimik tunngaveqarnerarpaat, oqariartuutaalli ’Jiisusi upperiuk annallutillu’ ilumoorullugu Biibilimik atuaqqissaarnissamut kajumissaarinngilaq. Allat isumaginninnikkut politikkikkulluunniit iivangkiiliu oqaluussissutigilersimavaat. Tamanna qanoq kinguneqarsimava?

Amerika avannarlermi upperisaq pillugu atuakkiortoq tamanna pillugu oqarpoq: „Kristumiussuseq qalliinnarsiortunngulersimavoq, ilaasortallu upperisamut tunngasunik ilinniartinneqarnerat ajortorujussuuvoq.“ Isumasiuineq naapertorlugu Amerikamiut „inuiaqatigiittut Biibilimik ilisimasaqannginnertik pissutigalugu Biibilimik atuarsinnaanngitsutut“ allaaserineqarput. Allaaserinninneq tamanna nunanut kristumiuunerartunut allanut aamma tunngatinneqarsinnaavoq. Taamatuttaaq upperisarsioqatigiippassuit kristumiuunngitsut ilaasortamik upperisaminnik tunngaveqarluartumik pissarsinartumillu eqqarsaatiginneqqissaarnissaannut kajumissaarneq ajorpaat. Akerlianik assigiiaaginnartumik erinnersaartarnerit, uteqattaarilluni qinusarnerit eqqarsaqqissaarnerit paasiuminaatsortallit assigiinngitsut pingaartinnerusarpaat.

Inuilli taakkorpiaat upperisamik paasinninnertik eqqortuunerannik tunngaveqarluartuuneranillu isumakuluutiginninngitsut, ulluinnarni isumagisassat soqutaannginnerit eqqarsaatigeqqissaartarpaat. Imminut assortornerunnginnerpa biilinik — ullut ilaanni saviminikuinnanngortussanik — pisiniarnerinnarmi peqqissaartumik misissuisarmata, upperisartilli pillugu oqartartut: ’Angajoqqaannut ajunngippat, uannuttaaq ajornavianngilaq’?

Guutip iluarisaanik iliornissarput ilumoortumik soqutigigutsigu, taassumunnga uppernerput tunngavissaqarluarnersoq misissorluassannginnerparput? Apustili Paulusi nalimini upperisarsiortut pillugit oqarpoq taakkua „Guuti ilungersuutigigaat, kisianni silaqassuseqarnatik“. (Romamiut 10:2) Taakku qalipaasumut illumik qalipaasussatut atorfinitsinneqartumut, piginnittulli ilitsersuutaanut tusarnaannginnami qalipaatinik  kukkusunik atuisumut assersuunneqarsinnaapput. Immaqa qalipaasup suliani iluarisimaarpaa, piginnittulli akuerissanerpaa?

Guuti qanoq pallorfigineqarusuppa? Biibilimi allassimavoq: „Taama inuuneq ajunngeqaaq Guutimullu annaassisitsinnut iluarinartuulluni, taassumami piumasaraa inuit tamarmik annaanneqassasut sallusuissummillu ilisarsissallutik.“ (1 Timotheusi 2:3, 4) Ilaat isumaqarunarput eqqorluartumik ilisimasaqalernissaq upperisarsiortorpassuit akornanni nassaarineqarsinnaanngitsoq. Guutilli inuit sallusuissummik ilisarsinissaat piumasariguniuk, tamanna isertussanerpaa? Naamik, tamanna naapertuilluanngitsuliornerussaaq. Biibilimi Guuti pillugu allassimavoq: „Ujarukku naniumaarpat“ — 1 Nalunaarsuutit 28:9.

Guuti qanoq ililluni imminut ilumoorlutik ujarlersunut ilisaritittarpa? Tamanna allaaserisap tulliani sammissavarput.