Atuartartut apeqqutaat

Oqaatsit „Jiisusip aqqani“ assingusulluunniit atornagit Guutimut qinuneq eqqortuussava?

Biibili naapertorlugu kristumiut qinunikkut Jehovamut saaffiginnikkusuttut, Jiisusip aqqani qinusussaapput. Jiisusi ajoqersukkaminut oqarpoq: „Uakkuinnaq Ataatamut pisoqarsinnaavoq.“ Nangippoq: „Sunaluunniillu uanga atikkut qinnutigigussiuk naammassissavara. Ataataq Ernikkut naalannarsisitaaqqullugu. Sumik atikkut qinnuigigussinga tamanna naammassiumaarpara.“ — Johannesi 14:6, 13, 14.

Ujaarlerfissiami Cyclopedia of Biblical, Theological, and Ecclesiastical Literature-mi Jiisusip atorfia nalissaqanngitsoq pillugu allassimavoq: „Guutimut taamaallaat, angut akunnermiliuttoq Jiisusi Kristusi aqqutigalugu, qinusoqartariaqarpoq. Taamaattumik iluartuutitanut inngilinulluunniit qinnutit tamarmik iluaqutaanngiinnaratik aamma Guutimut mitalliutaapput. Qanorluunniit ataqqineqartigigaluarpat pinngortitanut pallorfiginninneq guutipilussiorneruvoq Guutillu inatsisai illernatut naapertorlugit inerteqqutaalluinnarluni.“

Oqaluussisartormi nuannersumik misigisaqarsimalluni „Jiisusip aqqani“ oqarnani oqarpat „Qujanaq Jehova!“? Tamanna naleqqutissanngila? Naamik, taamaattariaqanngilaq. Oqariarta kristumiu navianartorsiuleriataarluni suaartoq: „Jehova, ikiunnga!“ Takorlooruminaappoq Guutip kiffani ikiorumasanngikkaa „Jiisusip aqqani“ oqanngimmat.

Oqaatigisariaqarporli Guutimut saaffiginninneq immini qinunerunngimmat. Kainip qatanngunni toqukkamiuk Jehovamit eqqartuunneqareerluni assersuutigalugu oqarpoq: „Pillaatisiara artorpara. Maanna narsaammit peersikkamma illillu kiinnannit isertortariaqalerama inissaasuallungalu nunami angalaartariaqalerlunga, taava uannik naapitsisup kialuunniit toqoriaannaavaanga.“ (1 Mosesi 4:13, 14) Kaini Jehovamut saaffiginnikkaluarpoq, oqaasiili ajortuliami kinguneri artornartut pillugit maalaarutaapput.

Biibilimi allassimavoq: „Guutip makitasuut akerartorpai, qanilaartulli saammaattarpai.“ Qutsinnerussaartumut inuinnartut pissusilersorfigalugu saaffiginninneq maniguuttuunnginnermut ersiutaalluinnarpoq. Aamma ataqqininnginnermut ersiutaassaaq qinunermi piaaraluni Jiisusi Kristusi akueralugu oqaatiginaveersaaraanni, inissisimaffia pillugu Guutip oqaasiani qanoq allassimasoqartoq nalungikkaluarlugu. — Lukasi 1:32, 33.

Imali paasineqassanngilaq Jehovap oqaatsit aalajangersimasut ileqqulersuutilluunniit aalajangersimasut qinunermi atoqqusarai. Pingaarnerpaarli tassaavoq qinusup uummataata qanoq ittuunera. (1 Samueli 16:7) Ukiuni hundredelinni siullerni sakkutuut naalagaat romamiu Corneliusimik atilik ’Guutimut qinujuartuuvoq’. Corneliusi kipineqarnikuunngilaq Jehovamullu tunniulluinnarsimanani. Taamaattumik ilimananngilaq Jiisusip aqqani qinusarsimassasoq, taamaakkaluartorli Corneliusip ’qinnutai Guutimut anngussimapput taassumanilu eqqaamaneqarlutik’. Sooq? „Taanna upperluartuuvoq Guutimullu mianerinnittuulluni.“ (Apustilit Suliaat 10:2, 4; Ussatit 17:3) Corniliusi „Jiisusi Nazaretimioq“ pillugu ilisimasaqalerami anersaamik illernartumik kuineqarpoq, Jiisusimullu ajoqersuganngorluni kuisimasoq. — Apustilit Suliaat 10:30-48.

Paasivarput inuup aalajangigassarinngikkaa qinnutit sorliit Guutip tusartarnerai. Kristumiut Guutimut saaffiginninnerminni ilaatigooriarlutik Jiisusip aqqani qinusannginnertik ilerasuutigisariaqanngilaat. Pisinnaasavut Jehovap tamakkiisumik nalunngilai ikiorusullutalu. (Tussiaatit 103:12-14) ’Guutip ernerata aqqa’ upperigutsigu tatigilluinnarsinnaavarput „piumasaminut naapertuuttumik qinnuigigutsinni tusarumaaraatigut.“ (1 Johannesi 5:13, 14) Kristumiulli ilumoortut Jehovap siunertaani Biibili naapertorlugu Jiisusip inissisimaffia akuerisariaqarpaat, ingammik qinunermi allanik tusarnaatoqartillugu. Jiisusilu tunaartaralugu Guutimut qinunerminni naalallutik Jiisusip ataqqinissaa ilungersuutigissavaat. (wE 4/15 02)