Immikkut pisariaqartitallit ilumoorlutit tunniusimaffigikkit

„Ilumoorlusi tunniusimaffigeqatigiissaasi.“ — ZAKARIA 7:9, NV.

1, 2. (a) Sooq ilumoorluta tunniusimasariaqarpugut? (b) Apeqqutit suut misissussavavut?

JEHOVA GUUTIP oqaasiani kajumissaarneqarpugut ’ilumoorluta asannissasugut’ imaluunniit ilumoorluta tunniusimassasugut. (Mika 6:8) Tassani aamma paasitinneqarpugut sooq taamaaliortariaqarnersugut. Ilaatigut pissutaatinneqarpoq ’angut ikinngutinnersoq imminut iluaqutissiortarmat’. (Ussatit 11:17) Ilumuungaarami! Ilumoorluta tunniusimagutta allanut qanittumik ataavartumillu attaveqalissaagut ilumoortunillu ikinnguteqalerluta. — Ussatit 18:24.

² Biibilimi aamma allassimavoq: ’Iluarnermik ilumoorsutsimillu noqqaassutiginnittup inuussut . . . pissarsiarissavaa.’ (Ussatit 21:21) Ilumoorluta tunniusimaniarutta Guutip asassavaatigut siunissamilu pilluaqqusaangaassaagut, ilaatigut inuunermik naassaanngitsumik. Kikkulli ilumoorluta tunniusimaffigisinnaavavut, qanorlu taamaaliortoqarsinnaava? Ilumoorluni tunniusimaneq qanoq inoqammut asanninnermit, tassa nalinginnaasumik inussiarnisaarnermit, allaassuteqarpa?

Inoqammut asanninneq ilumoorlunilu tunniusimaneq

3. Ilumoorluni tunniusimaneq inoqammut asanninnermit qanoq immikkooruteqarpa?

³ Inoqammut asanninneq ilumoorlunilu  tunniusimaneq qanoq assigiinngissuteqarpat? Amerlanertigut tullermut asannittut inussiarnisaarfigisatik inuttut qanimut attaveqarfiginngikkaluarlugit inussiarnisaarfigisarpaat. Ilumoorlunili tunniusimaffigisat qanittumik misigissuseqarfigineqalertarput. Biibilimi ilumoorlutik tunniusimasut eqqaaneqaraangata imminnut qanimut attaveqareersut pineqartarput. (1 Mosesi 20:13; 2 Samueli 3:8; 16:17) Aamma ilumoorluni tunniusimaneq nammineq inussiarnisaarfigineqarsimanermik pissuteqarsinnaavoq. (Josva 2:1, 12-14; 1 Samueli 15:6; 2 Samueli 10:1, 2) Assigiinngissutaat erseqqissarniarlugu inoqammut asanninnermik ilumoorlunilu tunniusimanermik assersuutit marluk Biibilimeersut naleqqiussinnaavavut.

4, 5. Assersuutit Biibilimeersut qanoq takutippaat ilumoorluni tunniusimanerup inoqammullu asannittuliornerup assigiinngissutaat?

⁴ Qeqertami Maltami Paulusip allallu umiiarnerat pillugu oqaluttuami inoqatiminnut asannittunik assersuuteqarpoq. (Apustilit Suliaat 27:37–28:1) Maltamiut umiiartut ilisarisimanngikkaluarlugit inoroorsaarfigaat ’assullu inussiarnisaarfigalugit’. (Apustilit Suliaat 28:2, 7) Inoroorsaarnerat inussiarnisaarneruvoq, nalaatsornerinnakkulli pilluni takornartanullu inussiarnisaarnerulluni. Taamaattumik inoqammut asanninneq pineqarpoq.

⁵ Asannittuliorneq alla maanna misissoriartigu, tassa kunngi Daavip Mefiboshetimut, ikinngummi Jonatanip erneranut, inoroorsaarnera. Daavip Mefibosheti oqarfigaa: „Uanga nerrivinni nereqataajuartassaatit.“ Daavip aamma eqqaavaa sooq taamaaliornerluni: „Ataatanuna Jonatani pillugu ajunngitsuliorfiginiarikkit.“ (2 Samueli 9:6, 7, 13) Daavip Mefiboshetimut inoroorsaartuarnera eqqortumik oqaatigineqarpoq ilumoorluni tunniusimanertut, inoqammut asanninnerinnaanngitsutut, Daavimmi attavigeriikkaminik ilumoorfiginnineranut ersiutaavoq. (1 Samueli 18:3; 20:15, 42) Tamatumunnga assingusumik ullumikkut Guutip kiffaasa inuit tamaasa asannittuliorfigaat, uppeqatitilli ataavartumik ilumoorlutik tunniusimaffigalugit. — Matthæusi 5:45; Galatiamiut 6:10.

6. Guutip oqaasia naapertorlugu inuit ilumoorlutik tunniusimaffigeqartigiinnerat sunik ilisarnaateqartarpa?

⁶ Ilumoorluni tunniusimanerup ilisarnaatai paasinarnerulersinniarlugit maanna Biibilimi oqaluttuat pingasut misissussavavut. Taakkunatigut paasissavarput inuit ilumoorlutik tunniusimagaangata, tamanna ersertartoq (1) iliuutsikkut, (2) kajumilluni aamma (3) ingammik immikkut pisariaqartitalinnut. Oqaluttuat takutippaattaaq ullumikkut qanoq ilumoorluta tunniusimasinnaasugut.

Ataataq ilumoorluni tunniusimaffiginnittoq

7. Aaperaap kiffaata Betueli Labanilu sumik oqaluttuuppai, sunalu anguniarpaa?

⁷ Aaperaap kiffaanik oqaluttuap naanera Mosesimik allakkat siulliit 24:28-67-imi atuarneqarsinnaavoq. Rebekkap naapinnerata kingorna angutaanut, Betuelimut, qaaqquneqarpoq. (1 Mos 24 Versit 28-32) Tassani sukumiisumik oqaluttuaraa Aaperaap erneranut nuliassarsiuussinini. (1 Mos 24 Versit 33-47) Angalanermi manna tikillugu iluatsissimanera Jehovamit nalunaaqutitut isigaa, taassuma ’aqqutikkut eqqortukkut ingerlatimmani, [Aaperaap] qatanngutaata pania [Aaperaap] erneranut nuliassarsiaritissinnaanngortillugu’. (1 Mos 24 Versi 48) Qularnanngitsumik kiffaq neriuppoq isertuarani oqaluttuaruni Betuelip taassumalu ernerata Labanip qulariunnaassagaat suliani immikkut ittoq Jehovamit siulersorneqartoq. Naggataatigut kiffaq oqarpoq: „Maanna ilissi nalunaarfigisinga naalagara ajunngitsuliorfigiumanerissi unneqqariffigiumanerissilu imaluunniit taamaaliorumannginnersusi, ilisimaniassagakku qanoq iliussallunga.“ — 1 Mos 24 Versi 49.

8. Kiffap qinnutaa Betuelip qanoq qisuariarfigaa?

⁸ Jehovap Aaperaat ilumoorluni tunniusimaffigereerpaa. (1 Mosesi 24:12, 14, 27) Betuelittaaq ilumoorluni tunniusimaffigissanerpaa Rebekka Aaperaap kiffaanut aallaqatigitillugu? Kiffalluunniit ungasissumut angalanera asuliinnarpa? Aaperaap kiffaata nuannaarutigisimassavaa Betueli Labanilu oqarmata: „[Jehovamit]  tamanna pivoq.“ (1 Mos 24 Versi 50) Akueraat Jehovap tamanna piumasarigaa nangaanatillu naalapput. Taava Betuelip ilumoorluni tunniusimanini ersersippaa oqarluni: „Rebekka tassa saanniippoq, aallaqatiginiaruk naalakkavit erneranut nuliartaareqqullugu, soorlu [Jehovap] taama aalajangersimagaa.“ (1 Mos 24 Versi 51) Rebekkap kajumilluni Aaperaap kiffaa aallaqatigaa, erniinnarlu Iisaap asasamisut nuliartaaraa. — 1 Mos 24 Versit 49, 52-58, 67.

Erneq ilumoorluni tunniusimaffiginnittoq

9, 10. (a) Jaakup ernini Josefi sumik qinnuigaa? (b) Josefip qanoq ataatani ilumoorluni tunniusimaffigaa?

⁹ Aaperaap ernutaa Jaaku aamma ilumoorluni tunniusimaffigineqarpoq. Mosesimik allakkat siulliit kapitali 47-mi oqaluttuarineqarpoq Jaaku taamanikkut Egyptenimi najugaqartoq ’toquffissaalu qanillilersoq’. (Versit 47-49) Eqqissiunnaarutigaali nunami Guutip Aaperaamut neriorsuutigisaaniinnginnami. (1 Mosesi 15:18; 35:10, 12; 49:29-32) Jaakup Egyptenimi ilisaanissani kissaatiginngilaa, oqarlunili Kana’anip nunaani ilisaajumalluni. Jaakup kissaataa piviusunngortinniarlugu erneranit Josefimit oqartussaassuseqangaartumit allamik taamaaliorluarnerusoqarsinnaanerpa?

¹⁰ Ima allassimasoqarpoq: „[Jaakup] ernini Josefi qaaqquaa oqarfigalugulu: ’Ilinnut saammaannarsiguma . . . ajunngitsumik iliorfigalunga unneqqariffigalungalu neriorsunnga Egyptenimi ilisaatissanngikkimma. Ilisaajumavunga siuaasanni qasuersaartussanngorlunga. Kanaanimukaallunga taakkua iliveqarfiannut ilissavarma.’“ (1 Mosesi 47:29, 30) Josefi neriorsuivoq kissaataa naammassiumallugu, kingunitsianngualu Jaaku toquvoq. Allassimavoq Josefip qatanngutaasalu Jaaku ’Kanaanimukaakkaat ilillugulu qaarusummut Makpelap narsaataaniittumut, . . . Aaperaap ilivissarsiaralugu . . . pisiarisimasaanut’. (1 Mosesi 50:5-8, 12-14) Taamaalilluni Josefip ataatani ilumoorluni tunniusimaffigaa.

Ukuaq ilumoorluni tunniusimaffiginittoq

11, 12. (a) Ruthip No’omi qanoq ilumoorluni tunniusimaffigaa? (b) Ruthi qanoq „siornatigornit annerusumik“ ilumoorluni tunniussimava?

¹¹ Ruthimik allakkat kapitali 1-imi oqaluttuarineqarpoq uillarnerup moabikkuusup Ruthip sakini No’omi qanoq ilumoorluni tunniusimaffigigaa. No’omi aamma uillarnerusoq aalajangermat Judami Betlehemimut utissalluni, Ruthi ilumoortumik tunniusimalluni aalajangiusimannilluinnarlunilu oqarpoq: „Ornikkat uangattaaq ornissavara, najugariligassannilu najugaqassaanga. Inuiaqatitit uangattaaq inuiaqatigissavakka, illillu Guutit uangattaaq Guutigissavara.“ (Versi 16) Kingusinnerusukkut Ruthip ilumoortumik tunniusimanini takutippaa No’omip eqqarliata utoqqaanerusup Boazip aappartarinissaa akuerigamiuk. * (5 Mosesi 25:5, 6; Ruthi 3:6-9) Taamaattumik Boazi Ruthimut oqarpoq: „Unneqqarissutsit siornatigornit annerusumik allaat takutippat angutinik inuusuttunik piitsunik pisuunilluunniit qaninniagaqannginnavit.“ (Ruthi 3:6-9, 10)

¹² Ruthip ’siornatigut’ unneqqarissusia imaluunniit ilumoorluni tunniusimanera erserpoq No’omi ilaginiarlugu nunaqqatini qimammagit. (Ruthi 1:14; 2:11) Maannali Ruthi „siornatigornit annerusumik“ ilumoorluni tunniusimavoq Boazi aappartariumagamiuk. Maanna Ruthip No’omi meerartaarsinaajunnaareersoq kingornussisussaqartissinnaalerpaa. Ruthi Boazilu aappariilereerlutik ernertaarmata, Betlehemimi arnat oqarput: „No’omi erneqalerpoq!“ (Ruthi 4:14, 17) Jehovap Ruthip isiginnittaasia pillugu pilluaqquaa immikkut pisinnaatitaaffilerlugu Jiisusi Kristusimut siuaasanngortillugu. — Ruthi 2:12; 3:11; 4:18-22; Matthæusi 1:1, 5, 6.

 Ilumoorluni tunniusimaneq iliuutsini takuneqarsinnaavoq

13. Betueli, Josefi Ruthilu qanoq ilumoorlutik tunniusimappat?

¹³ Malugaajuk Betueli, Josefi Ruthilu oqaatsimikkuinnaanngitsoq iliuutsiminnili aamma ilumoorlutik tunniusimasut? Betuelip Rebekkap Iisaamut katinnissaa akueriinnanngilaa, aammali ’inuulluaqquaa’. (1 Mosesi 24:51, 59) Josefi oqaannanngilaq: „Oqaatsit malillugu iliorumaarpunga,“ taassumali qatanngutaasalu ’ataatamik piumasaa naammassivaat’. (1 Mosesi 47:30; 50:12, 13) Ruthi oqaannanngilaq: „Ornikkat uangattaaq ornissavara,“ No’omili ilagalugu inuiaqatini qimappai, „taavalu ingerlaqatigiipput Bethlehemip tungaanut“. (Ruthi 1:16, 19) Judamullu tikikkamik Ruthi „sakimi peqqussutai tamaasa malillugit iliorpoq“. (Ruthi 3:16) Taamaalilluni Ruthi iliuutsimiguttaaq ilumoorluni tunniusimavoq.

14. (a) Guutip kiffai ullumikkut iliuutsimikkut qanoq ilumoorlutik tunniusimappat? (b) Ilagiinni attavigisanni uppeqativit ilumoorlutik tunniusimanerat qanoq takuneqarsinnaava?

¹⁴ Nuannaajallaatigisarparput Guutip kiffai aamma ullumikkut iliuutsimikkut ilumoorlutik tunniusimasut takugaangatsigit. Eqqarsaatigeriakkit uppeqatiminnik napparsimasunik, isumatsassimasunik aliasuttunilluunniit asannillutik isumaginnittuartartut. (Ussatit 12:25) Imaluunniit Jehovap Nalunaajaasui amerlasuut qatanngutinik utoqqarnik ilagiinni ataatsimiinnernut aalajaallutik biiliussisartut. Anna 82-inik ukiulik gigtertoq amerlasuut sinnerlugit oqarpoq: „Ataatsimiinnernut tamanut biiliunneqartarnera Jehovamit tunissutaavoq. Uummatikkut iluunngarlunga qutsavigaara taama asannitsigisunik qatannguteqartimmanga.“ Tamatumunnga assingusumik ilagiinni attagivisanni ikiuinissannut periarfissaqarpit? (1 Johannesi 3:17, 18) Taamaaliorsinnaaguit qularissanngilat ilumoorlutit tunniussimanerit pingaartinneqangaassasoq.

Kajumillutik ilumoortumik tunniusimaffiginnittut

15. Ilumoorlutik tunniusimasut aamma suna ilisarnaatigaat, Biibilimi oqaluttuani pingasuni takuneqarsinnaasutut?

¹⁵ Biibilimi oqaluttuat misissoriikkatta takutippaattaaq nammineq kajumissutsimit pinngitsaalineqarnani ilumoorluni tunniusimasoqartartoq. Betuelip kajumilluni Aaperaap kiffaa suleqatigaa, Rebekkalu aamma taamaaliorpoq. (1 Mosesi 24:51, 58) Josefi kimigiiserfigineqarani ilumoorluni tunniusimavoq. (1 Mosesi 50:4, 5) Ruthi ’Noomi ilaginiarlugu aalajangivissimavoq’. (Ruthi 1:18) No’omip Ruthi Boazimut saaffiginneqqulluni siunnersormani, Moabikkuusoq ilumoorluni tunniusimalluni akivoq: „Oqaatsitit tamaasa malillugit iliussaanga.“ — Ruthi 3:1-5.

16, 17. Sooq Betuelip, Josefip Ruthillu ilumoorlutik tunniusimanerat maluginiarnartuua, sumillu taamatut pissuseqartinneqarpat?

¹⁶ Betuelip, Josefip Ruthillu ilumoorlutik tunniusimaffiginninnerat maluginiarnarpoq. Aaperaap, Jaakup No’omillu taakku  taamatut pissuseqartinniarlugit kimigiiserfigisinnaanngilaat. Assersuutigalugu Betueli inatsisitigut pisussaaffeqanngilaq panimmi aallartinnissaanut. Aaperaap kiffaa oqarfigisinnaagaluarpaa panini eqiasuitsoq eqqamini najugaqartikkusullugu. (1 Mosesi 24:18-20) Aammattaaq Josefip nammineq aalajangersinnaavaa ataatami qinnutaa akuerissanerlugu, Jaakumi toqoreersimassaaq Josefilu pinngitsaalillugu neriorsuumminik akuersisissinnaanagu. No’omip Ruthi paasitippaa Moabimiiginnarsinnaasoq. (Ruthi 1:8) Ruthi aamma aalajangersinnaagaluarpoq ’angutit inuusuttut’ ilaannik aappartaarniarluni Boazi utoqqalisoq aappartaarinagu.

¹⁷ Betueli, Josefi Ruthilu namminneq kissaatigigamikku ilumoorlutik tunniusimapput. Attaveqarfigereersimasaminnut ilumoorlutik tunniusimanissaminnut ileqqussatigut pisussaasutut misigipput, kingusinnerusukkut kunngi Daavip Mefiboshetimut ilumoorluni tunniusimanissaminut pisussaasutut misigineratulli.

18. (a) Kristumiut utoqqaanertat Guutip savaataanut paarsisuunerminni qanoq isiginnittaaseqartarpat? (b) Utoqqaanertap paarsisut isumassuisut tamarmik qanoq misiginerat qanoq oqaatigaa?

¹⁸ Ullumikkut Guutip kiffaasa imminnut ilumoorlutik tunniusimanertik suli ilisarnaatigaat. Minnerunngitsumik Guutip savaataanut paarsisut taamaapput. (Tussiaat 110:3; 1 Thessalonikamiut 5:12) Utoqqaanertat, imaluunniit nakkutilliisut, toqqagaanermikkut tatigineqarnermik eqqortinnissaa akisussaaffittut isigaat. (Apustilit Suliaat 20:28) Ilagiinnulli ilumoorlutik tunniusimanertik aamma takutittarpaat kajumillutik, pinngitsaalisaasutut pinnatik, paarsisutut kiffartuussinermikkut. (1 Petrusi 5:2) Utoqqaanertat savaatinut paarsisuupput, akisussaaffigigamikku aamma taamaaliornissaminnut kajumikkamik. Jiisusip savaatai ilumoorlutik tunniusimaffigaat taamaaliortariaqaramik, aamma taamaaliorusukkamik. (Johannesi 21:15-17) „Nuannareqaara qatanngutit pulaartarnerat alakkalaaginnarlugilluunniit eqqarsaatigalugit takutinniarlugu,“ kristumiu utoqqaanertaq oqarpoq. „Qatanngutinik ikiuineq nuanneqalunilu nalerisimaarnaqaaq.“ Nunarsuaq tamakkerlugu utoqqaanertat isumassuisut oqaatsinut taakkununnga isumaqataasinnaapput.

Immikkut pisariaqartitallit ilumoorluta tunniusimaffigitigit

19. Ilumoorluni tunniusimanermut tunngatillugu allaaserisami uani sammisatsinni Biibilimi oqaluttuat suna erseqqissarpaat?

¹⁹ Biibilimi oqaluttuat sammisatta erseqqissarpaattaaq namminneq matussusersinnaanngisaminnik immikkut pisariaqartitallit ilumoorluta tunniusimaffigisariaqarivut. Aaperaat kinguaariinnik ingerlatitseqqissaguni Betuelimit ikiorneqartariaqarpoq. Jaaku Josefimit ikiorneqartariaqarpoq Kana’animi ilisaarusunnini akuerineqassappat. No’omilu Ruthimit ikiorneqartariaqarpoq kingornussisussaqalerniarluni. Aaperaap, Jaakup No’omillu pisariaqartitatik namminneq matussusersinnaanngilaat. Ullumikkuttaaq immikkut pisariaqartitallit ilumoorluta tunniusimaffigisariaqarpavut. (Ussatit 19:17) Ataataanerpaaq Jobi ilaartariaqarparput, taassuma ’ikiortarialik ikioqqulluni nilliasoq annaattarpaa iliarsullu ikiorteqanngitsorlu ikiortarlugu’. Jobip aamma ’uillarnerit uummataat qiimmattartittarpai’. ’Isiusutullu ippoq tappiitsunut isikkatullu illuni nukillaarsimasunut’. — Jobi 29:12-15.

20, 21. Kikkut ilumoorluni tunniussimaffigineqartariaqarpat, qanorlu iliorniarluta aalajangiusimasariaqarparput?

 ²⁰ Kristumiummi ilagiivini tamani inoqarpoq ’ikiortarialinnik ikioqqullutik nilliasunik’. Kiserliorneq, isumatsassimaneq, naleqanngitsutut misigineq, allanik pakatsisinneqarneq, ilaquttamik toqusoorneq ilungersunartumilluunniit nappaateqarneq pissutaasinnaapput. Sunaluunniit pissutaagaluarpat qatanngutit angutit arnallu asanartut taakku pisariaqartitaqarsinnaapput uagut ilumoorluta tunniusimaffiginnittuarnitsigut matussusersinnaasatsinnik matussusertariaqakkatsinnillu. — 1 Thessalonikamiut 5:14.

²¹ Taamaattumik Jehova Guuti „nallittuisoq saammaasorlu“ ilaarniartuartigu. (2 Mosesi 34:6; Efesosimiut 5:1) Taamaaliorsinnaavugut kajumilluta immikkut pisariaqartitalinnik ikiuilluta. Taamaalilluta Jehova ataqqissavarput imminullu nuannaartissalluta ’ilumoorluta tunniusimaffigeqatigiikkatta’. — Zakaria 7:9, NV. (wE 5/15 02)

[Quppernerup ataani ilanngussaq]

Qanoq akissavit?

• Ilumoorluni tunniussimaneq inoqammut asanninnermit qanoq allaassuteqarpa?

• Betueli, Josefi Ruthilu qanoq ilumoorlutik tunniusimappat?

• Qanoq isiginnittaaseqarluta ilumoorluta tunniusimassaagut?

• Kikkut ilumoorluni tunniusimaffigineqartariaqarpat?x

[Atuaqqissaarnermi apeqqutit]

[Qupp. 26-mi assiliartaq]

Nalunngiliuk Betueli qanoq ilumoorluni tunniusimasoq?

[Qupp. 29-mi assiliartaq]

Ruthip ilumoorluni asanninnera No’omip iluaqutigingaarpaa

[Qupp. 31-mi assiliartaq]

Ilumoorluni tunniusimaneq takutinneqartarpoq kajumittumik,iliuutsikkut immikkullu pisariaqartitalinnut