Innarluutit killeqanngillat

CHRISTIAN, afrikami najugalik ilaanni pinngitsaalillugu sakkutuunngortinniaraluarlugu sakkutuunit qimarngunneqarpoq. Nalunngeqatiginnissutsini Biibilimit ajoqersorneqarsimasoq pissutigalugu taamaaliorusunngilaq. Taava sakkutuuqarfimmukaappaat tassanilu ulluni sisamani persuttagaavoq naggataatigullu nissumigut aallaaneqarluni. Christian iluatsitsilluni napparsimavimmut pivoq, niuali ikilernikoq seeqquata ataatungaatigut kipisariaqarluni. Afrikap ilaani peqqarniisaarniat allaat meeraaqqanik avataarsisarput. Cambodjamiit Balkani tikillugu, Afghanistanimiit Angola tikillugu qaattartut nunamut assaattakkat suli tassa inuusuttunik utoqqarnillu aqqunartitsisarlutillu innarluuteqalersitsisarput.

Aamma amerlaqisut ajutoornernit nappaatinillu, soorlu sukkornermit eqqugaasarput. Allaat ilaat toqunartulinnik mingutsitsinermit innarluuteqalertarput. Assersuutigalugu Europap kangiani illoqarfimmi eqqaanilu meeqqat talerperlermik ilaannakuusumik taleqarlutik inunngortarput. Ilimanarpoq mingutsitsineq timip pisataasa ajoquserneqartarnerannut pissutaasartoq. Silarsuaq tamakkerlugu inuppassuit avatitik tamakkerlugit pigaat nukillaarnermilli allatigulluunniit ajoquteqarlutik innarluuteqarlutik. Aap, innaarluutit killeqanngillat.

Sunaluunniit pissutaagaluarpat innaarluuteqarluni inuuneq artornarsinnavoq. Angutip Junior-imik atillip 20-nik ukioqarluni niuni saamerleq annaavaa. Kingusinnerusukkut oqaluttuarpoq: „Isumatsaatigeqaara. Niuma iluarseqqinngisaannarnissaa qissatigisaqaara. Qanoq iliussallunga naluara. Paatsiveerutiiveqqavunga“ Piffissalli ingerlanerani Junior allarluinnarmik isiginnittaaseqalerpoq. Biibilimik atuaqqissaartalerami atukkami naammagiinnarnissaat kisiat ilikkaannanngilaa, nunamili maani siunissamik pilluarnartumik nuannersumik aamma neriuutissaqalerpoq. Innarluuteqaruit, taamatut neriuuteqalerusuppit?

Taamaappat allaaserisaq tulliuttoq atuarukku pissarsiaqarfigilluarsinnaassavat. Allassimaffiit innersuussutigineqartut illit nammineq Biibilinni takusarukkit pitsaassaaq, pinngortitsisup imminik ilinniartunut maleruaalersunullu qanoq iliorumaarnissaa nammineerlutit takuniassavat.