Jehovap ilumuunngitsuliorneq uumigaa

’Inoqatitsinnut ilumuunngitsuliortassanngilagut.’ — MALAKI 2:10.

1. Naassaanngitsumik inuussagutta Guutip sumik piumaffigaatigut?

NAASSAANNGITSUMIK inoorusuppit? Biibilimi neriorsuutit upperigukkit qularnanngitsumik ima akissaatit: ’Aap, soorunami.’ Kissaatigigutsiguli silarsuassami nutaami Guutip naassaanngitsumik inuutissagaatigut, piumaffiginninneratut iliortariqarpugut. (Oqaluussisartup oqaasii 12:13; Johannesi 17:3) Inunnut naammalluinnanngitsunut piumasaqaataava inornartoq? Naagga, Jehovami qiimmaallannangaartumik oqarpoq: „Piumasaraara ilumoorsuseq, pilliutit toqutassat pinnagit. Piumasaraara Guutimik ilisimasaqalernissaq, pilliutit ikikkagassat pinnagit!“ (Hosea 6:6) Tassa allaat inuit naammalluinnanngitsut Guutip piumasaqaataanik eqqortitsisinnaapput.

2. Inuppassuit Israelikkuusut Jehovamut qanoq ilumuunngitsuliorpat?

² Tamarmiunngitsorli Jehovap piumasaatut iliorusupput. Hoseap paasitippaatigut allaat inuppassuit Israelikkuusut taamaaliorusunngitsut. Inuiattut angeruseqarput, imaluunniit isumaqatigiissuteqarput, Guutip inatsisai naalakkumallugit. (2 Mosesi 24:1-8) Sivitsunngitsorli inatsisit taakku unioqqutippaat ’angeruseq unioqqutillugu’. Taamaattumik Jehova oqarpoq Israelikkut imminut ’ilumuunngitsuliortut’. (Hosea 6:7) Taamanimiilli inuppassuit aamma taamaaliorput. Jehovalli uumigai imminut asasiminullu kiffartortiminut ilumuunngitsuliortut.

3. Suna misissussavarput?

³ Pilluarluta inoorusukkutta, ilumuunngitsuliornermut Guutip isiginnittaasiatut isiginnittaaseqartariaqarpugut. Guutip ilumuunngitsuliorneq qanoq isigineraa Hoseap pruffiitini kisimi nassuianngilaa. Allaaserisap matuma siuliani Malakip siulittuutitut oqariartuutaa kapitali siullermiit misissorlugu aallartipparput. Allakkat kapitaliisa aappaannut ingerlaqqeriarta ilumuunngitsuliornermut Guutip isiginnittaasia misissorlugu. Guutip innuttaasa Babylonimit uternerannit ukiorpassuit qaangiutut pissutsit atugaat Malakip allaatigigaluarai, kapitali 2 ullumikkut uagutsinnut aamma pingaaruteqangaarpoq.

Palasit assuarnartut

4. Jehovap palasit qanoq mianersoqquai?

⁴ Kapitali 2-p aallartinnerani Jehovap juutit palasit assuarai aqqutigeqqusani naapertuilluartut qimammatigik. Siunnersuutaa uummammiuliutinngikkunikku siunnerfitsillu allanngortinnagu, kingunerlutsitsingaassapput. Versit siulliit marluk malugikkit: „Ima peqqusiffigineqarpusi, ilissi palasiususi: Naalanniaritsi, ateralu ilungersorlusi ataqqinartinniarsiuk, oqarpoq Katersaarsuit [Jehovaat]; taamaaliunngikkussi perloqqussummik aallartitsivigalusi pilluaqqusaanersi perloqqusaaninngortikkumaarpara.“ Palasit Guutip inatsisai inunnut ilinniartitsissutigisimasuuppatigik maleruarsimasuuppatigillu, pilluaqqusaasimassagaluarput. Guutilli piumasaa sumiginnaramikku perloqqusaassapput. Allaat palasit pilluaqqusinerat perloqqusaaninngortinneqassaaq.

5, 6. (a) Sooq ingammik palasit assuarnarpat? (b) Jehovap palasinik ajorinninnini qanoq ersersippaa?

⁵ Sooq ingammik palasit assuarnarpat? Mal 2 Versi 7-imi tamanna paasisinnaavarput: „Palasit qarluisa sianigissavaat ilisimasaqarnissaq qarngisalu ajoqersuussutit. Katersaarsuimmi [Jehovaata] palasi aallartitaraa.“ Ukiut tusindinit amerlanerusut tamatuma siorna Mosesi aqqutigalugu  Guutip Israelikkunnut inatsisaani allassimavoq palasit pisussaasut ’Israelikkunnik ajoqersuinissamut inatsisinik [Jehovap] nalunaarutigisaanik tamanik’. (3 Mosesi 10:11) Kingusinnerusukkut Nalunaarsuutit aappaat 15:3-mik allattoq ajoraluartumik ima oqartariaqarsimavoq: „Israeli sivisuumik piviusumik Guuteqarsimanngilaq, palaseqarsimanani ajoqersuisinnaasunik inatsiseqarsimananilu.“

⁶ Malakip nalaani, ukiuni 400-kkunni ukiunik naatsorsuisarnitta siorna, pissutsit aamma taamaassimapput. Palasit Guutip inatsisaanik inuit ilinniartinngitsoortarsimavaat, taamaattumillu akisussaatinneqartariaqarlutik. Jehovap taakkununnga assuarliutai malugikkit. Malaki 2:3-mi allassimavoq: „Kiinnassinnut eqqassavakka nersutaatit nalliussinerni pilliutigisassi perlukui.“ Avoqqaaritingaarneq! Pilliutit perlukui nalinginnaasumik tammaarfiup avataanukaanneqartartussaapput ikuallanneqarlutillu. (3 Mosesi 16:27) Jehovalli oqarfigimmagit perlukut kiinaannut eqqarneqassasut, erseqqippoq taakku nikagigai pilliutillu pilliutissanillu aggiussisut itigartikkai.

7. Sooq Jehovap Inatsisinik ilinniartitsisut kamaappai?

⁷ Malakip nalaa ukiunik hundrelikkuutaanik sioqqullugu Jehovap levikkut illernatuummik kingusinnerusukkullu naalaffimmik tassanilu kiffartornermik illernartumik isumaginnittussanngortippai. Inuiannut Israelikkunnut ilinniartitsisuupput. Suliartik naammaginartumik naammassigunikku namminneq Israelikkullu sinnerisa inuussutigissavaat eqqississutigalugulu. (4 Mosesi 3:5-8) Levikkulli allaqqaammut Guutimut mianerinninnermittulli mianerinnikkunnaarput. Taamaattumik Jehovap ima oqarfigai: ’Aqqutissamit nigorpusi ajoqersuussinissigullu amerlasuut orlutillugit Levikkunnut angeruseq unioqqutillugu. Aqqutigeqqusakka atuaqqissaanngilasi.’ (Malaki 2:8, 9) Palasit sallusuissummi ilinniartitsinngitsoornermikkut maligassiuinerlunnermikkullu inuppassuit Israelikkut tammartippaat, taamaattumik Jehovap kamaammagit pissusissamisoorpoq.

Guutip najoqqutassiaanik eqqortitsisoqarsinnaava?

8. Guutip najoqqutassiaanik eqqortitsinissamik piumaffiginninneq ingasappallaarpa? Nassuiaruk.

⁸ Isumaqassanngilagulli Malakip nalaani levikkut naammalluinnanngitsuugamik Guutip najoqqutassiaanik eqqortitsisinnaanngitsut misiginneqatigineqartariaqartut isumakkeerfigineqartariaqartullu. Inuit Guutip piumasaqaataanik eqqortitsisinnaapput, sapikkatsinnimmi Jehovap piumaffiginngilaatigut. Ilimanarpoq taamani aamma ataasiakkaanik palaseqartoq Guutip inatsisaanik eqqortitsisunik, nalunngilarpulli kingusinnerusukkut takkuttoqartoq Guutip piumasaqaataanik tamanik eqqortitsisumik: Jiisusi, ’palasiuneq’ anneq. (Hebræerit 3:1) Taanna pillugu eqqortumik ima allassimavoq: „Levip qanga ajoqersuussut ilumoortoq qanermiorigaluarpaa, peqquserlunnermillu qarluiniittoqanngikkaluarpoq. Eqqissilluni iluartuullunilu inooqatigigaluarpaanga, inuillu amerlasuut ajortuliutsaaligaluarlugit.“ — Malaki 2:6.

9. Nalitsinni kikkut aalajaallutik sallusuissummik oqaluussippat?

 ⁹ Taamatulli Jiisusip qatanngutai tanitat qilaliarnissamik neriugisallit, maanna ukiut hundredet sinnerlugit ’palaseqatigiittut illernartutut pilliutinik Anersaap piinik Guutimut ilassiuminartunik sassaassissutut’ kiffartoreerput. (1 Petrusi 2:5) Sallusuissutinik Biibilimeersunik allanut oqaluussinermik suliaqarneq siulersorpaat. Sallusuissutit taakku ilikkarakkit qularnanngitsumik malugisimassavat kristumiut tanitat „ajoqersuussut ilumoortoq“ qanermiorigaat. Inuppassuit upperisarsiornikkut tammarsimasut ikiorsimavaat, silarsuaq tamakkerlugu inuit maanna millionilikkuutaajusut sallusuissummik Biibilimeersumik ilisarsitillugit inuunermillu naassaanngitsumik neriugisaqalersillugit. — Johannesi 10:16; Saqqummersitat 7:9.

Mianersorfissaqarpoq

10. Sooq mianersorfissaqarpugut?

¹⁰ Mianersorfissaqarpugulli. Malaki 2:1-9-mi siunnersuut paasinngitsoorsinnaavarput. Tamatta immikkut eqqumaffigaarput ’peqquserlunnermik qarlutsinniittoqannginnissaa’? Assersuutigalugu qaniginerpaasatta oqaatsivut ilumut tatigisinnaavaat? Ilagiinnimi qatanngutitta? Naak oqaaserisat ilumooraluartut ileqquliunneqariaannaavoq piaaraluni allanik paasinerluititsilluni oqalunneq. Imaluunniit niuernermut tunngasut ilaannik ingasaassisoqarsinnaavoq isertuisoqarsinnaallunilluunniit. Taamaaliornerli Jehovap malugisannginnerpaa? Taamaalioruttalu qarlutsinnik unnersiutiginninnerput ilassissanerpaa?

11. Ingammik kikkut mianersortariaqarpat?

¹¹ Ullumikkut ilagiinniittunik Guutip oqaasianik ilinniartitsinissamut immikkut pisinnaatitaaffilinnut Malaki 2:7-imi mianersoqqussuteqarpoq. Allassimavoq taakku ’qarluisa sianigissagaat ilisimasaqarnissaq qarngisalu ajoqersuussutit’. Ilinniartitsisut akisussaafferujussuaqarput, Jaaku 3:1-imimi allassimavoq ’sukannernerusumik eqqartuunneqassasut’. Ilinniartitsissariaqarput ilungersuussillutik angorniorlutillu, ilinniartitsineralli Guutip oqaasiani allassimasunik tunngaveqarluinnassaaq siunnersuutaallu Jehovap peqatigiissortaaneersuussallutik. Taamaalillutik ’allanik ajoqersuisinnaalissapput’. Taamaattumik ima kajumissaarneqarput: „Noqqaassutiginiaruk sulisutut kanngusuutissaqanngitsutut oqaatsimik sallusuissutaasumik nassuiaasutut Guutip saavani misiligaaninni attassinissat.“ — 2 Timotheusi 2:2, 15.

12. Ilinniartitsisut suna mianersorfigisariaqarpaat?

¹² Mianersunngikkaanni nammineq isummamik piumanerusamilluunniit ilinniartitsinissaq ussernartorsiorfigineqarsinnaavoq. Ingammik navianartuuvoq aalajangersimalluinnartumik isumalinnut namminerluunniit isummiussaminnik tatiginneqqajaasunut, naak isummiussatik Jehovap peqatigiissortaaneersunut akerliugaluartut. Malaki kapitali 2-mili takutinneqarpoq tatigisinnaasariaqaripput ilagiinni ilinniartitsisut Guutimik ilisarsineq saqqummiuttaraat, namminneq isummatik, savanik tammartitsisinnaasut, saqqummiunnagit. Jiisusi oqarpoq: „Minninnguit uannut uppertut ukua ilaannik tammartitsisoqarpat taassumunnga pitsaanerussagaluarpoq aserorteriviup ujarattaa qungasianut qilerullugu immap itinersaanut kivisitaaguni.“ — Matthæusi 18:6.

 Uppinngitsumik aappaqarneq

13, 14. Ilumuunngitsuliornerit ilaat suna Malakip uparuarpaa?

¹³ Malaki kapitali 2 versi 10-miit ilumuunngitsuliorneq suunersoq suli toqqaannarnerusumik allaatigineqarpoq. Malakip pingaarnerutillugit sammivai iliuutsit assigiinngitsut marluk imminnut assingusut, Israelikkullu ’ilumuunngitsuliornerartuarlugit’. Malugiuk Malaki siunnersuitinnani aperisoq: „Guuti ataaseq ataataginnginnerparput tamatta? Guutip ataatsip taannaasup pinngortitarinnginnerpaatigut? Sooq taava inoqatitsinnut ilumuunngitsuliortarpugut Guutip siuaasatsinnut angerutaa kipitillugu?“ Mal 2 Versi 11-mi allassimavoq Israelikkut ilumuunngitsuliornerat sualungaarmat „illernartuut [Jehovap] nuannarisaa“ narrunarsarneqartoq. Sunaana iliuuserisimagaat taama sualutsigisoq? Versimi kukkussutigisaasa ilaat uparuarneqarpoq: ’Guutip allanertap panianik nuliarput.’

¹⁴ Tassa Israelikkut ilaat, Jehovamut tunniulluinnarsimasut, Jehovamut pallorfiginninngitsunik nuliarsimapput. Versit ataqatigiinnerisa paasitippaatigut sooq taama sualutsigisoq. Mal 2 Versi 10-mi allassimavoq ataatsimik ataataqartut. Jaaku (Israelimik ateqalersoq) Abrahamiluunniit Adamiluunniit pineqanngillat. Malaki 1:6-p takutippaa Jehova Ataatagigaat. Inuiaat Israelikkut Jehovamut qanimut attaveqarput siuaasamillu angerusaannut ilaallutik. Angerutsip taassuma inatsisaasa ilaat imaappoq: „Aappaninnikkut atassuteqarfigissanngilatit, panitit ernerinut nuliartaaritissanngilatit taakkualuunniit panii erninnut nuliartaaritissanagit.“ — 5 Mosesi 7:3.

15. (a) Uppinngitsumik aappartaarneq ilaasa qanoq eqqortutut isigineqalersinniartarpaat? (b) Aappariinnermut Jehova qanoq isiginnittaaseqarpa?

¹⁵ Ullumikkut immaqa ima eqqarsartoqartarpoq: ’Asannilersoorfigisara inuuvoq ajunngitsoq. Qularnanngitsumik piffissap ingerlanerani upperisamik ilumoortumik ilassinnikkumaarpoq.’ Taamatut eqqarsarnerup mianersoqqussut isumassarsiarititaasoq uppernarsarpaa: „Tamanit annerusumik uummat tatigisassaanngitsuuvoq. Katsorsagassaanngilaq.“ (Jeremia 17:9) Uppinngitsumik aappartaarnissaq pillugu Guutip isiginnittaasia Malaki 2:12-imi erserpoq: „[Jehovap] piiarumaarpaa taamaaliortoq.“ Taamaattumik kristumiut ilungersortumik kajumissaarneqarput ’Naalakkamiinnaq’ kateqqullugit. (1 Korinthimiut 7:39) Kristumiut aaqqissuussaaneranni uppertoq uppinngitsumik aappartaartoq ’piiagaaneq ajorpoq’. Uppertulli eqqarsaatigisariaqarpaa ungasinngitsukkut Guutip pissutsit aaqqissuussaanerat manna atorunnaarsippagu uppinngitsoq qanoq pineqassanersoq. — Tussiaat 37:37, 38.

Aapparmik ajortumik pinninneq

16, 17. Ilaat qanoq ilumuunngitsuliorpat?

¹⁶ Maanna Malakip nangilluni eqqunngitsuliorneq alla ilumuunngitsuliornermut ersiutaasoq allaatigaa: aapparmik ajortumik pinninneq, ingammik eqqunngitsumik pissuteqarluni avinneq. Kapitali 2 versi 14-imi allassimavoq: ’[Jehova] ilisimannittuuvoq illit nuliavillu inuusuttuuninniilli nuliarisavit akunnissinni, tassa taanna nuliaasutut ilinnut atavissuugaluartoq ilumuunngitsuliorfigigakku.’ Juutit uiusut nuliaminnut ilumuunngitsuliornermikkut Jehovap pilliiviata ’qullinik matoorneqarneranut’ pisuupput. (Malaki 2:13) Angutit taakku eqqunngitsumik pissuteqarlutik avipput inuusuttuunerminnilu nuliatik qimallugit, qularnanngitsumik inuusunnerusunik guutimilluunniit nalusunik nuliarniarlutik. Tamannalu palasit ajortunngorsimasut isiginngitsuusaarpaat. Allassimavoq: ’Avinneq uumigaara, oqarpoq Jehova, Israelip Guutia.’ (Malaki 2:16, NV) Kingusinnersukkut  Jiisusip takutippaa pissuussuteqanngitsup aappartaaqqinnissaanut allasiorneq avinnermut pissutissatuaasoq. — Matthæusi 19:9.

¹⁷ Malakip oqaasii eqqarsaatigilaakkit, paasillugulu uummammut inuullu pissusiinut ajunngitsunut qanoq kajumissaarisoq. Malakip nuliaasoq ima oqaatigaa: ’Ilinnut atavissoq.’ Angutit pineqartut tamarmik uppeqatiminnik Israelikkuusumik aappartaarsimapput, inooqatissamittullu asasatut ’atavissussatut’ qinersimallugu. Marluullutik inuusuttuutillutilli aappariilersimagaluarlutik ukiut ingerlaneranni utoqqalilernerannilu angerfigeqatigiinnerat, tassa aappariinnerat, atorunnaartariaqanngikkaluarpoq.

18. Ilumuunngitsuliornermut tunngatillugu Malakip siunnersuutaa sooq ullumikkut atorsinnaava?

¹⁸ Siunnersuutit taakku ullumikkut suli taama atorsinnaatigipput. Ajoraluartumik ilaasa Naalakkamiinnaq aappartaarnissamik Guutip inassutaa sumiginnarpaat. Aammattaaq ajuusaarnarpoq ilaasa aappariilluartuaannarnissartik sulissutigiunnaarsimammassuk. Sulissuteqaratik utoqqatsissutissarsiuinnarput Guutip uumigisaanik iliornerminnut, tassa Biibilimut akerliusumik pissuteqarlutik avinnerminnut allamillu aappartaarnerminnut. Taamaalillutik Jehova ’qasutippaat’. Malakip nalaani Guutip siunnersuutaanik sumiginnaasut soqqusaallutik eqqartorneqartumut Jehovap isiginnittaasia pissutissaqannginnerarpaat. Ima oqarpullusooq: „Guuti taanna eqqartuussisussaq sumiikkami?“ Perorsarnerlugaassusiat! Taamaalinngisaannarta. — Malaki 2:17.

19. Uisut nuliaasullu Guutip anersaavanik qanoq ilumioqalersinnaappat?

¹⁹ Malakilli oqaasiini erserpoq nalaani anguteqartoq nuliaminnut ilumuunngitsuliunngitsunik. Taakku ’Guutip anersaava illernartoq annaasimanngilaat’.  (Mal 2 Versi 15, NV) Qujanartumik ullumikkut Guutip peqatigiissortaani taamaattunik anguterpassuaqarpoq. Angutaapput ’nuliaminnik ataqqinnittut’. (1 Petrusi 3:7) Nuliatik timikkut oqaatsitigulluunniit naalliutsinneq ajorpaat, nikanarsaataasumik kinguaassiuutitigut pinngitsaalillugit atoqatigineq ajorpaat arnanulluunniit allanut qaninniarnermikkut tiingasulersaarutinilluunniit isiginnaarnermikkut ataqqinaataajartarnagit. Aammattaaq Jehovap peqatigiissortaani aalajaatsunik nuliaasunik kristumiorpassuaqarpoq Guutimut inatsisaanullu ilumoortunik. Angutit arnallu taakku suna Guutip uumigigaa nalunngilaat, tamannalu naapertorlugu eqqarsartarput iliuuseqartarlutillu. Taakkutut iliortuaannarta ’Guuti naalakkatsitut’ naalallugu Guutillu anersaavanik illernartumik pilluaqquneqangaarluta. — Apustilit Suliaat 5:29, NV.

20. Inuiannut tamanut piffissaq suna qanilliva?

²⁰ Qanittukkut Jehovap silarsuaq manna eqqartuutissavaa. Inuit tamarmik uppernerminnut iliuutsiminnullu akisussaapput, ’tamattami immikkut Guutimut nassuertussaavugut’. (Romamiut 14:12) Taamaattumik apeqqut una soqutiginarpoq: Jehovap ullussaani kina aniguissava? Allaaserisat pingajuanni kingullermilu tamanna sammineqarpoq.

Nassuiarsinnaavigit?

• Jehovap Israelimi palasit sooq assuarai?

• Inuit eqqortitsinissaannut sooq Guutip najoqqutassiai qutsippallaanngillat?

• Ilinniartitsinitsinnut atatillugu suna mianersorfigissavarput?

• Suut marluk Jehovap ingammik assuarai?

[Atuaqqissaarnermi apeqqutit]

[Qupp. 15-mi assiliartaq]

Malakip nalaani palasit assuarineqarput Jehovap aqqutigeqqusaaniiginnannginnamik

[Qupp. 16-mi assiliartaq]

Jehovap najoqqutassiai ilinniartitsissutigisariaqarpavut nammineq isummavut salliutinniarnagit

[Qupp. 18-mi assiliartaq]

Jehovap Israelikkut eqqunngitsumik pissuteqarlutik nuliaminnit averiarlutik guutimik nalusunik nuliartut assuarai

[Qupp. 18-mi assiliartaq]

Ullumikkut kristumiut aappariittut angerfigeqatigiinnertik ataqqivaat