Jehovap ullussaani kikkut aniguissappat?
Jehovap ullussaani kikkut aniguissappat?
„Nalliutilerpoq ulloq uutsitsivittut ikumasutut ittoq.“ — MALAKI 3:19.
1. Pissutsit aaqqissuussaanerata ajortup matuma naggatissaa Malakip qanoq allaatigaa?
GUUTIP pruffiiti Malaki isumassarsisillugu siunissami ungasinngitsukkut pisussanik mianernangaartunik allatsippaa. Pisussat nunarsuarmi inunnik tamanik attuissapput. Malaki 3:19-imi ima siulittuuteqarpoq: „Maanna nalliutilerpoq ulloq uutsitsivittut ikumasutut ittoq. Soqqusaatsut iluaatsutullu iliortut tamarmik karriiarnikutut ilissapput; ullussallu piumaartussap ikikkassavai, oqarpoq Katersaarsuit [Jehovaat], sorlannik avalequtinillu amiakkuerullugit.“ Pissutsit aaqqissuussaanerat ajortoq manna qanoq aserugaalluinnartigissava? Orpiup sorlaanik aseruinertulli aserugaatigissaaq. Naaqqinngisaannassaaq.
2. Allassimaffiit ilaanni Jehovap ullussaa qanoq allaatigineqarpa?
2 Immaqa ima aperivutit: ’„Ulloq“ sunaana pruffiiti Malakip siulittuutigigaa?’ Ulloq taanna Esajap allagaani kapitali 13 versi 9-mi aamma allaatigineqarpoq, ima allassimavoq: „Tassa [Jehovap] ullua nalliutilerpoq tataannaqaluni, uumitsannermik kamangaarnermillu nassataqarluni nunarsuaq inoqajuitsunngortikkumallugu inuilu ajortuliortut piiarumallugit.“ Ulloq taanna Sefania 1:15-imi ima allaatigineqarpoq: „Ulloq taanna tassaassaaq kamannerup ullussaa, ulloq naalliuffissaq, annikilliorfissaq, ulloq piuneerussaaffissaq, aserugaaffissaq, ulloq taggarissuusussaq, ulloq qulisimasoq taartunillu nuialik.“
’Naalliunnartoqangaarneq’
3. ’Jehovap ullussaa’ suua?
3 Malakip siulittuutaata eqquunnerani annermi ’Jehovap ullussaata’ ilisarnaatigissavaa ’naalliunnartoqangaarnera’. Jiisusi ima siulittuivoq: „Naalliunnartoqangaassaaq silarsuup pileqqaarneraniit maannamut asseqanngitsumik nalliuteqqinngisaannassasumillu.“ (Matthæusi 24:21) Eqqarsaatigikkit silarsuarmi naalliuuterpassuit takusariikkagut, ingammik 1914-ip kingorna. (Matthæusi 24:7-12) Sorsunnersuup Aappaaniinnaq inuit 50 millionit sinnerlugit toqupput. Taamaattoq ’naalliunnartoqangaarnerani’ inuunerminnik annaasaqartussanut sanilliullugit ikittuararsuussapput. Naalliunnartoqangaarnera taanna, Jehovap ullussaani pisussaq, Harmagedonimi naassaaq pissutsillu aaqqissuussaanerata matuma ajortup ullui naggaserneqarlutik. — 2 Timotheusi 3:1-5, 13; Saqqummersitat 7:14; 16:14, 16.
4. Jehovap ullua naappat susoqassava?
4 Jehovap ullussaata naalernerani Saatanip silarsuaa taassumanngalu tapersersuisut piiagaassapput. Eqqunngitsumik upperisarsiornerit siulliullutik piiagaassapput. Taava Saatanip politikkikkut aningaasarsiornikkullu aaqqissuussineri Jehovap piuneerutissavai. (Saqqummersitat 17:12-14; 19:17, 18) Ezekieli ima siulittuivoq: „Sølviutitik aqqusinermut eqqassavaat, kuultiutaallu minguttunngussapput. Sølviutitik kuultiutitillu annassutigissanngilaat ullormi [Jehovap] kamaffissaani.“ (Ezekieli 7:19) Ulloq taanna pillugu Sefania 1:14-mi allassimavoq: „Qanillivoq [Jehovap] ullussarsua; qanilliartulertoqaaq!“ Jehovap ullussaa pillugu Biibilimi allassimasoq eqqarsaatigalugu, Guutip piumasaqaataanut naapertuilluartunut naapertuuttumik iliornissarput aalajangiusimasariaqarparput.
5. Jehovap aqqanik mianerinnittut suna misigissavaat?
5 Jehovap ullussaa Saatanip silarsuaanut qanoq attuiumaarnera siulittuutigereerlugu Jehovap oqaasii Malaki 3:20-mi issuarneqarput: „Ilissinnut atinnik mianerinnittunut qinngorumaarpoq seqineq iluassuseqarfissaq, suluisa ataanni katsorsaaneqassaaq. Aniumaarpusi pisseqattaarumaarlusilu nersuteeqqatut puallarsikkatut.“ „Seqineq iluassuseqarfissaq“ tassaavoq Jiisusi Kristusi. Anersaakkut ’silarsuarmut qaammaqqutaavoq’. (Johannesi 8:12) Jiisusi qinngorpoq ’sulummi ataanni katsorsaalluni’ — siullermik anersaakkut, ullumikkut misigeriikkatsitut, silarsuassamilu nutaami timikkut peqqissilluinnartitsilluni. Jehovap oqarneratut ajorunnaartut ’aniumaarput pisseqattaarlutillu nersuteeqqatut puallarsikkatut’ aniguisitaanertik nuannaarutigalugu.
6. Ajugaanersiorneq suna Jehovap kiffaasa misigissavaat?
6 Jehovap piumasaqaataanik sumiginnaasut qanoq pineqassappat? Malaki 3:21-mi allassimavoq: „Ullormi uanga qanoq iliuuseqarfissanni [Guutimut kiffaasusi] iluaatsut tullaarissavasi, taakkualu assigilissavaat pujoralaat alussinniittut, oqarpoq Katersaarsuit [Jehovaat].“ (Malaki 4:3) Guutimut pallorfiginnittut Saatanip silarsuaanik aserueqataassanngillat. Assersuutaasumilli ’iluaatsunik tullaarinnissapput’ Jehovap ulluata kingorna ajugaanersiornersuarmut peqataanermikkut. Faraop sakkutuui Immami Ivissuartuumi piuneerussaammata ajugaanersiornersuaqarpoq. (2 Mosesi 15:1-21) Saatani silarsuaalu naalliunnartoqangaarnerani piiagaappata aamma ajugaanersiortoqassaaq. Kiffat aalajaatsut Jehovap ulluani aniguisut, ima nillissapput: „Annaassinera qiimmattaatigalugulu tipaatsuutigisigu.“ (Esaja 25:9) Jehovap kisimi oqartussaanera akitsisinneqarpat nunalu ajortueruppat inuit eqqissillutik inuusinnaalersillugit nuannaangaarnissamut pissutissaqassaaq.
Kristumiuunerartut Israeli ilaarpaat
7, 8. Malakip nalaani Israelikkut anersaakkut qanoq innerat oqaluttuariuk.
7 Jehovamut iluarisaasumik attaveqalersut tassaapput tassunga kiffartortut, akerlianillu tassunga kiffartunngitsut iluarisaalinngillat. Malakip, ukioq 443-p u.n.s. missaani, allakkani allammagit pissutsit aamma taamaapput. Ukiumi 537-mi u.n.s. Israelikkut sinneruttut Babylonimi ukiuni 70-ini tigusaaqqareerlutik uterput. Ukiunili hundredelinni tulliuttuni inuiaat pilerseqqinneqartut tunusseqqilerput guutiitsunngoqqillutillu. Inuinnaat amerlanersaasa Jehovap aqqa ataqqinaataajarpaat, inatsisai naapertuilluartut sumiginnarlugit, naalaffia uumasunik tappiitsunik, tusiattunik napparsimasunillu pilliinermikkut mingutsillugu aamma inuusunnerminniit nuliaminnit avillutik.
8 Taamaattumik Jehovap ima oqarfigai: „Maanna eqqartuukkiartulerpassi. Piaartumik sassarumaarpunga ilisimannittutut unnerluutigissallugit angakkuartartut allasiortullu sallullutillu uppernarsaasartut, sulisitat akissarsiassaannik tunniussinngitsoortartut, ilassinnikkumanngitsut takornartanik, uillarnernik iliarsunnillu. Uangali mianerinngilaannga . . . Uanga [Jehova] allanngorsimanngilanga.“ (Malaki 3:5, 6) Taamaattoq Jehovap ajortuliortarunnaarusuttut tamaasa ima kajumissaarpai: „Uannut saanniarniaritsi, taava uanga ilissinnut saassaanga,“ — Malaki 3:7.
9. Malakip siulittuutai siullermik qanoq eqquuppat?
9 Oqaatsit taakku aamma ukiuni hundrelinni siullerni eqquupput. Juutit ikittunnguit Jehovamut kiffartornissartik qinerpaat ilaalerlutillu ’inuiannut’ nutaanut kristuminut tanitanut, piffissap ingerlanerani guutimik nalusunik ilaqalersunut. Juutilli amerlanersaasa Jiisusi itigartippaat. Taamaattumik Jiisusip inuiaat Israelikkut ima oqarfigai: „Illorsi ilissinnut qimagaassaaq inuerullugu.“ (Matthæusi 23:38; 1 Korinthimiut 16:22) Malaki 3:19-imi siulittuutigineqartutut, „ulloq uutsitsivittut ikumasutut ittoq“ ukiumi 70-imi juutit misigaat. Jerusalemi naalaffillu aserorneqarput, inuillu 1 millioninit amerlanerusut kaannersuarmi, pissaaneqarniunnermi romamiullu sakkutuuisa saassussineranni toqusorineqarput. Jehovamulli kiffartortut naalliunnartoqangaarnera anigorpaat. — Markusi 13:14-20.
10. Palasit inuinnaallu ukiuni hundredelinni inuiannik Israelikkunnik qanoq ilaarsippat?
10 Inuiaat, ingammik kristumiuunerartut, ukiuni hundrelinni inuiaat Israelikkut ilaarpaat. Siulersuisut inuinnaallu upperisarsiornikkut namminneq isummatik salliutinnerusimavaat sallusuissutit Guutimeersut Jiisusip ilinniartitsissutigisai pinnagit. Ingammik palasit assuarineqartariaqarput. Jehovap aqqa atorumanngilaat allaallu Biibilimik nutsikkaminni peersimallugu. Jehova ataqqinaataajarpaat Biibilerpalaanngitsunik, ilaatigut guutimik nalusut ajoqersuutaannik anniarfimmi naassaanngitsumik naalliutsitsinermik, ataasiullunilu pingasuusumik, tarnip toqusuitsuuneranik pinngoriartuaasimanermillu isumaliutersuummik, ilinniartitsinermikkut. Taamaalillutik Jehova ataqqineqarnissaatut ataqqiumanngilaat, Malakip nalaani palasit iliornerattorluinnaq.
11. Silarsuarmi upperisarsiortut kinarpiaq kiffartorfigalugu qanoq takutippaat?
11 1914-imi ullut kingulliit aallartimmata silarsuup matuma upperisarsiortuisa, ingammik kristumiuunerartut, takutippaat kina kiffartorfiginerlugu. Sorsunnersuarni marlunni ilaasortatik kajumissaartarpaat inuiaassutsikkut aaqqiagiinngissutit pissutigalugit sorsunnermi sorsoqataaqqullugit, uppeqatiminnilluunniit toqutsisariaqassagaluarpata. Guutip oqaasiani erseqqissumik takuneqarsinnaavoq Jehovamut naalattut tassungalu naalanngitsut suna ilisarnaatigineraat. Allassimavoq: „Matumuuna erseqqissivoq kikkut Guutip qitornarigai kikkullu Diaavulup qitornarigai: Kinaluunniit iluartumik iliunngitsoq Guutimit pisuunngilaq, soorluttaaq qatanngumminik asannittuunngitsoq Guutimit pisuusinnaanngitsoq. Tusarliussarmi una tassaavoq pileqqaarneranniilli tusarsimasarsi: Asaqatigiissaagut assigissanagulu Kaini Ajortumit pisuusoq nukkaminillu toqutsisoq.“ — 1 Johannesi 3:10-12.
Siulittuut eqquuttoq
12, 13. Guutip kiffaasa siulittuutit suut ullumikkut eqquutitippaat?
12 1918-imi Sorsunersuup Siulliup naalernerani Jehovap kiffaasa takusinnaavaat kristumiuunerartut eqqunngitsumillu upperisarsiornerup sinnera eqqartuutereersimagai. Taamanimiilli eqqortuliorusuttunut ima kajumissaaruteqarpoq: „Qimallugu anigitsi, innuttakka, ajortuliornerini peqataaqqunasi perluutaanillu eqqorneqaqqunasi. Ajortuliaami qaleriiaarlutik qilammut apissisimapput, iluaatsuliornerilu Guutip puiorsimanngilai.“ (Saqqummersitat 18:4, 5) Jehovamut kiffartorusuttut eqqunngitsumik upperisarsiornermit mingutsitaanernit tamanit minguiarneqalerput. Tamatumalu kingorna silarsuaq tamakkerlugu naalagaaffik pilersinneqarsimasoq pillugu nutaarsiassamik nuannersumik oqaluussisalerput — suliaq pissutsit aaqqissuussaanerat ajortoq manna atorunnaarsinneqartinnagu naammassineqartussaq. — Matthæusi 24:14.
13 Tamanna pivoq Malaki 3:23-mi siulittuut eqquunniassammat. Tassani Jehova oqarpoq: „Pruffiiti Elia ilissinnut aallartikkumaarpara [Jehovap] ullussaa pingaartoq siooranaqisorlu nalliutinngikkallartillugu.“ Siulittuut siullermik eqquuppoq Johannesi Kuisisup, Eliamut assersuutaasup, suliaani. Juutit Angerutsimut ajortuliaminnik peqqissimissutiginnittut kuigamigit Johannesi Eliap suliaanut assingusumik suliaqarpoq. Johannesilli Missiarsimut aqqutissiuisuunera pingaaruteqarnerungaarpoq. Johannesilli suliaa Malakip siulittuutaata eqquunneraa minnerusoq. Jiisusip uparuarpaa Johannesi Eliamut assersuutaasoq, ersersippaattaarli Eliap ulapputigisaanut assingusumik siunissami suliaqartoqarumaartoq. — Matthæusi 17:11, 12.
14. Pissutsit aaqqissuussaanerat manna atorunnaartinnagu pingaarutilik suna suliarineqartussaava?
14 Malakip siulittuutaata takutippaa suliarujussuaq tamanna „[Jehovap] ullussaa pingaartoq siooranaqisorlu nalliutinngikkallartillugu“ suliarineqarumaartoq. Ulloq taanna naassaaq Guutip Ajugaqanngitsup ullussarsuani Harmagedonimi maanna qanilliartorasuartumi. Tassa pissutsit aaqqissuusaanerat ajortoq manna atorunnartinnagu Guutillu qilammi naalakkersuinerata ataani ukiuni tusindini naalakkersuineq atulertinnagu Eliap suliaanut assingusumik suliaqartoqarumaarpoq. Siulittuutip eqquunneratut ullumikkut katersat Eliatut ittut, kristumiunit nunami inuunissamik neriugisalinnit millionilinnit tapersersorneqarlutik, aallussilluarlutik pallorfiginninnermik ilumoortumik pilersitsitseqqinnermik, Jehovap aqqanik qutsissisitsinermik assersuutaasumillu savanut Biibilimik ilinniartitsinermik suliaqarput.
Jehovap kiffani pilluaqqusarpai
15. Jehovap kiffani qanoq eqqaamavai?
15 Jehovap kiffartortini pilluaqqusarpai. Malaki 3:16-imi allassimavoq: „[Jehovamik] mianerinnittut taamani oqaloqatigiipput, [Jehovalu] naalaaqqissaarpoq. Mappersagarlu allanneqarpoq [Jehovamik] mianerinnittut aqqanillu ataqqinnittut taassumannga eqqaamaneqaqqullugit.“ Abelip nalaaniilli Guuti eqqaamajumasami naassaanngitsumillu inuunissamik periarfissikkumasami aqqinik atuakkamut allattuivorlusooq. Taakkununnga Jehova oqarpoq: „Pissarsiat qulingi ilanngarnagit aattarniarsigit peqqumaasivimmut, uanga illunni nerisassamaateqaqqullugu. Taamaalillusi misilinniarsinga qilaap igalaavi ammassanerikka ilissinnut pilluaatissanillu killeqanngitsunik kueraaffigalusi.“ — Malaki 3:10.
16, 17. Jehovap kiffani taakkulu suliaat qanoq pilluaqquai?
16 Jehovap kiffani pilluaqqungaarsimavai. Siullermik siunertarminik paasisaqarnerulersippai. (Ussatit 4:18; Danieli 12:10) Aappassaanik oqaluussinermi tupaallannartumik angusaqarluarsimapput. Eqqortuliorusuttorpassuit pallorfiginninnermut ilumoortumut ilanngussimapput, taakkualu tassaapput ’inuppassuit amerlangaartut . . . inuiaqatigiinnit naggueqatigiinnillu inuiannillu immikkullu oqaasilinnit tamanit pisut, . . . Nipitoqisumillu torlulapput: Annassut Guutitsinnit issiavissaarsuarmi issiasumit Savaaqqamillu pivoq’. (Saqqummersitat 7:9, 10) Amerlangaartut arajutsisassaanngillat, Jehovamullu kiffartorlutik suleqataasut silarsuaq tamakkerlugu ilagiinni 93.000-nit amerlanerusuni 6 millioninit amerlanerupput.
17 Jehovap pilluaqqusinera aamma takuneqarsinnaavoq oqaluttuarisaanermi atuagassianik Biibililersaarutinik siaruarsimanerpaanik Jehovap Nalunaajaasui saqqummersitsisarmata. Qaammatit tamaasa Napasuliaq Alapernaarsuiffik Iteritsi!-lu 90 millioninngorlugit naqinneqartarput. Napasuliaq Alapernaasuiffik oqaatsini 144-ni saqqummertarpoq, Iteritsi!-lu oqaatsini 87-ini. Biibilimik atuaqqissaaqatigiissut sagdlusuíssut inûnigssamut nâgssáungitsumut sangmissoq, kalaallisut 1973-imi saqqummersinneqartoq, oqaatsini 117-ini 107 millioninngorlugu naqiterneqarpoq. Atuagaq pâratîsime nunami nâgssáungitsumik inûsínauvutit, kalaallisut 1986-imi saqqummersoq, oqaatsini 131-ni 81 millioninit amerlanerusunngorlugu naqiterneqarpoq. Atuagaq Ilisarsineq inuunermut naassaanngitsumut sammisoq, 1995-imi saqqummersoq, manna tikillugu oqaatsini 154-ini 85 millioninit amerlanerusunngorlugu naqiterneqareerpoq. Atuagassiaaraq Guutip sumik piumaffigaatigut? 1996-imi saqqummersoq maanna oqaatsini 244-ni 150 millioninit amerlanerusunngorlugu naqiterneqareerpoq.
18. Sooq akerlilersorneqaraluarluta anersaakkut atugarissaarpugut?
18 Saatanip silarsuaanit sakkortuumik akerlilersorneqartuaraluarluta anersaakkut atugarissaarnerput nuannaarutigisinnaasimavarput. Tamatuma Esaja 54:17-imi allassimasut ilumoornerat uppernarsarpaa: „Sakkut ilinnut sakkuaatissatut saffiukkat atorsinnaassuseqassanngillat, oqqat ilinnik unnerluutiginnittut tamaasa eqqartuutitissavatit pisuusutut. Tassa [Jehovap] kiffaasa pissarsiassaat, iluarnerat uannit pivoq, oqarpoq [Jehova].“ Malaki 3:17-ni annermik eqquukkumaartoq nalunnginnamikku Jehovap kiffaasa tuppallersaatigingaarpaat, allassimavoq: „Ullormi qanoq iliuuseqarfissanni, oqarpoq Katersaarsuit [Jehovaat], taakku uanga pigissavakka.“
Jehovamut kiffartorneq nuannersoq
19. Jehovap kiffai allanit qanoq immikkooruteqarpat?
19 Jehovap kiffaasa aalajaatsut inuillu Saatanip silarsuaaniittut assigiinngissutaat piffissap ingerlanerani malunnarsiartuinnarsimavoq. Malaki 3:18-imi ima siulittuuteqarpoq: „Taava kingumut immikkoortissinnaanngussavarsi iluartoq iluanngitsumit, tassa Guutimik kiffartuussisoq kiffartuussisuunngitsumit.“ Jehovap kiffaasa immikkooruterpassuisa ilagaat nuannaarneq, ilaatigut nuanningaartumik neriugisaqarnermik pissuteqartoq. Jehovap neriorsuutaa tatigilluinnarpaat: „Maanna qilak nutaaq nunalu nutaaq pinngortissavakka; pereersut eqqaamaneerutissapput eqqaaqqinneqarnatillu. Kisianni pinngortitakka naassaanngitsumik tipaatsuutigalugillu qiimmattaatigissavasi.“ — Esaja 65:17, 18; Tussiaat 37:10, 11, 29; Saqqummersitat 21:4, 5.
20. Sooq Jehovap neriorsuutai tatigaavut?
20 Jehovap ullussaani silarsuaq tamakkerlugu kiffaminik aalajaatsunik aniguisitsinissaminik silarsuassamullu nutaamut siulersuinissaminik Jehovap neriorsuinera tatigaarput. (Sefania 2:3; Saqqummersitat 7:13, 14) Tamannalu nalliutsinnagu immaqa utoqqalilluni, nappaateqarluni ajutoornikkulluunniit toqusoqartaraluartoq, Jehova oqaatsimini neriorsuivoq makitikkumaarlugit naassaanngitsumillu inuunissamut periarfissinniarlugit. (Johannesi 5:28, 29; Titusi 1:2) Tassa Jehovap ullussaa qanilliartortillugu ajornartorsiuteqaraluarluta unamminiagaqaraluarlutalu nunarsuarmi pilluarnerpaanissatsinnut pissutissaqangaarpugut. (wE 5/1 02)
Qanoq akissavit?
• „Jehovap ullussaa“ suua?
• Silarsuarmi upperisarsiortut itsaq Israeli qanoq ilaarpaat?
• Jehovap kiffaasa siulittuutit suut eqquutitippaat?
• Jehovap innuttani qanoq pilluaqqusarpai?
[Atuaqqissaarnermi apeqqutit]
[Qupp. 21-mi assiliartaq]
Ukiuni hundredelinni siullerni Jerusalemi ’uutsitsivittut ikumasutut ippoq’
[Qupp. 23-mi assiliartaq]
Jehovap kiffani isumassorpai
[Qupp. 24-mi assiliartaq]
Neriugisartik nuanningaartoq pissutigalugu Jehovap kiffai piviusumik nuannaartuupput