Qanoq ernerup ataatani ikioraa

JAMES, tuluk 30-t sinnerlugit ukiulik, qaratsamigut ajoquteqalaartuuvoq. Ukiorpassuarni anaanani aleqanilu ilagalugit Jehovap Nalunaajaasuisa ataatsimiittarnerinut najuuttarsimavoq. Ataataata ilaquttami upperisaat soqutiginngisaannarsimavaa. Unnuilli ilaanni ataatsimiinnermi takutitsisoqarpoq, qanoq ililluni Kristusip toquneranik eqqaaniaalluni nalliuttorsiornermut ilisarisimasanik qaaqqusisoqarsinnaasoq. James angerlarami iniminut isipallappoq. Ernumagalugu anaanaata malikkamiuk takuaa atuagassianik Napasuliaq Alapernaarsuiffik-nik Iteritsi!-nillu nutaanngitsunik assaarsuataartoq. Atuagassiap tunuani eqqaaniaalluni nalliuttorsiornermut qaaqqusissutitalik toqqarpaa ataataminukapallallunilu. Assiliaq tikkuariarlugu ataatani tikkuarpaa oqarlunilu: „Illit!“ Anaanaa ataataalu imminnut qiviarput paasigamikku Jamesip ataatani eqqaaniaalluni nalluttorsiornermut qaaqqugaa. Ataataa oqarpoq imaassinnaasoq ilaasoq.

Unnuk taanna eqqaaniaalluni nalliuttorsiorfissanngormat Jamesip ataatami atisaasivianut qarlinnik aallersinnarluni ataataminukaappai ussersorfigalugulu ateqqullugit. Ataataata akivaa ilaaniarnani, taava James anaananilu kisimiillutik ingerlaannarput.

Tamatuma kingorna James anaanami ataatsimiigiarnissamut piareersaqqugaangani piuminaattalerpoq. Ataatani ilagalugu angerlarsimaannarusunneruvoq. Ilaanni sapaatikkut ullaakkut pisarnermisunaasiit piuminaattoq, anaanaa tupaallappoq ataataata erni aperigamiuk: „James, ataatsimiigiaqataaguma ilaassagaluarpit?“ James nuannaatsangaarluni ataatani eqippaa akillunilu „Aap!“ Taava pingasuullutik naalagaaffilersaaffiliarput.

Taamanimiilli Jamesip ataataa sapaatikkut ataatsimiigiartalerpoq, oqakumisaarlunilu anersaakkut siuariassaguni ataatsimiittarnerit allat aamma najuuffigisariaqarlugit. (Hebræerit 10:24, 25) Oqarnermisut iliorpoq, qaammatit marluk qaangiummata aaqqissuulluakkamik Biibili misissortalerpaa. Siuariartupallappoq inuunerminilu pisariaqavissunik allannguilluni. Erininarserianngitsoq oqaluussisalerpoq. Biibilimik misissuileqqaarnerminit ukioq ataaseq qaangiummat Jehovamut tunniulluinnarpoq kuisillunilu. Maannakkut najugaqarfigisamini ilagiinni kiffartortuuvoq. Ullumikkut ilaqutariit tamarmik ataasiussuseqarlutik Jehova kiffartorfigaat. (wE 5/1 02)