Atuartartut apeqqutaat

Kristumiut ilumoortut oqaluffimmi ilisinermut katittunulluunniit najuunnissaat silatusaarnerussava?

Eqqunngitsumik pallorfiginninnermut sumulluunniit peqataaneq ingalattariaqarparput, Jehovap iluarinngimmagu. (2 Korinthimiut 6:14-17; Saqqummersitat 18:4) Oqaluffimmi ilisineq upperisarsiornikkut ileqqulersuutaavoq, tassunngalu ilanngunneqartarput takorluukkat Biibilimut naapertuutinngitsut, assersuutigalugu tarnip toqusuitsuuneranik inuillu ajunngitsut tamarmik qilaliarnissaannik ajoqersuutit. Imaassinnaavoq katersuussimasut sanningasutut ittumik ussersortut, qularnanngitsumillu palasip najuuttut qinnummik siulersorlugilluunniit pilluaqqussavai. Qinnutit upperisarsiornikkullu ileqqulersuutit allat, Biibilimi ajoqersuutinut akerliusut, aamma oqaluffimmi allamiluunniit katittorsiornermi atorneqarsinnaapput. Kristumiu eqqunngitsumik guutisiortuinnaat akornanniikkuni, ileqqulersuutinut peqataanngitsoornissani akioruminaatsissinnaavaa. Silatusaarnerunngilaq tatineqarfiusinnaasumiinnissaq.

Kristumiulli oqaluffimmi ilisisunut imaluunniit katittunut ilaasariaqarlutik misigigunik qanoq iliussappat? Immaqa uiusup uppinngitsup nuliani kristumiu ilaaqqullugu kimigiiserfigisinnaavaa. Taava ataqqinnilluni isiginnaartutut ilaaginnarsinnaava? Immaqa uini eqqarsaatigalugu aalajangerpoq ilaaniarluni, aalajangiusimalluinnarlugu upperisarsiornikkut iliuutsinut peqataaniarnani. Aammali imaassinnaavoq ilaaniarnani aalajangertoq, paasigamiuk tassani misigissutsimigut tatineqarpallaarsinnaalluni immaqalu akuerinngisaminut akuersiinnartoorsinnaalluni. Nammineq aalajangigassaraa, ajunnginnerusorisaminik iliornermigut ilerasuuteqanngittuaannarnissani kissaatigigamiuk. — 1 Timotheusi 1:19.

Iluaqutiginngitsoornavianngilaa uini nassuiaakkuniuk upperisarsiornermi ileqqulersuutit, tussiarnerit, qinoqatigiinnerni sikinnerit imaluunniit pilluaqqusinerni nikuinnerit ilerasuuteqarnani peqataaffigisinnaanagit. Imaassinnaavoq uiata imatut inernileraa nuliami najuunnissaa imminut nuanniilliortitsiinnaassasoq. Nuliani asagamiuk, upperisaanut ataqqinnikkami imaluunniit nuanniilliornissani pinngitsoorusukkamiuk imaassinnaavoq aalajangertoq kisimiinniarluni. Nulianili ilaaqquppagu, immaqa nulia ilaaginnassaaq oqaluffimmilu pisunut peqataanngiinnarluni.

Aamma eqqarsaatigisariaqarpoq upperisarsiornikkut ileqqulersortunut najuunneq uppeqatinut qanoq sunniuteqarsinnaanera. Ilaasa nalungeqatiginnissusiat ajoquserneqarsinnaava, imaluunniit guutipilussioqataajumasannginnerat sanngiillisinneqarsinnaava? Apustili Paulusip kristumiut ima siunnersorpai: „Suna pingaartittariaqartoq paasisinnaasaqqullusiuk, minguitsooqqullusi assuarnaatsooqqullusilu Kristusip ullussaani.“ — Filippimiut 1:10.

Qanigisaappat imaassinnaavoq ilaqutaasut kimigiisernerulersut. Kristumiut eqqarsaatigeqqissaartariaqarpaat oqaluffimmi ilisinermut katittunulluunniit najuunneq qanoq kinguneqassanersoq. Pissutsini aalajangersimasuni immaqa ima inerniliisoqarsinnaavoq najuunnissaq ajornartorsiutitaqarnavianngitsoq. Aammali imaassinnaavoq najuunneq nammineq allalluunniit nalunngeqatiginnissutaannik ajoqusiisinnaasoq, tamannalu immaqa najuussimanermit aliasuutaanerusinnaavoq. Qanorluunniit ikkaluarpat kristumiut qulakkeertariaqarpaat aalajangigartik taanna Guutimut inunnullu ilerasuutaanngitsumik kinguneqassasoq. (wE 05/15 02)