Guuti kinaava?

GUUTI „nunamit matumannga pinngilaq, pissarsuuvoq silarsuarmi pinngortitsisutut naalakkatullu pallorfigisaasoq,“ Politikens Store Nye Nudansk Ordbog-imi allassimavoq. Ordbogimi allami „Guuti“ „Qutsinnerusaartutut imaluunniit Piviusoq Qutsinnerpaatut“ oqaatigaa. Ataqqinangaartup taassuma pissusii qanoq ittuuppat?

Guuti tassaava pissaaneq kinaassuseqanngitsoq imaluunniit kinaassusiliviua? Ateqarpa? Guuti ataasiullunilu pingasuusunut ilaava inuppassuit isumaqarnerattut? Qanoq ililluta Guutimik ilisarsinerulersinnaavugut? Apeqqutinut tamakkununnga Biibili eqqorluartumik naammaginartumillu akissuteqarpoq. Allaat kajumissaarpaatigut Guuti ujaqqullugu ima allassimagami ’ilatsinnit kimilluunniit ungasinngitsuusoq’. — Apustilit Suliaat 17:27.

Pissaaneq kinaassuseqanngitsoq imaluunniit kinaassusiliviusoq?

Guutimik upperinnittorpassuit Guuti pissaaniusorisarpaat kinaassusilittut isiginagu. Kulturit ilaanni pinngortitap nukinga guutiunerarneqartarpoq. Silaannarsuarmik uumassusillillu pilerfiannik misissueqqissaarsimasorpassuit isumaqatigiissutigaat Aallarniisoqarsimassasoq. Taamaattorli Aallarniisimasoq kinaassulittut aalajangiutissallugu tunuarsimaarfigisarpaat.

Pinngortitarsuaq tupinnangaartoq takussutissaannginnerpa Aallarniisup taassuma silassoringaartuuneranik? Silassorissuuguni qarasaqarsimassaaq. Silassoringaartoq taanna pinngortitami takusinnaasarput kinaassusilimmeersimassaaq — Guutimit. Timeqarpoq, inuit timaasut uiniuttut ittuunngitsumik, anersaajullunili. Biibilimi allassimavoq: „Timeqarmat tarnip pianik aamma timeqarpoq anersaap pianik.“ (1 Korintumiut 15:44) Guutip qanoq ittuussusia Biibilimi ersarissumik allassimavoq: „Guuti anersaajuvoq.“ (Johannesi 4:24) Anersaaq uagutsinnit allaanerusumik inissisimaffeqarpoq inummullu ersinngitsuulluni. (Johannesi 1:18) Allanik ersinngitsunik anersaaqarpoq. Tassa inngilit Biibilimi aamma ’Guutip ernerinik’ taaneqartut. — Jobi 1:6; 2:1.

Guuti kinaassusiliummat anersaatut timilik, sumi arlaanniissimassaaq. Anersaakkut ineqarfia eqqaallugu Biibilimi paasitinneqarpugut Guuti ’qilammi najugaqartoq’. (1 Kunngit 8:43) Biibilimik allaqataasoq Paulusi allappoq ’Kristusi . . . qilammut . . . isertoq Guutip kiinaata saanut sassartarumalluni iluaqutissatsinnik’. — Hebræerit 9:24.

 Oqaaseq „anersaaq“ aamma allamik isumaqartillugu Biibilimi atorneqarpoq. Tussiaasiortoq Guutimut qinulluni oqarpoq: „Anersaat aallartikkaangakku pinngortarpoq.“ (Tussiaat 104:30) Anersaaq taanna Guutiunngilaq, pissaaniuvorli Guutip aallartittagaa imaluunniit kissaatigisamisut iliuuseqartittagaa. Taanna atorlugu Guutip qilak, nuna uumassusillillu tamaasa pinngortippai. (1 Mosesi 1:2; Tussiaat 33:6) Anersaava taaneqartarpoq anersaaq illernartoq. Biibili inunnit aalajangersimasunit allatsikkamiuk anersaani illernartoq atorpaa. (2 Petrusi 1:20, 21) Taamaattumik anersaaq illernartoq nukiuvoq ersinngitsoq sulissutiginnittartoq Guutip siunertaminik naammassinninnermini atortagaa.

Guuti nammineq ateqarpoq

Biibilimik allattoq Agur aperivoq: „Kia anori itummaminut katersorsimavaa? Kia imeq qilersorsinnaavaa qallersaatimini? Kia nunarsuup isui aalajangerpai? Taamaaliortoq qanoq ateqarpa, erneralu qanoq ateqarpa?“ (Ussatit 30:4) Allatut oqaatigalugu ima aperivoq: ’Inummik taamaaliortumik nalunngisaqarpit, inuup taassuma aqqa kinguaavilu taasinnaavigit?’ Pinngortitap nukingisa aqunnissaannut Guutip kisimi pissaaneqarpoq. Guutip piuneranik pinngortitat nalunaajaataagaluartut, Guutip aqqanik oqaluttuusinnaanngilaatigut. Guutip aqqa ilisimalersinnaanngilarput nammineq oqaluttuutinngippatigut. Taamaaliorsimavorlu. „Uanga tassa Jahve.“ Oqarpoq Pinngortitsisoq. „Tassa atera.“ — Esaja 42:8.

Guutip nammineq aqqa Allakkani Hebræerisuuginnarni 7000-t pallillugit allassimavoq. Jiisusi Kristusip ateq taanna allanut ilisaritippaa akitsisillugulu. (Johannesi 17:6, 26) Guutip aqqa aamma Biibilip atuagartaasa kingullersaanni allassimavoq, oqaaseq „Halleluja“ isumaqartoq „Jah unnersiutigiuk“ atorlugu. Jah Jehova-mit naalisagaavoq. (Saqqummersitat 19:1-6) Taamaattorli Biibilimik nutsikkani nutaarpassuarni ateq atorneqarpallaanngilaq. „NAALAGAQ“-mik imaluunniit „GUUTI“-mik allannerusarpaat angisuunik naqinnilerlugit oqaatsinit „Nalaagaq“-mik imaluunniit „Guuti“-mik nalinginnaasumik atorneqartartunit immikkoortissinnaajumallugit. Biibilimik misissueqqissaartartut ilaat isumaqarput taaneqarnera eqqortoq tassaasoq „Jahve“. — Tussiaat 83:19.

Sooq silarsuarmi qutsinnerpaajusup aqqa taama isumaqatigiinngissutaatigaa? Ukiut  hundredellit matuma siornatigut juutit upperisapalaavat tunngavigalugu Guutip aqqa taasarunnaarpaat, Allakkallu atuaraangamikkit „Naalaga kisimi oqartussaasoq“-mik hebræerit oqaasianik taarsertarlugu. Hebræerit oqaasii ersiuteqanngitsunik allanneqartarput, taamaattumik maannakkut eqqorluartumik ilisimasinnaanngilarput itsaq Mosesip, Daavip allallu Guutip aqqata allanneqarnera qanoq atuartarneraat. Qallunaatut „Jehova“-mik taaneqartarnera ukiuni hundredelinni nalinginnaasimavoq, nunarsuarmilu tamarmi taama oqartarneq ukiuni hundredelinni akuerisaalluni. — Takuuk 2 Mosesi 6:3.

Guutip aqqa siornatigut Hebræerisut qanoq taaneqartarnera nalornissutigineqartoq, aqqata isumaa qularutigineqanngilaq. Guutip aqqa isumaqarpoq „-nngortippoq“. Tamaalilluni „siunertalittut“ imminut ilisaritippoq. Siunertani neriorsuutinilu piviusunngortittuaannarpai. Guuti ilumoortoq, taamatut pissaaneqartoq, kisimi eqqortumik taama ateqarsinnaavoq. — Esaja 55:11.

Guutip ajugaqanngitsup aqqi Jehova qularnanngitsumik guutinit allanit tamanit immikkoorutigaa. Tamanna aqqata Biibilimi atukulaneqarneranut pissutaavoq. Biibilimik nutsigarpassuarni ateq atorumaneqanngilaq, ersarissumilli Tussiaat 83:19-mi allassimavoq: ’Aqqit tassaavoq Jahve - Qutsinnerussaartuusutit nunarsuarmi tamarmi.’ Jiisusi nunamiikkallarami ajoqersukkaminut oqarpoq: „Taamaattumik ilissi ima qinussaasi: Ataatarput qilanniittutit! Aqqit illernartitaali.“ (Matthæusi 6:9) Taamaattumik Guutip aqqa atortariaqarparput qinugaangatta, taanna pillugu oqalukkaangatta allanullu unnersiutigigaangatsigu.

Jiisusi Guutiua?

Jehova Guutip nalornitinngilaatigut ernermi kinaaneranik. Iivangkiiliumik allattoq Matthæusi oqaluttuarpoq Jiisusi kuisereermat ’nipi qilannit tutsiuttoq: „Tassa ernera asasara, nuannarisara.“’ (Matthæusi 3:16, 17) Tassa Jiisusi Kristusi Guutip erneraa.

Inuilli uppertut ilaat isumaqarput Jiisusi Guutiusoq. Allat oqartarput Guuti ataasiullunilu pingasuusoq. Ajoqersuussut taanna tunngavigalugu „Ataataq Guutiuvoq, Erneq Guutiuvoq Anersaarlu illernartoq Guutiuvoq, guutilli pingasuunngillat ataasiinnaallunili.“ Oqartoqartarpoq „timimi ataatsimiittut piginnaaneqatigiillutik naassaanngitsuullutillu: Ataataq, Erneq Anersaarlu illernartoq.“ (Den danske Folkekirke-p Nassuerutaat) Taama isumaqarneq eqqortuua?

Allakkani isumassarsiarititaasuni Jehova pillugu allassimavoq: „Guutiuvutit naassaanngilluinnartumik“. (Tussiaat 90:2) ’Naassaanngilluinnartumik kunngiuvoq’ — aallartiffeqarani naaffeqaranilu. (1 Timotheusi 1:17) Jiisusilu tassaavoq „pinngortitaani tamani erniusut siullersaat“, „Guutip pinngortitaasa pilerfiat“. (Kolossamiut 1:13-15; Saqqummersitat 3:14) Jiisusip Guuti Ataataminik taavaa oqarlunilu: „Ataataq uannit anneruvoq.“ (Johannesi 14:28) Aamma Jiisusi oqarpoq Guuti kisimi ilisimasaqartoq nammineq inngililluunniit ilisimanngisaannik. (Markusi 13:32) Jiisusi Ataataminut qinulluni ima oqarpoq: „Uanga piumasara pinnani illit piumasat pili.“ (Lukasi 22:42) Imminit qutsinnerusumut qinunngikkuni, kimut qinusimassava? Aamma Guutip Jiisusi toqusunit makitissimassavaa, Jiisusi imminut makitinnani. — Apustilit Suliaat 2:32.

Biibili tunngavigalugu Jehova Guutiusimassaaq ajugaqanngitsoq Jiisusilu erneralugu. Jiisusi nunamukanngikkallarmat nunamiitillugulluunniit naligiinngillat; aamma Jiisusip qilammut makititaanermi kingorna Ataatani naligilinngilaa. (1 Korinthimiut 11:3; 15:28) Soorlu paasereeripput Anersaaq illernartoq ataasiullunilu pingasuussumik ajoqersuutigineqartumut pingajoritinneqartoq kinaassusiliunngilaq. Nukiuvorli Guutip kissaatigisamisut naammassisitsigaangami atortagaa. Taamaattumik ataasiullunilu pingasuussumik ajoqersuut Biibilimi tunngavissaqanngilaq. * „[Jehova] Guuterput, [Jehova] ataasiuvoq,“ Biibilimi allassimavoq. — 5 Mosesi 6:4.

Guuti ilisarisimallualeruk

Guuti asasinnaajumallugu tunniusimalluinnarnermillu pisassaanik ersersitsivigiumallugu  ilisarisimallualertariaqarparput. Qanoq ililluta ilisarisimallualersinnaavarput? „Takussaanngitsuunerami, ittuinnartumik pissaanera Guutiussusialu, silarsuup pinngortitaaneraniilli takussaagaluarput suliaasigullu ilisimaneqarlutik,“ Biibilimi allassimavoq. (Romamiut 1:20) Ilaatigut Guutimik ilisarsiniartoqarsinnaavoq pinngortitaasa maluginiarnerisigut eqqarsaatigeqqissaarnerisigullu.

Guutili ilisarilerumallugu ilisimasariaqakkavut tamaasa pinngortitami paasisinnaanngilavut. Kinaassusiliviunera namminerlu ateqarnera paasiumallugit Biibilimi atuartariaqarpugut. Guuti ilisarisimallualerniarlugu pitsaanerpaavoq oqaasia aqqutigalugu ilisarisimalerutsigu. Jehovap oqaatsimini illernartumi oqaluttuuppaatigut qanoq ittuulluni. Aamma siunertaminik oqaluttuuppaatigut naapertuilluartuunermillu ajoqersorluta. (Amosi 3:7; 2 Timotheusi 3:16, 17) ’Sallusuissummik ilisarsinissarput’ Guutip kissaatigimmagu nuannaarutigisinnaavarput, asannilluni tunniussai iluaqutigisinnaaniassagatsigit. (1 Timotheusi 2:4) Jehova pillugu ilisarsinerpaaniarluta ilungersorta. (wE 05/15 02)

[Quppernerup ataani ilanngussaq]

[Qupp. 5-mi assiliartaq]

Guutip anersaani illernartoq atorpaa nunarsuaq pinngortitsikkamiuk inuillu Biibilimik allannissaanik isumassarsisikkamigit

[Qupp. 5-mi assiliartaq]

Nipi qilannit tutsiuppoq: „Tassa ernera asasara“

[Qupp. 7-mi assiliartaq]

Jiisusi Guutimut qinuvoq — imminit qutsinnerusumut

[Qupp. 7-mi assiliartaq]

Jiisusip Guutip aqqa allanut ilisaritippaa

[Qupp. 7-mi assiliartaq]

Guuti ilisarisimanerulersinnaavarput