Guutip asanninnerata itissusia eqqarsaatigisarpiuk?

JOBIP ilaanni inuit naammalluinnanngissusiat ima oqaatigaa: „Inuk arnamit erniusoq inuunikittarpoq eqqissinaatsorsiortaqalunilu. Naasoq assigalugu sikkertarpoq toqusarlunilu, tarrartut nigoriartortarpoq atajuarsinnaananilu.“ (Jobi 14:1, 2) Tamatuma nalaani Jobi ernumanermik aliasunnermillu nanertuuteqarpoq. Illit taamatut misiginikuuit?

Qanorluunniit ajornartorsiuteqaraluarutta Guutip nallittuineratigut asanninneratigullu tunngavissaqarluartumik neriuutissaqarpugut. Pingaarnerpaamik Ataatatta qilammiusup nallittuisup utertitsissutissaq uagutsinnik ajortiliussutsimit aniguisitsisussaq isumagaa. Johannesi 3:16, 17 naapertorlugu Jiisusi oqarpoq: „Guutimmi silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu. Tassami Guutip ernini silarsuarmut aallartinngilaa silarsuaq eqqartuukkiartortillugu, kisianni taassumuuna annaanneqaqqullugu.“

Aamma eqqarsaatigiuk Guutip uagutsinnut asannittumik pissuseqarfiginninnera naak naammalluinnanngitsuugaluartugut. Apustili Paulusi oqarsimavoq: „Inummillu ataatsimit pinngortippai inuiaat tamaasa nunarsuarmilu tamarmi najugassarsisillugit sumilu najugaqarnissaat aalajangersumik piffissalerlugu killissalerlugulu. Guuti ujaqqullugu satsillutik nanisinnaaneritsik, uffa ilatsinnit kimilluunniit ungasinngikkaluartoq.“ (Apustilit Suliaat 17:26, 27) Tupinnaqaaq, ilaa? Naak naammalluinnanngitsuugaluarluta pinngortitsisitsinnut asannittumut, Jehova Guutimut, inuttut qanimut attaveqarneq nuannaarutigisinnaavarput.

Taamaattumik siunissaq isumalluarluta erinigisinnaavarput, nalunagu Guutip isumagisaraatigut naassaanngitsumillu asannittumik isumagiuarumaaraatigut. (1 Peter 5:7; 2 Peter 3:13) Taamaattumik oqaasiata Biibilip atuaqqissaarneratigut Guutitta asannittup ilisarisimanerulernissaanut pissutisaqarluarpugut. (wE 05/15 02)