Guutip naalagaaffianik oqaluussissutiginninnermit nutaarsiassat

Ilimananngilluinnartumi sallusuissut nassaaraa

GUUTIP „piumasaraa inuit tamarmik annaanneqassasut sallusuissummillu ilisarsissallutik.“ (1 Timotheusi 2:3, 4) Tamanna pissutigalugu Jehovap Nalunaajaasui Biibilinik Biibililersaarutinillu millionilinnik naqiterisarlutillu agguaasarput. Ilumoorusuttut amerlasuut sallusuissummik nassaarinnittarnerannut atuagassiat tamakku pissutaasarput, ilaatigut ilimaginngisaqqinnaakkut. Tamanna Osmanip, Sierra Leone-mi Freetown-imeersup, misigaa.

Osmani ilaqutariinni qulingiluanik meerartalinni angajulliup tulleraa. Ilaqutariit uppertuugamik ataatani naalagiaqatigikulasarpaa. Oqaluffiulli anniarfik pillugu ajoqersuutaa Osmanip ernummatigaa. Paasisinnaanngilaa Guutip naakkinnittuusup qanoq ililluni inuit ajortut innermut ikuallallugit anniartissinnaagai. Anniarfimmik ajoqersuut qanorluunniit Osmanimut nassuiarneqaraluartoq iluaqutaanngilaq.

Osmani 20-nik ukioqarluni, ullut ilaanni eqqaaviup iluani atuagaq tungujortoq nuisalaartoq malugaa. Atuarneq nuannarigamiuk tiguaa allarterlugulu. Qulequtaa takusinnaalerpaa — Sallusuíssut inûnigssamut nâgssáungitsumut sangmissoq. *

’Sunaana sallusuissut?’ Osmani eqqarsarpoq. Alapernaannerinnarmini atuagaq angerlaappaa naallugulu atuarlugu. Nuannaarutigeqaa paasillugu Guuti namminerisamik ateqartoq — Jehova. (Tussiaatit 83:19) Aamma ilikkarpaa Guutip pissusiisa pingaarnersaat tassaasoq asanninneq, inuillu innermik anniartinnissaannik eqqarsaat taassumunnga maajunnartuusoq. (Jeremia 32:35; 1 Johannesi 4:8) Kiisalu atuarpaa Jehova erniinnaq nunami paratiisimik inuit naassaanngitsumik inuuffissaannik pilersitsiumaartoq. (Tussiaatit 37:29; Saqqummersitat 21:3, 4) Tassa sallusuissutsit tupinnangaartut Guutimit naakkinnittumit asannittumillu pisut. Qujamasoqaluni Osmanip Jehova qutsavigaa sallusuissut nassaaritissimammagu, allaat ilimananngilluinnartumi.

Ullualuit qaangiummata Osmanip ikinngutini ikiortigalugit Jehovap Nalunaajaasuisa Naalagaaffilersaarfiat nassaaraa ataatsimiinnerlu siullerpaamik peqataaffigalugu. Tassani qatanngummut angummut aperivoq Biibilimik atuaqqissaaqatigiumaneraani. Naak Osmani ilaquttaminit akerlilersorneqaraluaqaluni, kuisikkumalluni anersaakkut siumukartuarpoq. (Matthæusi 10:36) Ullumikkut ilagiinni utoqqaanertaavoq. Osmanip inuunera allanngorluinnarpoq atuagaq eqqaavimmi nassaarigamiuk. (wE 06/01 02)

[Quppernerup ataani ilanngussaq]