Inuiaat minguiarsimasut ajunngitsuliornissamillu noqqaassutiginnittut

„Immitsinnik minguiarniarta, timimi anersaamilu minguk tamaat piiassavarput illernartuullutalu Guutimik mianerinninnermi.“ — 2 KORINTHIMIUT 7:1.

1. Guutip pallorfiginnitsini qanoq piumasaqarfigai?

„KINA majuarsinnaava [Jehovap] qaqqaanut, kina qeqarsinnaava najugaani illernartumi?“ Apeqqut eqqarsaallannartoq taanna pallorfiginninnermut Jehovap akuerisaanut atatillugu Israelip kunngiata Daavip apeqqutigisimavaa. Taavalu nammineq akivaa: „Tassa taanna pinngitsuusoq assammigut minguitsorlu uummammigut, sallumik siaruarterinngitsoq, uppernarsaasanngitsorlu sallulluni.“ (Tussiaatit 24:3, 4) Jehovamit nammineq illernarsusivimut ersiutaasumit akuerineqassagaanni minguitsuullunilu illernartuusariaqarpoq. Siusinnerusukkut Jehovap Israelip ilagiivi ima oqaaqqissaarsimavai: „Illernarsassaasi illernartuullusilu uanga illernartuugama.“ — 3 Mosesi 11:44, 45; 19:2.

2. Pallorfiginninnermut ilumoortumut atatillugu minguitsuunissap pingaaruteqassusia Paulusip Jaakullu qanoq erseqqissarpaat?

² Ukiut hundredillit arlallit qaangiuttut apustili Paulusi uppeqatiminut illoqarfimmi ileqqussatigut ajortunngorsimasumi Korinthimi najugalinnut ima allappoq: „Asasakka, neriorsuutit tamakku pigigatsigit immitsinnik minguiarniarta, timimi anersaamilu minguk tamaat piiassavarput illernartuullutalu Guutimik mianerinninnermi.“ (2 Korinthimiut 7:1) Tamatumuuna erseqqissaqqinneqarpoq Guutimut pitsaasumik attaveqarniaraanni, pilluaqqussutinillu neriorsuutigisimasaanik ilangiiniaraanni anersaakkut timikkullu minguitsuusariaqartoq, mingutsitaasimanani ajortunngorsimananilu. Pallorfiginninnermut Guutip akuerisinnaasaanut atatillugu ajoqersukkap  Jaakup eqqarsaat taannarpiaq oqaatigaa. Allappoq: „Guutisiorneq minguitsoq piviusorlu Guutimut Ataatatsinnut tassaavoq iliarsunnik uillarnernillu atugarliuutilinnik isumaginninneq imminillu mingutsinneqatsalineq silarsuarmit.“ — Jaaku 1:27.

3. Pallorfiginninnerput Guutimit akuerineqarsinnaassappat suna pimoorullugu soqutigisariaqarparput?

³ Minguitsuuneq, illernartuuneq mingutsitaasimannginnerlu pallorfiginninnermut ilumoortumut taama pingaaruteqartigimmata, kialuunniit Guutimit akuerineqarnissamik kissaatillip piumasaqaatit taakku naammassinissaat pimoorullugu soqutigisariaqarpaa. Ullumikkulli inuit suna minguitsuunersoq assigiinngitsunik paasisarmassuk, paasiniartariaqarparput Jehovap suna minguitsutut akuerineqarsinnaasutullu isigineraa, tamannalu naammassiniarlugu. Taamaattumik misissussavarput Guutip pallorfiginnitsini tamatumani sumik piumaffiginerai, qanorlu imminut minguitsumik akuerineqarsinnaasumillu attaveqalernissaannut attaveqartuarnissaannullu ikiorsimanerai. — Tussiaatit 119:9; Danieli 12:10.

Minguitsuuneq pallorfiginninnerlu ilumoortoq

4. Oqaaseq minguitsuuneq Biibilimi qanoq atorneqarnersoq nassuiaruk.

⁴ Minguitsuuneq amerlasuunit ipeqanngitsuunertut isigineqartarpoq. Biibilimili oqaatsit hebræerisuut grækerisuullu assigiinngitsut arlallit minguitsuunermut atorneqartarput. Oqaatsini taakkunani timikkut minguitsuuneq eqqarsaatigineqaannarani amerlanertigut ileqqussatigut upperisarsiornikkullu minguitsuuneq pineqartarpoq. Biibili pillugu qinerlerfissiat ilaanni ima allassimasoqarpoq: „Oqaatsit ’minguitsuuneq’ aamma ’minguttuujuneq’ eqqiluisaarnerinnarmut tunngatinneqarneq ajorput, kisianni pingaarnerusumik upperisarsiornermut tunngatillugit atorneqartarput. Taamaattumik ’minguitsuunermik’ najoqqutassap inooriaaseq tamangajaat sunniuteqarfigisarpaa.“

5. Minguitsuunissaq pillugu najoqqutassianik Mosesip inatsisai qanoq imaqartigippat?

⁵ Mosesip inatsisai malittarisassanik aalajangersakkanillu Israelikkut inooriaasiinik tamanik attuisunik imaqarput, suullu minguitsuunerinik minguttuujunerinillu erseqqissaapput. Assersuutigalugu minguinnermut aamma minguttuujunermut atatillugu Mosesimik allakkat pingajuini kapitali 11-miit 15-imut sukumiisunik najoqqutassiaqarpoq. Uumasut ilaat minguttuujupput, taakkulu Israelikkunut nereqqusaanngillat. Arnaq ernigaangami piffissami aalajangersimasumi minguttuujusarpoq. Ammikkut nappaatit ilaat, ingammik pupinneq, aamma arnani angutinilu kinguaassiutitigut igineq taamatuttaaq inummik minguttuunngortitsisarpoq. Minguttuujunermut tunngatillugu qanoq iliortoqartassanersoq inatsisini aamma eqqaaneqarpoq. Assersuutigalugu Mosesip allagaasa sisamaat 5:2-mi manna atuarneqarsinnaavoq: „Israelikkut peqqukkit angutit arnallu pupissuusut kinguaassiuutitigulluunniit igillutik toqusunilluunniit attuisimallutik mingutsissimasut tamaasa tammaarsimaffimmit peerseqqullugit.“

6. Sooq Israelikkut minguitsuuneq pillugu inatsisinik tunineqarpat?

⁶ Inatsisit taakku Jehovallu inatsisai allat malittarisassanik pinaveersaartitsisunik, peqqinnissap nakorsaateqarnermillu ilisimatusarnerup tungaatigut naliminnut naleqqiullugit siuarsimaqisunik, imaqarput, tamakkulu inuit malikkaangamikkik iluaqutigingaartarsimavaat. Peqqinnissarli pillugu imaluunniit nakorsaatit tungaasigut siunnersuuteqarnissaq kisiat pillugu inatsisit tunniunneqarsimanngillat. Pallorfiginninnermut ilumoortumut ilaapput. Inuit ulluinnarni inuunerat najoqqutassianit nerisassat, erninerit, aappariittut inuuneq il. il. tungaatigut attorneqartarmat erseqqissarneqaannarpoq Jehova inuiaat Guutiattut inooriaaseq tamaat eqqarsaatigalugu suut naleqquttuunersut suullu naleqquttuunnginnersut aalajangiisussaasoq. Tassami Israelikkut Jehovamut tunniulluinnarsimasuupput. — 5 Mosesi 7:6; Tussiaatit 135:4.

7. Israelikkut Inatsisit naalallugit malikkunikkik qanoq pilluaqqusaassappat?

⁷ Inuiaat eqqaamiuisa ileqquinut Inatsisit Israelikkut illersorpaat. Aalajaallutik Inatsisit, Jehovap isaani minguitsuujuarnissamik aalajangersakkat ilanngullugit, malinnerisigut Israelikkut Guutertik akuerineqarsinnaasumik kiffartuussinnaassavaat taassumanngalu pilluaqquneqarsinnaallutik. Tamatumunnga atatillugu Jehova inuiaqatigiinnut ima oqarpoq: „Naalakkussinga angeruseralu  aalajangiullugu inuiaqatigiinnit tamanit immikkoortillusi pigisassarsiariumaarpassi, nunarsuaq tamaat uanga pigigakku. Uannut tassaalissaasi kunngeqarfik palaseqatigiinnik innuttalik inuiaqatigiillu illernartut.“ — 2 Mosesi 19:5, 6; 5 Mosesi 26:19.

8. Minguitsuuneq pillugu Inatsisini qanoq allassimasoqarnersoq sooq kristumiut ullumikkut soqutigisariaqarpaat?

⁸ Jehovap Israelikkut imminut qanoq minguitsumik, illernartumik akuerisaasumillu attaveqalersinnaanerat pillugu annikitsualuppassuarnik Inatsisit imaqartimmagit, ullumikkut kristumiut sunik piumaffigineqarnertik isumaliutigeqqissaartariaqannginnerpaat? Naak kristumiut Mosesip inatsisainik malinnittussaanngikkaluartut Paulusip Inatsisit imai pillugit oqaasii uku eqqaamassallugit pingaartuuvoq: „Piumaartussap tarraannarai, timili Kristusip pigaa.“ (Kolossemiut 2:17; Hebræerit 10:1) Israelikkut nalaanni Jehova Guutip allanngunngisaannartup minguitsuuneq mingutsitaasimannginnerlu pallorfiginninnerup ilumoortup ilaatut pingaartutut isigai. Taamaattumik Jehova Guutimit akuerisaanissaq pilluaqqusaanissarlu anguniarlugu uaguttaaq timikkut, ileqqussatigut anersaakkullu minguitsuuniarluta ilungersortariaqannginnerpugut? — Malaki 3:6; Romamiut 15:4; 1 Korinthimiut 10:11, 31.

Timikkut eqqiluitsuuneq Guutip kiffaanik kajungernartunngortitsisarpoq

9, 10. (a) Timikkut eqqiluitsuuneq sooq kristumiunut pingaaruteqarpa? (b) Jehovap Nalunaajaasuisa ataatsimeersuarnerat pillugu suut oqaatigineqarajuttarpat?

⁹ Timikkut eqqiluitsuuneq suli pallorfiginninnerup ilumoortup ilagaa pingaarutilik, sapinngisamillu imminut timikkut eqqiluitsuutinniarneq naleqquttuuvoq, naak taannaannaq Guutip piumasarinngikkaluaraa. Ullumikkut inuppassuit imminnik, atisaminnik avatangiisiminnillu eqqiluitsuutitsinissartik pingaartippallaarneq ajorpaat, taamaattumik taamaaliortut maluginiarneqartarput. Tamanna ajunngitsunik kinguneqarsinnaavoq, soorlumi Paulusi Korinthimi kristumiunut ima oqartoq: „Sumilluunniit naakkiuffissiiniartanngilagut kiffartuutigisarput tusaamanerlunneqaleqqunagu. Tamatigulli Guutimit kiffarineqartutut takutinniartarpugut.“ — 2 Korinthimiut 6:3, 4.

¹⁰ Jehovap Nalunaajaasuisa eqqiluisaarnerat, torersuunerat ataqqinnittuunerallu pillugit pisortat nersukulasarpaat, taamaannerallu ingammik ataatsimeersuarneranni maluginiarneqartarpoq. Assersuutigalugu Savonami Italiamiittumi ataatsimeersuarneq pillugu aviisimi La Stampa-mi ima allassimasoqarpoq: „Ataatsimeersuarfiat angalaarfigalugu peqataasut minguinnerat torersuunerallu maluginiarnarnerpaajusarput.“ São Paulomi, Basiliamiittumi arsaattarfissuarmi Jehovap Nalunaajaasui ataatsimeersuareersut arsaattarfissuup nakkutilliisuisa ilaat eqqiaasunik nakkutilliisumut oqarsimavoq: „Maannakkumiit arsaattarfissuaq Jehovap Nalunaajaasuisa eqqiaasarnerattut eqqiartittalissavarput.“ Arsaattarfissuarmi tassani nakkutilliisoq alla ima oqarsimavoq: „Jehovap Nalunaajaasuisa arsaattarfissuaq atorniaraangassuk ulluni taakkunani atorsinnaaneraat apeqqutaaginnartarpoq. Allamik eqqasuuteqarneq ajorpugut.“

11, 12. (a) Eqqiluitsuutinnissatsinnut atatillugu tunngaviusumik najoqqutassaq Biibilimiittoq suna puigussanngilarput? (b) Ileqquvut inooriaaserpullu pillugit immitsinnut qanoq aperisinnaavugut?

¹¹ Pallorfiginnittarfipput eqqiluitsuullunilu takujuminartuuppat tamanna Guutimut ataqqinaataavoq, aammattaarli uagut taamatut eqqiluitsuullutalu takujuminartuunissarput pingaaruteqarpoq. Immaqa misigisimavugut angerlarsimaffitsinniitilluta ilaginnaaginnarsinnaalluta qanorluuunniillu iliorsinnaalluta. Atisatta qallikkullu pikisarnissatta tungaasigut soorunami nammineq kusagisavut iluarisavullu toqassallugit kiffaanngissuseqarpugut. Kiffaanngissuserpulli ataatsimut isigalugu killeqarpoq. Uppeqatimi nerisassaat pillugit Paulusip siunnersuutaa una eqqarsaatigeriaruk: „Mianersoritsili pilliutinik nerisinnaatitaanersi sanngiitsunut naakkiussutaaqqunagu.“ Tamatuma kingorna ileqqussaq iluaqutaasoq tikkuarpaa: „Sunik tamanik iliorsinnaatitaavunga, imaanngilarli suut tamarmik iluaqutaasut. Sunik tamanik iliorsinnaatitaavunga, imaanngilarli suut tamarmik ineriartortitsisuusut.“ (1 Korintumiut 8:9; 10:23) Minguitsuunermut atatillugu tamanna qanoq atuuppa?

¹² Soorunami inuit ilimagisinnaasariaqarpaat  uagut Guutip kiffaasut eqqiluitsuunissarput torersuunissarpullu. Taamaattumik qulakkeertariaqarparput angerlarsimaffitta avatangiisittalu isikkui kinaanerarnitsinnut assortuinnginnissaat, tassa Guutip kiffai ilumoortut. Uagut pilluta upperisarpullu pillugu angerlarsimaffipput qanoq takutitsiva? Takutippaa silarsuassaq nutaaq naapertuilluartoq minguitsorlu inunnut allanut nuannaarluta oqaluuserisartagarput inuuffigissallugu qilanaarigipput? (2 Petrusi 3:13) Oqariartuutitsinnut inuit itigartitsinerannut tusarnaarnerannulluunniit isikkorput — oqaluusseqataagaangatta sunngiffitsinnilu — aalajangiisooqataasinnaavortaaq. Assersuutigalugu Mexicomi tusagassiortoq qanoq allannersoq malugeriaruk: „Jehovap Nalunaajaasuisa akornanni inuusuttorpassuaqarpoq, taakkualu eqqiluitsuunerat, atisarissaarnerat nujarinnerallu maluginiarnarnerpaavoq.“ Inuusuttut taamaattut akornatsinniittut nuannaarutigaavut.

13. Inuunitsinni eqqiluitsuunermik torersutsimillu malunnarsitsinissarput qulakkeerniarlugu qanoq iliorsinnaavugut?

¹³ Soorunami torersaaneq, angerlarsimaffimmi eqqiluitsuutitsinissaq torersuutitsinissarlu, kiisalu imminut eqqiluitsuutinnissaq imaannaanngitsuupput. Atortut akisuut paasiuminaatsullu atorfissaqartinnagit pilersaarusiorluarnissarli ullullu tamaasa iliuuseqartarnissaq pisariaqarput. Imminut eqqiluitsuutinnissamut, errorsinissamut, biilinik angerlarsimaffimmillu asaanissamut piffissamik immikkoortitsisoqartariaqarpoq. Pisussaaffitta allat saniatigut oqaluussinermik, ataatsimiinnernik atuaqqissaartarnitsinnillu aallussinerput eqqiluisaarnissamik sumiginnaanissamut utoqqatsissutissaanngilaq. Kiffartornerput Guutimit inunnillu akuerinartuussappat pingaartuuvoq aamma kiffartornitta ilaa taanna eqqumaffigissagipput. Biibilimi allaatigineqarpoq ’suut tamarmik aalajangersimasumik piffissaligaasut’, aammalumi tunngaviusumik najoqqutassaq ilisimaneqarluartoq taanna eqqiliuisaarnissamut atatillugu atuuppoq. — Oqaluussisartup oqaasii 3:1.

Uummat mingutsitaasimanngitsoq

14. Sooq oqartoqarsinnaava ileqqussatigut anersaakkullu minguitsuuneq timikkut minguitsuunermit pingaarnerusoq?

¹⁴ Timikkut minguitsuunermit pingaarnerungaartoq tassaavoq ileqqussatigut anersaakkullu minguitsuuneq. Inuiannut Israelikkunnut pisimasumi tamanna erserpoq. Inuiaat Israelikkut Jehovamit ajattorneqarput, imaanngitsoq timimikkut  minguttuunngorsimagamik, ileqqussatigulli anersaakkullu ajortunngorsimagamik. Pruffiiti Esaja aqqutigalugu Jehovap oqarfigai ’inuiaat ajortuliortuummata, inuiaat ajortuliaminnit nanertorneqartut’ pilliutaat, qaammanniffissiorfii, sabbatisiorfii, aap allaat qinnutaat nanertigilersimallugit. Guutimit iluarisaaqqilerniarlutik qanoq iliussappat? Jehova oqarpoq: „Uffarniaritsi, eqqiarniaritsi! Iluaatsuliasi isinnit peersigit, ajortumik iliussaaritsi.“ — Esaja 1:4, 11-16.

15, 16. Jiisusi naapertorlugu suup inuk minguttuunngortittarpaa, oqaasiilu qanoq iluaqutigisinnaavavut?

¹⁵ Ileqqussatigut anersaakkullu minguitsuunerup pingaaruteqassusia paasineruniarlugu Jiisusip ajoqersugai ileqquusartut malillugit assatik asattoqqaarnagit nerimmata minguttuujunerarlugit farisæerit allakkanillu ilisimasut oqaaserisaannut Jiisusip akissutaa misissoriartigu. Jiisusip naveerpai oqarluni: „Qanikkut isertut inummik mingutsitsineq ajorput, qanikkulliuna anisut inummik mingutsitsisartut.“ Taavalu Jiisusi nassuiaavoq: „Qanikkulli anisut uummammit pisarput, tamakkulu inummik mingutsitsisarput. Uummammimmi pisarput eqqarsaatipiluit, toqutsinerit, allasiornerit, kinguaassiuutitigut inuunerlunnerit, tillinnerit, sallulluni nalunaajaanerit mitallernerillu. Tamakku tassaapput inummik mingutsitsisartut. Assaammi asaqqaarnagit nerineq inummik mingutsitsisinnaanngilaq.“ — Matthæusi 15:11, 18-20.

¹⁶ Jiisusip oqaasii qanoq ilinniarfigisinnaavavut? Iliuutsit ajortut, ileqqorlunnerit minguttuuliornerillu uummammit allaaveqartartut tikkuarpaa. Tamanna ajoqersukkap Jaakup ima oqaatigaa: „Kinaluunniit usserneqartarpoq nammineq pilerissutsiminit nassataritilluni kajumitsatsitaallunilu.“ (Jaaku 1:14, 15) Jiisusip eqqartugaasa ilaattut sualuttumik ajortuliorusunngikkutta uummatitsinneersut ajortut tamaasa akiorniartariaqarpavut. Tassa imaappoq suut atuarnerlugit, isiginnaarnerlugit tusarnaarnerlugillu mianersuutigisariaqarivut. Oqalussinnaatitaanerup eqqumiitsuliornerullu aqqi naqqisigalugit aliikkutassiortartut ussassaarusiortartullu inuit kajumissusii ajornerpaat attorniarlugit nipiliuterpassuarnik assiliarpassuarnillu sanaartortarput. Taamaattut uummatitsinni sorlanitsissanagit aalajangiusimaniartigu. Guuti nuannaartiniarutsigu taassumanngalu akuerisaaniarutta uummatitta minguitsuutinnissaa mingutsernaveersaarnissaalu  pingaartuuvoq. — Ussatit 4:23.

Minguiakkat ajunngitsuliornissamillu noqqaassutiginnittut

17. Sooq Jehovap innuttani imminut minguitsumik attaveqalersissimavai?

¹⁷ Jehovamut, taanna ikiortigalugu, minguitsumik attaveqarsinnaanerput nalilerujussuuvoq, tamannalu aamma uatsinnut illersuutaangaarpoq. (2 Korinthimiut 6:14-18) Nalunngilarputtaaq Jehova immikkut ittumik pissuteqarluni innuttani minguiartikkai. Paulusi Titusimut oqarsimavoq Jiisusi Kristusi ’imminut tunniuttoq uagut pilluta inatsisaatsuliornernit sunilluunniit tamanit utertikkumalluta pigisaqalerumallunilu inuiannik minguitsunik ajunngitsuliornissamillu noqqaassuteqartunik’. (Titusi 2:14) Inuiattununa minguiarsimasutut iliuutsit suut noqqaassutigisariaqarivut?

18. Qanoq takutissinnaavarput ajunngitsuliornissamik noqqaassuteqarluta?

¹⁸ Pingaarnerpaamik pisinnaasarput tamaat Guutip naalagaaffianik nutaarsiassaq nuannersoq oqaluussissutigisariaqarparput. (Matthæusi 24:14) Tamatumuuna nunarsuarmiut tamarmik nunami mingutsitsiffiunngitsumi naassaanngitsumik inuunissamik neriuuteqalersinnaapput. (2 Petrusi 3:13) Iliuutsitsinnut ajunngitsunut ilaavortaaq Guutip anersaavata inerititaanik ullut tamaasa ersersitsiniarluta ilungersornerput, taamaalillutalu Ataatarput qilammiusoq ataqqillugu. (Galatiamiut 5:22, 23; 1 Petrusi 2:12) Aammattaaq ajunaarnersuarnik imaluunniit inunnut aliasuutaaqisunik allanik eqqugaasut isumagisarpavut, aamma uppeqatiginngikkaluarutsigilluunniit. Paulusip kajumissaarutaa eqqaamavarput: „Taamaattumik piffissaqarallartilluta tamanut ajunngitsuliorniarta, pingaartumik uppeqatitsinnut.“ (Galatiamiut 6:10) Uummammik minguitsumik ajunngitsumillu pissuteqarluta allanut iliuutsivut taamaattut tamarmik Guutimik nuannaartitsissapput. — 1 Timotheusi 1:5.

19. Timikkut, ileqqussatigut anersaakkullu qutsisumik minguitsuujuarutta suna qilanaarisinnaavarput?

¹⁹ Guutimut qutsinnerussaartumut kiffatut Paulusip oqaasii pigiliuppavut: „Qatanngutit! Guutip nallittuineratigut oqaaqqissaarniarpassi timisi sassaateqqullugit pilliutitut uumasutut illernartutullu Guutip iluarinartitaatut, tamanna tassaassaaq anersaakkut guutisiornersi.“ (Romamiut 12:1) Inuiannut Jehovap minguiarsimasaanut ilaanerput pingaartinniartigu, tamaviaarniartalu timikkut, ileqqussatigut anersaakkullu qutsisumik minguitsuujuaannarniarluta. Taamaaliornitta maannangaaq imminut ataqqitiliinnassanngilaatigut nalerisimaartiliinnassanatalu. Aamma Guutip ’sunik tamanik nutaanngortitsinissaa’ aamma „siulliit“ — tassa aaqqissuussaaneq maannakkut atuuttoq ajortoq minguttoorlu — piiagaanissaat qilanaarisinnaavarput. — Saqqummersitat 21:4, 5. (wE 06/01 02)

 Eqqaamavigit?

• Sooq Israelikkut minguitsuunissaq pillugu inatsisinik taama amerlatigisunik tunineqarpat?

• Tulluartunik atisalersortarneq qallikkullu pikisarneq qanoq oqariartuutitsinnik kajungernarnerulersitsiqataasarpat?

• Sooq ileqqussatigut anersaakkullu minguitsuuneq timikkut minguitsuunermit pingaarnerua?

• Qanoq ililluta takutissinnaavarput inuiaalluta „ajunngitsuliornissamik noqqaassutiginnittut“?

[Atuaqqissaarnermi apeqqutit]

[Qupp. 17-mi assiliartaq]

Atisalersornitsinnit qallikkullu pikisarnitsinnit oqariartuuterput kajungernarnerulersinneqartarpoq

[Qupp. 18-mi assiliartaq]

Eqqarsaatit ajortut ajortunik iliuuseqartitsisarnerat Jiisusip mianersoqqussutigaa

[Qupp. 19-mi assiliartaq]

Inuiattut minguiakkatut Jehovap Nalunaajaasui ajunngitsuliornissamik noqqaasuteqarput