Kunngit maligassiaat malinniaruk

„[Inatsisit taakku] nammineq pissani allaqqissavai . . . Allakkat imminiitissavai inuuninilu tamaat atuartassallugit.“ — 5 MOSESI 17:18, 19.

1. Kikkut ilaarnissaat kissaatigisariaqarparput?

QULARNANNGITSUMIK imminut kunngitut isiginngikkaluarputit. Kristumiu aalajaatsoq Biibilimilluunniit atuaqqissaartartoq kina imminut takorloorsinnaanerpa kunngit aalajaatsut Daavip, Josijap, Hizkijap Joshafatillu oqartussaassuseqarnerattut oqartussaassuseqarluni? Taamaakkaluartoq minnerpaamik immikkut ittumi ataatsimi taakku ilaarsinnaavatit ilaartariaqarlugillu. Sukkut? Aamma sooq tassuuna taakkua ilaarnissaat kissaatigisariaqarpiuk?

2, 3. Inummik kunngeqalernissaq pillugu Jehovap suna siulittuutigaa, kunngissarlu qanoq iliortussaava?

² Mosesip nalaani, Guutip Israelikkut nunamiumik kunngeqalernissaata akuerinnissaa sioqquterujussuarlugu, siulittuutigaa innuttami kunngeqalernissartik kissaatigilerumaaraat. Taamaattumik Mosesi isumassarsisippaa maleruaqqusat naleqquttut Inatsisinik angerutsimut ilannguteqqullugit. Tassaapput kunnginut maleruaqqusat.

³ Guuti oqarpoq: „Nunamut [Jehovap] Guutivit tunniukkumaagaanut iseruit, . . . oqaruillu inuiattut eqqaamiussitut kunngimit naalakkersorneqarumallutit, taava angut [Jehovap] Guutivit qinigaa kunnginngortissavat. . . . Kunngisut issiavissaarsuarmini issialeruni nammineq pissani allaqqissavai . . . Allakkat imminiitissavai inuuninilu tamaat atuartassallugit ilikkaqqullugu [Jehova] Guutini mianerissagamiuk oqaatsillu inatsisit allassimaffianniittut inatsisillu taakku maleruaqqissaassagamigit.“ — 5 Mosesi 17:14-19.

4. Guutip kunngit qanoq ilioqquai?

⁴ Aap, kunngi Jehovap pallorfigisiminut qinigassaa ullumikkut Biibilimi atuarsinnaasatta ilaanik nammineq pissaminik allaqqiisussaavoq. Taava Kunngip allaqqitani ullut tamaasa atuartassavai. Eqqaamasinnaassutsimik sungiusaanerinnaanngilaq. Atuaqqissaarneruvoq aalajangersimasumik siunertaqarluni. Kunngi Jehovamit iluarineqassaguni taamatut atuaqqissaartariaqarpoq uummatikkut eqqortumik isiginnittaaseqarnissani ineriartortinniarlugu attatiinnarniarlugulu. Aamma kunngiulluassaguni siuneqassuseqassagunilu allakkat isumassarsiarititaasut taakku atuaqqissaartariaqarpai. — 2 Kunngit 22:8-13; Ussatit 1:1-4.

Kunngitut ilinniartinneqarit

5. Biibilip atuagartaasa ilaat suut kunngi Daavip allaqqissinnaallugillu atuarsinnaavai, suliassarlu tamanna qanoq isigaa?

⁵ Daavi Israelikkunnut kunnginngormat tamakku tamarmik taassumunnga qanoq nassataqarpat? Mosesimik allakkat tallimat, Pentateukimik taaneqartut, allaqqittussaavai. Takorlooriaruk Daavi Inatsisinik allaqqiinermini qanoq sunnerneqarsimassanersoq. Qularnanngitsumik Mosesip aamma Jobimik allakkat aamma Tussiaat 90 91-ilu allassimavai. Daavip taakku aamma allaqqissimassagunarpai. Aamma Josvamik allakkat, Eqqartuussisunik allakkat Ruthimillu allakkat pigisimagunarpai. Taamaattumik kunngi Daavip Biibilip atuagartaasa ilaat arlallit atuarsinnaallugillu misissoqqissaarsinnaavai. Pissutissaqarluarpugut  isumaqassalluta taamaaliortoq, tassami maluginiaruk Tussiaat 19:8-12-mi Guutip inatsisai pillugit qanoq oqarnersoq.

6. Qanoq nalunngissinnaavarput Jiisusip, siuaasamitut Daavitut, Allakkat soqutigilluinnarai?

⁶ Daavi annerup — Jiisusip Daavip erneranik taaneqartup — maligassaq tamanna malippaa. Sapaatip akunneri tamaasa Jiisusi synagogimukartarpoq Allakkat atuffassissutigineqarnerat oqaaseqarfigineqarnerallu tusarnaariarlugu. Tassani Jiisusi aamma nammineq arlaleriarluni Guutip oqaasianik atuffassillunilu nassuiaavoq. (Lukasi 4:16-21) Iivangkiiliunik allakkanik atuaraanni paasinarsisarpoq Allakkanik qanoq ilisimasaqarluartigisoq. Maluginiaruk qanoq akulikitsigisumik ima oqartoq: „Allassimavoq,“ imaluunniit Allakkani allassimaffiit aalajangersimasut innersuussutigisarai. Assersuutigalugu Matthæusip iivangkiiliua naapertorlugu Qaqqami oqaluutsimini Jiisusi 21-riarluni Allakkanit Hebræerisuunit issuaavoq. — Matthæusi 4:4-10; 7:29; 11:10; 21:13; 26:24, 31; Johannesi 6:31, 45; 8:17.

7. Jiisusi upperisarsiornikkut siuttunit qanoq allaanerua?

⁷ Jiisusip Tussiaat 1:1-3-mi ilitsersuut maleruartarpaa: „Pilluarpoq iluaatsut siunnersuutaat malillugit inuunngitsoq, . . . kisianni [Jehovap] inatsisaanik nuannarisaqartoq inatsisaalu eqqarsaatigalugit ullukkullu unnuakkullu. . . . Qanoq iliornermini tamani iluatsitsisaraaq.“ Taamaalilluni nalimini upperisarsiornikkut siuttunit allaalluinnarpoq, taakku „Mosesip issiaviani issiasarput“ „[Jehovalli] inatsisai“ sumiginnartarlugit. — Matthæusi 23:2-4.

8. Sooq juutit upperisarsiornikkut siuttuisa Biibilimik atuartarnerat misissuinerallu asuliinnarpa?

⁸ Ilaasali immaqa Biibilimi allasimasoq aalajangersimasoq tupigusuutigisinnaavaat, ima paasigamikku Jiisusi Biibilimik atuaqqissaaqqusinngitsoq. Johannesi 5:39, 40-mi Jiisusip nalimini inuusut ilaannut oqaasii atuarpavut: „Allakkat isumasiortarpasi ilissi isumaqarassi tamakku naassaanngitsumik inuuneqaatigalugit; taakkorpiaallu uanga nalunaajaatigaannga. Taamaattorli ornikkumanngilassinga inuussut piniarlugu.“ Imali paasisariaqanngilaq Jiisusip juutit taakku Allakkanik atuaqqunngikkai. Ilumoortuusaarnerat killormoortuunerallu qulaarpaa. Nalunngilaat Allakkat naassaanngitsumik inuuneqaatigisinnaallugit, Allakkalli misissoqqissaakkatik taakku iluaqutigalugit akuerisussaagaluarpaat Jiisusi Missiarsiusoq. Taamaattorli akueriumanngilaat. Taamaattumik Allakkanik misissueqqissaarnertik iluaqutiginngilaat, ilumoorusunnginnamik ilinniartinneqarumanatillu. — 5 Mosesi 18:15; Lukasi 11:52; Johannesi 7:47, 48.

9. Apustilit itsarlu pruffiitit qanoq maligassiuilluarpat?

⁹ Jiisusip ajoqersugai, ilaatigut apustilit, taamaanngilluinnarput! ’Allakkat illernartut annattussanngornerminnik ilisimalersitsisinnaasut’ misissortarpaat. (2 Timûtiusi 3:15) Tamatumuuna pruffiititut itsaq inuusimasutut ’paasiniaaqqissaartartutut eqqarsaatiginneqqissaartartutullu’ ipput. Pruffiitit taakku isumaqanngillat qaammatialuinnaat imaluunniit ukioq ataasiinnaq paasiniaaqqissaartariaqarlutik. Apustili Petrusi allappoq Allakkat ’misissoqqissaartuaraat’ (NV), ingammillu Kristusi pillugu inuiannullu annaassisuuneranut atatillugu ’naalannarsinissaanik’ Allakkani paasissutissat soqutigigaat. Allakkamini siullerni Petrusip Biibilip atuagartaasa ilaat qulit 34-riarluni issuarpai. — 1 Petrusi 1:10, 11.

10. Sooq tamatta Biibilimik atuaqqissaarneq soqutigisariaqarparput?

¹⁰ Tassa qularutissaanngilaq itsaq Israelikkut kunngii Guutip oqaasiata atuaqqissaarnissaanik suliassinneqarsimasut. Jiisusi aamma taamaaliortarpoq.  Qilammilu Kristusimut naalakkersueqataasussat aamma taamaaliortarput. (Lukasi 22:28-30; Romamiut 8:17; 2 Timotheusi 2:12; Saqqummersitat 5:10; 20:6) Ullumikkut kunngit taakkua maligassiaasa malinnissaat uagutsinnuttaaq taama pingaaruteqartigaaq Naalagaaffiup naalakkersuinerata ataani Guutip kiffaanut pilluaqqussutissanik ilimagisaqaratta. — Matthæusi 25:34, 46.

Kunnginut ilinnullu suliassaq

11. (a) Kristumiunut suna navianarsinnaava? (b) Imminut qanoq aperisinnaavugut?

¹¹ Erseqqissarneqarluartariaqarpoq kristumiut ilumoortut tamarmik namminneq Biibili atuartarlugulu atuaqqissaartariaqaraat. Imaanngilaq Jehovap Nalunaajaasui Biibilimik misissueqatigalugit aallartikkaangatta taamaallaat taamaaliortussaasugut. Aalajangerluinnartariaqarpugut apustili Paulusip nalaani namminneq atuaqqissaanngitsoortartutut iliorumanata. Taakkua „Guutip oqaasiini ilinniaqqaagassanik“, assersuutigalugu ’Kristusi pillugu ilinniaqqaagassanik’, ajoqersorneqarsimapput. Atuaqqissaartarunnaarpulli taamaattumillu inersimassutsimut siumukapallanngitsoorlutik. (Hebræerit 5:12–6:3) Sivikitsumik sivisuumilluunniit kristumiut ilagiivinut ilaasimagaluarutta immitsinnut aperisinnaavugut: ’Guutip oqaasianik atuaqqissaarneq qanoq isigaara?’ Paulusip qinnutigaa nalimini kristumiut ’Guutimik ilisimasaqarnerat’ alliartuinnaqqullugu. Takutipparput taamatut kissaateqarluta? — Kolossemiut 1:9, 10.

12. Sooq Guutip oqaasianik nuannaarutiginnittuarneq pingaaruteqarpa?

¹² Atuaqqissaarnermik ileqquliussinissatsinnut iluaqutigisinnaavarput Guutip oqaasianik nuannarinninneq. Tussiaat 119:14-16-imi takutinneqarpoq Guutip oqaasia aalajangersimasumik eqqarsaatigeqqissaartarutsigu nuannaarutiginerulersinnaagipput. (Tussiaat 1:1, 2) Soorlu Timotheusip maligassiaanit paasinarsisoq, qanorluunniit sivisutigisumik kristumiuugaluarutta taamaappoq. Kristumiu taanna utoqqaanertaasoq ’Kristusi-Jiisusimut sakkutuujulluartooreerpoq’, taamaakkaluartorli Paulusip noqqaassutigeqquaa ’oqaatsimik sallusuissutaasumik nassuiaasuulluarnissaa’. (2 Timotheusi 2:3, 15; 1 Timotheusi 4:15) Noqqaassutiginninnermut atuaqqissaarnermik ileqquliussineq ilaavoq.

13. (a) Qanoq Biibilimik atuaqqissaarnermut piffissaqarnerusinnaavugut? (b) Atuaqqissaarnermut piffissaqarnerujumallutit qanoq iliornissat eqqarsaatigeqqissaarsimaviuk?

¹³ Atuaqqissaarnermik ileqquliussinissamut iluaqutigisinnaavarput Biibilip atuaqqissaarnissaanut piffissamik aalajangersimasumik immikkoortitsineq. Illit taamaaliortarpit? Qanorluunniit akigaluaruit, isumaqarpit nammineq atuaqqissaarneq piffissaqarfiginerugukku iluaqutigissagit? ’Qanorli piffissaqarfigissavara?’ immaqa eqqarsarputit. Ilaat piffissaqarnerulersimapput ullaakkut makiaarnerulaartarlutik. Immaqa minutsit 15-it Biibilimi atuartarput aalajangersimasorluunniit atuaqqissaarlugu. Allatut periarfissarsisoqarsinnaavoq pilersaarutit sapaatip-akunneranoortut allanngortilaaraanni. Assersuutigalugu ullut tamangajaasa aviisi atuartarukku tv-miluunniit nutaarsiassat isiginnaartarukkit, sapaatip-akunnerata ingerlanerani ulloq ataaseq taakku pinngitsoorsinnaavigit taarsiullugulu Biibilimik atuaqqissaarnerusarsinnaavit? Sapaatip-akunneranut ulloq ataaseq nutaarsiassat pinngitsoorsinnaagukkit taarsiullugulu akunnerup affaata missaa atuaqqissaarnermut atortarlugu, ukiup ataatsip ingerlanerani akunnerit 25-nngussapput. Takorlooriaruk pisarninnit akunnerit 25-it Biibilimik atuarnerullutillu atuaqqissaarnerusuuguit ilinnut qanoq iluaqutaatigissagaluartoq. Aajuna siunnersuut alla: Sapaatip-akunnerata tullia ullut tamaasa ullup naalernerani eqqarsaatigisaruk suut sammisimanerlugit. Immaqa paasissavat ilaat pingitsoorluarsinnaallugit samminikinnerusinnaallugilluunnit Biibilimik atuarneq atuaqqissaarnerlu piffissaqarfiginerusinnaajumallugit. — Efesosimiut 5:15, 16.

14, 15. (a) Sooq nammineq atuaqqissaarnermut atatillugu anguniagaqarneq pingaaruteqarpa? (b) Biibilimik atuarneq eqqarsaatigalugu suut anguniagarineqarsinnaappat?

¹⁴ Aalajangersimasunik anguniagaqaleruit atuaqqissaarneq ilinnut ajornannginnerussaaq pissanganarnerussallunilu. Piviusorsiortut suut anguniagarisinnaavigit? Amerlasuunut pitsaassaaq Biibilip naallugu atuarnissaata anguniagarinissaa. Biibilimi immikkoortut aalajangersimasut  atuartarsimassagunarpatit. Maannakkut aalajangersinnaavit Biibili naallugu atuassallugu? Iivangkiiliut sisamat atuarlugit aallarniutigisinnaavatit nangillutillu Kristumiut Allagaataasa Grækerisuut sinneri atuarlugit. Tamanna iluaqutaangaassaaq, nuannaarutigingaassavallu. Tulliatut anguniagarisinnaavat Mosesimik allakkat tallimat atuakkallu oqaluttuarisaanermut tunngasut Esterimik allakkat ilanngullugit atuarnissaat. Taakku naammassisimagukkit Biibilip sinnerata atuarnissaa sapernarnavianngilaq. Arnap, ilagiinnut kristumiunut ilumoortunut ilaalerami 65-inik ukiullip, ulloq qanga Biibili tamaat atuarniarlugu aallartissimanerlugu kingusinnerusukkullu ulloq qanga naasimanerlugu Biibilimini allappai. Maannakkut qanga aallartinnerminut qangalu naasinerminut tallimariarluni ulluliisimavoq. (5 Mosesi 32:45-47) Biibili toqqaannartumik atuartarpaa, qarasaasiami atuarnagu.

¹⁵ Ilaasa Biibili naallugu atuareeraangamikku atuaqqissaariaatsit nutaat atulertarpaat atuaqqissaarnertik pissarsiffigiuarniarlugu. Immaqa Biibilip atuagartaanik aalajangersimasumik aallartitaqartinnatik Biibililersaarumik nassuiaatitalimmik misissueqqaartarput. Atuakkani „Hele Skriften er inspireret af Gud og gavnlig“-imi aamma Indsigt i Den Hellige Skrift-imi Biibilip atuagartaasa oqaluttuarisaaneq pillugu tunuliaqutaat, allaaserinneriaasiat aamma sooq iluaqutaanersut pillugit paasissutissarpassuaqarpoq. *

16. Biibilimik atuaqqissaarnerput eqqarsaatigalugu suna pinngitsoortinniartariaqarparput?

¹⁶ Atuaqqissaaraangatta Biibilimik ilisimatuunerartut amerlasuut pisarnerattut iliortussaanngilagut. Taakkua allakkat oqaasilerinerat pingaarnerutippallaartarpaat, puiorpaallu Biibili atuagaasoq inunninngaanneersuunngitsoq. Taakkua ilaat isumaqarput allakkat tamarmik allanneqarsimasut allattuisa namminneq inuttut isumaat malillugit inunnullu aalajangersimasunuinnaq, ataasiinnaq siunertaralugu isikkivimmillu ataasiinnarmit isigalugit, paasiniaagaluartarpullu. Inuttut taamatut eqqarsariaaseqaraanni Biibilip atuagartai oqaluttuarisaanertuinnaq isigineqartarput, imaluunniit ukiut ingerlaneranni upperisarsiornerup allanngoriartorsimaneranut paasissutissaannartut isigineqartarlutik. Ilisimatuut allat suut tamaasa soqutigiunnaarlugit oqaatsit misissoqqissaartarpaat Biibilimilu oqaatsit assigiinngissutaat pingaartippallaartarlugit. Guutimit tusarliussap paasinissaaninngarnit oqaatsit nagguii aallaaviilu misissornerusarpaat oqaatsillu hebræerisuut grækerisuullu tunngaviusumik isumaat nassuiarniartarlugit. Isumaqarpit taama iliorneq aalajaatsumik uumasumillu uppilersitsisinnaasoq? — 1 Thessalonikamiut 2:13.

17. Sooq Biibili inunnut tamanut tusarliussatut isigisariaqarparput?

¹⁷ Ilisimatuulli ilumoorpat isumaqaramik Biibilip atuagartai tamarmik immikkut inunnut aalajangersimasunuinnaq allanneqarsimasut tusarliussarlu ataasiinnaq imarigaat? (1 Korinthimiut 1:19-21) Imaannerunnginnerpa Guutip oqaasia piffissani tamani atuartunut tamanut pingaaruteqartoq, taakkua utoqqaassusiat tunuliaqutaallu apeqqutaatinnagit? Massa Biibilip atuagartaa ataaseq aallaqqaammut inummut aalajangersimasumut, soorlu Timotheusimut Titusimulluunniit, imaluunniit inunnut aalajangersimasunut, immaqa Galatiamiunut Filippimiunulluunniit, allagaagaluartoq, tamatta atuakkat taakkunatut ittut atuaqqissaartariaqarpavut. Atuakkat taakku tamatsinnut pingaaruteqarput, atuagarlu aalajangersimasoq assigiinngitsorpassuarnik sammisaqarsinnaavoq inunnullu assigiinngitsorpassuarnut iluaqutaasinnaalluni. Biibilimmi imaa inunnut tamanut  tusarliussaavoq, taamaattumilluuna oqaatsinut taama amerlatigisunut nutserneqarsimasoq. — Romamiut 15:4.

Ilinnut allanullu iluaqutaavoq

18. Guutip oqaasia atuaraangatsigu suut eqqarsaatigisarsinnaavavut?

¹⁸ Iluaqutaasorujussuussaaq atuaqqissaarnermi Biibilip paasiniarsarinissaa annikitsualuillu imminnut qanoq atanerannik paasiniaalluni. (Ussatit 2:3-5; 4:7) Jehovap oqaatsimini saqqummersissimasai siunertaanut atalluinnarput. Taamaattumik iluaqutaassaaq atuarsimasavut, Biibilimi siunnersuutit, Guutillu siunertaa imminnut qanoq atassuteqarnersut paasiniarutsigik. Eqqarsaatigisinnaavarput pisimasoq, eqqarsaat siulittuulluunniit aalajangersimasoq qanoq Jehovap siunertaanut attuumassuteqarnersoq. Imminut aperigit: ’Atuakkama Jehova pillugu sumik paasitippaannga? Tamakku Guutip naalagaaffia aqqutigalugu siunertaata naammassineqarnissaanut qanoq attuumassuteqarpat?’ Eqqarsaatigisinnaavarputtaaq paasissutissat qanoq atorsinnaanerivut. Ilinniartitsinitsinni allanilluunniit Biibili ikiortigalugu siunnersuinitsinni atorsinnaavavut? — Josva 1:8.

19. Allat ilikkakkatsinnik oqaluttuukkutsigik kikkut iluaqutigissavaat? Nassuiaruk.

¹⁹ Aamma iluaqutaassaaq allat ilinniarsimasatsinnik aveqatigigutsigik. Biibili atuarlugulu atuaqqissaaraangatsigu nutaanik ilinniartarpugut paasisaqarnerujartortarlutalu. Ilaquttatit allalluunniit ilikkakkannik oqaluttuutikkit. Piffissani naleqqulluartuni anneruniajuilluta taamaaliortarutta ineriartornassaaq. Nuannaarutiginnillutit allat ilikkakkannik soqutiginarsorisannilluunniit oqaluttuuttarukkit, qularnanngitsumik eqqaamassavaat. Soorunami aamma nammineq iluaqutigissavat. Tassami ilisimatuut paasisimavaat atuarsimasat eqqaamajuminarnerusartut atorlugit uteqqillugilluunniit, assersuutigalugu eqqaamalluarneranni allanut oqaluttuaralugit. *

20. Sooq Biibilimik atuartuarneq iluaqutaava?

²⁰ Biibilip atuagartaasa ilaannik atuarnerit tamaasa nutaanik ilikkagaqartarputit. Immikkoortut siornatigut immaqa malugerpianngisatit maanna malugilissavatit, Biibilimillu paasisaqarnerulerlutit. Tamatuma takutippaa Biibili inunnit allagaannaanngitsoq, tassaasorli ilisarsinermik erlinnartuut  iluaqutigiuarsinnaasarput. Taamaattumiguna Daavip kunngillu allat ’inuunertik tamaat atuartartussaagaat’.

21. Guutip oqaasia atuaqqissaarnerugutsigu qanoq iluaqutaassava?

²¹ Biibilip atuaqqissaarnissaanut piffissaqarfiginnittut paasissavaat iluaqutaasorujussuusoq. Anersaakkut ittunik erlinnartuutit nassaarissavaat siuneqassuseqarnerulerlutillu. Guutimut qaninnerusumik attaveqalissapput. Aamma ilaquttaminnut, ilagiinni kristumiuni qatanngutiminnut inunnullu suli Jehovamik pallorfiginnilersimanngitsunut iluaqutaanerulissapput. — Romamiut 10:9-14; 1 Timotheusi 4:16.

[Quppernerup ataani ilanngussat]

Eqqaamavigit?

• Israelitoqqami kunngit sumik suliassaqartitaappat?

• Biibilimik atuaqqissaarneq eqqarsaatigalugu Jiisusi apustilillu qanoq maligassiuippat?

• Immaqa qanoq iliortoqarsinnaava nammineq atuaqqissaarnermut piffissaqarnerujumalluni?

• Qanoq isiginnittaaseqarluta Guutip oqaasia atuaqqissaartariaqarparput?

[Atuaqqissaarnermi apeqqutit]

[Qupp. 23-mi ungalusaq]

„Tigummisariaqarparput“

„Biibilimi oqaatsinut qinerlerfissiaq atorusukkutsigu Interneti atoriaannaavoq. Biibilili atuarusukkutsigu, atuaqqissaarusukkutsigu eqqarsaatigeqqissaarusukkutsigulu tigummisariaqarparput, pissutigalugu taamaallaat taamatut uummammiugilerneqarsinnaammat isummamiitilerneqarsinnaallunilu.“ — Gertrude Himmelfarb, New Yorkimi City Universitymi professori soraarneq.