2003-mi ataatsimeersuarnerit nunanit tamalaanit peqataaffigineqartut

WATCH TOWER Bible and Tract Society of Pennsylvania-mi ilaasortanik ukiumoortumik ataatsimiititsinneq arfininngorneq 6. oktobari 2001-mi Jersey citymi New Jerseymi USA-miittumi pivoq. Ataatsimiinnerup kingorna ilaasortanut tikeraavinullu immikkut ittumik pilersaarusiortoqarsimavoq. Aqaguani Canadami USA-milu illoqarfinni sisamani ilassutaasumik ataatsimiittoqarpoq, taakkunanilu Jehovap Nalunaajaasuisa Siulersuisoqatigiivinut ilaasortat oqalugiaatimminnut kingullermut naggasiullugu imaattunik nalunaaruteqarput:

„Siunissami pingaaruteqarluinnarpoq Jehovap kiffaasa tamarmik ilagiittut katerisimasarnernut peqataanngitsoortannginnissaat. Apustili Paulusip kajumissaarpaatigut ataatsimooqatigiittaqqulluta kajumissaaqatigiittaqqullutalu, taamaaliortaqqullutalu Jehovap ullussarsua qalligaluttuinnartoq ilisimagatsigu. (Hebræerit 10:24, 25) Peqqussut Biibilimiittoq taanna naapertorlugu neriuutigaarput aappaagu [2002-mi] nunarsuup ilaani tamani ataatsimeersuartoqartarumaartoq. 2003-milu, Jehovap piumasarippagu, nunarsuup ilaanni nunanit tamalaanit peqataaffigineqartunik immikkut ittunik ataatsimeersuartoqartassaaq. Maannakkut eqqumaniartariaqarpugut, silarsuarmilu pissutsit qanoq allanngornersut maluginiarlugit.“

Naak aarlerinartoqarnerujartoraluartoq akerleriinneqarnerujartoraluartorlu pissutsit aaqqissuussaanerata maannakkut atuuttup naggatissaa qalliartortillugu, Guutip innuttai siumukartuartariaqarput. Naalagaaffimmik tusagassaq nuannersoq, mianersoqqussullu Biibilip imarisaa ilanngullugu, inuiaqatigiinnut naggueqatigiinnullu, immikkut oqaasilinnut inuiannullu tamanut oqaluussissutigineqassaq. Tamarmik kajumissaarneqassapput ’Guutimik mianerinninnissaminnut naalannartitsinissaminnullu’, eqqartuussinissaa qalliartormat. (Saqqummersitat 14:6, 7) Taamaattumik, Ataatatta qilammiusup piumasarippagu kissaatigippagulu, 2003-mi nunarsuarmi sumiiffinni assigiinngitsuni nunanit tamalaanit peqataaffigineqartunik ataatsimeersuartoqassaaq.

Ataatsimeersuarnerit immikkut ittut siullermik Amerikap Avannaani illoqarfinni arlaqanngitsuni pissapput, kinguninnguatigullu Europami. 2003-mi kingusinnerulaartukkut ataatsimeersuariat eqimattat Asiami illoqarfinnut arlaqanngitsunut aallarsinnaalissapput; ukiullu naalernerani eqimattat allat Afrikamut, Amerikap Kujataanut Manerassuarmullu aallarsinnaalissapput. Immikkoortortaqarfiit ilaat piumaffigineqassapput ataatsimeersuarianik killilimmik amerlassusilinnik ataatsimeersuarnerit ilaannut aallartsiteqqullugit. Ajoraluartumik inissaaleqineq pissutigalugu aggiinnartoqarsinnaanngilaq. Taamaattorli ataatsimeersuarnerni tamani nunanit assigiinngitsunit ataatsimeersuariat amerlassusii killiligaagaluartut qiimmassaataassapput.

Qanittukkut ataatsimeersuarnissat tamakku pillugit paasissutissanik Jehovap Nalunaajaasuisa ilagiivi nassinneqassapput. Immikkoortortaqarfiit pineqartut qaqugorpiaq ataatsimeersuartoqarnissaa ataatsimeersuariallu illoqarfinnut sorlernut aallarsinnaassanersut nalunaarutigiumaarpaat. Taamaattumik qinnuigissavatsigit ataatsimeersuarnissat pillugit maannakkorpiaq allaqqunasi apeqqutilleeqqunasiluunniit.

Ataatsimeersuariartussat toqqarneqartut oqaluussisartuusariaqarput tunniulluinnarsimallutillu kuisissimasut, maligassaalluartut, tikitaminnilu qatanngutinut qatanngutitut tunniusimaffiginnikkumasut. Qatanngutillu tassaniittut periarfissaqarluassapput nunanit allanit ataatsimeersuariat akillugit asannittumik tikilluaqqussallugit inoroorsaarfigalugillu. (Hebræerit 13:1, 2) Taamaaliorunik ’kajumissaaqatigiissinnaassapput’. (Romamiut 1:11, 12) Immikkoortortaqarfinnit, ataatsimeersuarnissamut ataatsimut arlalinnulluunniit aallartitaqaqqusaasimasunit, pisussat pillugit sukumiinerusumik paasissutissiisoqarumaarpoq.

2003-mi pisarnertut ulluni pingasuni nunani amerlanerusuni ataatsimeersuartoqartassaaq. Taamatut ataatsimooqatigiillutik tamarmik periarfissaqassapput ’tusarnissamut ilikkarsinnaanissamullu’ aamma qiimmassarneqarnissamut. (5 Mosesi 31:12; 1 Korinthimiut 14:31) Matumuuna Guutip innuttai tamarmiullutik periarfissaqartinneqassapput ’usserlugu takusinnaassallugulu Jehova ajunngitsuusoq’. (Tussiaat 34:9) Ataatsimeersuarnerit nunanit tamalaanit peqataaffigineqartut, soorlu aamma ataatsimeersuarnerit amerlasuut ajoqersuiartortitanit ilaaffigineqassapput, taakkualu ilaat saqqummiussassanut peqataasassallutik.

Ukiumi matumani ataatsimeersuarnissaq qulequtalik „Guutip naalagaaffianik oqaaluussisartut ilungersortut“, annertunerusumik oqaluussinissatsinnut kajumilersitsisussaq, qilanaarisinnaavarput. Taamaaliorutta Jehovap aappagu uagutsinnut piareersaagai qilanaarinerulissavavut. Tamatuma ulluni makkunani ajornartorsiorfiusuni pingaarutilinnilu ’eqqumatissavaatigut piareersimatillutalu’. — Matthæusi 24:42-44.  (wE 7/1 02)