Kristumiut sallusuissummi inuujuaannartut
Kristumiut sallusuissummi inuujuaannartut
„Qitornakka sallusuissummi inuusut tusarlugit tassa tamanit uannut nuannernerpaaq.“ — 3 JOHANNESI 4.
1. ’Nutaarsiassap nuannersup ilumoorsusiata’ pingaarnerpaatut suut sammivai?
JEHOVAP imminut „anersaakkut ilumoornikkullu“ pallorfiginnittuinnaat akuerai. (Johannesi 4:24) Taakkua ’nutaarsiassap nuannersup ilumoorsusia’ naalappaat kristumiut ajoqersuutaat tamaasa Guutip oqaasianik, Biibilimik, tunngavillit akueralugit. (Galatiamiut 2:14, NV) Sallusuissutip tamatuma Jiisusi Kristusi aamma Guutip naalagaaffia aqqutigalugu Jehovap kisimi oqartussaanerata qutsisisitaanissaa pingaarnerpaatut sammivai. Sallusuissummi inuunersugut nutaarsiassamillu nuannersumik upperinninnersugut annannissatsinnut aalajangiisuuvoq, Guutilli sallumik nuannarinnittut ‘paatsiveerutitissavai’. — 2 Thessalonikamiut 2:9-12; Efesosimiut 1:13, 14.
2. Apustili Johannesip suna qujamasuutigaa, Gajusimullu qanoq attaveqarpa?
2 Guutip naalagaaffianik oqaluussisartut ’sallusuissutip siammartinniarnerani suleqataapput’. Apustili Johannesitut ikinngutaatullu Gajusitut, sallusuissut aalajangiulluinnarpaat tassanilu inuullutik. Johannesip Gajusi allaffigaa: „Qitornakka sallusuissummi inuusut tusarlugit tassa tamanit uannut nuannernerpaaq.“ (3 Johannesi 3-8) Immaqa Johannesip Gajusi sallusuissummik ajoqersorsimanngikkaluarpaa. Utoqqarsuanngorninili, kristumiutut inersimalluarnini ataatatullu tunniusimanini pissutigalugit Johannesip Gajusi inuusunnerusoq anersaakkut qitornamisut isigilluarsimasinnaavaa.
Sallusuissut kristumiutullu guutisiorneq
3. Suna siunertaralugu kristumiut siulliit ataatsimiittarpat, qanorlu iluaqutigaat?
3 Sallusuissut ilikkarnerujumallugu kristumiut siulliit ilagiinni, amerlanertigut angerlarsimaffinni, katersuuttarput. (Romamiut 16:3-5) Taamaalillutik asaqatigiinnermut ajunngitsuliornermullu kajumissaaqatigiittarput. (Hebræerit 10:24, 25) Kingusinnerusukkut kristumiuunerartut pillugit Tertullian (155-p u.n.k. missaani inuusoq 220-llu kingorna toqusoq) allappoq: „Allakkat Guutimeersut oqaloqatigiissutiginiarlugit katersuuttarpugut. Oqaatsinik illernartunik uppernerput nakkussatsittarparput, pavaniittoq neriuffigaarput, tatiginninnerput aalajaallisarparput.“ — Tertullians forsvarsskrift for de kristne, kapitali 39.
4. Kristumiut ataatsimiinneranni erinarsorneq qanoq pingaaruteqarpa?
4 Kristumiut siulliit ataatsimiikkaangamik qularnanngitsumik erinarsortarput. (Efesosimiut 5:19; Kolossemiut 3:16) Celsus ukiuni 100-kkunni u.n.k. inuusoq, kristumiussutsimut assortuisoq, isumaqarpoq kristumiut erinarsuutaat tusarnersuusut „ima tusarnertigisut misigissutsinut sunniuteqarnerat pissutigalugu ajuallangajalluni,“ professori Henry Chadwick allappoq. Ima nangippoq: „Clemensip Alexandriameersup kristumiuni atuakkiortunit siulliulluni nassuiarpaa nipilersorneq qanoq ittoq kristumiunut naleqqulluartuunersoq. Eqqartorpaa nipilersorneq tiinganermut tunngasunik qitinnermut attuumassuteqartussaanngitsoq.“ (The Early Church, quppernerit 274-75) Kristumiut siulliit pisarnerattut Jehovap Nalunaajaasuisa Biibilimut tunngasunik taallallit erinarsortarpaat, ilaatigut erinarsuutit kimittuut Guutimik nalaagaaffianillu unnersiutiginnissutit.
5. (a) Ilagiit Kristumiut siulliit qanoq anersaakkut siunnersorneqarpat? (b) Kristumiut ilumoortut qanoq Jiisusip Matthæusi 23:8, 9-mi oqaasii maleruartarpaat?
5 Kristumiut siulliit ilagiivini utoqqaanertat ajoqersuinermik isumaginnittarput, ilagiinnilu kiffartortut assigiinngitsutigut uppeqatitik ikiortarpaat. (Filippimiut 1:1) Siulersuisoqatigiit Guutip oqaasianit anersaamillu illernartumit siulersortillutik anersaakkut siunnersuineq isumagisarpaat. (Apustilit Suliaat 15:6, 23-31) Ilagiinni upperisarsiornermut tunngasunik taaguuteqartoqanngilaq, Jiisusimmi ajoqersukkani ima peqquai: „Ilissili rabbimik taagortissanngilasi; ataasermi ajoqersuisoraarsi, ilissilu tamassi qatanngutigiippusi. Nunamiittoq kinaluunniit ataatassinnik taassanngilarsi; ataasermi ataatagaarsi, taanna qilammiittoq.“ (Matthæusi 23:8, 9) Tamakku allarpassuillu eqqarsaatigalugit Jehovap Nalunaajaasui kristumiutut siullertut ipput.
Sallusuissut oqaluussissutigigamikku malersorneqarput
6, 7. Eqqissinartumik tusarliussaqaraluarlutik kristumiut ilumoortut qanoq pineqarsimappat?
6 Kristumiut siulliit Guutip naalagaaffia pillugu tusarliussaq eqqissinartoq oqaluussissutigaat. Taamaattorli Jiisusitut malersorneqartarput. (Johannesi 15:20; 17:14) Oqaluttuarisaanermik ilisimatuup John L. von Mosheimip kristumiut ukiuni hundredelinni siullerni inuusut ima oqaatigai: „inuit katersat ajoqutaannginnerpaallutillu eqqissisimanerpaat . . ., naalagaaffimmut ajoqutaasinnaasumik eqqarsarnaviarnatillu kissaateqarnavianngitsut“. Dr. Mosheim oqarpoq „Romamiut kamannarigaat kristumiut pallorfiginninnerata pisariitsuunera, inuiaat allat upperisarsiornikkut ileqqulersuutaannut assersuunneqarsinnaanngilluinnartoq“. Ima nangippoq: „Kristumiuni pilliisoqarneq ajorpoq, naalaffeqanngilaq, inuusaliaqanngilaq, siulittuisartoqanngilaq palaseqatigeeqarnanilu; inuillu taama ileqqoqanngitsut allanit ilisimasaqanngitsunit upperisaqanngitsutut isigineqartarput. Guuteqarneranillu miserratiginnittuusorineqartut Romamiut inatsisaat naapertorlugit inuttut navianarnerpaatut isigineqartarput.“
7 Palasit, eqqumiitsuliortut allallu guutipilussiornermik aningaasarsiuteqartut, inuit kamassaartarpaat kristumiunut, guutipilussiornernut attuumassuteqartunut qanorluunniit ittunut peqataajumanngitsunut. (Apustilit Suliaat 19:23-40; 1 Korinthimiut 10:14) Tertullian allappoq ’kristumiut [unnerluussisut] isumaat malillugu inuiaqatigiinni ajortoqarneranut nuanniitsunullu tamanut pissuusut. Kuussuaq Tiberi qaaraangat, Nileni narsaatinut qarsutsinngikkaangat, qilak unikkaangat, nuna sajukkaangat, kaannersuaqaraangat toqoraataasumilluunniit nappaateqaraangat, ingerlaannaq suaartoqartarpoq: ’Kristumiut løvinukaassigit.’“ Qanorluunniit pisoqassagaluarpat kristumiut ilumoortut ’guutipilunnut mianersussapput’. — 1 Johannesi 5:21.
Upperisarsiornikkut ileqqut pillugit sallusuissut
8. Sooq sallusuissummi inuusut juullisiorneq ajorpat?
8 Sallusuissummi inuusut ileqqut Biibilimut naapertuutinngitsut ingalassimasarpaat, ’qaamasoq taartorlu assigiissuteqanngimmata’. (2 Korinthimiut 6:14-18) Assersuutigalugu juullisiorneq ajorput, decembarip ulluisa 24-anni 25-anniluunniit nalliuttorsiutigineqartartoq. „Kristusip ulloq inuuffia eqqoqqissaartoq kialuunniit ilisimanngilaa,“ The World Book Encyclopedia-mi miserratigineqanngilaq. The Encyclopedia Americana-mi (1956-imoortumi) allassimavoq: „Saturnaliasiorneq, decemberip qeqqata missaani Romamiut nalliuttorsiutigisartagaat, juullip nalaani ileqqut qiimanartut ilarpassuinut aallaaviuvoq.“ Atuakkami Højtider og fester-imi allassimavoq: „Ulloq Jiisusip inuuffia ilisimaneqanngilaq. Ukiup 336-p missaani ilagiinni pisortaasunit ulloq decembarip 25-at aalajangiunneqarpoq. Tamatumunnga pissutaasinnaasut arlallit taaneqarput.. . . Nassuiaat alla tassaavoq Romami decembarip 25-anni seqineq ajugaaffigineqanngitsoq nalliuttorsiutigineqartarmat.“ Atuakkamilu La vie quotidienne en Palestine au temps de Jésus-imi (Jiisusip nalaani Palæstinami ulluinnarni inuuneq-imi) allassimavoq: „Savaatit . . . ukiukkut . . . savat inaanniittarput, tamannarpiarlu pissutigalugu paasineqarsinnaavoq juullimut ulluliussaq, ukiukkut, eqqortuusinnaanngitsoq, iivangkiiliumimi allassimammat savanik paarsisut naarsamiittut.“ — Lukasi 2:8-11.
9. Jehovap kiffaasa kristumiuuneraqatigiit poorskisiortarnerat qanoq isigaat?
9 Kristumiut poorskisiornerat amerlanertigut Kristusip makinneranik nalliuttorsiutiginninnertut isigineqartarpoq, paasissutissiisulli tatiginartut nalliuttorsiorneq tamanna eqqunngitsumik pallorfiginninnermut atassuteqartittarpaat. Atuakkami Dagligt Liv i Norden-imi allassimavoq: „Tyskisut poorski taaneqartarpoq ’ostern’, tuluttuut ’easter’, tamarmik naggueqarput itsaq sakserit oqaasiannit ’oster’-imit = makinnermit. . .. Itsaq Germanerit upernaap guutia arnaq ’Ostara’-mik atilik guutisiorfigaat.“ Qanorluunniilli aallaaveqaraluarpat Encyclopædia Britannica-mi ilumoortumik allassimavoq: „Testamentitaami [nalliuttorsiornerup taassuma ullumikkut poorskimik, tuuluttulluunniit easter-imik taaneqartartup] nalliuttorsiutigineqarneranik takussutissaqanngilaq.“ Kristumiut siulliit poorskisiorneq ajorput, ullumikkullu Jehovap Nalunaajaasui aamma taamaaliortanngillat.
10. Nalliuttorsiorneq suna Jiisusip atulersippaa, kikkullu peqqussutigineqarneratut nalliuttorsiutigisarpaat?
10 Jiisusip ajoqersukkani peqqunngilai inunngornini makinniniluunniit nalliuttorsiutigisassagaat, pilliutitulli toqunerminik eqqaaniaalluni nalliuttorsiorneq atulersippaa. (Romamiut 5:8) Iluamik oqassagaanni tassaavoq ajoqersukkaminut nalliuttorsiutigeqqusatuaa. (Lukasi 22:19, 20) Ukiumoortumik nalliuttorsiorneq taanna, aamma Naalakkap unnukkorsiortitsineranik taaneqartartoq, Jehovap Nalunaajaasuinit suli nalliuttorsiutigineqartarpoq. — 1 Korinthimiut 11:20-26.
Sallusuissut nunarsuaq tamakkerlugu oqaluussissutigineqarpoq
11, 12. Sallusuissummi inuusut qanoq oqaluussineq tapersersortuaannarsimavaat?
11 Sallusuissummik ilisimannittut ataqqinaatitut isigaat piffissartik, nukitik pigisatillu allat nutaarsiassap nuannersup oqaluussissutigineqarneranut atorsinnaagamikkik. (Markusi 13:10) Kristumiut siulliit oqaluussinerat kajuminnermit tunissutinit aningaasatigut tapersersorneqartarpoq. (2 Korinthimiut 8:12; 9:7) Tertullian allappoq: „Aningaasiveqarpat aningaasat tassaniittut ilaalernissamut akiliutitut katersugaanngillat, soorlulusooq upperisarsiorneq niuerutigineqarsinnaasoq. Kinaluunniit qaammatip ingerlanerani ullormi aalajangersimasumi aningaasamininnguanik ikisisarpoq, imaluunniit piumalleraangami, taamaallaallu piumassaguni pisinnaassagunilu. Pinngitsaaliisoqarnermi ajorpoq, namminerli kajuminnermit akiliisoqartarpoq.“ — Tertullians Forsvarsskrift for de kristne, kapitali 39.
12 Jehovap Nalunaajaasuisa nunarsuaq tamakkerlugu oqaluussinerat aamma kajuminnermit tunissutinit tapersersorneqartarpoq. Jehovap Nalunaajaasuisa saniatigut soqutiginnittorpassuaqarpoq sulinermut tamatumunnga aningaasatigut tapersiiumasunik. Aamma tamatumuuna kristumiut siulliit Jehovallu Nalunaajaasui assigiissuteqarput.
Sallusuissut inuttullu pissuseq
13. Jehovap Nalunaajaasuisa qanoq pissuseqarnissaminnut atatillugu siunnersuut suna maleruartarpaat?
13 Kristumiut siulliit aamma takutippaat sallusuissummi inuullutik apustili Petrusip siunnersuutaa manna maleruaramikku: „Guutimik nalusut akornanni ajunngitsumik inuugitsi, tamatumuunarpiaq taakkua ilissinnik pinerluttuuneraallutik mamarliisartut takusinnaaniassammatigit suliasi ajunngitsut taakkunuunatigullu Guuti unnersiutigisinnaaniassammassuk ullormi takusarneqarfissami.“ (1 Petrusi 2:12) Jehovap Nalunaajaasuisa siunnersuut tamanna ullumikkut maleruaqqissaartarpaat.
14. Kristumiut aliikkusersuineq kanngunartoq qanoq isigaat?
14 Allaat tunussinersuaqalereersoq kristumiuunerartut kinguaassiuutitigut inuunerlunnaveersaarput. W. D. Killen, oqaluffeqarfiit oqaluttuarisaanerannik ilisimatooq, allassimavoq: „Ukiuni 100-kkunni 200-kkunnilu illoqarfinni annerusuni tamani isiginnaartitsisarfik aliikkutassaqarfiit pingaarnerpaat ilagaat; isiginnaartitsisartut amerlanertigut ileqqorissaarpallaartanngitsut, isiginnaartitsigaangamik tamatigut inuit pilerissusiinut ajornerpaanut kajumissaarisarput. . . . Kristumiut ilumoortut tamarmik isiginnaartitsisarfik maajunnartutut isigaat. . . . Aliikkusersuineq kanngunartoq tunuarsimaarfigaat; Guutimik nalusut guutiisa torlorfigineqartuarnerat kristumiut upperisarsiornikkut qularunnaarsitaanerannut narrunarsaataangaarpoq.“ (The Ancient Church, quppernerit 318-19) Ullumikkut Jiisusip ajoqersugaasa ilumoortut aamma aliikkutassiat kanngunartut ileqqorluttunngornartullu ingalassimasarpaat. — Efesosimiut 5:3-5.
Sallusuissut ‘naalakkersuisullu qullersaasut’
15, 16. ’Naalakkersuisut qullersaasut’ kikkuuppat, sallusuissummilu inuusunit qanoq isigineqarpat?
15 Romamiut kaasariisa amerlanersaasa kristumiut siulliit ileqqorissaaraluartut kukkusumik nalilertarpaat. Oqaluttuarisaanermik ilisimatooq E. G. Hardy oqarpoq Romamiut kaasariisa kristumiut siulliit ’ingasattajaarniatut narrunartutut’ isigisaraat. Kaasarip Trajanip Romamiullu Bityniami naalagaatitaata Plinius Nukarliup allaffigeqatigiinnerata takutippaa nuimarnit kristumiussutsip ilumoortup qanoq ittorpiaaneranik ilisimasaqarpallaanngitsut. Kristumiut qanoq naalagaaffik isigaat?
16 Jiisusip ajoqersugaasa siulliit pisarnerattut Jehovap Nalunaajaasui „naalakkersuisunut qullersarisaminnut“ killilimmik naalatsigitittarput. (Romamiut 13:1-7) Inuit piumasaqaataat Guutillu piumasaa imminnut naapertuukkunnaasagaluarpata, kristumiut ima aalajangerluinnassapput: „Guuti inunnit naalattariaqarneruvoq.“ (Apustilit Suliaat 5:29) Atuakkami After Jesus — The Triumph of Christianity-mi allassimavoq: „Naak kristumiut kaasarimik guutisiorfiginninneq peqataaffiginngikkaluaraat pikitsitsinermik aallarniisuunngillat, naallu upperisarsiornerat allaanerugaluartoq ilaannikkullu Guutimik nalusunut ajuallannartaraluartoq, kaasarip naalagaaffianut sioorasaarutaanngilaq.“
17. (a) Naalakkersuinissaq suna kristumiut siulliit neriuutigaat? (b) Jiisusip ajoqersugaasa ilumoortut Esaja 2:4-mi allassimasoq qanoq maleruarsimavaat?
17 Kristumiut siulliit Guutip naalagaaffia neriuutigaat, ataataanerpaallu Aaperaap, Jaakup Iisaallu ’illoqarfik [neriorsuutigisaq] pinngortitsisua tassaasoq Guuti’ utaqqivaat. (Hebræerit 11:8-10) Jiisusip ajoqersugai Jiisusitut ’silarsuarmut ilaanngillat’. (Johannesi 17:14-16, NV) Inuiaallu sorsunneri akersuunnerilu eqqarsaatigalugit kristumiut takutippaat eqqissineq noqqaassutigalugu „panatik assallatserummut savissaliaralugit“. (Esaja 2:4) Malugiuk assigiissut soqutiginartoq oqaluffeqarfiit oqaluttuarisaaneranni lektoriusup Geoffrey F. Nuttallip tikkuaraa: „Kristumiut siulliit sorsunnermut isiginnittaasiat imminnullu Jehovap Nalunaajaasuinik taagortut isiginnittaasiat akueriuminaatsumik assigiissuteqarnerungaarput.“
18. Naalakkersuisut kikkulluunniit Jehovap Nalunaajaasuinik qunuginninnissaminnut sooq pissutissaqanngillat?
18 Kristumiut siulliit kalluunnaveersaarlutik „naalakkersuisunut qullersarisaminnut“ naalatsigitipput. Taamaattumik politikkikkut aaqqissuussinernut qanorluunniit ittunut sioorasaarisanngillat, Jehovallu Nalunaajaasui aamma taamaapput. Amerika-avannarlermi allaaserisamik pingaarnermik allattartoq ima allassimavoq: „Ilumoortuusaarniartut imaluunniit kukkusumik isummertartut kisimik isumaqarsinnaapput Jehovap Nalunaajaasui politikkikkut naalakkersuinermut sumulluunniit sioorasaarisartut; upperisarsioqatigiit taakku pikitsitsiniartooqqajanngillat eqqissinermilli nuannarisaqaqalutik.“ Oqartussaasut paasisimasaqarluartut nalunngilaat Jehovap Nalunaajaasui qunugisariaqarnagit.
19. Akileraartarneq eqqarsaatigalugu kristumiut siulliit Jehovallu Nalunaajaasui pillugit qanoq oqartoqarsinnaava?
19 Kristumiut siulliit ’naalakkersuisut qullersaasut’ ataqqivaat ilaatigut akileraarnermikkut. Romamiut kaasariat Antoninus Pius (138-161 u.n.k.) allaffigalugu Justinus Martyr allappoq kristumiut ’inunnit allanit kajuminnerullutik’ akileraartartut. (Justinos Martyr’s Forsvarsskrift for Kristendommen, kapitali 17) Tertullianillu Romamiut naalakkersuisui oqarfigai akileraaruserisut ’kristumiunut qujassutissaqartut’ taakku peqqissaarlutik akileraartarmata. (Tertullians forsvarsskrift for de kristne, kapitali 42) Kristumiut Pax Romana (Romamiut eqqissineqartitsinerat) — inatsisitigut allatigullu aaqqissuussatigut aalajaatsumik ingerlatsineq, aqqusernit pitsaasut aamma immakkut angalanerit pissutsinut naleqqiullugit isumannaatsuunerat — iluaqutigaat. Akueraat innuttaaqatigiinnut akiitsoqarlutik, Jiisusillu oqaasii naalattarpaat: „Kaasari tunisiuk kaasarip piinik Guutilu Guutip piinik.“ (Markusi 12:17) Ullumikkut Jehovap kiffaasa aamma siunnersuut tamanna maleruartarpaat, nersorneqartarpullu peqqusersuikkamik, assersuutigalugu akileraarnermikkut. — Hebræerit 13:18.
Sallusuissut — ataasiussutsip qilerutaa
20, 21. Kristumiut siulliit akornanni ullumikkullu Jehovap kiffaasa akornanni eqqisseqatigiinneq qatanngutigiittullu asaqatigiinneq qanoq oqaatigineqarsinnaappat?
20 Sallusuissummi inuugamik kristumiut siulliit qatanngutigiittut eqqissisimasutut ataasiussuseqarput. Ullumikkut Jehovap Nalunaajaasui aamma taamaapput. (Apustilit Suliaat 10:34, 35) Allakkat The Moscow Times-imi ilanngunneqartut imaapput: „[Jehovap Nalunaajaasui] inuttut inussiarnerluinnartutut maniguutingaartutullu peqatikkuminartutut ilisimaneqarput. Allat kimigiiserfiginngisaannarpaat, tamanulli eqqissinartumik attaveqarniartarput. . .. Iminngersortaqanngillat, ikiaroortartortaqarnatik akissarsillunilu peqquserluttuliortortaqarnatik. Taamaappoq oqaatsitik iliuutsitsillu tamaasa nalunngeqatiginnissutsiminnit Biibilimit ilinniartinneqarsimasumit siulersortinniartarmatigik. Silarsuaq tamakkerlugu inuit tamarmik Biibilimut naapertuuttumik inuuniarsarisuuppata, Jehovap Nalunaajaasuisa iliornerattut, silarsuaq peqqarniitsoq inuuffigisarput allaanerulluinnassagaluarpoq.“
21 Qinerlerfissiami Encyclopedia of Early Christianity-mi allassimavoq: „Kristumiut siulliit imminnut innuttaaqatigiittut nutaatut, akerariissimagaluartut, juutit Guutimillu nalusut, eqqisseqatigiillutik inuuffigisinnaasaattut, isigipput.“ Jehovap Nalunaajaasui aamma silarsuaq tamakkerlugu qatanngutigiissuupput eqqissinermik nuannarisaqartut — aap, silarsuaq tamakkerlugu innuttaaqatigiit nutaat. (Efesosimiut 2:11-18; 1 Petrusi 5:9; 2 Petrusi 3:13) Jehovap Nalunaajaasui naggueqatigiinnit tamaneersut eqqissillutik ataatsimeersuaqatigiittut takugamigit Afrika-kujallermi Pretoriami saqqummersitsivimmi isumannaallisaanermi pisortaasoq oqarpoq: „Tamarmik pissuserissaarput inussiarnersumillu oqaloqatigiillutik, aap, ulluni taakkunani periaasiisa takutippaat peqatigiiffissinnut ilaasortaasut qutsissunik najoqqutaqartut tamarmillu ilaqutariissuartut ittut.“
Sallusuissummik ilinniartitsinikkut pilluaqqussutit
22. Kristumiut sallusuissummik nalujunnaarsitsinerat qanoq kinguneqartarpa?
22 Paulusip kristumiullu allat ’sallusuissut saqqummersittarpaat’ — pissusilersornermikkut oqaluussinermikkullu. (2 Korinthimiut 4:2) Isumaqarpit Jehovap Nalunaajaasui aamma taamaaliortartut inuiannillu tamaneersunik sallusuissummik ajoqersuisartut? Silarsuaq tamakkerlugu inuit ilumoortumik pallorfiginninnermut ilannguttarput, amerliartuinnartullu ’Jehovap illuata qaqqaanut’ aggiallutik. (Esaja 2:2, 3, NV) Ukiut tamaasa tusindilikkuutaat Guutimut tunniulluinnartarlutillu kuisitarput, ilagiillu nutaarpassuit pilersinneqartarput.
23. Inuiannit tamaneersunik sallusuissummik ajoqersuisut qanoq isigaagit?
23 Tunuliaquttatik assigiinngilluinnaraluartut Jehovap kiffai pallorfiginninnermi ilumoortumi ataasiussuseqarput. Asaqatigiinnerata takutippaa Jiisusimut ajoqersugaasut. (Johannesi 13:35) ’Ilumut Guuti akornanniittoq’ takusinnaaviuk? (1 Korinthimiut 14:25) Illit inuiannit tamaneersunik sallusuissummik ajoqersuisunut ilannguppit? Ilanngussimaguit qinnutigaarput sallusuissut pingaartittuassagit immikkullu pisinnaatitaaffeqarlerlutit naassaanngitsumik sallusuissummi inuussasutit. (wE 07/15 02)
Qanoq akissavit?
• Guutisiorneq eqqarsaatigalugu kristumiut siulliit Jehovallu Nalunaajaasui qanoq assigiissuteqarpat?
• Sallusuissummi inuusut upperisarsiornermut atasumik suna kisiat nalliuttorsiutigisarpaat?
• ’Naalakkersuisut qullersaasut’ kikkuuppat, kristumiullu taakku qanoq isigaat?
• Sallusuissut qanoq ataasiussutsimut qilerutaava?
[Atuaqqissaarnermi apeqqutit]
[Qupp. 25-mi assiliartaq]
Kristumiut ataatsimiinneri sallusuissummi inuusunut iluaqutaajuarsimapput
[Qupp. 27-mi assiliartaq]
Jiisusip ajoqersukkani pilliutitut toqunini pillugu eqqaaniaallutik nalliuttorsiortaqquai
[Qupp. 28-mi assiliartaq]
Kristumiut siulliit pisarnerattut Jehovap Nalunaajaasuisa ’naalakkersuisut qullersaasut’ ataqqisarpaat