Salloqittarteqinak
Salloqittarteqinak
UKIUNI nutaanerusuniinnaq inuit peqquserluffigineqarneq ajorput. Inuiaat oqaluttuarisaaneranni peqquserluttuliornerit siulliit ilaat oqaluttuarineqartoq tassa Saatanip Eva naatsiivimmi Edenimi salloqittarmagu. — 1 Mosesi 3:13; 1 Timotheusi 2:14.
Peqquserluttarneq taamanili nalinginnaalersimavoq, ullumikkulli aatsaat taama ajortigaaq. Nalerput pillugu Biibilimi ima mianersoqqussuteqarpoq: „Inuilli ajortut peqquserluttullu ajortumut nakkaakkiartuinnartussaapput, ilaminnik tammartitsillutik imminnullu tammartillutik.“ — 2 Timotheusi 3:13.
Inuit assigiinngitsorpassuartigut peqquserluffigineqartarput. Peqquserluttuliortut inuit nakutillugit aningaasaataannik arsaarniartarpaat. Politikerit ilaasa qinersisitik salloqittaarisarpaat qanorluunniit akeqassagaluarpat atorfimminniiginnarniarlutik. Inuit allaat imminnut salloqittartarput. Piviusut nuanniitsut paasiumanagit imminnut uppernarsartarpaat inooriaaseq navianartoq ajortunik kinguneqarnavianngitsoq, immaqalu pujortartarnertik, ikiaroortarnertik inuunerluttarnertillu attatiinnartarlugu.
Aamma upperisarsiornermut tunngatillugu peqquserlunneqartarpoq. Jiisusip nalaani upperisarsiornikkut siuttut inuit salloqittaarisarpaat, Jiisusilu taakku pillugit oqarpoq: „Ilaginnarsigit tappiitsuullutik tappiitsunik ingerlassisuupput, tappiitsullu tapiitsoqanni ingerlakkuniuk marluullutik kussinermut nakkassapput.“ (Matthæusi 15:14) Aamma inuit upperisamut tunngatillugu imminnut salloqittartarput. Ussatit 14:12-imi allassimavoq: „Ingerlavik inuup eqqortuusorisaralua tassaasinnaavoq toqumut aqqutaasoq.“
Ullumikkuttaaq inuppassuit upperisamut atatillugu salloqittagaasarmata tupigusuutigissanngilarput, apustili Paulusimi oqarpoq Saatanip ’uppinngitsut isumaat tappiillisikkai, Messias, tassa Guutip assinga, pillugu tusagassap nuanningaartup qaamangaarnera qaamaqqunagu.’ — 2 Korinthimiut 4:4, NV.
Peqquserluttumit salloqittagaagutta aningaasatigut annaasaqassaagut. Politikerip salloqittaarippatigut immaqa kingunerissavaa kiffaanngissutsitta killilerneqarnera. Saatanilli salloqittarpatigut Jiisusi Kristusi pillugu sallusuisut itigartillugu, inuuneq naassaanngitsoq annaassavarput. Taamaattumik salloqittarteqinak. Upperisarsiornermut tunngatillugu sallusuissummut paasissutissiisinnaasutuaq tutsuiginartoq, Biibili, paqumisunnak misissoruk. Taamaaliunngikkuit annaasaqarpallaassaqaatit. — Johannesi 17:3. (wE 07/01 02)