Toqu qanoq takorloortarpiuk?

TOQUP ulluinnarni inuunerput allanngortilluinnarsinnaavaa qanorluunniit peqqitsigigaluarutta pisuujutigigaluaruttaluunniit. Tulliani aqqusinikkut ikaarnitsinni siniffitsinniluunniit innanganitsinni toqumit nalaanneqassanersugut naluarput. Septembarip 11-anni 2001-mi New Yorkimi Washingtonimilu pinerliisoqarnerani ajunaarnersuup eqqaasippaatigut ’akeqqap kingulliup’, toqup, inuiaqatigiit tamaneersut qassinillu ukioqarneri apeqqutaatinnagit eqqortarai, minutsialunnguillu ingerlanerinnaanni tusindilippassuit eqqorsinnaagai. — 1 Korinthimiut 15:26.

Taamaakkaluartorli inuit toqu tiguartissimaffigerpaseqaat. Nutaarsiassanik tunisaqarneq pitsaanerpaasarpoq imaluunniit fjersynikkut isiginnaartoqarnerpaasarpoq toqusoqarnermut tunngasunik ilanngutassiaqartillugu, ingammik ajunaarneq inuppassuit inuunerannik naleqarsimagaangat. Inuit toqu soqutigiuaraat takuneqarsinnaavoq sorsunnerup, pinngortitami ajunaarnersuup, pinerlunnerup nappaatilluunniit piliarigaluarpatigit. Toqumik soqutiginninnerujussuaq misigissutsikkut ersernerusarpoq tusaamasanik inunnilluunniit nuimasunik toqusoqaraangat.

Toqup inuit eqqarsaataanniittuarnera miserratissaanngilaq. Inuit toqu soqutigiuarsimavaat — pingaartumik allat toqumik eqqorneqaraangata. Nammineq eqqorneqaratarsinnaaneq eqqarsaatigerusunneqannginnnerusarpoq. Amerlanerit namminneq toqunissartik eqqarsaatigiumaneq ajorpaat.

Toqu paasiuminaatsuua?

Nammineq toqunissaq eqqarsaatigalugu nuannersuunngilaq, taamaattuassaarlu. Sooq taamaappa? Guutip naassaanngitsumik inoorusussuseqangaartilluta pinngortissimagamitigut. Oqaluussisartup oqaasiini 3:11-mi, nuktsikkami 1961-meersumi ima allassimavoq: „aammattaaq ittuinnartoqarnera uummataannut tunniuppaa.“ Toqunissaq qulariunnaaraanni qamuuna aporaattoqalertarpoq eqqissiunnaartitsillunilu. Qamuuna aporaattoqarneq nalimmatserniarlugu naassaanngitsumillu inoorusussuseq pissusissamisoortoq nalerisimaarnartunngortinniarlugu inuit paasinnittaatsinik assigiinngitsorpassuarnik ineriartortitsisimapput, soorlu tarnip toqusuitsuunera inooqqittarnerlu upperalugit.

Taamaakkaluartorli toqunissaq ernumanartuuvoq nalinginnaasumillu annilaangatigineqartarluni. Tamaattumik tupigusuutigissanngilarput inuiaqatigiit nalinginnaasumik toqu akuerilersinnaanngimmassuk. Toqup takutippaa qanoq inuuneq pisuussutinik piginnaanermillu anguniagaqarnermut atussallugu siunertaqanngitsigisoq.

Toqu sungiusimajunnaagaq?

Qanga toqussutaasinnaasumik napparsimasoqartillugu aqqunarsimasoqartilluguluunniit nammineq angerlarsimaffimmi asasanik  najorteqarluni toqusarneq nalinginnaasuuvoq. Biibilip nalaani taamaattoqakulavoq kulturillu ilaanni suli ullumimut taamaattoqartarluni. (1 Mosesi 49:1, 2, 33) Nunani taakkunani ilaqutariit katersuuttarput qanorlu iliortoqarnissaanik pilersaarusiornermi meeqqat aamma peqataatinneqartarlutik. Taamaalillutik ataasiaakkaat paasisarpaat kisimik aliasuttuunatik, aliasoqatigiinneq peqatigiillunilu toqulersumik isumaginninneq tuppallersaataapput.

Tamanna inuiaqatigiinnit toqumik eqqartuinngisaannartunit amiilaarnartutullu isumaqarfiginnittunit, meeqqallu „illersorniarlugit“ peqataatitserusunngitsunit allaanerulluinnarpoq. Ullutsinni allaanerusumik pissusilersortoqartarpoq kiserliorlunilu toqusoqartarluni. Amerlanerit angerlarsimaffimminni toqorusuttarput — eqqissillutik toqqissisimallutillu ilaquttaminnik najorneqarlutik — amerlanerilli napparsimmavimmi kisimiillutik anniaateqarlutik, soriarsinnaanatik teknikkikkullu atortorissaarutinik quarsaaminartunik atortoqarlutik toqunissartik naammagiinnartariaqartarpaat. Aamma inuit millionillit inunnik toqoraanermi, kaannersuarni, aids-mik, inuiaqatigiit sorsuunneranni piitsuungaarnerluunniit pissutigalugu malugineqaratik toqusarput.

Eqqarsaatigisassaq

Biibilimi toqup ajortutut eqqarsaatigineqarnissaa eqqaaneqanngilaq. Assersuutigalugu Oqaluussisartut oqaasiani 7:2-mi allassimavoq: „Illumut aliasuffimmukarneq pitsaaneruvoq illumut nalliuttorsiorfimmukarnermit, inuit tamarmik inuunerat illumi aliasuffimmi naggateqartarmat.“ Toqusoqartilluta ulluinnarni suliarisartakkatta isumakuluutittalu unitsikkallarnissaat pissusissamisoorpoq inuunerullu qanoq sivikitsiginera eqqarsaatigeqqisaarlugu. Tamatuma siuneqarluarnerusumik inuunissatsinnut ikiorsinnaavaatigut nalaatsornerinnarmik asuliinnarluunniit inuuneqarnissaminngarnit.

Toqu qanoq eqqarsaatersorfigisarpiuk? Inuunerup naggatissaanut atatillugu qanoq misiginerlutit, upperisaqarnerlutit, neriuuteqarnerlutit ernummateqarnerlutillu eqqarsaatigisimaviuk?

Toqu inuunertulli inuup paasiuminaatsillugulu nassuiaruminaatsitaatut paasiuminaatsigaaq. Tamatumunnga tunngatillugu aperisinnaasatuarput ilumoortoq tassaavoq pinngortitsiserput. Taassumaniippoq „inuunerup puilaffia“, tassaavorlu ’toqumit aniguiffissaqartoq’. (Tussiaat 36:10; 68:21) Toqu pillugu isummat ilaat nalinginnaanerpaat Guutip oqaasia atorlugu misissoraanni, qularnanngitsumik Biibilimi oqariartuutip qanoq tuppallersaataatigalunilu qiimmaallaataatiginera tupaallaatigineqassaaq. Biibilimi ersersinneqarpoq toqu sunut tamanut naggatissaasariaqanngitsoq.

[Qupp. 4-mi issuagaq]

Inuunerup qajannartuunera eqqarsaatigalugu siuneqassuseqarnerusumik inuuneqarnissatsinnik kajumissisippaatigut.