Atuartartut apeqqutaat

Pissutsini qanoq ittuni arnap kristumiup upperisarsiorneq pissutigalugu nasartaateqarnissaa nasaqarnissaaluunniit naleqqutissava?

„Arnap kialuunniit qinutilluni pruffiititulluunniit oqalutsilluni niaqqumigut uleqanngitsup niaqquni kanngunarsartarpaa,“ apustili Paulusi allappoq. Sooq? Oqartussaassuseq pillugu Biibilimi ima najoqqutassiaqarmat: ’Arnap angut niaqoraa.’ Kristumiut ilagiivini qinnussisut ilinniartitsisullu tassaasarput angutit. Taamaattumik arnap kristumiup anersaamut tunngasut uimi ilagiinniluunniit qatanngutip angutip kuisimasup isumagisartagaanik isumagisaqaruni nasartaateqartariaqarpoq nasaqartariaqarluniluunniit. — 1 Korinthimiut 11:3-10.

Arnaq kristumiu ilaquttani ilagitillugit ilaannikkut nasartaateqartariaqalersinnaavoq. Ilaqutariit atuaqqissaarniarlutik neriniarlutilluunniit katersuukkaangata uiusoq atuaqqissaarnermi aqutsisuusarpoq ilaquttaminillu qinnussisuusarluni. Uiusorli uppinngitsuuppat nuliata tamanna akisussaaffigisinnaavaa. Taamaattumik uia najuutsillugu nuliaasoq nipituumik qinnussiguni qitornaniluunniit Biibilimik  atuaqqissaaqatigigunigit eqqortuliussaaq nasartaaseruni. Uini najuutinngippat nasartaasertariaqanngilaq, Guutimmi nuliaasoq qitornaminik ilinniartitsisinnaatippaa. — Ussatit 1:8; 6:20.

Taavami ilaqutariinni erneq ukiukitsoq Jehovamut kiffaappat tunniulluinnarsimasoq kuisimasorlu? Erneq kristumiut ilagiivinut ilaasortaammat ilagiinni qatanngutinit angutinit ilinniartinneqartariaqarpoq. (1 Timotheusi 2:12) Ataataasoq uppertuuppat erneq angumminit ilinniartinneqartariaqarpoq. Ataataasorli najuutinngippat anaanaasullu erni kuisimasoq qitornanilu allat Biibilimik atuaqqissaaqatigigunigit nasartaateqartariaqarpoq. Atuaqqissaaqatigiinnermi taamaattumi nerilernermilu erni kuisimasoq qinutissanerlugu nammineq aalajangersinnaavaa. Misigiguni suli taamaaliorsinnaanngitsoq nammineq qinusinnaavoq. Aalajangeruni nammineq qinuniarluni nasartaateqartariaqarpoq.

Ilagiinni aalajangersimasunik isumagisaqartillutik arnat kristumiut aamma nasartaateqartariaqarsinnaapput. Ulluinnarni katersuuttoqartillugu immaqa qatanngutit arnaannaapput. Aamma ilagiit ataatsimiinnerisa ilaanni kuisimasumik anguteqanngitsoorsinnaavoq. Ataatsimiinnermi katersuunnermiluunniit qatanngutip arnap qatanngutip angutip suliarisartagaanik suliaqartariaqaruni nasartaateqartariaqarpoq.

Arnaq kristumiu Biibilimik tunngavilimmik oqalugiaammik oqaatsinut allanut, soorlu ussersorluni, nutserisuuguni ilagiilluunniit ataatsimiinnerini atuffassisuuguni nasartaateqartariaqassava? Naagga, qatanngutit arnat taamaaliortut ataatsimiinnerni siulittaasuunngillat ilinniartitsinatilluunniit. Taamatullu arnat qanoq oqaluussisoqarsinnaaneranik takutitsisut, misigisanik oqaluttuartut imaluunniit Teokratiimik atuarfimmi pisassaqartut nasartaateqartariaqanngillat.

Ilagiinni ilinniartitsisut angutaasariaqarput kuisimasut, angutilli arnallu oqaluusseqquneqarput ilagiillu avataanni ilinniartitseqquneqarlutik. (Matthæusi 24:14; 28:19, 20) Taamaattumik arnap kristumiup qatanngut angut kuisimasoq oqaluusseqatigiguniuk nasartaateqartariaqanngilaq.

Allaaneruvorli Biibilimik atuaqqissaaqatigiinnissamik isumaqatigiissuteqartoqarsimappat angullu tunniulluinnarsimasoq kuisimasorlu najuuppat. Uani pineqarpoq ilinniartitsineq aaqqissugaasoq, atuaqqissaarnermilu aqutsisoq siulittaasutut oqaatigineqarsinnaavoq. Taamaattoqartillugu ilagiit sinnerlugit ilinniartitsisoqarpoq. Angut kuisimasoq najuutsillugu qatanngutip arnap kuisimasup atuaqqissaarneq taamaattoq aqukkuniuk eqqortuliussaaq nasartaateqaruni. Qatanngulli angut qinnussisuusariaqarpoq. Aatsaat pissutsit immikkorluinnaq ittuuppata, assersuutigalugu angut oqalussinnaanngippat, qatanngut arnaq angummik tunniulluinnarsimasumik kuisimasumillu najuuttoqartillugu qinnussissaaq.

Immaqa qatanngutip arnap kristumiup ilaannikkut angut oqaluussisartoq kuisimanngitsoq Biibilimik atuaqqissaaqatigiinnermut ilagisarpaa. Piumaguni angut atuaqqissaarnermik aqutseqqusinnaavaa. Angulli taanna qatanngummik arnamik kuisimasumik qinunermi siulersuisinnaatitaanngimmat, eqqortuliornerussaaq arnaq atuaqqissaaqatigiinnermi qinnussiguni. Pissutsini taamaattuni atuaqqissaarneq aqukkuniuk qinnussigunilu nasartaateqartariaqarpoq. Ilagiit avataanniittut angut oqaluussisartoq oqaluusseqataanera pissutigalugu ilagiinnut ilaasorissavaat, suli kuisimanngitsuugaluarpalluunniit.

„Arnaq inngilit pillugit niaqqumigut uleqassaaq piginnaanermut nalunaaqutaasumik,“ apustili Paulusi allappoq. Aap, qatanngutit arnat kristumiut inngilinut millionilikkuutaanut ilumoorlutik Jehovamut naalatsigitittuartunut maligassiuilluarnissartik immikkut pisinnaatitaaffigaat. Taamaattumik arnat Guutimik mianerinnittut pisariaqaraangat nasartaateqarnissartik nasaqarnissartilluunniit eqqumaffigigunikku eqqortuliussapput. (wE 07/15 02)

[Qupp. 31-mi assiliartaq]

Nasartaateqarneq nasaqarnerluunniit oqartussaanermik ataqqinninnermut ersiutaavoq