„Guutip tupinnartuliaanit“ kajungilersinneqarput

„Tusarpavut Guutip tupinnartuliai uagut nammineq oqaatsivut atorlugit oqaatigigaat.“ — APUSTILIT SULIAAT 2:11.

1, 2. Piinsip ulluani ukiumi 33-mi Jerusalaami tupinnartumik sumik pisoqarpa?

JIISUSIP ajoqersugai angutit arnallu Jerusalaami angerlarsimafimmi katersuussimasut ukiumi 33-mi sapaatit ilaanni tupinnartumik nalaataqarput. „Tassanngaannarlu perpaluk anoraasuarsuartut qilammit tutsiuppoq, illulu isersimaffigisaat tamaat ulikkaarpaa. Oqqallu innertut ittut taakkununnga takutipput tamaasalu immikkut tuffigalugit. . . Taava tamarmik anersaamik illernartumik ilumioqangaalerput allamiullu oqaasii atorlugit oqalulerput.“ — Apustilit Suliaat 2:2-4, 15.

² Inuppassuit illup eqqaanut katersuupput. Katersuuttut ilagaat juutit Romamiut naalagaaffiannit tamaneersut, ’angutit upperluartut’ Jerusalaamut piinsisioriartorsimasut. „Guutip tupinnartuliai“ pillugit tamarmik immikkut oqaatsiminnik tusaramikkit tupaallaqaat. Oqaluttut galilæamiuuppata qanoq taamaattoqarsinnaava? — Apustilit Suliaat 2:5-8, 11.

3. Piinsip ulluani inuit katersuussimasut Petrusip qanoq nassuiaappai?

³ Galilæamiut ilaat tassaavoq apustili Petrusi. Taassuma sassariarluni Jiisusi Kristusip sapaatit akunnialunnguit sioqqullugit angutinit naapertuilluanngitsunit toqutaasimanera nassuiarpaa. Guutilli ernini toqusunit makitissimavaa,  Jiisusilu toqusunit makissimasoq ajoqersugarpassuarminut takutissimavoq, aamma Petrusimut allanullu katersuussimasuni najuuttunut. Ullut quliinnaat siornatigut Jiisusi qilaliarsimavoq, maannalu anersaaq illernartoq ajoqersukkaminut kuivaa. Petrusip oqalugiaataanik tusarnaartunut tamanna pingaaruteqarpa? Aap, taamaalluinnarpoq, tassami Jiisusip toquata ajortaannik isumakkerfigineqarnissaat ajornarunnaarsippaa, ’anersaarlu illernartoq tunissutisiarisinnaalerpaat’. (Apustilit Suliaat 2:22-24, 32, 33, 38) „Guutip tupinnartuliai“ tusaramikkik inuit qanoq qisuariarpat? Jehovamut kiffartuussinitta nalilerniarnerani oqaluttuap taassuma qanoq ikiorsinnaavaatigut?

Iliuuseqarnissaminnut kajungilersitat

4. Ukiumi 33-mi piinsip ulluani Joelip siulittuutaa sorleq eqquuppa?

⁴ Jerusalaami ajoqersukkat anersaaq illernartoq pigamikku ingerlaannaq annannissaq pillugu tusagassaq nuannersoq oqaluussissutigilerpaat, oqariartuummillu tusartut siulliit tassaapput ullaaq taanna inuit katersuussimasut. Ajoqersukkat oqaluussinerat pruffiitip Joelip, Petuelip ernerata ukiut 800-t sioqqullugit siulittuutigisimasaanik eqquutitsivoq: „Anersaara kuiumaarpara inunnut tamanut. Ernisi panisilu siulittuissapput, utoqqartasi sinnattorumaarput inuusuttortasilu takorluugaqarumaarlutik. Anersaara kuiumaarpara allaat inussiaatissinnut angutinut inussiaatissinnullu arnanut ullussani taakkunani.“ — Joeli 1:1; 3:1, 2, 4; Apustilit Suliaat 2:17, 18, 20.

5. Ukiuni untritilinni siullerni kristumiut siulittuinerat qanoq paasineqassava? (Quppernerup ataani nassuiaat allassimasoq takuuk.)

⁵ Angutit arnallu Daavitut, Joelitut Deboratullu ittut siunissami pisussanik siulittuisussat Guutip maanna saqqummersinnialernerpai? Naamik. ’Ernerit paniillu, inussiaatit angutit arnallu’ kristumiut siulittuisussaapput, ima paasillugu anersaap illernartup ikiuineratigut Jehovap ’tupinnartuliaanik’, naammassereersimasaanik siunissamilu naammassisassaanik oqaluussissutiginninnermikkut taamaaliussasut. Oqaatigineqarsinnaavoq Qutsinnerussaartoq sinnerlugu oqariartortitaasut. * Oqaluussinerannut inuit qanoq qisuariarpat? — Hebræerit 1:1, 2.

6. Petrusip oqalugiaataa tusarnaareerlugu inuppassuit qanoq iliornissaminnik kajumissisinneqarpat?

⁶ Petrusip oqalugiaataata inuppassuit iliuuseqarnissaannik kajumissisippai. „Oqaasiinik ilassinnittut kuisipput, ullorlu taanna inuit 3.000-ingajaat ilagiinnut ilanngutitaapput“. (Apustilit Suliaat 2:41) Juutiugamik imaluunniit juutiussutsimut ilanngussimasuugamik Allakkanik tunngaviusumik ilisimasaqareerput. Maanna Petrusip oqaluussissutaanut uppertunngoramik, „Ataatap Ernerullu Anersaallu Illernartup aqqani“ kuisissinnaalerput. (Matthæusi 28:19) Kuisinnermik kingorna „apustilit ajoqersuinerat aalajangerfigaat“. Aammattaaq upperneq naneqqammisartik pillugu inuit allat oqaluttuuttalerpaat. Aap, „ullut tamaasa isumaqatigiillutik naalaffimmiittarput, . . . Guuti unnersiutigisarpaat tamanillu nuannarineqarlutik“. Oqaluussinerup tamatuma kinguneranik „[Jehovap] annaanneqartut ullut tamaasa ilanngutitittarpai“. (Apustilit Suliaat 2:42, 46, 47) Ajoqersukkat nutaat  nunaminnut utermata, nunat ilarpassuini kristumiut ilagiivinik pilersitsiortortoqapallappoq, qularnanngitsumik ’tusagassamik nuannersumik’ nakimanatik oqaluussinerat pissutigalugu. — Kolossemiut 1:23.

Guutip oqaasia sunniisinnaassuseqarpoq

7. (a) Inuiaat naalagaaffinnit tamaneersut Jehovap ilagiivinut ullumikkut suup ilanngutsittarppaat? (b) Ilagiinni attaveqarfigisanni aamma nunarsuaq tamakkerlugu amerliartornissamik periarfissat suut takusinnaavigit? (Quppernerup ataani nassuiaat allassimasoq takuuk.)

⁷ Taavami ullumikkut Guutimut kiffaanissaminnik kissaateqartut? Aamma taakkua Guutip oqaasia peqqissaartumik atuaqqissaartariaqarpaat. Taamaaliorunik Jehova ’Guutitut nallittuisutut, saamasutut, kamajaatsutut, ilumoornermik sallusuissummillu peqangaartutut’ ilisarilissavaat. (2 Mosesi 34:6; Apustilit Suliaat 13:48) Paasissavaattaaq Jehovap asannilluni utertitsissut isumagisimagaa, aamma paasissavaat Jiisusi Kristusip aavata kuisap ajortinit tamanit eqqiarsinnaagaatik. (1 Johannesi 1:7) „Toqusut makikkumaartut – iluartut iluaatsullu“ pillugu Guutip neriorsuuta upperilerunikku uummataat qujamasunnermik ulikkaassaaq. (Apustilit Suliaat 24:15) ’Tupinnartulianik’ tamakkuninnga suliarinnittumut asanninnerup Biibilip sallusuissutaanik allanut oqaluttuarnissaannik kajumissisissavaat, Guutimullu tunniulluinnariarlutik kuisissapput. Tamatuma kingorna ’Guutimik ilisimasaqarnertik alliartuinnartittariaqarpaat’. * — Kolossemiut 1:10b; 2 Korinthimiut 5:14.

8-10. (a) Misilitakkat qanoq takutippaat Guutip oqaasii ’sunniisinnaassuseqartuusut’? (b) Misilittakkap taassuma Jehova pillugu sumik ilinniartippaatit, aamma kiffaminik isumassuisarnera pillugu? (2 Mosesi 4:12)

⁸ Guutip kiffai Biibili pillugu qarsupiinnartumik ilisimasaqalerneq ajorput. Naamik, ilisimasaqarnerup kajumingaalersittarpai, eqqarsartaasiat allanngortittarpaa, inooriaasiannullu ilannguttarpoq. (Hebræerit 4:12) Tamanna oqaluttuamit tulliuttumit ersersinneqarpoq. Arnaq Camillemik atilik utoqqaat angerlarsimaffianni sulisuuvoq. Paaqqutarisaasa ilagaat Martha, Jehovamut Nalunaajasuusoq. Martha puiortarnermik nappaateqarpoq, taamaattumillu ulloq unnuarlu paaqqutarineqarnissaminik pisariaqartitsivoq. Paarsisuisa nerinissaanik, aap, allaat nerisaminik iisinissaanik eqqaasittariaqartarpaat. Takusassatsitulli Marthap puiorsimanngisaannagaanik isumaaniittoqarpoq.

⁹ Ullut ilaanni Marthap Camille qiasoq takuaa, paasinarsivorlu inuttut ajornartorsiuteqartoq. Marthap Camille eqeriarlugu Biibilimik atuaqqissaaqatigiumallugu neqeroorfigaa. Kisianni Biibilimik atuaqqissaarnermik Martha aqutsisinnaavaa? Aap, naak eqqaamasinnaassutsimi ilarujussua annaasimagaluarlugu Guutini Ataqqinartoq imaluunniit sallusuissutit erlinnartut Biibilimeersut ilinniarsimasani puigorsimanngilai. Atuaqqissaaraangamik Marthap Camillemut paragrafit tamaasa atuaqqusarpai, allassimaffiit innersuussutigineqartut quppeqqusarlugit, quppernerullu ataaniittoq apeqqut atuaqqoriarlugu akeqqusarpaa. Sivisulaartumik taamaaliorput, Marthallu piginnaasai killeqaraluartut, Camille Biibili pillugu annertuumik ilinniagaqarpoq. Marthap nalunngilaa Camillep Guutimut kiffartorusuttunik allanik peqateqartarnissani pisariaqartikkaa. Taamaattumik naalagaaffilersaarfimmi siullermeerluni ataatsimiileruni kusanartunik atisassaqarniassammat kjolissaanik skuussaanillu tunivaa.

¹⁰ Marthap asannittumik isumassuinera, pissusii upperneralu sakkortooq Camillep killitsissutigai. Paasilerpaa Marthap Biibilimiit ilinniutigitinniagai pingaaruteqartuusut, taakkumi kisiisa Marthap puigorsimanngilai. Camille kingusinnerusukkut utoqqaat angerlarsimaffiannut allamut nuutsinneqarami paasivaa nammineq iliuuseqartariaqarluni. Periarfissaq siulleq atorlugu Marthap atisat tunniussai atorlugit naalagaaffilersaarfimmukarpoq, Biibilimillu atuaqqissaaqatigineqarnissani kissaatigalugu. Tamatuma kingorna Camille siumukarpoq, kuisillunilu.

 Jehovap killiliussai kristumiut ataqqivaat

11. Eqiasuilluta oqaluussisartuunitta saniatigut Naalagaaffiup oqariartuutaanit kajumissisinneqarsimanerput qanoq takutissinnaavarput?

¹¹ Ullumikkut nunarsuarput tamakkerlugu Jehovap Nalunaajaasui Marthatut Camilletullu „naalagaaffik pillugu nutaarsiassamik nuannersumik“ oqaluussisartut 6 millioninit amerlanerupput. (Matthæusi 24:14, NV; 28:19, 20) Ukiuni untritilinni siullerni kristumiut assigalugit „Guutip tupinnartuliaanit“ kajumissisinneqarlutik oqaluussisarput. Jehovap aqqanik taagorneqarsinnaanerminnik pisinnaatitaaffitsik pingaartippaat, qujamasuutigaallu Guutip anersaaminik tunisimammatik. Najoqqutassianik Biibilimeersunik inuunerminni tamatigut malinninnermikkut ’[Jehovap] piumasaa malillugu inuunissartik, tamatigullu iluarisaanik iliornissartik’ ilungersuutigaat. Ilaatigut atisalersornissamut imminullu peqqissaartuunissamut atatillugu Guutip najoqqutassiaanik ataqqinnittuunerannik tamanna kinguneqarpoq. — Kolossemiut 1:10a; Titusi 2:10.

12. Atisat imminullu peqqissaartuunissaq pillugu Timotheusimut allakkani siullerni 2:9,10-mi aalajangersimasumik qanoq ilitsersuuteqarpa?

¹² Kristumiut ilumoortut pissusilersornissaannut najoqqutassiat Jehovap aalajangersarsimavai. Tamatumunnga atatillugu Guutip piumasaqaatai apustili Paulusip tikkuarpai: „Taamatuttaaq piumasaraara arnat isornaatsumik perroorniutaanngitsunillu atisaqassasut, nutsat eqqumiikajaamik kusassagaasut, kuultit sapanngallu atisalluunniit akisuut pinnagit, ajunngitsuliornerilli arnanut Guutimik mianerinninnermik nassuerutiginnittunut naleqquttut pinnersaatigalugit.“ * Oqaatsit taakku qanoq ilinniarfigisinnaavavut? — 1 Timotheusi 2:9, 10.

13. (a) „Isornaatsumik atisaqarneq“ qanoq isumaqartinneqarpa? (b) Sooq oqarsinnaavugut Jehovap najoqqutassiai ingasaassinianngitsuusut?

 ¹³ Paulusip oqaasiisa erseqqissarpaat kristumiut „isornaatsunik“ atisaqartariaqartut. Tassa imaappoq pikataanatillu imminnut peqqissaartuussapput. Kikkulluunniit, aamma pigisakitsut, atisaminnik eqqiluitsuutitsinermikkut najoqutassianik taakkuninnga ingasaassinianngitsunik malinnissinnaapput. Amerikami Kujallermi Jehovap Nalunaajaasuisa ilaat tamatuma tungaatigut maligaassaalluarput. Ukiut tamaasa ataatsimersuarnermut peqataajumallutik kilometererpassuit orpippassuartigut pisuttariaqartarput, kingornatigullu akunnerpassuit kanomik umiartortariaqartarlutik. Takornartaanngilaq angalanerup nalaani ilaat kuussuarmut nakkarlutik atisatik avaleqqummut alittarmatigit. Ataatsimeersuarfissamut apuukkaangamik atisaat aaqqissugassaasarput, taamaattumik atisanik ataatsimiissutissaminnik iluarsartuussinissaminnut, errorsillutillu manissaanissaminnut piffissaqarniartarput. Jehovap nerriviani neriartoqqusaasimanerminnut qujamasunnertik pissutigalugu isornaatsumik atisalersornissartik nukissartik tamaat ilungersuutigisarpaat.

14. (a) „Perroorniutaanngitsunik“ atisalersorneq qanoq isumaqarpa? (b) Atisalersoriaatsip „guutimik mianerinnittuuneq“ qanoq takutissinnaavaa?

¹⁴ Paulusip aamma eqqaavaa „perroorniutaanngitsunik“ atisalersussasugut. Tamanna isumaqarpoq ingasaassisunik, pikitsitsiniarpaluttunik, attuumavallaartunik imaluunniit mutiuvallaartunik atisalersussanngitsugut. „Guutimik mianerinninnermik“ ersersitsisunik atisalersortariaqarpugut. Eqqarsaallannaq, ilaa? Imaanngilarli ataatsimiikkaangatta aatsaat isornaatsumik atisalersortassasugut, allatigullu Jehovap najoqqutassiai sumiginnarlugit. Pissutsitsigut guutimik mianerinninneq ataqqinninnerlu ersersinneqartariaqarpoq, tassami nalunaaqutaq kaajallallugu kristumiuullutalu Guutimut kiffaavugut. Suliffitsinni atuarfitsinnilu atisat atukkavut suliatsinnut soorunami naleqquttuussapput, kisianni ippinnaateqaratillu pilimaniartuussanngillat. Atisavut guutimik mianerinninnitsinnik tamatigut ersersitsippata, atisavut kanngusuutigalugit torrutiinnarlugu oqaluussinissarput tunuarsimaarutiginavianngilarput. — 1 Petrusi 3:15.

’Silarsuaq asaniaqinasiuk’

15, 16. (a) Atisat imminullu peqqissaartuutinnissap tungaatigut silarsuaq sooq issuarnaveersaassavarput? (1 Johannesi 5:19) (b) Sooq mutiutitat ingalassimanissaat silatusaarnerua?

¹⁵ Atisanik sorlernik atisaqarnissatsinnik qanorlu isikkoqarnissatsinnik aalajangiiniarnitsinni ilitsersuutip Johannesip allagaani siullerni 2:15,16-imiittup ikiorsinnaavaatigut. Atuarpugut: „Silarsuaq taassumaluunniit pii asaniaqinasigit. Silarsuarmik asannittup Ataatap asanninnera immini piginngilaa; silarsuarmiittummi tamarmik – uinngup pilerigisai, isit pilerigisaat nunallu piinik usorsisimaaruteqarneq – Ataatamit pisuunngillat, silarsuarmit pisuupput.“

¹⁶ Ilitsersuut ullutsinnut naleqquttoq, tassami avatangiisinit tatineqarneq ullumikkut aatsaat  taama annertutigaaq. Uagulli qanoq atisalersornissatsinnik silarsuaq aalajangiisuutissanngilarput. Atisat qanorlu isikkoqarnerup tungaatigut ukiuni kingullerni inuit isiginnittaasiat allanngorujussuarsimavoq. Allaat niuernerup silarsuaani atorfillit, pisortat, qaffasissumilu atorfillit allat atisalersortaasiat kristumiut eqqarsaqqaaratik ilaarsinnaanngilaat. Taamaattumik „silarsuarmut matumunnga naleqqussartariaqanngilagut“, akerlianilli Guutip najoqqutassiai malillugit ’Guutip annaassisitta ajoqersuutaanut tamatigut pinnersaataaniarta’. — Romamiut 12:2; Titusi 2:10.

17. (a) Atisanik pisitinnata imaluunniit atisalersortaatsimik aalajangersimasumik toqqaatinnata apeqqutit suut eqqarsaatigisariaqarpavut? (b) Sooq ilaqutariinni ittuusut ilaquttamik atisalersortaasiat maluginiartariaqarpaat?

¹⁷ Atisat aalajangersimasut pisiarinnginnerini silatusaarnerussaaq ima imminut aperissalluni: ’Sooq atisat taamaattut nuannaraakka? Inuk tusaamasaq nuannaartorisara taamaattunik atisaqarmat nuannaraakka? Imaluunniit inuusuttut nipilersortartut aalajangersimasut atisaat imaluunniit allat siulersorneqarusunngitsut pikitsitsiumatuullu atisaat assigaat? Atisat aamma maluginiartariaqarpavut. Kjole atequlluunniit naleqquttumik takissuseqarpa? Atisat pilimanianngitsuuppat ataqqinarpaluttuullutillu, imaluunniit attuumavallaarpat? Pikitsitsiniartoorpaluppat imaluunniit talakkappasippat? Ilinnut aperigit: ’Allat atisakka mamiatsaatigisinnaavaat?’ (2 Korinthimiut 6:3, 4) Tamatuma maluginiarnissaa sooq taama pingaaruteqartigaa? Jiisusi ilaaratsigu taamaappoq, Biibilimilu oqaatigineqarpoq ’Kristusi imminut eqqarsaatiginngitsoq’. (Romamiut 15:3) Ilaqutariinnut ittuusut kristumiut ilaquttamik atisalersortaasiat maluginiartariaqarpaat. Guutimut pallorfigisaminnut ataqqinninnertik pissutigalugu pisariaqaraangat aalajangersimasumik asannittumillu ilitsersuinissartik nangaassutigisariaqanngilaat. — Jaaku 3:13.

18. Atisat qinikkavit maluginiarnissaannut suup kajumissisippaatit?

¹⁸ Oqariartuut oqaluussissutigisarput Jehovameersuuvoq, taannalu ataqqinassutsip illernassutsillu aallaavigaat. (Esaja 6:3) Biibilimi kajumissaarneqarpugut „qitornaasutut asasaasutut“ taanna ilaarniaqqullugu. (Efesosimiut 5:1) Atisalersortaasitta immitsinnullu peqqissaarunnitta Ataatarput qilammiusoq ataqqinartilluguluunniit kanngunarsarsinnaavaat, nuannaartinnissaalu soorunami kissaatigaarput. — Ussatit 27:11.

19. „Guutip tupinnartuliai“ pillugit sooq allat oqaluttuukkusuppigit?

¹⁹ „Guutip tupinnartuliai“ qanoq isigaagit? Eqqarsaatigeriassagit sallusuissut ilikkarsimallugu pisinnaatitaaffik qanoq annertutigisoq! Jiisusi Kristusip aava kuisaq upperigatsigu ajortitsinnik isumakkeerfigineqarsimavugut. (Apustilit Suliaat 2:38) Tamatuma kinguneranik Guutimut siooranata oqalussinnaalersimavugut. Neriuuteqanngitsut sioorasarnerattut toqu siooraginngilarput, Jiisusimmi „iliverniittut tamarmik taassuma nipaanik tusarumaarfissaanik ilivernillu aniumaarfissaanik“ neriorsuutaa upperilersimavarput. (Johannesi 5:28, 29) Jehovap asannilluni tamakku tamaasa uagutsinnut saqqummiuppai, tamatumalu saniatigut anersaaminik illernartumik tunivaatigut. Guutip tunissutai ajunngitsut qujamasuutigalugit najoqqutassiai qutsissut ataqqisariaqarpavut, „tupinnartuliaalu“ pillugit allat oqaluttuunnerisigut ilungersorluta Jehova unnersiutigisariaqarparput. (wE 08/01 02)

[Quppernerup ataani ilanngussat]

Qanoq akissavit?

• „Tupinnartulianik“ sunik inuit ukiumi 33-mi piinsip ulluani tusagaqarpat, qanorlu qisuariarpat?

• Qanoq Jiisusimut ajoqersuganngortoqartarpa, tamannalu qanoq kinguneqartarpa?

• Atisat imminullu peqqissaartuutinnerup soqutiginissaa sooq pingaaruteqarpa?

• Atisat aalajangersimasut imaluunniit atisalersortaaseq aalajangersimasoq naleqquttuunersoq qanoq aalajangerneqarsinnaava?

[Atuaqqissaarnermi apeqqutit]

[Qupp. 15-mi assiliartaq]

Jiisusip toqusunit makissimanera Petrusip oqaluussissutigaa

[Qupp. 17-mi assiliartaq]

Isikkukkut qallikkut Guuti naalannartippiuk?

[Qupp. 18-mi assiliartaq]

Angajoqqaat kristumiut meeqqamik atisalersortaasiat soqutigisariaqarpaat