Inuuneq upperisapalaanit aqunneqaraangat

ANGERLARSIMAFFINNIIT anillutit tumitit paarlallugit ikaarneqarpata, putukkut ujaqqamut torruttoorukku, timmissap unnuakkut nipipalaamik qarlornera tusaagukku sinnattulluunniit uteqattaartuarpat, isumaqartissagaluarpigit? Qularnanngitsumik inuppassuarnit soqutaanngitsutut nalaatsornikkut pisutut isumaqarfigineqassagaluarput, Afrika kitaamiulli ilarpassuisa anersaat silarsuaanniit nalunaaqqutitut ilimasaarutitullu oqariartuutitulluunniit paasissagaluarpaat. Nalunaaqqut isumalersorneqarneralu apeqqutaalluni iluanaarnissamik ajutoornissamilluunniit ilimasaarutitut isigineqartarpoq.

Soorunami Afrikamiinnaq upperisapalaaqanngilaq. Allaat Kinami kunngiitsuuffimmilu Sovjetunioniusimasumi, ukiuni qulikkuutaani guutiitsutut ilisimaneqartuni, upperisapalaaqarneq tupinnaannartumik suli atugaangaarpoq. Nunani killerni inuppassuarnit ullorissat najoqqutaralugit siulittuutit atuarneqakulasarput, qaammatip ulluisa 13-iat tallimanngorneruppat ulloq immikkut ajortutut isigineqartarpoq qitsuillu qernertut qanillinaveersaarneqartarlutik. Aamma inuiaat ilaat allorniusat sanimukartut avannarlersaanniittut isumaqartarput arsarnerit tassaasut toqusimasut anersaavi aarrup niaquanik arsartut. Indiami lastbiilimik ingerlatsitsisut aids-imik siaruarsaaqataasimapput, upperigamikku kiattumi ungasissumut ingerlaartillutik nillarsaatigalugu atoqateqartariaqarlutik. Japanimi sullorsuarliortut upperaat, sullorsuaq suli naammassisimanngitsoq arnamit iserfigineqarpat ajunaarnermik kinguneqassasoq. Timersornerup silarsuaani aamma upperisapalaaqarpoq. Volleyball-ertartup upperaa qaqortunik alerseqarnani qernertunik alerseqartarnini pillugu ilini unamminerni ajugaajuaannartut. Aap, upperisapalaanik takorluukkat killeqanngillat.

Illimmi? Ersinngitsumik, nassuiarneqarsinnaanngitsumik sioorassuteqarpit? „Takorluukkanit iliuuseqarnertalinnit inornartutut isumaqarfigineqartunit“ sunnertissimavit? Akissutit qulaarisinnaavoq, qinerlerfissiaq naapertorlugu „upperisapalaaq“ taamatut nassuiarneqarmat.

Sooq ulluinnarni inuuneq aalajangigassallu upperisapalaanit nassuiarneqarsinnaanngitsunit aqunneqassappat? Silatusaarnerua satsigassaanngitsunik allaallu ajoqutaasunik aqunneqassalluni? Upperisapalaaqarneq ajoqutaasanngila, imaluunniit navianartoqartapa?