Inuunerit upperisapalaanit aqunneqartippiuk?

NUNARSUAQ tamakkerlugu upperisapalaaqartoqarpoq. Inuit ilaannut pingaarutilerujussuuvoq, kulturikkut kingornussaannut ilaammat. Allat inuunerminni pissanganartorsiutigilaaginnarpaat, mianersortunnguamilli. Ingammik nunarsuup kitaani inunni upperisapalaanik, assersuutigalugu Afrikamisulli, sunnertissimanngitsuni tamaappoq.

Afrikamiut kulturiata ilarujussua upperisapalaanit tunngaveqarpoq. Afrikamiut filmiliaat, radiokkut aallakaatitassiaat atuagassiaataallu, upperisapalaanik, angakkuarsaarnernik, siuaasanik pingaartitsinermik aarnussanillu tunngasunik oqaluttuanik ulikkaarajupput. Sooq upperisapalaat taama inunnut sunniuteqartigaat, upperisapalaallu sumit aallaaveqarpat?

Upperisapalaat sunik tunuliaqutaqarpat?

Upperisapalaaqarnerujussuaq toqusimasut anersaavinik anersaanilluunniit allanik ersigisaqarnermik pissuteqarpoq. Pisartut assigiinngitsut nassuiarneqartarput anersaat inuit siorasaarniarlugit, mianersoqquniarlugit iluanaartinniarlugilluunniit attaveqarfiginiarsarisaraat.

Upperisapalaat aamma healerinermut nakorsaatinullu attuumassuteqangaarput. Nunani ineriartorfiorpianngitsuni inuit nakorsaatinik nutaanerpaanik pissarsisinnaanngillat akissaqarnatilluunniit. Taamaattumik inuppassuit anersaarsiorneq upperisamullu tunngatillugit ileqqulersuutit atorlugit katsorsartinniartarput nappatsaalitinniartarlutilluunniit. Aamma angakkoq inooriaatsiminnik ilisimannittoq oqaatsiminnillu oqaluttoq nakorsamik oqaloqatiginninnermit toqqisisimanarnerutittarpaat. Tamakku tamarmik upperisapalaat ataavartinneqarnerannut pisooqataapput.

Upperisapalaaqarneq naapertorlugu nappaatit ajutoornerillu nalaatsornerinnaanngillat, anersaalli silarsuaanni pissaanilissuarnit pilersitaallutik. Angakkup oqaatigisinnaavaa ilaqutaasup toqusimasup anersaava naammagittaalliuuteqartoq. Aamma imaassinnaavoq anersaanut attaveqartartoq oqartoq arlaata angakkoq unammillertoq perloqqusitissimammagu, nappaammik ajutoornermilluunniit eqqugaanera pissuteqartoq.

Upperisapalaat nunarsuaq kaajallallugu assigiinngitsorujussuupput, siaruarsimanerannullu nunagisami oqaluttuatoqqat, oqaluttualiat upperniutinut tunngasut pissutsillu apeqqutaapput. Ataatsimulli oqaatigalugit tamarmik upperaat arlaannik sumilluunniit anersaat silarsuaanneersumik saammarsaasoqartariaqartoq.

Ajoqutaanngitsoq ulorianartorluunniit?

Ilaqutariinni amerlanerni marluliaatitaarneq immikkorluinnaq ittuuvoq. Upperisapalaaqaraannili, nalunnaaqqutitut isumaqartinneqarsinnaavoq. Afrikap kitaata ilaani inuppassuit isumaqartarput marlulissat guutiusut, taamaattumillu pallorfigineqartarput. Marlulissap aappaa tamarmilluunniit toquppata, assilillugit inuusaliaaraliarineqartarput ilaqutaasut nerisassanik pilliuteqarfigisartagaannik. Sumiiffinni allani marluliaatitaarneq inuit perloqqussutitut isigisarpaat, taamaammallu angajoqqaat ilaat marlulissat aappaanik  marluutillugilluunniit toqutsitissinnaavai. Sooq? Isumaqaramik marlulissat peroriartoqatigiikkunik, ullut ilaanni angajoqqaatik toqussagaat.

Assersuutit taamaattut takutippaat upperisapalaat ilaat immaqa quianarsinnaagaluartut ajoqutaarpasinngikkaluartullu, allat ulorianartuusinnaasut allaallu toqumik kinguneqarsinnaasut. Pisoq aarlerinartumik isumaqartinneqarpat, soqutaarpasinngikkaluartoq ulorianarsisinnaavoq.

Eqqortumik oqaatigalugu upperisapalaaqarneq aalajangiussimanninneruvoq, upperisatut oqaatigineqarsinnaasoq. Upperisapalaaqarnermi navianartut eqqarsaatigalugit ima aperisoqarsinnaavoq: Upperisapalaaqarnikkut ileqqulersuuteqartarnikkullu kia soqutigisaa aallunneqartarpa?

Upperisapalaanut aallaaviusoq

Ullumikkut inuppassuit Saatanip anersaallu ajortut piunerat miserratigiumaneruaat, naak tamatumunnga uppernarsaatissaqaraluartoq. Sorsunnerup nalaani akeqqat navianartut piunerannik miserratiginninneq ajunaarutaasinnaavoq. Aamma pinngortitat anersaajusut pineqaraangata taamaattarpoq, apustili Paulusimi allappoq: ’Sorsunnerput . . . ajussutsip anersaavinut pissaasunut qilaap ataaniittunut’ sorsunneruvoq. — Efesosimiut 6:12.

Pinngortitat anersaajusut ajortut takuneqarsinnaannginnerat, piunnginnerarnissaannut pissutissaanngilaq. Biibilimi oqaluttuarineqarpoq anersaaq ersinngitsoq arnamut siullermut, Evamut, pulateriaarsuk aqqutigalugu saaffiginnittoq — inuusamik oqalutsitsisuusaartartoq assigalugu — Guutimullu pikitsitsilersillugu. (1 Mosesi 3:1-5) Anersaaq taanna Biibilimi tassaanerarneqarpoq „pulateriaarsutoqaq Diaavulumik Saatanimillu taaneqartoq silarsuarmik tamarmik tammartitsiniartoq“. (Saqqummersitat 12:9) Saatanip aamma inngilit allat pikitsitsilersippai. (Judasi 6) Inngilit ajortut taakku anersaapilunngorput, Guutimut akeraasut.

Jiisusi anersaapilunnik inunniittunik anisitsisarpoq, ajoqersugaalu aamma taamaaliortarput. (Markusi 1:34; Apustilit Suliaat 16:18) Anersaat taakkua toqungasut anersaarinngilaat, ’toqungasummi sunnguamilluunniit ilisimasaqanngillat’. (Oqaluussisartup oqaasii 9:5) Inngiliuppulli pikitsitsiumatuut Saatanimit tammartitaasimasut. Taakkununnga attaveqarfiginninneq taakkunanngaluunniit aqunneqartinneq asuliinnaq isigineqartariaqanngilaq, siulersortimisulli, Saatani  Diaavulutut, pisariumammatigut. (1 Petrusi 5:8) Inuiaammi neriuutissatuaannit — Guutip naalagaaffianit — tunussinissarput siunertaraat.

Saatanip anersaapiluisalu periaasiisa ilaat Biibilip qulaarpaa, ima allassimagami: „Saatani nammineq qaamasumut inngiliunerarpoq.“ (2 Korinthimiut 11:14) Saatanip isumaqalersinniarsaraatigut pitsaanerusumik inuuneqalersissinnaalluta. Ima isikkoqalersinnaavoq soorlu anersaat ajortut akunnermiliunnerat arlalitsigut iluaqutaallatsiartartoq. Ataavartumilli iluaqutaasinnaasumik neqerooruteqarsinnaanngillat. (2 Petrusi 2:4) Naassaanngitsumik inuuneqalersitsisinnaanngillat, namminnerlu erniinnaq suujunnaarsitaasussaapput. (Romamiut 16:20) Pinngortitsisitta kisimi inuunermik naassaanngitsumik, pilluarnermik piviusumik anersaanullu pissaasunut ajortunut illersuummik pitsaanerpaamik tunisinnaavaatigut. — Jaaku 4:7.

Anersaarsiorneq aqqutigalugu ikiortissarsiortarneq Guutip assuaraa. (5 Mosesi 18:10-12; 2 Kunngit 21:6) Taamaaliorneq tassaagami akeqqamik ikinngutiginninniarneq, Guutip akerartortaanik attaveqalerneq. Ullorissat atorlugit siulittuisartut angakkulluunniit siunnersiorfigigaanni, imaluunniit upperisapalaanit qanorluunniit iliornikkut sunnerneqartikkaanni inuunermi aalajangiiniarnermi anersaat ajortut sunniuteqartinneqartarput. Taamaaliorneq Guutimut pikitsitsinerannut taakkununnga ililiunneruvoq.

Ajortut ingalassimaneqarsinnaappat?

Ade, * Nigerimi niuertoq, Jehovap Nalunaajaasuisa ilaannit piffissaq tamaat oqaluussisartunit Biibilimik atuaqqissaaqatigineqartarpoq. Sooq Ade pisiniarfiutimini aarnuaateqarnerminut nassuiaalluni oqarpoq: „Akeqqat amerlaqaat.“ Oqaluussisartup takutippaa Jehovami kisimi illersortissarsiortoqarsinnaasoq. Tussiaat 34:8-mit Ade atuffappaa. Tassani allassimavoq: „[Jehovap] inngilia taassuminnga mianerinnittut eqqaanni inississaaq, aniguisissavaalu.“ Ade isummerpoq: „Jehovap ilumut illersorsinnaappanga, taava aarnuaq peerniarpara.“ Massakkut, ukiorpassuit qaangiuttut, utoqqaanertatut piffissanilu tamaat oqaluussisartutut kiffartorpoq. „Akeqqap“ arlaannaataluunniit ajortumik pinngilaa.

 Biibilimi takutinneqarpoq piffisami nalaatsornikkut tamatta eqqorneqartartugut, upperisapalaaqarutta upperisapalaaqanngikkuttaluunniit. (Oqaluussisartup oqaasii 9:11) Jehovalli ajortumik misilinngisaannarpaatigut. (Jaaku 1:13) Toqu naammalluinnanngissuserlu ajortimit Adamimit kingornutatsinnit pissuteqarput. (Romamiut 5:12) Tamanna pissutigalugu ilaatigooriarluta tamatta napparsimalertarpugut, ilaatigullu sukkut tamatigut ajunaarutaaratarsinnaasunik kukkussuteqartarluta. Taamaattumik kukkunerussaaq anersaat ajortut nappaatinut tamanut ajornartorsiutinullu tamanut pisuutissallugit. Taamatut isumaqaraluarutta qanoq iliornikkulluunniit anersaat nalerisimaartinniarlugit ussernartorsiortiinnarsinnaavaatigut. * Napparsimagutta nakorsanut ilinniagaqarluartunut ikiortissarsiortariaqarpugut, ’sallutuumut sallunerillu ataatanut’ siunnersiuiniarata. (Johannes 8:44) Naatsorsuutit takutippaat inuit nunani uppersapalaaqarfiusuni najugaqartut inunnit nunani allani najugalinnit sivisunerusumik pitsaanerusumilluunniit inuuneq ajortut. Tamatuma ersarissumik takutippaa upperisapalaaqarneq peqqissutsimut iluaqutissartaqanngitsoq.

Guuti anersaanit ajortunit tamanit piginnaaneqarneruvoq, ajunngitsumillu ingerlanissarput soqutigaa. „[Jehovammi] isai iluartunut sammipput siutaalu qinusarnerinut.“ (1 Pîtrusi 3:12) Taanna illersorneqarnissaq siuneqassuserlu pillugit qinnuigisariaqarparput. (Ussatit 15:29; 18:10) Aamma oqaasia illernartoq, Biibili, paasilluarniartariaqarparput. Biibilimit eqqortumik ilisimasaqarneq uagutsinnut illersuutaanerpaavoq. Sooq taama ajortoqartigineranik qanorlu Guutimit ajugaqanngitsumit pilluaqqussutissarsisinnaanersugut paasitissavaatigut.

Guuti pillugu ilisimasaqarneq qanoq iluaqutaasoq

Jehova siunertaalu pillugit eqqortumik ilisimasaqalernitsigut — ilisimasaqannginnerup upperisapalaaqarnerullu akerlianik — illersorneqarsinnaavugut. Tamanna Jeanip, angutip Beninimeersup, uppernarsarsinnaavaa. Jeanip ilaqutaani upperisapalaaqarneq pigiliulluarneqarsimavoq. Naggueqatigiit ileqqui naapertorlugit arnaq nukappiaqqamik ernerlaaq, ulluni qulingiluani tamanna siunertaralugu sanaajusimasumi illuikkiamiittussaavoq. Niviarsiaqqamik erniguni ulluni arfineq-marlunni illuikkiamiittussaassaaq.

1975-imi Jeanip nulia nukkappiaqqamik inequnartumik, Marcimik atserneqartumik, ernivoq. Jeani nuliilu Biibilimik ilisimasaqarnertik pissutigalugu, anersaapiluit ajortut susassaqarfigiumanngilluinnarpaat. Annilaanganerli tatineqarnerlu pissutigalugit naggueqatigiit upperisapalaaqarnikkut ileqqulersuutaat malillugu anaanaasoq illuikkiamiissava? Naamik, taamaaliunngillat. — Romamiut 6:16; 2 Korinthimiut 6:14, 15.

Jeanip ilaqutai qanoq ingerlappat? Massakkut, ukiorpassuit qaangiuttut, Jehovap Nalunaajaasuisa ilagiivini Marci ilagiinni kiffartortuuvoq. Ilaqutariinni tamarmik nuannaarutigaat upperisapalaanut inuunertik aqutsissimannginnamikku taamaalillutillu anersaakkut peqqissusertik navialisillugu. — 1 Korinthimiut 10:21, 22.

Kristumiut ilumoortut upperisapalaat suliaannit taartunit ingalassimasariaqarput anersaakkullu qaamaneq Pinngortitsisup, Jehovap, Erneratalu, Jiisus Kristusip, tunniussaat ilassillugu. Nalunagu Guutip isaani ajunngitsumik iliorluni, isummakkut piviusumik eqqissisitsisarpoq. — Johannesi 8:32.  (wE 8/1 02)

[Quppernerup ataani ilanngussat]

[Qupp. 5-mi ungalusaq]

Silarsuaq tamakkerlugu upperisapalaat ilaat

• Qisunnguit amitsut nerinermi atortut skålemi qaqorteqqasunik imalimmi nappaarissisillugit kappusimasut toqumut naasaajupput

• Ulluunerani uppimmik takusaqarneq ajunaarnissamik naasaajuvoq

• Nalliuttorsiornermi qulliit ilaat qamippat, anersaanik ajortunik najuuttoqarpoq

• Alanngittaat natermut nakkaaneqarpat, illumi tassani toqutsisoqassaaq

• Nasaq siniffimmut ilineqarpat ajunaartoqassaaq

• Siarngup nipaata anersaapiluit qimaasittarpai

• Inuuissiortup kaagiani naneruutit supusinermi siullermi ataatsikkut qaminneqarpata, kissaatigisaq piviusunngussaaq

• Sanigutit siniffimmut talinneqarpata sanigutit anersaavisa ajortut siniffik perloqqusinnaavaat

• Qitsuk qernertoq aqqusinikkut ikaartoq takuneqarpat ajutoortoqassaaq

• Ajassaat natermut nakkaaneqarpat, ilimaginngisamik pulaartoqassaaq

• Nagguaatsup assinga matup akiani nivingasoq iluanaartitsisarpoq

• Hiistip aloqutaa matup qulaaniittoq iluanaartitsisarpoq

• Naasoq silami illup iigaatigut naasoq ajortunut illersuutaavoq

• Tummeqqat nuuttakkat ataatigoorneq ajunaarutaavoq

• Tarrarsuut aserorpat ukiuni arfineq-marlunni ajunaarutaassaaq

• Qasilitsunik kuisisoortoq, ikinngutiginerpaasaminik assortuuteqateqartarpoq

• Taratsunik kuisisoortoq, tuini saamerleq qulaallugu tarajuminernik igitsinngikkuni, ajunaassaaq

• Issiavimmik ukamartumik ukamartitsiinnarneq, anersaapilunnik tassani issiaqqusineruvoq

• Kamippaat, alui qallinngorlugit nakkartinneqarpata ajunaarnissamik naasaarneruvoq

• Toqusoornermi igalaaq ammarneqassaaq tarneq anisinnaaqqullugu

[Qupp. 6-mi ungalusaq/​assiliartaq]

Upperisapalaaqarnermit aniguisitaaneq

Afrika kujallermi Jehovap Nalunaajaasui matukkut kasuttorput, arnallu sangoma-tut atisallip matu ammarpaa. (Sangoma tassaavoq angakkoq.) Oqaluussisartut ingerlaqqiinnarniaraluarput, arnalli kimigiiserfigai oqariartuutertik oqaatigeqqullugu. Oqaluussisartut aappaata Mosesimik allakkat tallimaat 18:10-12-imut atuarpaa takutinniarlugu anersaarsiornermut tunngasunik iliuutsit Guutip qanoq isiginerai, arnallu oqaatigineqartut tigulluarpai atuaqqissaaqatigiumaneqarninilu akueralugu. Biibilimik atuaqqissaaqatigineqarnermini uppernarsarneqarpat sangoma-tut sulinera Jehovap piumasaanut akerliusoq, taava sangoma-tut suliunnaarniarluni oqarpoq.

Atuakkami pâratîsime nuname nâssáungitsumik inûsínauvutit-mi kapitali 10 atuareeramikku Biibilimilu qanoq allassimasoqarnersoq takoreerlugu, atortorissaarutini angakkuarsaarnermut attuumassuteqartut tamaviisa ikuallappai naalagaaffilersaarfimmilu ataatsimiinnernut najuuttalerluni. Aammattaaq paasilerpaa aappariinnermut tunngasut aaqqittariaqarlugit, naak ukiuni 17-ini uiminit averuseqqasimagaluarluni. Ullumikkut marluullutik Jehovap Nalunaajaasuinut ilaapput kuisimasut tunniulluinnarsimasut.

[Qupp. 6-mi assiliartaq]

Sangoma saanernik nalorujussivoq nakorsiap ajornartorsiutaa paasiniarlugu

[Qupp. 7-mi assiliartaq]

Guuti pillugu eqqortumik ilisimasaqarneq illersuutaanerpaavoq piviusumillu pillualersitsisarluni