„Maligassippassi“

„Qangalili ajoqersuisunngorsimasariaqaraluarpusi.“ — HEBRÆERIT 5:12.

1. Hebræerit 5:12-imi allassimasut kristumiup qanoq qisuariarfigisinnaavai, aamma sooq pissusissamisoorpa?

ALLAASERISAMI matumani allassimaffik najoqqutarineqartoq isumassarsiarititaasoq atuarlugu qanoq eqqarsarpit? Misigisarpit akisussaafferujussuusoq ilaatigullu eqqortikkuminaattartoq? Taamaappat kisimiinngilatit. Kristusimut ajoqersugaasutut nalunngilarput allanik ilinniartitsisussaalluta. (Matthæusi 28:19, 20) Nalunnginnatsigu piffissaq inuuffigisarput nukinginnartuusoq sapinngisatsinnik ilinniartitsilluartariaqarpugut. Nalunngilarputtaaq ilinniartitsinerput allaat ilinniartitatta inuunissaannut toqunissaannulluunniit aalajangiisuusinnaasoq! (1 Timotheusi 4:16) Taamaattumik pissusissamisoorpoq imminut aperinissarput ima: ‘Ilinniartitsisariaqarnittut ilinniartitsisarpunga? Qanoq ilinniartitsillaqqinnerulersinnaavunga?’

2, 3. (a) Ilinniartitsisup pitsaasumik ilinniartitsinermut tunngaviusoq qanoq nassuiarsimavaa? (b) Ilinniartitsineq eqqarsaatigalugu Jiisusip qanoq maligassippaatigut?

² Taamatut misigigutta nikallortariaqanngilagut. Ilinniartitsineq immikkut periaaseqarluni suliarineqartussatut isumaqarfigiinnarutsigu, pitsanngoriaateqarsinnaanngitsutut misigisinnaavugut. Ilinniartitsilluarnissamulli tunngaviusoq tassaanngilaq periaaseq aalajangersimasoq, pingaaruteqarnerungaarporli. Malugiuk ilinniartitsisoq misilittagaqarluartoq tamanna pillugu atuakkami qanoq allaaserisaqarsimasoq: „Pitsaasumik ilinniartitsinermi periaatsit, pilersaarutit iliuutsilluunniit aalajangersimasut apeqqutaanngillat. . . . Ilinniartitsinermi asanninneq pingaarnerpaavoq.“ Taassuma ilinniartitsineq nalinginnaasoq soorunami eqqarsaatigaa. Oqaasiili kristumiutut ilinniartitsinitsinnut attuumassuteqarnerugunarput. Qanoq?

³ Ilinniartitsisutut maligassarput tassaavoq Jiisusi Kristusi, taassumalu malitsini ima oqarfigai: „Maligassippassi.“ (Johannesi 13:15) Tassani maniguunnermik maligassiani eqqarsaatigaa, Jiisusilli aamma nunamiikkallarami suliamigut pingaarnerpaakkut — tassa Guutip naalagaaffianik nutaarsiassamik nuannersumik ajoqersuinermigut — maligassippaatigut. (Lukasi 4:43) Oqaaseq ataasiinnaq atorlugu Jiisusip kiffartornera oqaatigissagukku, oqaaseq ’asanninneq’ atussagunarpat, ilaa? (Kolossemiut 1:15; 1 Johannesi 4:8) Jiisusip ataataminut qilammiusumut, Jehovamut, asanninnera tamanit pingaarnerpaavoq. (Johannesi 14:31) Tamatumali saniatigut Jiisusip ilinniartitsisutut aamma periaatsit allat marluk atorlugit asanninnini takutippaa. Sallusuissutit ilinniartitsissutigisani asavai, aamma inuit ilinniartitani asavai. Periaatsit marluk taakku eqqarsaatigalugit uatsinnut maligassiaa misissoriartigu.

Sallusuissummik Guutimeersumik asannittuaannarneq

4. Jehovap ilinniartitsissutaanut nuannarinnini Jiisusip qanoq ineriartortissimavaa?

⁴ Ilinniartitsisup ilinniartitsissutiminut isumaqarfiginninnera ilinniartitsinerata pitsaassusianut  sunniuteqangaartarpoq. Ilinniartitsisup ilinniartitsissutini soqutiginngippagu ilinniartut malugissagunarpaat tamatumanngalu sunnerneqassallutik. Jiisusip Jehova naalagaaffialu pillugit sallusuissutit naleqangaartut ilinniartitsissutigisani suusupaginngisaannarpai. Ilinniartitsissutigisani qamannga pisumik nuannarai. Nuannarinninneq tamanna ilinniartuugallarami ineriartortissimavaa. Inuttut nunarsuarmukanngikkallarami Ernituaq ukiorpassuarni kajumilluni iliniartuujuarpoq. Esaja 50:4, 5-imi naleqquttumik ima allaatigineqarpoq: „Guutip [Jehovap] tunivaanga ajoqersukkap oqaanik qasusut ikiorsersinnaaqqullugit oqaatsinnik; ullaat tamaasa siutiga itersartarpaa ajoqersukkap pisarneratut tusarnaaqqullunga. Guutip [Jehovap] siutiga ammarpaa. Naalasseriinngilanga tunuarnangalu.“

5, 6. (a) Jiisusi kuisimmat qanoq pisoqarpa, qanorlu sunnerneqaatigaa? (b) Jiisusip Saatanillu Guutip oqaasianik atueriaatsiminni suna assigiinngissutigaat?

⁵ Nunarsuarmi inuttut peroriartornermini Jiisusip ilisimassut Guutimeersoq nuannariuarpaa. (Lukasi 2:52) Kingusinnerusukkut kuisikkami immikkut illuinnartumik misigisaqarpoq. „Qilak ammarpoq,“ Lukasi 3:21-mi allassimavoq. Taava Jiisusip inunngunngikkallarami piusimanini eqqaamasinnaanngorsimassavaa. Tamatuma kingorna ulluni 40-ni iisinnginniarluni inoqajuitsumiippoq. Qilammi Jehovamit ilinniartineqartuarsimanini eqqarsaatigeqqissaarlugu nuannaarutigingaarsimassavaa. Sivitsunngitsorli sallusuissutinut Guutimeersunut asanninnera misilinneqarpoq.

⁶ Taamani Jiisusi qasullunilu kaammat Saatanip usserniaraluarpaa. Guutip ernerisa marluk taakkua assigiinngilluinnassusiat! Tamarmik Allakkanit Hebræerisuunit issuaapput — siunertaalli assiiginngilluinnarput. Saatanip Guutip oqaasii mumillugit namminissarsiorlunilu siunertani anguniarlugu ataqqinninngitsumik atorpai. Aap, pikitsitsisup taassuma sallusuissutit Guutimeersut asissorpai. Kisiannili Jiisusi Allakkanik issuaagaangami nuannarisorujussuugai paasinarsisarpoq, akissutiminilu tamani Guutip oqaasii peqqissaartumik atortarpai. Jiisusi oqaatsit isumassarsiarititaasut taakkua allanneqaqqaarnerat sioqquterujussuarlugu piusimavoq, taamaattorli ataqqingaarpai. Tassaapput sallusuisutit naleqangaartut Ataataanit qilammiusumeersut! Saatani oqarfigaa oqaatsit Jehovameersut tamakku nerisassanit pingaaruteqarnerusut. (Matthæusi 4:1-11) Aap, sallusuissutit Jehovap imminut ilinniartitsissutigisai tamaasa Jiisusip asavai. Ilinniartitsisutulli asanninnini tamanna qanoq takutippaa?

Sallusuissutinut ilinniartitsissutigisaminut asanninnera

7. Sooq Jiisusi nammineq ajoqersuutiminik ineriartortitsinngila?

⁷ Erseqqippoq Jiisusip sallusuissutit ilinniartitsissutigisani asagai. Namminerli isumassarsiaminik ineriartortitsilluarsinnaagaluarpoq. Ilisimasaqarluarlunilu ilisimassuseqangaarpoq. (Kolossemiut 2:3) Taamaattorli tusarnaartini eqqaasittuarpai ilinniartitsissutini imminit pinngitsut tamarmilli Ataataminit qilammiusumit pisut. (Johannesi 7:16; 8:28; 12:49; 14:10) Sallusuissutit Guutimeersut ima asatigai nammineq eqqarsaatiminik taarserumanngilluinnarlugit.

8. Kiffartuussileqqaarnerminiilli Jiisusip qanoq takutippaa Guutip oqaasia tunngavigiuarlugu?

⁸ Jiisusip kiffartuussileqqaarnerminiilli ilinniartitsinermigut maligassippaatigut. Eqqarsaatigilaaruk Guutip innuttai siullerpaamik nalunaarfigigamigit Missiarsiulluni neriorsuutigisaq qanoq oqarnersoq. Inuppassuit sioraannut sassarpa Missiarsiunerarluni, tamannalu uppernarsarniarlugu maluginiarnartunik tupinnartuliorpa? Naamik. Synagogimukarpoq, tassani Guutip innuttai Allakkanit atuartarmata. Tassani siulittuut Esaja 61:1, 2-miittoq atuffassissutigaa nassuiarlugulu sallusuissutit siulittuutaasut taakku imminut eqquuttut. (Lukasi 4:16-22) Tupinnartuliarpassuisa takutippaat Jehovamit tapersersorneqartoq. Taamaattorli ilinniartitsinermini Guutip oqaasia tunngavigiuarpaa.

9. Farisiiarinik oqaloqateqarnermini Jiisusip qanoq takutippaa Guutip oqaasianut ilumoortumik asannilluni?

⁹ Jiisusi upperisarsiornikkut akerlilersortiminit unammillerneqaraangami oqaasissaarutsitsiniartanngilaq, naak oqallinnermi ajugaaffigilluarsinnaagaluarlugit. Taarsiullugu Guutip oqaasia atorlugu oqaasii naqqittarpai. Assersuutigalugu, eqqaamajuk farisiiarit Jiisusip ajoqersugai sabbatisiorneq pillugu inatsisinik unioqqutitsinerarmatigik,  narsaatikkoorlutik karrertaminernik nusussillutik nerimmata. Jiisusi akivoq: „Atuarsimanngilisiuk Daavi taamani angutitanilu kaaleramik qanoq iliortoq?“ (Matthæusi 12:1-5) Soorunami angutit imminnut iluartuutinniartut taakkua atuarsimagunarpaat oqaluttuaq isumassarsiarititaasoq Samuelimik allakkat siulliit 21:1-6-imi allassimasoq. Atuarsimagunikku pingaaruteqartoq paasinngitsoorsimavaat. Jiisusilli oqaluttuaq atuaannarsimanngilaa. Aamma eqqarsaatigisimavaa oqaluttuamilu tusarliunneqartoq uummammiugilerlugu. Najoqqutassiat Jehovap oqaluttuami ilinniartitsissutigisai nuannarai. Taamaattumik oqaluttuaq taanna aamma Mosesip inatsisaanit assersuusiaq atorpai, Inatsisini anersaaq qanoq oqimaaqatigiitsiginersoq nassuiarniarlugu. Jiisusi aamma ilumoortumik asanninnerminit killinneqartarpoq Guutip oqaasianik illersuinissaminut, upperisarsiornikkut siuttut namminneq iluaqutissaminnut Guutip oqaasia mumikkaangassuk imaluunniit inuit ileqqutoqqaannit inangerneqartikkaangassuk.

10. Jiisusip ilinniartitseriaatsimigut siulittuutit qanoq eqquutitippai?

¹⁰ Jiisusi sallusuissummut asanninnerata qasunartumik misigissuseqanngitsumilluunniit ilinniartitsinngisaannartippaa. Siulittuutit isumassarsiarititaasut takutippaat Missiarsi ’oqaatsinik kusanartunik’ ’oqalorilluinnarluni’ oqalussasoq. (Tussiaat 45:3; 1 Mosesi 49:21, NV) Jiisusip siulittuutit taakku eqquutitippai tusarliussani soqutiginartumik uummarissumillu oqaluussissutigalugu sallusuissutillu nuannarilluinnakkani „oqaatsit saamangaartut“ atorlugit ilinniartitsissutigalugit. (Lukasi 4:22) Qularutissaanngilaq angorniornera oqaluuserisaminullu soqutiginningaarnera kiinaani takuneqarsinnaasut. Tusarnaarlugu nuannerluinnarsimassaaq, ilikkakkavullu pillugit allanut oqaluussinitsinni maligassaalluarpoq!

11. Sooq Jiisusip ilinniartitsillaqqinnini annerunialissutiginngilaa?

¹¹ Jiisusip sallusuissut Guutimeersoq paasilluaramiuk iluarinartumillu nassuiarsinnaagamiuk annerunialerlunilu pingaarnialerpa? Ilinniartitsisut naammalluinnanngitsut taamaakkajuttarput. Eqqaamajulli Jiisusip ilisimassusia Guutimik mianerinninneranut ersiutaasoq. Ilisimassut taama ittoq makitasuunnguutaasussaanngilaq, ’qanilaartut ilisimassuseq pigimmassuk’. (Ussatit 11:2) Aamma allamik pissuteqarluni Jiisusi pingaarniartunngornanilu makitasuunngunngilaq.

Jiisusip ilinniartitani asavai

12. Jiisusip qanoq takutippaa malitsimi imminut qununissaat kissaatiginagu?

¹² Jiisusip inunnut qamanga pisumik asanninnera ilinniartitsinerani takuneqarsinnaajuaannarpoq. Nikassaarpalaartumik sioorasaarerpalaartumilluunniit ilinniartitsinngisaannarpoq, inuit pingaarniartut ilinniartitsisarnerannit allaanerulluinnarpoq. (Oqaluussisartup oqaasii 8:9) Jiisusip tupinnartuliaasa ilaat takugamiuk Petrusi tupaallangaarluni seeqquinut pallorpoq. Jiisusilli kissaatiginngilaa malitsimi ersigissagaanni. Inussiarnerluni oqarpoq: „Erseqinak,“ taavalu Petrusi oqaluttuuppaa ajoqersuganngortitsineq pissanganartoq peqataaffigisinnaasaa pillugu. (Lukasi 5:8-10) Jiisusip kissaatigaa ajoqersukkami Guuti pillugu sallusuissutinut naleqangaartunut asanninnertik killissutigissagaat, ilinniartitsisuminnut qunuginninneq killissutiginagu.

13, 14. Jiisusip qanoq takutippaa inunnut misiginneqataalluni?

¹³ Jiisusip ilinniartitaminut asanninnera aamma misiginneqatiginninneratigut erserpoq. „Inuit takugamigit nalligingaalerpai paarinerlugaallutillu  naakkinarsisimangaarmata savatut paarsisoqanngitsutut.“ (Matthæusi 9:36) Atugaanni alianartuni misiginneqatigai ikiorusullugillu.

¹⁴ Piffissami allami Jiisusip misiginneqataanera malugiuk. Inuppassuit akornanni arnap aaqartuartup ornillugu qallersaataata nivingaataatigut attoramiuk tupinnartuliornikkut ajorunnaarsinneqarpoq. Jiisusip malugaa nukimmik imminit anisoqartoq, takunngilaali kina ajorunnaarnersoq. Arnap nanineqarnissaa piumasaraa. Sooq? Immaqa arnap annilaanngatigisaatut isornartorsiornianngilaa Inatsisinik imaluunniit Allakkanik ilisimasut farisiiarillu malittarisassiaannik unioqqutitsinera pillugu. Tamatuma akerlianik Jiisusip oqarfigaa: „Panik, uppernerpit annaappaatit. Eqqissillutit qimagunniarit, ajoqutinnillu ajorunnaarsitaagit!“ (Markusi 5:25-34) Malugiuk misiginneqataanera. Oqaannanngilaq: „Ajorunnaarsitaagit.“ Oqarporli: „Ajoqutinnik ajorunnaarsitaagit.“ Oqaaseq Markusip uani atugaa eqqortumik isumaqarsinnaavoq „iperartuineq“, iperartueriaaseq naalliutitsinermi atorneqarajuttartoq. Taamaalilluni Jiisusip takutippaa arnap nappaataa naalliunneranut immaqalu timikkut misigissutsikkullu anniaateqangaarneranut pissutaasoq paasillugu. Misigeqatigaa.

15, 16. Jiisusip kiffartornerani pisimasut suut takutippaat inuit pissusii ajunngitsut pingaarnerutikkai?

¹⁵ Jiisusip aamma inunnut asanninnini takutippaa pissusii ajunngitsut pingaarnerutillugit. Eqqarsaatigiuk Nathanaeli, kingusinnerusukkut apustilinngortoq, naapimmagu qanoq pisoqartoq. „Jiisusip takuleramiuk Nathanaelip ornikkaani pillugu ima oqarpoq: ’Kiisami aajuna Israelikkuusoq peqquserlunneq ajortoq.’“ Tupinnartuliornikkut Jiisusip Nathanaelip uummataa isigaa, taamaalillunilu taanna pillugu ilisimasaqangaalerpoq. Soorunami Nathanaeli naammalluinnangitsuuvoq uatsitut kukkusartoq. Assersuutigalugu Jiisusi pillugu tusagaqarami toqqaannartumik aperivoq: „Sumik ajunngitsumik Nazaretimit pisoqarsinnaagami?“ (Johannesi 1:45-51) Taamaattorli Jiisusip Nathanaelip pissusia ajunngitsoq pingaarnerutippaa, tassa peqqusersuissusia.

¹⁶ Aamma taamaappoq sakkutuut naalagaat — immaqa Guutimik nalusuusoq, Romamiu — Jiisusimukarmat kiffaq napparsimasoq ajorunnaarseqqullugu. Jiisusip nalunngilaa sakkutooq taanna kukkusartoq. Taamanikkut sakkutuunut naalagaasoq nakuusertarsimassasoq, aammik kuisisarsimassasoq guutipilussiortarsimassasorlu qularnanngilaq. Taamaakkaluartoq Jiisusip ajunngitsortaa pingaarnerutippaa — angutip uppissuseqarnera maluginiarnartoq. (Matthæusi 8:5-13) Kingusinnerusukkut Jiisusip pinerluttoq sanimini nappakkamiittoq oqaluukkamiuk, angutip pinerluttuliortarsimanera pillugu avoqqaarinngilaa, kajumissaarpaali siunissamut neriuutissillugu. (Lukasi 23:43) Jiisusip nalunngilluinnarpaa allanut isornartorsiuisumik isumalluanngitsumillu isiginninneq taakku nikalluutigiinnartaraat. Allat pissusiinik ajunngitsunik maluginiaalluni ilungersornera amerlasuut siumukarnissaminnut kajumississutigigunarpaat.

Allanik kiffartuussiumanera

17, 18. Nunarsuarmukarnissani akuerigamiuk Jiisusip qanoq takutippaa allanik kiffartuussiumalluni?

¹⁷ Jiisusip ajoqersukkaminut asanninneranut ersiutaalluartoq alla tassaavoq taakkuninnga kiffartuussiumanera. Inunngunngikkallaramili Guutip ernerata inuiaat nuannariuarsimavai. (Ussatit 8:30, 31) Jehovap ’oqaasiatut’ oqaaseqartitaatulluunniit, arlaleriaqaluni inuit iliuuseqarfigisarsimassagunarpai. (Johannesi 1:1) Ilaatigut inuiaat toqqaannarnerusumik ilinniartikkumallugit qilammi qutsissumik inissisimaffini ’iperarpaa  kiffap isikkua atillugu’. (Filippimiut 2:7; 2 Korinthimiut 8:9) Nunarsuarmiikkallarami Jiisusip allanit kiffartorfigineqarnissani naatsorsuutiginngilaa. Akerlianilli oqarpoq: „Inuup Ernera tikiutinngilaq kiffartorfigeqqulluni, namminerli kiffartussalluni inuuninilu akissatut tunniutissallugu amerlasuut utertinneqaatissaattut.“ (Matthæusi 20:28) Oqaatsit taakku Jiisusip piviusunngortippai.

¹⁸ Jiisusi maniguulluni ilinniartitami pisariaqartitaat matussuserniarlugit kiffartorpoq taakkulu ikiorniarlugit sapinngisaminik iliorluni. Nuna neriorsuutigisaq tamaat angalaarfigaa, oqaluussilluni kilometerit hundredelippassuit pisuinnaq sapinngisamik inuit amerlanerusut anguniarlugit. Farisiiarisut Allakkanillu ilisimasutut pingaarniartutut pinnani maniguuttuaannarpoq saaffigiuminartuaannarlunilu. Inuit assigiinngitsut — nuimasut, sakkutuut, inatsisilerituut, arnat, meeqqat, piitsut, napparsimasut, allaat inuiaqatigiinnit ajattugaasut — kajumillutik qununatillu ornittarpaat. Naammalluinnartuugaluarluni Jiisusi inuuvoq qasusinnaallunilu kaassinnaasoq. Qasugaluarlunili qasuersaartariaqaraluarluniluunniit imaluunniit eqqissilluni qinunissani pisariaqartikkaluarlugu, allat pisariaqartitaat nammineq pisariaqartitaminit salliutittarpai. — Markusi 1:35-39.

19. Jiisusi ajoqersukkaminut maniguunnermigut, kamagittarnermigut inussiarnernermigullu qanoq maligassaalluarpa?

¹⁹ Jiisusip aamma ajoqersukkani kiffartuukkumavai. Taamaaliorpoq inussiarnerluni kamagittarlunilu ilinniartitsinermigut. Pingaarutilimmik paasiuminaatsitaqaraangata uniinnartanngilaq, kamalertarnani naveersisarnaniluunniit. Paasitinniarlugit allatut nassuiaasarpoq. Assersuutigalugu eqqarsaatigeriaruk ajoqersukkat qanoq akulikitsigisumik kina annerunersoq assortuussutigisaraat. Aap, toqutaanissaminut aqagunnera tikillugu Jiisusi assigiinngitsunik periaasissarseqittaqattaarpoq imminnut maniguuffigeqatigiinnissaannik ilinniartinniarlugit. Maniguunneq allallu tamaasa eqqarsaatigalugit, Jiisusi eqqortumik oqarsinnaasimavoq: „Maligassippassi.“ — Johannesi 13:5-15; Matthæusi 20:25; Markusi 9:34-37.

20. Jiisusip ilinniartitseriaasia farisiiarit ilinniartitseriaasiannit qanoq allaassuteqarpa, aamma sooq periaaseq tamanna sunniuteqarluarpa?

²⁰ Malugiuk Jiisusip ajoqersukkani maligassap qanoq ittuuneranik oqaluttuutiinnanngikkai, namminerli ’maligassikkai’. Maligassiuinermigut ilinniartittarpai. Imminut pingaartippallaarluni taakkununnga suliassiissutiminik nammineq naammassinnittariaqanngitsutut nikassartanngilai. Farisiiarilli taamaattarput. Jiisusi taakku pillugit oqarpoq: „Oqaaserisamittummi iliorneq ajorput.“ (Matthæusi 23:3) Jiisusip maniguulluni ajoqersukkani ajoqersuutini qanoq isumaqarnersut takutittarpai nammineq maleruaanermigut, inuunermini atorlugit. Taamaattumik ajoqersukkat nunap piinik pingaartitsivallaaqqunatik pilimanianngitsumillu inooriaaseqaqqullutik kajumissaarigaangat, eqqoriartariaqanngilaat qanoq isumaqarnersoq. Oqaasiisa piviusunngornerat takusinnaavaat: „Terianniat siseqartarput qilaallu timmiai ulloqartarlutik, Inuulli Ernera niaqquminut iigarfissaqanngilarluunniit.“ (Matthæusi 8:20) Jiisusip ajoqersukkani kiffartuuppai maniguulluni maligassillugit.

21. Allaaserisami tulliuttumi suna sammineqassava?

²¹ Nalunanngilaq Jiisusi ilinniartitsisuusoq nunarsuarmi ilinniartitsisuusimasunit pingaarnerpaaq! Inuit ilumoorusuttut taassuminnga takunnittut tusarnaartullu qularutiginngilluinnarpaat ilinniartitsissutigisani ilinniartitanilu asagai. Ullumikkut uagut aamma tamanna qularutiginngilluinnarparput maligassiaa misissoraangatsigu. Kristusilli maligassiaa naammalluinnartoq qanoq malissinnaavarput? Apeqqut tamanna allaaserisami tulliuttumi sammineqassaaq.

Qanoq akissavit?

• Pitsaasumik ilinniarnermut tunngaviusoq suua, kialu maligassiuinermigut tamanna takutippaa?

• Jiisusip qanoq takutippaa sallusuissutit ilinniartitsissutigisani asallugit?

• Jiisusip qanoq takutippaa inuit ilinniartitani asallugit?

• Assersuutini suni takutinneqarpa Jiisusip ilinniartitani maniguulluni kiffartuukkumagai?

[Atuaqqissaarnermi apeqqutit]

[Qupp. 22-mi assiliartaq]

Jiisusip najoqqutassiat Guutip oqaasianiittut nuannaralugit qanoq takutippaa?