’Malittuarsinga’
’Malittuarsinga’
„Tamatumunngami qaaqqusaasimavusi, Kristusissaaq anniartitaammat ilissi pillusi, tassuuna maligassaqartillusi tumini peqqissaartumik atuaqqullusigik.“ — 1 PETRUSI 2:21, NV.
1, 2. Sooq Jiisusip ilinniartitsisutut naammalluinnartumik maligassiaata ilaarnissaa uatsinnut inornarpallaanngila?
JIISUSI KRISTUSI ilinniartitsisuuvoq nunarsuarmi ilinniartitsisuusimasunit pingaarnerpaaq. Aamma naammalluinnartuuvoq, inuttullu inuutilluni ajortuliunngisaannarpoq. (1 Petrusi 2:22) Tamanna isumaqarpa Jiisusip ilinniartitsisutut maligassiaa uatsinnut inunnut naammalluinnanngitsunut inornarpallaartoq? Naamerluinnaq.
2 Soorlu allaaserisami siulianiittumi takuneqarsinnaasoq, Jiisusip ilinniartitsinera asanninnermik tunngaveqarpoq. Asanninnerlu tamatta ineriartortissinnaavarput. Guutip oqaasiani arlaleriaqaluta kajumissarneqartarpugut allanut qamannga pisumik asanninneq ineriartorteqqullugu asanninneruleqqullutalu. (Filippimiut 1:9; Kolossemiut 3:14) Jehovap pinngortitani naammassisinnaanngisaannik ilimasuffiginngisaannarpai. Asannittussatut pinngortitaavugut, „Guutimi tassaavoq asanninneq“, taannalu assilillugu pinngortitaagatta. (1 Johannesi 4:8; 1 Mosesi 1:27) Taamaattumik Petrusip allassimaffimmi najoqqutarineqartumi allagaa atuaraangatsigu imminut naammaginnginnissatsinnut pissutissaqanngilagut. Jiisusip tumai peqqissaartumik atuarsinnaavavut. Aap, Jiisusip peqqussutaa maleruarsinnaavarput: ’Malittuarsinga.’ (Lukasi 9:23, NV) Misissoriartigu Kristusip sallusuissutinut ilinniartitsissutigisaminut inunnullu ilinniartitaminut asanninnera qanoq ilaarsinnaaneripput.
Salluisuissutinut allanut ilinniartitsissutigisannut asanninneq ineriartortiguk
3. Sooq ilaasa atuarneq atuaqqissaarnerlu erloqinartutut isigisarpaat, kisianni Ussatit 2:1-5-imi qanoq kajumissaarneqarpugut?
3 Sallusuissutinut allanut ilinniartitsissutigisatsinnut asanninneq ineriartortissinnaassagutsigu, sallusuissutinik ilinniarnerunissarput nammineq nuannaarutigisariaqarparput. Ullumikkulli tamarmiunngitsoq ilinniarnissartik nuannaarutigisarpaat. Atuarfimmi ilinniartinneqarluarsimannginneq inuusuttuunermilu sungiussipilussimaneq pissutigalugit inuppassuit atuarneq atuaqqissaarnerlu nuannarinngilaat. Jehovamilli ilinniartineqarnissarput pingaaruteqarluinnarpoq. Ussatit 2:1-5-imi allassimavoq: „Ernera, oqaatsikka ilassiniakkit inassutikkalu pigiliullugit, ilisimassusermut naalaarlutit uummatillu siuneqassusermut saatsillugu, paasisimasaqassuseq qaaqqugukku siuneqarnerlu aggeqqullugu nipituumik torlulaffigalugu, ujarukku sølvisiortoq assigalugu, erlinnartunik nassaarniartutut ilungersorlutit, taava paasilissavat Guutimik mianerinninneq sunaasoq, taava Guuti ilisimalissavat.“
4. ’Uummatip saatsinnera’ qanoq paasisariaqarpa, taamaaliornissatsinnullu qanoq isiginnittaaseqarneq iluaqutaassava?
4 Versit 1-4-mi ’ilassinninnissamut’ ’pigiliussinissamullu’ taamaallaat kajumissaarneqanngilagut, aammali ’ujaasinissamut’ ’nassaarniarnissamullu’ kajumissaaqqeqattaarneqarpugut. Taamaaliornissatsinnut suna pissutigisariaqarparput? Oqaatsit „uummatit siuneqassusermut saatsillugu“ maluginialaakkit. Qinerlerfissiaq naapertorlugu kajumissaarut taanna ‘soqutiginninnissamut kajumissaarutaannaanngilaq; isiginnittaaserli aalajangersimasoq, ilinniarumatuujunissaq, pillugu peqqussutaavoq’. Suup Jehovap ilinniartitsissutigisaanik ilikkagaqarusulersissinnaavaatigut ilungersuussilersissinnaallutalu? Isiginnittaasitta. ’Guutimik ilisimasaqarneq’ ’sølvitut’ ’erlinnartutullu’ isigisariaqarparput.
5, 6. (a) Piffissap ingerlanerani qanoq pisoqalersinnaava, qanorlu pinngitsoortissinnaavarput? (b) Sooq erlinnartuutivut Biibilimeersut ilisarsinertut ittut ineriartortittuartariaqarpavut?
5 Taama isiginnittaaseqarnissaq ineriartortikkuminaattuunngilaq. Assersuutigalugu nalugunanngilat Jehovap inuit uppertut aalajaatsullu paratiisimi nunarsuarmiittumi naassaanngitsumik inuunissaat siunertarigaa. (Tussiaat 37:28, 29) Tamanna ilikkaqqaarakku qularnanngitsumik erlinnartutut nalissaqanngitsutut isigaat, isummakkullu uummatikkullu neriuuteqangaalerputit nuannaangaalerlutillu. Massakkummi? Piffissap ingerlanerani erlinnartoq tamanna pingaartikkunnaariartulerpiuk? Taamaappat marlunnik iliuusissaqarputit. Siullertut pingaartitsinerit nutartertariaqarpat akuttunngitsumik imminut eqqaasittarlutit sallusuissutit Jehovamit ilikkarsimasatit tamaasa, aamma ukiorpassuit matuma siorna ilikkarsimasatit, sooq pingaartittariaqarneritit.
6 Aappaatut erlinnartut pigeriikkavit amerlanerujartuinnarnissaat isumagisariaqarpat. Nalaatsornikkut ujaraq erlinnartoq nunami nassaarisuugukku kaasarfimmiuliuteriarlugu ingerlaqqiinnarnavianngilatit, ilaa? Qularnanngitsumik assaassagaluarputit allanik ujaasillutit. Guutip oqaasia sallusuissutinik erlinnartorpassuarnik, sølvitut erlinnartutullu isertukkatut ittunik, imaqarpoq. Amerlasuunik nanisaqareersimagaluaruilluunniit, nanisaqaqqissinnaavutit. (Romamiut 11:33) Sallusuissut pillugu paasisaqaqqikkaangavit imminut ima aperisarsinnaavutit: ’Sooq erlinnartuua? Jehovap kinaassusianik siunertaanilluunniit paasisimasaqarnerulersippaannga? Jiisusip tumaanik atuaanissannut iluaqutigisinnaasannik atoriaannaasunik siunnersorpaannga?’ Apeqqutit taamaattut eqqarsaatigeqqissaarlugit Jehovap ilinnut ilinniartitsissutigisaanut asanninnerulernissat ineriartortissinnaavat.
Takutiguk allanut ilinniartitsissutigisatit nammineq nuannarigitit
7, 8. Ilikkakkavut Biibilimeersut nammineq nuannaralugit allanut qanoq takutissinnaavarput? Assersuummik taasaqarit.
7 Ilikkakkavut Guutip oqaasianeersut nammineq nuannaralugit allanut qanoq takutissinnaavarput? Jiisusi ilaarlugu oqaluussinitsinni ilinniartitsinitsinnilu Biibili najoqqutarisariaqarparput. Ukiuni kingullerni Guutip kiffai nunarsuaq tamakkerlugu kajumissaarneqartarput oqaluussinerminni Biibili atorneroqqullugu. Taamaalioraangavit pulaakkannut takutittaruk Biibilimit innersuussutigisat nammineq pingaartingaarlugu. — Matthæusi 13:52.
8 Assersuutigalugu siorna peqqarniisaarniat New Yorkimi saassunnerata kingorna qatanngutip arnap kristumiup oqaluussilluni naapitaminut Tussiaat 46:2, 12 takutittarpaa. Siullermik aperisarpai pisimasup alianartup kingorna qanoq misiginersut. Akigaangata tusarnaaqqissaartarpoq, misiginneqataalluni oqartarpoq nangillunilu: „Allassimaffik piffissami artornartumi matumani nammineq tuppallersaatigingaarsimasara ilinnut atuarsinnaavara?“ Ikittuararssuit itigartittarpaat, arlalippassuilli oqaloqatigilluartarpai. Arnap taassuma inuusuttut oqaloqatigigaangamigit ima oqartarpoq: „Ukiuni 50-ini allanik Biibili tunngavigalugu ilinniartitsisarninni ilumut misigisaqarsimanngisaannarpunga ajornartorsiutip ataatsilluunniit anigorniarnerani atuakkap uuma iluaqutaasinnaannginneranik.“ Ilumoornitsigut angorniornitsigullu takutittarparput nammineq Guutip oqaasianeersut ilikkakkavut pingaartillugillu nuannarigivut. — Tussiaat 119:97, 105.
9, 10. Upperisarput pillugu aperineqarutta sooq Biibilip atornissaa pingaaruteqarpa?
9 Upperisarput pillugu aperineqaraangatta, Guutip oqaasianik nuannarinninnitta takutinnissaanut periarfissaqarluartarpugut. Nammineq isumassarsiatsinnik akissuteqarniaannarnata Jiisusip maligassia ilaarlugu Biibili atortarparput. (Ussatit 3:5, 6) Annilaangassutigaajuk akisinnaanngisannik aperineqarnissat? Taamaappat imaaliorsinnaavutit.
10 Sapinngisannik piareersarluartarit. Apustili Petrusi allappoq: „Naalagarli Kristusi uummatissinni illernartissiuk, piareersimajuaritsilu neriuutigisaq ilissinniittoq pillugu isumarsi illersorsinnaaqqullugu nassuiaaqqusisumut kimulluunniit.“ (1 Petrusi 3:15) Upperisavit illersornisaanut piareeqqavit? Assersuutigalugu periaaseq ileqqutoqqarluunniit Biibilimut naapertuutinngitsoq sooq peqataaffigiumannginnerit paasineqarusuppat ima akiinnarsinnaanngilatit: „Upperisannut akerliuvoq.“ Taama akissaguit, ima paasineqarsinnaavoq allat ilinnut aalajangiisuutikkitit taamaattumillu upperusiortunut ilaasortaasutit. Immaqa pitsaanerussaaq ima akiguit: „Guutip oqaasiani Biibilimi taamaaliorneq inerteqqutaavoq,“ imaluunniit: „Guutip taamaaliorneq iluarinngilaa.“ Taava sooq peqataaniannginnerlutit nassuiarsinnaavat. — Romamiut 12:1.
11. Apeqqutit Biibili tunngavigalugu akisinnaajumallugit atuagaq suna iluaqutigisinnaavarput?
11 Piareersimanngitsutut misigiguit, atuagaq Lad os ræsonnere ud fra Skrifterne misissorsinnaavat. * Oqaloqatigiissutigineqarajuttut ilaat toqqakkit, tunngavilersuutillu Biibilimeersut eqqaamasinnaajumallugit maluginiakkit. Oqaluussigaangavit ’Ræsonnerebogi’ Biibililu nassartakkit. Atornissaat nangaassutigissanngilat. Oqaannarsinnaavutit qinerlerfissiaateqarlutit apeqqutit assigiinngitsut Biibili tunngavigalugu akisinnaajumallugit.
12. Biibilimut tunngasumik akisinnaanngisatsinnik aperineqarutta qanoq oqarsinnaavugut?
12 Isumakuluppallaanaveersaalaarit. Inuit naammalluinnanngitsut arlaannaataluunniit apeqqutit tamakkerlugit akisinnaanngilai. Biibilimut tunngasunik akisinnaanngisannik aperineqaruit, assersuutigalugu ima oqarsinnaavutit: „Apeqqut soqutiginangaarami. Ajoraluartumik akisinnaanngilara, qularinngilluinnarparali tamanna pillugu Biibilimi allassimasoqartoq. Biibilimik atuaqqissaarneq nuannarisorujussuuara, taamaattumik apeqqutit misissussavara, paasisaqarumalu aggeqqissaanga.“ Ilumoorlutit anneruniajuillutillu taama akiguit qularnanngitsumik oqaloqatigeqqissinnaassavat.
Ilinniartitatsinnut asanninneq
13. Sooq oqaluussiffigisavut isumalluartumik isigiuartariaqarpavut?
13 Jiisusip inuit ilinniartitani asavai. Tamatumani qanoq ilaarsinnaavarput? Allanut misigittaatsumik isiginnittaaseqalinngisaannartariaqarpugut, naak ’Guutip Ajugaqanngitsup ullussarsuani sorsunnissaq’ ullut tamaasa qanilliartoraluartoq, inuiaallu milliardiliusut ilarpassui ajunaartussaagaluartut. (Saqqummersitat 16:14; Jeremia 25:33) Naluarpummi kikkut aniguissanersut kikkullu toqussanersut. Eqqartuussineq siunissami pisussaavoq, Jiisusilu, Jehovap toqqagaa, eqqartuussisuusussaavoq. Tamatuma tungaanut inuit tamaasa Jehovamut kiffanngorsinnaasutut isigissavavut. — Matthæusi 19:24-26; 25:31-33; Apustilit Suliaat 17:31.
14. (a) Imminut qanoq aperisinnaavugut paasiniarlugu misiginneqataanersugut? (b) Qanoq ililluta misiginneqataallutalu soqutiginnissinnaavugut?
14 Taamaattumik Jiisusitut misiginneqataaniarsarisarpugut. Imminut aperisinnaavugut: ’Inuit silarsuup matuma upperisarsiortuinit, politikkeriinit niuerniartuinillu salloqittarneqarsimasut misiginneqatigaakka? Tusarliussamut oqaluussissutigisatsinnut soqutiginnippasinngippata, paasiniarsaraara sooq taama isiginnittaaseqarnersut? Eqqaasarpara uanga nammineq, imaluunniit maannakkut Jehovamut kiffaasut aalajaatsut allat, taakkutut isiginnittaaseqarnikuulluta? Oqaluusseriaasera taakkununnga naleqqussartarpara, imaluunniit inuit taakku imminiiginnarpakka isumaqarlunga annaanneqarsinnaanngitsut?’ (Saqqummersitat 12:9) Inuit misigisinnaagunikku ilumoorluta misiginneqatigigivut, tusarliussamut tusarnaarumanissaat ilimanarnerussaaq. (1 Petrusi 3:8) Misiginneqataanerup aamma oqaluussinermi naapitatsinnut soqutiginninnerulersissavaatigut. Apeqqutigisaat soqutigisaallu maluginiarsinnaavavut. Pulaaqqiigutta paasitissinnaavavut kingullermik oqaasii eqqarsaatigisimallugit. Maannakkorpiarlu arlaannik ikiorneqarnissaminnik pisariaqartitsilluinnarpata, immaqa ikiorniarlugit neqeroorfigisinnaavavut.
15. Sooq inuit pissusii ajunngitsut pingaarnerutittariaqarpavut, qanorlu taamaaliorsinnaavugut?
15 Jiisusitut inuit pissusii ajunngitsut pingaarnerutittarpavut. Immaqa anaanaasup kisermaap nersornartumik meeqqani isumaginiarsarisarpai. Angut ilaquttani isumaginiarlugit ilungersungaartarpoq. Utoqqaq anersaakkut ittunik soqutigisaqartarpoq. Naapitatta pissusii taamaattut malugisarpavut nersortarlugillu? Taamaaliortarutta nuannersumik attaveqarfigilissavavut Guutillu naalagaaffianik oqaluttuussinnaalissallugit. — Apustilit Suliaat 26:2, 3.
Maniguunneq asanninnissamut pisariaqarluinnartoq
16. Oqaluussigaangatta saamasuujuaannarnissarput ataqqinnittuujuaannarnissarpullu sooq pingaaruteqarpat?
16 Ilinniartitavut asagutsigik allassimaffik una Biibilimeersoq eqqumaffigissavarput: „Ilisimasaqarneq imminik angisuutitsisarpoq, asanninnerli ineriartortitsivoq.“ (1 Korinthimiut 8:1) Jiisusi ilisimasaqangaaraluarluni makitasaanngisaannarpoq. Allat upperisatsinnik oqaluttuukkaangatsigik annerussiumatuujunaveersaartariaqarpugut nikassaanaveersaartariaqarlutalu. Inuit uummataasa killinnissaat taakkualu sallussuisutinut nammineq nuannarilluinnakkatsinnut kajungilernissaat anguniagaraavut. (Kolossemiut 4:6) Petrusi allakkami kristumiut imminnut illersornissaminnut piareersimaqqullugit, eqqaavaattaaq ’saamallutik ataqqinnilluinnarlutillu’ taamaaliortariaqartut. (1 Petrusi 3:15, NV) Saamallutalu ataqqinnikkutta inuit Guutimut kiffartorfigisatsinnut kajungilernissaat ilimanarnerussaaq.
17, 18. (a) Inuit oqarpata oqaluussinermut piukkunnanngitsugut qanoq qisuariassaagut? (b) Sooq oqaatsinik Biibilip allanneqaqqaarnerani atorneqartunik ilisimasaqartariaqanngikkaluarpugut?
17 Ilisimasavut imaluunniit ilinniartitaanerput pillugit allanut kakkagitinniarsarinissatsinnut pissutissaqanngilagut. Oqaluussiffigisartakkanni ilaasa immikkut ilinniagaqarsimasuinnaat imaluunniit aalajangersimasumik taaguutiliinnaat tusarnaarusuppatigik, tamanna nikalluutigissanngilat. Jiisusip soqutiginngilaa ilaasa isornartorsiormanni taamanikkut rabbinerit ilinniarfiini pingaartinneqartuni atuarsimannginnini pillugu, inuillu ilisimasarpassuarminnik kakkanniarfigalugit qujanarniarfigisanngilai. — Johannesi 7:15.
18 Maniguunneq asanninnerlu oqaluussisartunut kristumiunut ilinniartitaanermit qanorluunniit ittumit pingaaruteqarnerungaarput. Ajoqersuisorsuup, Jehovap, oqaluussinissamut piukkunnarsarpaatigut. (2 Korintimiut 3:5, 6) Aamma kristumiuuneraqatigiinni palasit ilaat qanorluunniit oqaraluarpata, oqaatsit Biibilip allanneqaqqaarnerani atorneqartut ilinniarnissaat pisariaqanngilaq allanik Guutip oqaasianik ilinniartitsisinnaassagaanni. Biibili Jehovamit isumassarsiarititaavoq, imalu paasinartigisumik allagaavoq, sallusuissutit naleqangaartut Biibilimeersut inunnit tamangajannit paasineqarsinnaapput. Sallusuissutit taakku allanngorsimanngillat, naak Biibili oqaatsinut hundredelippassuarnut nutserneqarsimagaluartoq. Taamaattumik oqaatsit Biibilip allanneqaqqaarnerani atorneqartut ilikkarnissaat pisariaqanngilaq, naallu ilaannikkut iluaqutaasinnaagaluartoq. Aammattaaq oqaatsinik ilisimasaqassuseq pingaarniassutigalugu kristumiunut ilumoortunut pingaaruteqarluinnartoq, ilinniarumatuujuneq, annaaneqarsinnaavoq. — 1 Timotheusi 6:4.
19. Oqaluussinermi nikallujuinnitsigut savat assersuutaasut qanoq ikiorsinnaavavut?
19 Qularutissaanngilaq kristumiutut kiffartussagaanni maniguuttariaqartoq. Soqutiginninnginneq assortorneqarnerlu misigisaannarpavut, allaallu immaqa malersorneqartarluta. (Johannesi 15:20) Aalajaallutali oqaluussiuarutta suliaq inuuginnarnissamut aalajangiisuusoq naammassissavarput. Maniguulluta inuit kiffartuuttuarutsigik Jiisusi Kristusip allanut asanninnera ilaassavarput. Manna eqqarsaatigilaaruk: Inuit tusindit soqutiginninngitsut akeqqersimaartulluunniit oqaluussiffigisariaqarutsigik sava assersuutaasoq ataasiinnaq naniniarlugu, ilungersornivut asuliinnarnaviassanngillat, ilaa? Soorunami! Oqaluussinermi nikallujuinnitsigut taamaatinngisaannarnitsigullu savanut assersuutaasunut suli naninngisatsinnut iluaqutaasussamik kiffartorpugut. Qularutissaanngilaq Jehovap Jiisusillu isumagiumaaraat naggatissap nalliutinnginnerani inuit suli amerlanerusut ’erlinnartuutitut ittut’ nanineqarnissaat ikiorneqarnissaallu. — Haggaji 2:7.
20. Maligassaalluarnitsigut qanoq ilinniartitsisinnaavugut?
20 Aamma maligassaalluarnitsigut allanik kiffartuusserusulluta takutissinnaavarput. Ilaatigut allanut ilinniartitsissutigerusupparput ajunnginnerpaamik nalerisimaarnarnerpaamillu inuusoqarsinnaasoq Jehova, ’Guuti pilluartoq’, kiffartorfigalugu. (1 Timotheusi 1:11) Qimerlooraangamisigut aamma sanilitsinnut, atuaqatitsinnut suleqatitsinnullu pissusilersornerput maluginiaraangamikku, takusinnaasarnerpaat nuannaarlutalu nalerisimaartugut? Allanut aamma ilinniartitsissutigaarput ilagiit kristumiut silarsuarmi naakkittaaffiusumi ajortumilu asanniffiulluni qimarnguffiusoq. Ilagiinniittut tamaasa asagivut sapinngisatsinnillu iliuuseqartartugut eqqisseqatigiuarniarlugit tamanit takuneqarsinnaava? — 1 Petrusi 4:8.
21, 22. (a) Imminut misissorutta kiffartornermut periarfissat suut immaqa atorluarsinnaassavavut? (b) Napasuliaq Alapernaarsuiffik-up normuani tullermi suut sammineqassappat?
21 Kiffartorusussuseqarutta ilaannikkut imminut misissortassaagut. Ilumoorlutik taamaaliortut ilarpassuisa immaqa paasilissavaat piffissaq tamaat oqaluussisalernermikkut pisariaqartitsiffiunerusumulluunniit nuunnermikkut kiffartornerulersinnaallutik. Allat aalajangersimapput allat oqaasiinik ilinniarniarlutik nunassisut oqaluussiffigisartakkaminniittut amerliartuinnartut ikiorsinnaajumallugit. Taamatut periarfissaqaruit qinunikkut eqqarsaatigeqqissaartariaqarpat. Guutimut kiffartorluni inuuneq nuannaangaalersitsisarpoq, nalerisimaangaalersitsisarluni isumakkullu eqqissisimangaalersitsisarluni. — Oqaluussisartup oqaasii 5:12.
22 Pingaarnerpaamik Jiisusi Kristusi ilaartuartigu sallusuissutinut ilinniartitsissutigisatsinnut ilinniartitatsinnullu asanninnermik ineriartortitsilluta. Taakkununnga asanninnerup asanninnermillu ineriartortitsinerup tunngavissaqarlualersissavaatigut Kristusip ilinniartitsisimaneratut ilinniartitsisinnaanissatsinnut. Qanorli ililluta taanna tunngavigalugu ingerlaqqissinnaavugut? Napasuliaq Alapernaarsuiffik-up normuani tullermi Jiisusip ilinniartitseriaasiisa ilaat sammineqassapput. (wE 08/15 02)
[Quppernerup ataani ilanngussaq]
^ imm. 11 Jehovap Nalunaajaasuinit saqqummersinneqartoq.
Qanoq akissavit?
• Sooq Jiisusip ilinniartitsisutut maligassiaata ilaarnissaa inornartuunngila?
• Sallusuissutit Biibilimeersut ilikkakkavut nuannaralugit qanoq takutissinnaavarput?
• Ilisarsineruleriartortilluta maniguuttuarnissarput sooq pingaaruteqarpa?
• Ilinniartitavut asallugit qanoq takutissinnaavarput?
[Atuaqqissaarnermi apeqqutit]
[Qupp. 26-mi assiliartaq]
Piareersarniarlutit sapinngisannik iliortarit
[Qupp. 27-mi assiliartaq]
Guutimik ilisarsineq pingaartikkukku Biibilimik atornissannut pikkorinnerulissaatit
[Qupp. 28-mi assiliartaq]
Allat nutaarsiassamik nuannersumik oqaluttuullugit asannittuliorfigisarpavut