Atuartartut apeqqutaat

Angajoqqaat arlaannaat Jehovamut Nalunaajaasuuppat meeqqanik perorsaaneq pillugu Biibilimi qanoq ilitsersuuteqarpa?

Biibilimi marlunnik pingaarutilinnik najuqqutassiaqarpoq Jehovamut Nalunaajaasup qulaani taaneqartutut atugaqartup meeqqanik perorsaanermini najoqqutarisassaanik. Siulleq tassaavoq: „Guuti naalakkatsitut inunnit naalattariaqarneruarput.“ (Apustilit Suliaat 5:29, NV) Aappaalu tassaavoq: ’Uiusoq nuliaminut niaquuvoq soorlu Kristusi ilagiinnut niaquusoq.’ (Efesosimiut 5:23) Allassimaffik kingulleq nuliaasup Jehovamut Nalunaajaasumik uillip kisimi malitassarinngilaa, aammali Jehovamut Nalunaajaasuunngitsumik uillip malitassaraa. (1 Petrusi 3:1) Najuqqutassiat taakku Jehovamut nalunaajaasup meeqqaminik perorsaanermini qanoq malissinnaavai?

Angut Jehovamut Nalunaajaasuuguni ilaquttami anersaakkut timikkullu pisariaqartitaasa matussuserneqarnissaat akisussaaffigaa. (1 Timotheusi 5:8) Naak immaqa nuliami (Jehovamut Nalunaajaasuunngitsup) meeqqat ilaginerusaraluarai, meeqqat anersaakkut perorsarneqarnissaat angutip isumagisariaqarpaa, angerlarsimaffimminni ilinniartinnerisigut kristumiullu ataatsimiinnerinut ilagisarnerisigut, tassami ilinniartitsineq aammattaaq ilagiinnik peqateqartarneq taakkununnga iluaqutaassammat.

Taavami nuliata meeqqat oqaluffimmut attavigisaminut ilaginiarpagit imaluunniit upperisaminik ilinniartinniarpagit — soorlu immaqa nunami inatsisit naapertorlugit pisinnaatitaasoq? Oqaluffimmi ileqqulersuutinut peqataanissaminnut kajumissaarneqarnerminnut meeqqat akuersiinnassanersut ataataasup ilinniartitsinera apeqqutaasorujussuuvoq. Meeqqat alliartortillugit ataataasup Biibili tunngavigalugu ilinniartitsinerata sallusuissumik Guutip oqaasianeersumik malinninnissaannut ikiortussaavai. Meeqqat namminneerlutik sallusuissummut aalajangiussippata tamanna ataataasumut pilluaataassaqaaq.

Anaanaasoq Jehovamut Nalunaajaasuuguni uimi ilaqutariinnut aqutsisuunera ataqqisariaqarpaa meeqqami naassaanngitsumik inuulluarnissaat soqutigiitigalugu. (1 Korinthimiut 11:3) Nuliami ileqqussatigut najoqqutassiat pitsaasut pillugit meeqqanik ilinniartitsinera upperisarsiornerullu tungaatigut perorsaanera, ilaatigut naalagaaffilersaarfimmi ataatsimiinnernut meeqqat ilagisarnerisigut, amerlanertigut uiata ajorisanngilaa. Jehovap peqatigiissortai aqqutigalugit meeqqat ilinniartinneqarnerisa ajunngequtaanik paasinninnissaanut nuliaasup uini ikiorsinnaavaa. Ilaatigut pissuserilluni uini ilisimatissinnaavaa meeqqat ileqqussatigut najoqqutassianik pitsaasunik Biibilimeersunik ilinniarnissaasa naleqassusianik. Silarsuarmi ileqqussatigut ajortunngorsimasumi tamanna meeqqanut iluaqutaassaaq.

Imaasinnaavorli angutip nuliamisut upperisaqanngitsup piumasarigaa upperisani meeqqat malissagaat oqaluffimminullu naalagiaqatigisassagaanni, upperisarsiornerullu tungaatigut perorsarneqarnerat nammineq isumaginiaraa. Imaluunniit imassinnaavoq upperisarsiornerit tamaasa akerlerigai, isumaqartorlu meeqqat upperisarsiornerup tungaatigut perorsarneqassanngitsut. Ilaqutariinnut ittuusutut aalajangiisussaavoq. *

Nuliaasup uppertup uini ilaqutariit ittuattut soorunami ataqqissavaa, kisianni kristumiutut tunniulluinnarsimasutut apustilit Petrusip Johannesillu isiginnitaasiat aamma eqqarsaatigissavaa, taakku ima oqarmata: „Uagut eqqartunngitsoorsinnaanngilavut takusimasavut tusarsimasavullu.“ (Apustilit Suliaat 4:19, 20) Meeqqat anersaakkut ingerlalluarnissaat soqutigalugu nuliaasoq upperisarsiornerup ileqqorissaarnissallu tungaatigut ilitsersuinissaminut periarfissarsiortassaaq. Eqqortumik nalunngisaminik allanut oqaluttuarnissaminut Jehovamut akisussaavoq, meeraalu allanit allaanerunngillat. (Ussatit 1:8; Matthæusi  28:19, 20) Pissutsini taama ittuni anaanaasoq qanoq iliorsinnaava?

Guutimut upperneq pillugu apeqqut assersuutigeriartigu. Immaqa ataataasup inerteqqutigimmagu anaanaasup meeqqat Biibilimik iluamik atuaqqissaaqatigisinnaanngilai. Tamannali pissutigalugu meeqqat Jehova pillugu oqaluttuunnaveersaarluinnartariaqarpai? Naamik, tamanna eqqortuussanngilaq. Pissusissamisuuinnassaaq oqaatsimigut iliuutsimigullu takutippagu Guuti Pinngortitsisorlu upperalugu, aamma meeqqat tamatumunnga tunngasunik apeqqutissaqanngitsoornavianngillat. Pisinnaatitaavoq upperisarsiornikkut kiffaanngissuseqarnini atorluarlugu Pinngortitsisumut uppernini nittassallugu, pisinnaatitaanerlu taanna aamma meeqqaminut atorluartariaqarpaa. Naak aaqqissuussamik Biibilimik atuaqqissaaqatigisinnaanngikkaluarlugit imaluunniit aalajangersimasumik ataatsimiigiaqatigisinnaanngikkaluarlugit Jehova Guuti pillugu ilisimasaqalersissinnaavai. — 5 Mosesi 6:7.

Aappariit arlaat uppinngitsuuppat attaveqatigiinnerat pillugu apustili Paulusi ima allappoq: „Angut uppertuunngitsoq illernartitaavoq nuliamigut, arnarlu uppertuunngitsoq illernartitaavoq qatanngutikkut. Taamaanngippat qitornasi minguttuussagaluarput, maannali illernartitaapput.“ (1 Korinthimiut 7:14) Aappaasoq uppertoq pissutigalugu Jehovap aappariinneq illernartutut isigaa, taamaattumillu meeqqat Jehovap isaani illernartuupput. Nuliaasoq uppertoq sapinngisaminik iliortariaqarpoq meeqqat sallusuissummik paasinninnissaannut ikiorniarlugit, sinneralu Jehovap assaanut tunniullugu.

Meeqqat alliartortillutik angajoqqaamik paasissutissiissutaat tunngavigalugit qanoq isummerniarnerlutik namminneq aalajangissavaat. Immaqa Jiisusip oqaasii maluginiassavaat: „Uannut asanninnerminit annerusumik ataataminut anaanaminulluunniit asannittoq uannut qinngaqqunnarpoq.“ (Matthæusi 10:37) Kajumissaarullu una malissinnaavaat: „Qitornaasusi, angajoqqaasi naalassigit Naalakkami, tamanna iluarmat.“ (Efesosimiut 6:1) Inuusuttorpassuit aalajangiussisimapput ataataminnit anaanaminnilluunniit uppinngitsumit ‘Guuti naalakkatut naalanneruniarlugu’, naak taamatut isummernermikkut uppinngitsumit akerlilersorneqaraluarlutik. Meeqqat naak assortorneqaraluarlutik Jehovamut aalajangiussinerat ataataasumut anaanaasumulluunniit uppertumut soorunami pilluaataassaqaaq. (wE 08/15 02)

[Quppernerup ataani ilanngussaq]