Ilikkakkasi maleruartuassavasi

„Uannit ilikkakkasi pissarsiasilu tusakkasilu uannilu takusasi iliuuserissavasi, eqqissinerullu Guutiata najussavaasi.“ — FILIPPIMIUT 4:9.

1, 2. Inunnut upperisarsiortutut imminnut isigisunut Biibili sunniuteqartarpa? Nassuiaruk.

„UPPERISARSIORNEQ siuariartorpoq, ileqqorissaarnerli kinguariartorluni.“ Nutaarsiassalersaarummi Emerging Trends-imi qulequtap tamatuma USA-mi nuna tamakkerlugu misissuinerup inernera eqikkarpaa. Nunami tassani naalagiartartut inuunerminnilu upperisariornermik pingaartitsinerartut amerliartuinnarunarput. Nalunaarusiamili allassimavoq: „Amerliartuinnaraluartut nalunanngilaq Amerikamiorpassuit upperisarsiorneq inuit inuunerannut inuiaqatigiinnulluunniit tamanut sunniuteqarnersoq apeqqusertaraat.“

² USA-ginnarmi pissutsit taamaanngillat. Silarsuarmi tamarmi inuppassuarnut Biibilimik upperinninnerartunut upperisarsiortuusunullu Biibili sunniuteqarpallaanngilaq. (2 Timotheusi 3:5) Misissueqqissaartartunut ittuusoq ima oqarpoq: „Suli Biibilimik ataqqinnittorujussuuvugut, atuarnissaali atuaqqissaarnissaalu maleruarnissaalu piffissaqarfigineqarunnaarput.“

3. (a) Kristumiunngortunut ilumoortunut Biibili qanoq sunniuteqarpa? (b) Paulusip Filippimiut 4:9-mi siunnersuutaa Jiisusip ajoqersugaasa qanoq malippaat?

³ Kristumiunulli ilumoortunut allaavoq. Guutip oqaasiani siunnersuutigineqartunik maleruaanerat eqqarsartaasiannut ileqquinullu sunniuteqangaarsimavoq. Aamma ’nutaamik inuttut pissuseqarlersimasut’ allanit malugineqarsimavoq. (Kolossemiut 3:5-10, NV) Jiisusimik malinnerusuttut Biibili atuakkatut atorneqarnani ilisivimmi pujoralassiiaataaginnartutut isiginngilaat. Akerlianik kristumiut ilumoortut apustili Paulusip Filippimi ilagiinnut kajumissaarutaa maleruarniarpaat: „Uannit ilikkakkasi pissarsiasilu tusakkasilu uannilu takusasi iliuuserissavasi, eqqissinerullu Guutiata najussavaasi.“ (Filippimiut 4:9) Kristumiut Guutip oqaasiani allassimasut ilumoorneraannanngilaat. Ilikkakkatik malillugit iliuuseqartarput, ilaqutariinnilu, suliffimmi, ilagiinni allatigullu inuunermi atukkaminni sutigut tamatigut maleruartarpaat.

4. Guutip inatsisaanik maleruaaneq sooq unamminiarnartuua?

 ⁴ Guutip inatsisaanik najoqqutassiaanillu maleruaaneq imaannaanngilaq. Silarsuarmi Saatani Diaavulup, Biibilimi ’pissutsit aaqqissuussaanerata matuma guutianik’ taaneqartup pissaaneqarfigisaani inuuvugut. (2 Korinthimiut 4:4, NV; 1 Johannesi 5:19) Taamaattumik pingaaruteqarpoq Jehova Guutimut assuarnaatsuujuarnissatsinnut akornutaasinnaasut tamaasa eqqumaffiginissaat. Qanoq ililluta?

„Oqaatsinut peqqissinartunut najoqqutassiaq“ aalajangiusimajuk

5. Jiisusip oqaasia una qanoq isumaqarpa: ’Malittuarsinga’?

⁵ Ilikkakkavut iliuuserisinnaavavut ilaatigut pallorfiginninnermik ilumoortumik ilumoorluta aalajangiusimanninnitsigut, uppinngitsunit akerlilersorneqaraluarlutaluunniit. Qasusuitsuussagaanni iliuuseqartariaqarpoq. Tamanna Jiisusip oqaasiini erserpoq: „Uannik malinnikkumasoq imminut isumakkiissaaq, napasorlu anniartitaaffini tigussavaa malittuarlungalu.“ (Matthæusi 16:24, NV) Jiisusi oqanngilaq sapaatip-akunnera ataaseq, qaammat ataaseq ukiorluunniit ataaseq malissagipput. Naagga, oqarpoq ’malittuassagitsinni’. Tamatuma ersersippaa inuunerup ilaannaaniinnaanngitsoq kristumiuussasugut. Asanninneq qarsupittoq, imaaliallaannaq qaangiuttartoq, pineqanngilaq. Pallorfiginninneq ilumoortoq ilumoorluta tapersersorusukkutsigu qanorluunniit pisoqassagaluarpat aalajaattariaqarpugut inuuseriumallugulu qinigarput malittariaqarlugu. Qanoq ililluta?

6. Oqaatsinut peqqissinartunut najoqqutassiaq suna ukiuni hundredelinni siullerni kristumiut Paulusimit ilikkarpaat?

⁶ Paulusip suleqatini Timotheusi ima kajumissaarpaa: „Oqaatsinut peqqissinartunut najoqqutassiaq uannit tusakkat aalajangiusimajuk, Kristusi-Jiisusikkut upperlutit asannillutillu.“ (2 Timotheusi 1:13, NV) Paulusi qanoruna isumaqartoq? Grækerit oqaasiat „najoqqutassiaq“-mik uani nutserneqarsimasoq eqqumiitsuliortup ilusiliigallarneranut tunngatinneqartarpoq. Annikitsualuit tamarmik ilaanngillat, assilialiassarli qanoq issikkoqalerumaarnersoq takorlooruminarpoq. Taamatulli sallusuissummut najoqqutassiap, Paulusip Timotheusimut allanullu ilinniartitsissutigisaata, apeqqutaasinnaasut tamaasa immikkut akinngilai. Ataatsimulli isigalugu ajoqersuut naammattunik siunnersuuteqarpoq inunnik ilumoorusuttunik Jehovap sumik piumaffiginninneranik paasititsisumik. Pingaarnerit tamarmik tassaniippullusooq. Guutimut iluarisaassagunik soorunami sallusuissumut najoqqutassiaq aalajangiusimasariaqarpaat ilinniakkatik iliuuseriuarlugit.

7. Kristumiut oqaatsinut peqqissinartunut najoqqutassiaq qanoq aalajangiusimasinnaavaat?

⁷ Ukiuni hundredelinni siullerni kristumiuni ilagiinniittut ilaasa, ilaatigut Hymenæusip,  Alexanderip Filetusillu, eqqarsaatit ’oqaatsinut peqqissinartunut najoqqutassiamut’ naleqqutinngitsut saqqummiuttarpaat. (1 Timotheusi 1:18-20; 2 Timotheusi 2:16, 17) Kristumiut taamanikkut qanoq tunussisunit tammartitaanngitsoorsinnaasimappat? Allakkanik isumassarsiarititaasunik atuaqqissaarnermikkut ilikkakkaminnillu maleruaanermikkut. Paulusip ajoqersukkallu aalajaatsut allat maligassiaannik malinnittut sallusuissummut najoqqutassiamut ilikkakkaminnut naapertuutinngitsut tamaasa malugisinnaavaat itigartillugillu. (Filippimiut 3:17; Hebræerit 5:14) ’Ingasalluinnartumik oqallinnerni assortuunnernilu peqataaneq’ ajorput, isumalluartuujuarpulli Guutimullu tunniusimajuarlutik. (1 Timotheusi 6:3-6) Uagut aamma taamaaliussaagut ilikkakkavut iliuuseriuarutsigik. Inuit millionilikkuutaat nunarsuarmi tamarmi Jehovamut kiffartortut sallusuissummut najoqqutassiamik Biibilimeersumik ilikkakkaminnik aalajangiussisimalluinnartut takullugit uppernermut nakussatsinnangaarpoq. — 1 Thessalonikamiut 1:2-5.

„Salluliuutit“ itigartikkit

8. (a) Ullumikkut Saatanip qanoq upperunnaarsinniarpaatigut? (b) Timotheusimut allakkat aappaat 4:3, 4-mi Paulusi qanoq mianersoqqusiva?

⁸ Ilikkakkatsinnik qularutiginnilersitsinermigut Saatanip assuarnaakkunnaartinniarpaatigut. Ukiuni hundredelinni siullernitulli tunussisut allallu ullumikkut ajortunngorsimanngitsut upperunnaarsinniarpaat. (Galatiamiut 2:4; 5:7, 8) Ilaannikkut Jehovap Nalunaajaasuisa pissutiginiagaat periaasiilu pillugit tusagassiuutitigut paasissutissiinerluttarput sualuttumilluunniit sallusarlutik. Paulusip mianersoqqussutigaa sallusuissummik tunussisoqarnissaa, ima allakkami: „Ullussani nalliuttussani inuit ajoqersuut peqqissinartoq naammagiunnaarumaarpaat, namminneq iluarisaminnik siutimik tusarnarisaannik ilinniartitsisussarpassuarsiorumaarlutik; sallusuissullu tusarumajunnaarumaarpaat salluliuutillu sammisarilerlugit.“ — 2 Timotheusi 4:3, 4, NV.

9. Paulusip ’salluliuutit’ allaatigigamigit suna pisimasinnaavaa?

⁹ Oqaatsinut peqqissinartunut najoqqutassiaq aalajangiusimanagu ilaat ’salluliuutinit’ tammartitaapput. Salluliuutit taakku suunuku? Paulusip eqqarsaatigisimasinnaavai oqaluttuatoqqat tupinnartut soorlu Tobitip Allagaani Biibilimut ilaanngitsumi allanneqarsimasut. * Salluliuutit taakku aamma tupinnartussarsiortunik eqqarsaatersuutinillu  tusatsiagaasinnaapput. Immaqa allat, namminneq kissaatitik naapertorlugit, Guutip ileqqussatigut najoqqutassiaanut maleruutiasumik isiginnittaaseqartitsiniartunit kristumiulluunniit ilagiivini siuttuusunut isorinnittunit anersaakkut salloqittagaasimapput. (3 Johannesi 9, 10; Judasi 4) Sunaluunniit naakkiussutaagaluarpat ilaasa salluliuut sallusuissummit Guutip oqaasianeersumit piumanerusimagunarpaat. Sivitsunngitsoq ilikkakkatik iliuuserisarunnaarpaat, imminnut anersaakkut ajoquserujussuarlutik. — 2 Petrusi 3:15, 16.

10. Ullumikkut qanoq ittunik salluliuuteqarpa, mianersortariaqarnerlu Johannesip qanoq erseqqissarpaa?

¹⁰ Salluliuutit kajungerinaveersaarsinnaavavut suna tusarnaarnerlugu sunalu atuarnerlugu mianersuuttarutsigu. Assersuutigalugu tusagassiuutini inuunerlunneq siuarsarneqartarpoq. Inuppassuit Guuteqarneranik qularinninnermik guuteqannginneraanermilluunniit illersuisarput. Oqaluttuarisaanerup tungaanit isigalugu isornartorsiuerpalaartumik Biibilimik misissueqqissaarnermut isumaqataasut Biibilip Guutimit isumassarsiarititaanerarneqarneranik mitaatiginniinnarput. Ullumikkullu tunussisut kristumiunik upperunnaartitsiniarlutik qulalersitsiniartuarput. Ukiuni hundredeni siullerni pruffiitioqqusersut navianartorsiortitsinerat pillugu apustili Johannesi allappoq: „Asasakka, anersaat suulluunniit upperiinnaqinasigit, misilissigilli anersaat Guutimit pisuunersut, pruffiitioqqusersummi amerlaqisut silarsuarmut aallarsimammata.“ (1 Johannesi 4:1) Taamaattumik mianersortariaqarpugut.

11. Uppernermiinnerluta qanoq paasiniarsinnaavarput?

¹¹ Tamatumunnga atatillugu Paulusi ima allappoq: „Immissinnik paasiniaaffiginiaritsi uppernermiinnersusi!“ (2 Korinthimiut 13:5) Uani apustilip kajumissaarpaatigut imminut misiligartuartariaqartugut paasiniarlugu kristumiut upperisaat tamaat aalajangiusimaneripput. Naammagittaatsut tusarnaaqqajaasarutsigik imminut misissortariaqarpugut isiginnittaatsittalu allanngortinnissaanut Guutimut ikioqqulluta. (Tussiaat 139:23, 24) Jehovap innuttai isornartorsioqqajaasarpavut? Taamaakkutta sooq taamaappugut? Arlaannik iliuuseqartoqarsimava oqartoqarsimavaluunniit ajuallaatigisatsinnik? Taamaappat pineqartumut eqqortumik isiginnittaaseqarpugut? Ullumikkut atugarliuutivut tamarmik atugaajunnaassapput. (2 Korinthimiut 4:17) Ilagiinniluuniit nuanniilliortinneqaraluarutta, Guuti kiffartorfigiunnaanngisaannartariaqarparput? Arlaannik kamassuteqarutta pitsaanerpaassanngila sapinngisatsinnik aaqqinniarutsigu taavalu Jehovap assaanut tunniullugu? — Tussiaat 4:5; Ussatit 3:5, 6; Efesosimiut 4:26.

12. Berøamiutut qanoq ajunngitsumik isiginnittaaseqarsinnaavugut?

¹² Isornartorsiueqqajaanata nammineq atuaqqissaarnikkut ilagiillu ataatsimiinnerini paasisavut anersaakkut peqqissumik isumaqarfigiuartigik. (1 Korinthimiut 2:14, 15) Guutip oqaasia apeqqusernagu Berøamiutut ukiuni hundredelinni siullerni Allakkanik misissueqqissaartartutut isiginnittaaseqarutta silartusaarnerungaassaaq. (Apustilit Suliaat 17:10, 11) Tassa ilinniakkatsitut iliuuseqartariaqarpugut, salluliuutit itigartillugit sallusuissullu aalajangiusimallugu.

13. Piaarinata salluliuutit qanoq ililluta ingerlateqqittoorsinnaavavut?

 ¹³ Allanik salluliuuteqarpoq mianersorfigisariaqakkatsinnik. Oqaluttuarpassuaqarpoq tupinnartussarsiortunik e-mail aqqutigalugu siaruarterneqarajuttunik. Taamaattut upperiinnarnissaat mianersuukkaanni silatusaarnerussaaq, ingammik pilerfii ilisimanngikkaanni. Kristumiumillluunniit tatiginartumit tusaraluarutsigik imaassinnaavoq nammineerluni sukumiisumik misissorsimanngikkai. Taamaattumik tusakkat uppernarsineqanngitsut oqaluttuareqqinnissaat ingerlateqqinnissaalluunniit mianersuutigisariaqarparput. ’Oqaluttuarujuit arnaqquassaapalaat ileqqorisartagaat’ ingerlateqqikkusunngilagut. (1 Timûtiusi 4:7) Ilumoortumik oqaluttussaagatta silatusaassaagut mianersorfigigutsigu eqqunngitsunik ingerlatitseqqinnissaq, ilumoorsorigaluaruttaluunniit. — Efesosimiut 4:25.

Sallusuissutip maleruarnera iluaqutaavoq

14. Guutip oqaasianit ilikkakkatsinnik maleruaaneq sumik ajunngequteqarpa?

¹⁴ Biibilimik atuaqqissaarnitsinni kristumiullu ataatsimiinnerini ilikkakkatsinnik maleruaaneq ajunngequterpassuaqarpoq. Assersuutigalugu immaqa paasilerparput uppeqatitsinnut attaveqarnerput ajunnginnerulersoq. (Galatiamiut 6:10) Biibilimi najoqqutassiat maleruaraangatigik aamma ilukkut pissuserput pitsaanerulertarpoq. (Tussiaat 19:9) Aammattaaq ilikkakkavut iliuuserisarutsigik ’Guutip ajoqersuutaanut pinnersaataassaagut’, tamatumalu allat pallorfiginninnermut ilumoortumut kajungilersissinnaavai. — Titusi 2:6-10.

15. (a) Niviarsiaraq atuarfimmi qanoq sapiiserluni oqaluussiva? (b) Assersuut tamanna qanoq ilinniarfigisinnaavarput?

¹⁵ Jehovap Nalunaajaasuini inuusuttorpassuaqarpoq Biibilimik atuagassianillu Biibililersaarutinik atuarnermikkut ilagiillu sapaatip-akunneranut ataatsimiinnerini ilikkakkaminnik maleruaasunik. Ileqqorissuunerat ilinniartitsisunut atuaqataannullu nalunaajaataalluarpoq. (1 Petrusi 2:12) Leslie, USA-mi niviarsiaraq 13-inik ukiulik, Jehovap Nalunaajaasuisa ilagaat. Upperisani pillugu atuaqatimi oqaluttuunnissaat sapernartittarsimavaa, ullulli ilaanni taamaaliorpoq. „Inuit sunik tamanik tuniniaaniarsarinerat klassimi oqallisigaarput. Taavalu niviarsiaqqap nappaariarluni Jehovap Nalunaajaasui eqqaavai.“ Leslie qanoq iliorpa? „Upperisara illersorpara,“ oqaluttuarpoq. „Tamarmik tupaallakkunarput nipaarluugamami.“ Qanoq kinguneqarpa? „Niviarsiaraq Jehovap Nalunaajaasuinik eqqartuisoq atuagassiaaqqamik naqitaaqqamillu pivoq, allanimmi aamma apeqquteqarpoq,“ Leslie oqaluttuarpoq. Jehovap nuannaarutigingaartassavaa inuusuttut ilikkakkaminnik maleruaagaangata sapiiserlutillu  atuarfimmi upperisartik pillugu oqaluttuaraangata. — Ussatit 27:11; Hebræerit 6:10.

16. Niviarsiaqqap Teokratiimik Atuarfik qanoq iluaqutigisimavaa?

¹⁶ Elizabeth aamma assersuutigisinnaavarput. Arfineq-marlunnilli ukioqarluni meeqqallu atuarfianni atuartilluni naalagaaffilersaarfimmi Teokratiimik Atuarfimmi pisassaqaraangami tamatigut ilinniartitsisuni qaaqqusarpai. Ilinniartitsisoq aggersinnaanngikkaangat atuareernerup kingorna ilinniartitsisumut saqqummiuttarpaa. Highschoolimiinnermi ukiuani kingullermi Teokratiimik Atuarfik qanoq iluaqutigisimanerlugu qulinik quppernilimmik nalunaarusiorpoq ilinniartitsisunullu sisamanut ataatsikkut saqqummiullugu. Aammattaaq kajumissaarneqarpoq Teokratiimi Atuarfimmi qanoq saqqummiussisarnermik takutitseqqullugu, aalajangerporlu „Sooq naalliunnartut atuunnerat Guutip akueraa?“ qulequtariniarlugu. Elizabethip Teokratiimik Atuarfimmi Jehovap Nalunaajaasuisa ilinniartitsineranni peqataanini iluaqutigingaarpaa. Elizabeth inuusuttorpassuit kristumiut ilikkakkaminnik maleruaanermikkut Jehova Guutimik ajunngitsumik isiginnilersitsisut ilaannaraat.

17, 18. (a) Unneqqarinneq pillugu Biibilimi qanoq siunnersuuteqarpa? (b) Jehovap Nalunaajaasuisa ilaata unneqqarissuunera angutip qanoq iluaqutigaa?

¹⁷ Biibilimi kristumiut eqqaasinneqarput tamatigut unneqqarissuussasut. (Hebræerit 13:18) Unneqqaserlunnerup allanut pingaarnerusumillu Jehovamut attaveqarnerput ajoqusersinnaavaa. (Ussatit 12:22) Unneqqarissuunitta takutippaa ilikkakkatsinnik maleruaasugut, tamatumalu allat Jehovap Nalunaajaasuinik ataqqinninnerulersippai.

¹⁸ Soorlu Phillipimut sakkutuujusumut taamaattoq. Checkitini atsioriigaq katassimallugu aatsaat paasivaa allakkatigut utertinneqarmat. Checki Jehovap Nalunaajaasuisa ilaannit nassaarineqarsimavoq. Nassaartup unneqqarissup allakkatigut nassuiarpaa upperisani pissutigalugu checki utertillugu. Phillip tupigutsattorujussuuvoq. „9000 dollarinik tilliffigisinnaagaluarpaannga!“ oqarpoq. Siusinnerusukkut oqaluffimmi natsami tillinneqarsimanera pakatsissutigisimavaa. Uppeqataata tillissimassavaa, takornartaalluinnartulli checki dollarinik tusindinik arlalinnik nalilik utertippaa. Qularutissaanngilluinnarpoq kristumiut unneqqarissut Jehova Guutimut ataqqinaataasut.

Ilikkakkatit maleruartuakkit

19, 20. Biibilimeersut ilikkakkatta maleruarnerat qanoq iluaqutigissavarput?

¹⁹ Guutip oqaasianinngaanneersut ilikkakkatta maleruarnerat ajunngequterpassuaqarpoq. Ajoqersugaq Jaaku ima allappoq: „Kiffaanngissutsilli inatsisaanik naammalluinnartunik isumaliutiginneqqissaartoq aalajangiussisorlu, tusakkaminik puigutuujunani suliassamillu naammassinnittartuulluni, taanna taamaaliornermigut pilluarumaarpoq.“ (Jaaku 1:25) Aap, Biibilimeersut ilikkakkavut naapertorlugit iliuuseqartarutta piviusumik nuannaalissaagut tatineqartarnivullu anigorluarnerusinnaassallugit. Pingaarnerpaamik Jehovamit pilluaqqusaassaagut naassaanngitsumillu inuunissamik neriugisaqalerluta. — Ussatit 10:22; 1 Timotheusi 6:6.

²⁰ Taamaattumik eqiasuillutit Guutip oqaasia atuartuaruk. Jehovamik pallorfiginnittut aalajangersimasumik ilagisakkit, kristumiullu ataatsimiinnerini saqqummiunneqartunut tusarnaaqqissaartarit. Ilikkakkatit atortarlugillu maleruartuakkit. Taava ’eqqissinerup Guutiata najussavaatit’. — Filippimiut 4:9.  (wE 09/15 02)

[Quppernerup ataani ilanngussaq]

Eqqaamavigit?

• ’Oqaatsinut peqqissinartunut najoqqutassiaq’ suua, qanorlu aalajangiusimasinnaavarput?

• ’Salluliuutit’ suut itigartittariaqarpavut?

• Guutip oqaasianeersut ilikkakkatta maleruarnerat qanoq iluaqutigisinnaavarput?

[Atuaqqissaarnermi apeqqutit]

[Qupp. 25-mi assiliartaq]

Kristumiut siulliit tunussisunit qanoq tammartitaanngitsoorsinnaasimappat?

[Qupp. 26-mi assiliartaq]

Tusagasiiuutit, internetimi atuarneqarsinnaasut ullumikkullu tunussisut qulalersissinnaavaatigut

[Qupp. 27-mi assiliartaq]

Tusakkanik uppernarsineqanngitsunik ingerlatitseqqinneq silatusaarnerunngilaq

[Qupp. 28-mi assiliartat]

Suliffimmi, atuarfimmi allanilu Jehovap Nalunaajaasuisa Guutip oqaasiani atuartakkatik maleruartarpaat