„Nalunngilisiuk sooq aningaasat tunniukkiartorikka?“

„ANINGAASARPAALUUTEQASSAGALUARAMA!“ Nana, anaanaq kisimiittoq pingasunik ernilik Georgiami Kaspi-mi najugaqartoq, eqqarsarpoq. Ullut ilaanni kissaataa eqquuppoq. Ullaaq aqqusinermi politeeqarfiup eqqaani 300 larit nassaarai, allanik eqqaminiittoqanngilaq. Aningaasarpassuupput. Aap, ukiuni tallimani nunami larip aningaasatut atugaanerani Nana aatsaat hundrede larimik takuvoq. Niuertut tassaniittut aatsaat ukiuni arlalinni sulereerlutik aningaasat taama amerlatigisut iluanaarutigisinnaavaat.

’Kisianni aningaasat uku sumut iluaqutaassappat uppernera, Guutimik mianerinninnera anersaakkullu ittunik pingaartitsinera annaagukku?’ Nana eqqarsarpoq. Kristumiutut pissutsit tamakku ineriartortissimavai, naak uppernini pissutigalugu sakkortuumik qinugineqaraluarluni unatarneqartaraluarlunilu.

Politeeqarfimmukartilluni politiit tallimat ilungersorlutik ujaasisut takulerpai. Paasilerpaa aningaasat ujaraat, taamaattumik ornillugit aperivoq: „Katataqarassi?“

„Aningaasanik,“ akipput.

„Qassit?“

„Tre hundrede larit!“

„Nassaaraakka,“ Nana oqarpoq. Nangillunilu aperivoq: „Nalunngilisiuk sooq aningaasat tunniukkiartorikka?“ Naluaat.

„Jehovamut Nalunaajaasuugama. Nalunaajaasuunngikkuma tigummiinnassagaluarpakka,“ nassuiaavoq.

Politeeqarfimmi pisortap, aningaasanik katatsisup, Nana 20 larinik tunivaa unneqarissusia qujamasuutigalugu.

Kaspi-mi tamarmi pisimasoq erniinnaq tusaamaneqalerpoq. Aqaguani politeeqarfimmi eqqiaasup Nana oqarfigaa: „[Politeeqarfimmi pisortaq] allaffimmini atuagassiaatissinnik peqartuaannarpoq. Maanna suli pingaartinnerulissagunarpai.“ Politiillu ilaat oqarpoq: „Inuit tamarmik Jehovamut Nalunaajaasuugaluarpata kinamitaava pinerluttuliussagaluarpa?“ (wE 08/15 02)