Sanilit pitsaasut iluaqutaapput

„Pitsaaneruvoq sanileqarluni qanittumiittumik ungasissorsuarmiittumik qatannguteqarnermit.“ — Ussatit 27:10.

UKIUNI HUNDREDELINNI SIULLERNI inatsisinik ilisimasup Jiisusi ima aperaa: „Kinami tulleraara?“ Jiisusip akissutimini oqaluttuutiinnanngilaa kina tullerineraa, aammali suna ilumoortumik tullinngortitsisarnersoq oqaluttuuppaa. Oqaluttuaq tusareersimassavat. Samariamiu nallittuisoq pillugu assersuutitut ilisimaneqarluarpoq, aamma ivangkiiliumi Lukasip allagaani atuarneqarsinnaavoq. Jiisusi ima oqarpoq:

„’Angut Jerusalemimit Jerikomukartoq piiaasut tigusaraat. Atisaajarpaat persuttarlugulu, toqungajattorlu qimaannarlugu ingerlaqqipput. Nalaatsortumik aamma palasi tamaanaqquppoq. Angut taanna takugaluarpaa qaangiinnarluguli. Aammattaaq Levikkuusup tassuunaqquttup takugaluarlugu qaangiinnarpaa. Samariamiulli angalalluni tassuunaqquttup ornippaa, takugamiullu nalligitsaappaa. Tikikkamiuk ikii uuliamik viinnimillu kuerarpai mattuserlugillu, kivillugulu qimusserfigisaminut qaqitippaa, akunnittarfimmukaallugulu pisariaqagaanik isumagaa. Aqaguani denarit marluk tiguai, akunnittarfiullu piginnittuanut tunniuppai oqarlunilu: Pisariaqagaanik isumagiuk annerusumillu atortitaqaruit uteruma akilerumaarpakkit. Taava qanoq isumaqarpit: taakkua pingasut arlaat kina piiaasunit tiguneqartup tulleraa?’“ — Lukasi 10:29-36.

Assersuutip isumaa inatsisinik ilisimasup paasilluarsimagunarpaa, ikilertitsersimasumummi kina tulliunersoq nangaanngivilluni eqqortumik akivaa: „’Taassuminnga naakkinnittoq.“ Jiisusillu oqarfigaa: „Illittaaq taamaalioriartorit!“ (Lukasi 10:37) Jiisusip uani tulliulluarlunilu saniliulluartoq qanoq ittuunersoq sunniuteqarluartumik oqaatigaa. Assersuut pillugu immaqa ima aperisinnaavugut: ’Uanga sanilitut qanoq ittuuvunga? Amerma qalipaataa inuiaassuseraluunniit kikkunnik tullittut isigininninnut sunniuteqarpat? Pisariaqartitsisoqassappat taakku kimut ikiuisariaqartutut misiginissannut aalajangiisuuppat? Saniliulluarniarlungalu tulliulluarniarpunga?’

Suminngaanniit aallartittoqassava?

Isumaqarutta sanilitsinnut attaveqarluarnerusinnaalluta, isummatsinniit aallartittariaqassaagut. Pingaarnerpaamik saniliulluarnissarput eqqarsaatiginerussavarput. Aamma taamaaliornitta sanileriilluarlersissinnaavaatigut. Ukiut 2ooo-tingajaat matuma siorna Jiisusip qaqqami oqaluutsimini tusaamasaasumi inuit attaveqatigiinnerannut tunngasoq najoqqutassiaq pingaarutilik erseqqissarpaa. Oqarpoq: „Inunnut qanorluunniit iliorfigeqqugussi ilississaaq taamatut iliorfigisigit.“ (Matthæusi 7:12) Allat ataqqisarutsigik inussiarnisaarfigisarutsigillu uagutsinnik taamatut pinninnissaminnut kajumilersinneqarsinnaapput.

Allaaserisami „Tullit ilittut asajuk“-mi, atuagassiami The Nation Since 1865 -imeersumi tusagassiortup atuakkiortullu Lise Funderburgip iliuutsit annikitsunnguit sanilinut attaveqarlualersitseqataasinnaasut eqqaavai. Allappoq: „Sanileriittut ikinngutitut ikioqatigiilaarnertigut, soorlu aviisinik aalliussilluni, meeqqanik paarsilluni pisiniussilaarluniluunniit soqutigeqatigiitoqarnissaa kissaatiginatikkaluarpara. Silarsuatsinni tunuarsimaarfiugaluttuinnartumi, ersinermit pinerluttuliornernillu najukkami ataqatigiikkunnaarfiugaluttuinnartumi, tamanna pitsaassagaluarpoq.“ Imalu nangippoq: „Arlaanniit  aallartittoqartariaqarpoq. Sanilinniit aallartiinnarsinnaavutit.“

Atuagassiami Canadian Geographic-imi sanilit imminnut ajunngitsumik isiginnittaaseqarnissaannut ineriartuutaasinnaasoq aamma erseqqissarneqarpoq. Atuakkiortup Marni Jacksonip eqqaavaa: „Sanilivut, soorlu ilaquttavut, nammineq toqqagarinngilavut. Pissuserissaarneq, inussiarnisaarneq akaarinninnerlu ataqatigiinnermut aalajangiisuupput.“

Sanilit pitsaasut iliuuseqarusuttuupput

Sanilit saaffiginissaannut peqqusiileqilaarneq nalinginnaavoq. Allanut attaveqarnaveersaarneq imminullu mattunnissaq oqinnerusorinarsinnaavoq. Biibilimili allassimavoq „tunisineq pilluarnarneruvoq tigusinermit“. (Apustilit Suliaat 20:35) Sanilip pitsaasup sanilini ilisimasarilerniartarpai. Ilaanneeriarluni oqaloqatigilaarniartarlugit, immaqa inussiarnersumik qungujulaarlugit ilassilaarlugilluunniit, qanimut ikinngutigilerusunnerannik isumaqartariaqanngilaq.

Eqqaaneqareersutut sanilinut pitsaasumik attaveqarneq ineriartortikkusukkaanni „ikinngutitut ikioqatigiilaartarnissat“ pisariaqarput. Taamaattumik pitsaassaaq sanilinut inussiarnisaalaarnissamut periarfissarsiortarnissaq, taamaaliornerlu amerlanertigut ilassiornerulersitseqataasarpoq ataqqinninnerulersitseqataasarlunilu. Tamannami Biibilimi aamma kajumissaarutigineqarpoq: „Ajunngitsuut nigorsimatinniaqinagu atorfissaqartitsisumit, ikiuissallutit sapinngikkaangavit.“ — Ussatit 3:27; Jaaku 2:14-17.

Sanilit pitsaasut — inussiarnisaarfigiuminartut

Soorunami iluassagaluaqaaq kikkut tamarmik ikiorneqaraangamik tunineqaraangamilluunniit qujamasussasut nalunngikkaanni. Taamaattoqartuaannanngilarli. Amerlasuut misiginikuuaat ajunngitsumik isumaqarlutik tunisinertik ikiuiumanertilluunniit ima inussiarniitsigisumik ilassineqarmat, imminnut neriorsorput taamaalioqqinngisaannassallutik. Ilaanni imaassinnaavoq sanilit inussiarnisaarfigigaluarlugit sikiffigitilaaginnartut.

 Amerlanertigulli inussiarnisaarfigisaq inussiarniippasikkaluarluni inussiarniittanngilaq. Imaassinnaavoq inuttut nangaasuullunilu ittuutuujusoq taamaanninilu isertorniaraluarlugu inussiarniippasittoq. Silarsuarmili maani qujasuiffiusumi inussiarnisaarneq ima qaqutigoortigilersimavoq allaat inussiarnisaarnermut pissutiginiakkat immaqa pasilliutigineqartarlutik. Immaqa eqqissiallannartumik oqaaseqarneq iluaqutaassaaq. Ikinngutinnersumik attaveqalerniarneq sivisusinnaavoq taamaattuminguna naammagittartariaqartugut. Sanilit iliuuseqarusussusermik inussiarnisaarfigiuminarnermillu ilikkarsimasut ajunngitsumik eqqissisimasumillu attaveqalersitseqataapput.

Ulluni atugarliorfiusuni

Ingammik ajutoortoqartillugu sanilit pitsaasut iluaqutaasinnaanerat malugineqarnerusarpoq, atugarliorfiusunimi sanilit attaveqatigiilluarnerat misilinneqartarpoq. Taamaattoqartillugu sanilit namminissarsioratik iliuuseqartarnerannik assersuutissarpassuaqarpoq. Tupannartumik nalaataqaraangamik eqqarsaqqaaratik suleqatigiilertannguatsiarput sapinngisartillu tamaat ikioqatigiilertarlutik. Allaat inuit assigiinngilluinnartunik isiginnittaaseqaraluartut tapersersoqatigiikkajuttarput.

1999-imi Tyrkiami nuna sajorujussuarmat The New York Times-imi ilaatigut atuarneqarsinnaavoq sanilit akeqqersimaartuusaraluartut tapersersoqatigiillutik tullerminnut asannittarsimasut. Ilanngutassiortoq Anna Stergiou Athenimi aviisimi allappoq: „Ukiorpassuarni oqaluttuunneqartarpugut Tyrkiamiut uumissussagivut. Anniaateqangaarneralli nuannaarutissarsiffiginngilarput. Killitseqaagut, qiavugullu meeraaqqat toqungasut takugatsigik soorlulusooq ukiorpassuarni uumissuineq peeruttoq.“ Ikiuiniarneq pisortatigoortumik unitsinneqarmat, grækerit ikiuiniaqatigiit aniguisimasinnaasunik ujarlerunnaarumanngillat.

Ajunaarnersuup kingorna ikiuiniarnermi sanilinut inussiarnisaarneq ilumut ileqqorissaarluni iliuutsimik sapiitsuliornermillu taaneqarsinnaavoq. Ajunaartoqartinnaguli sanilip inuunera annaanniarlugu mianersoqqusineq sanilimut inussiarnisaarnermik ersersitsinerungaarnertut isigineqarsinnaanngila? Ajoraluartumik oqaluttuarisaanerup takutippaa inuit ajunaartoqalerneranik mianersoqqusisut tamatigut nuannarisaaneq ajortut, ajunaarnissaq nalliulluinnalersorinanngimmat. Mianersoqqusisut qassiitigut tatigineqaneq ajorput. Kinaluunniit inunnik qanoq navianartorsiortiginerminnik sianigisaqanngitsunik ikiuiniartoq nikallujuingaartariaqarlunilu imminut pilliutigeriaannaasariaqarpoq.

Tullermut iliuuserineqarsinnaasoq pitsaanerpaaq

Ungasippallaanngitsukkut inuiaat ajunaarnersuarmit ajornerungaartumit eqqorneqassapput. Guutip ajugaqanngitsup nuna pinerlunniartartuerukkumaarpaa, ajussuseerukkumaarlugulu tamakkualu kingunerisaannik ajornartorsiutaarutitillugu. (Saqqummersitat 16:16; 21:3, 4) Pisussap siulittuutigineqartup tamatuma angingaartup nalliunnissaa ilimanaannarnani qularnaalluinnarpoq. Jehovap Nalunaajaasuisa pisussami angingaartumi, silarsuup aalaterneqaatigisassaani qanoq annattoqarsinnaanera sapinngisamik amerlanerpaanut oqaluttuariniarlugu ulapputigaat. Taamaattumik oqaluussinertik,  nunarsuami tamarmi tusaamasaassutigisartik ilungersuutigaat. (Matthæusi 24:14) Piumassuseqarlutik taamaaliorput, Guutimut tullerminnullu asanninnerminnit kajumissisinneqarlutik.

Taamaattumik Jehovap Nalunaajaasui kasuttorpata allamiluunniit saaffigippatsit paqumisunnermit arrassimaarnermilluunniit tusarnaanngitsoorniaqinak. Saniliuniarsaripput pitsaasut. Soormi Biibilimik atuaqqissaaqatigiumallutit neqeroorutaat ilassigukku? Taava paasilissavat Guutip oqaasiani neriorsoqqisaarneqartugut, nuannersumik siunissaqartugut inuit eqqissillutik inooqatigiiffissaanni. Ungasinngitsukkut amerlanersatta qilanaarisaattut ammip qalipaataa upperisarsiornerilluunniit pillugit allaassutit ikinngutigiillualernissamut akornutaajunnaassapput. (wE 09/01 02)

[Qupp. 7-mi assiliartaq]

Sanilinut inussiarnisaarneq pitsaassaaq

[Suminngaanneernera]

Globusi: Mountain High Maps® Copyright © 1997 Digital Wisdom, Inc.