Tusakkatit sianigilluaqqissaarniakkit

„Taamaattumik uatsinnut tusarliunneqartut sianigilluaqqissaarniartariaqarpavut sarfaanneqartutut qimakkiartoqqunatigit.“ — HEBRÆERIT 2:1.

1. Allamut saasarneqarnerup ajunaarutaasinnaaneranik assersuummik taasaqarit.

USA-ginnarmi ukiut tamaasa inuit 37.000-t missaat biilinik ajunaarnerni toqusarput. Danmarkimi siorna 431-t angallannermi toqupput. Immikkut ilisimasallit oqartarput toqusut ikinnerussagaluartut biilertartut mianersornerusaraluarpata. Biilertut ilaasa allagartat ussassaarutit mobiltelefonikkulluunniit oqalunneq allamut saasaatigisarpaat. Aamma ilaat biilertillutik nerisarput imertarlutillu. Pissutsini taakkunani tamani allamut saasarneqarneq ajunaarutaasinnaavoq.

2, 3. Paulusip Hebræerit kristumiut qanoq kajumissaarpai, aamma sooq tamanna pisariaqarpa?

² Biilimik nassaarneq ukiunik 2000-ingajannik sioqqullugu apustili Paulusip uparuarpaa allamut saasaataasinnaasoq alla Hebræerinut kristumiunut ajunaarutaasinnaasoq. Paulusip erseqqissarpaa Jiisusi Kristusi toqusunit makittoq inngilinit qutsinnerusumi inissinneqarsimasoq, Guutimmi talerpiata tungaani ingissimavoq. Paulusi ima isummerpoq: „Taamaattumik uatsinnut tusarliunneqartut sianigilluaqqissaarniartariaqarpavut sarfaanneqartutut qimakkiartoqqunatigit.“ — Hebræerit 2:1.

³ Sooq Hebræerit kristumiut Jiisusi pillugu tusarliunneqartut ’sianigilluaqqissaartariaqarpaat’? Jiisusip nunarsuarmiinneraniit ukiut 30-ngajaat qaangiutereermata. Naalakkamik najuutinnginnerani juutit kristumiunngorsimasut upperisaq ilumoortoq qimakkiartulersimavaat. Juutiussuseq, guutisioriaaserisimasartik, allamut saasaatigaat.

Mianersornerusariaqarput

4. Sooq Hebræerit kristumiut juutiussutsimut uterusussimasinnaappat?

⁴ Sooq kristumiu juutiussutsimut uterusussimasinnaava? Pissutaasut ilagaat juutit Mosesip Inatsisaasa ataanni pallorfiginninnerata ersittunik ilaqarnera. Inuit palasit takusinnaavaat pilliutillu ikikkarneqartut tikki naamasinnaallugit. Arlalitsigut kristumiussuseq allaanerulluinnarpoq. Kristumiut Jiisusi Kristusi palasiuneraat, ukiunili 30-ni nunarsuarmi takuneqarsimanngilaq. (Hebræerit 4:14) Naalaffeqarput, ineqarfiali illernartoq tassaavoq qilak. (Hebræerit 9:24) Kristumiut kipineqarnerat ’uummatikkut kipineqarneruvoq, anersaakkut’, Mosesip inatsisaasa ataanni timikkut kipineqarnertut innani. (Romamiut 2:29) Taamaammat immaqa Hebræerinut kristumiunut kristumiussuseq piviusorpalaarunnaalersimavoq.

5. Pallorfiginninnermik aaqqissuussineq Jiisusip atulersitaa Inatsisit ataanni atortuusumik akimuisoq Paulusip qanoq takutippaa?

 ⁵ Juutit kristumiunngorsimasut pallorfiginnermik aaqqissuussinermut Jiisusip atulersitaanut tunngatillugu pingaaruteqartoq paasisariaqarpaat. Aaqqissuussinerup tamatuma upperneq takussaasunit tunngavigineruaa, Inatsisinilli pruffiiti Mosesi aqqutigalugu atulersitanit akimuilluni. Paulusi allappoq: „Savaasammi angutivissat ussigillu angutivissat aavannik ussiullu arnavissap arsaanik serpartarneqarnikkut inuit mingussimasut illernarsarneqarsinnaappata qallikkullu minguitsunngortitaallutik, taava Kristusip anersaakkut ittuinnartukkut pilliutitut innarluuteqanngitsutut imminut Guutimut sassaattup nalunngeqatiginnissuserput ajunnginnerungaartumik sulianit toqungasunit eqqiarsinnaassavaa nammineq aamminik piiarlugit taamalu Guutimut uumasumut kiffartorsinnaalersilluta.“ (Hebræerit 9:13, 14) Aap, Jiisusi Kristusip utertitsissutitut pilliutaanik uppernikkut isumakkeerfigineqarsinnaaneq, Mosesip inatsisai tunngavigalugit pilliinikkut isumakkeerfigineqarsinnaanermik akimuingaarpoq. — Hebræerit 7:26-28.

6, 7. (a) Pissutsit suut pissutigalugit juutit kristumiunngorsimasut ’tusarliunneqartunik sianiginnilluaqqissaartariaqarnerat’ pisariaqarluinnarpa? (b) Paulusi Hebræerinut allammat Jerusalemip aserugaanissaata tungaanut qanoq piffissaqartigiva? (Ataani ilanngussaq takuuk.)

⁶ Aamma allamik pissuteqarlutik juutit kristumiunngorsimasut Jiisusi pillugu tusakkaminnik eqqumaffiginnilluinnartariaqaraluarput. Jiisusip Jerusalemip aserugaanissaa ima siulittuutigisimavaa: „Ullut ilinnut nalliukkumaarput akeqqavit kaajallallutit ippiliugaliorfissaat ungusiffissaallu tamaniillu ilinnut iserniarfissaat. Piuneerutitissavaatsit qitornatit ilanngullugit ujaqqanillu qaleriissuerutillutit takusarneqarfigisat ilisimannginnakku.“ — Lukasi 19:43, 44.

⁷ Qaqugu taamaalissava? Ulloq sunaanersoq aamma nalunaaquttap-akunnerani qassinuunersoq Jiisusip oqaatiginngilaa, imali siunnersuilluni: „Takugussiuk Jerusalemi sakkutuunit unguneqarsimasoq, taava nalussanngilarsi piuneerussaaffissaa qanillisoq. Taava Judæamiittut qaqqanut qimaassapput; illoqarfimmiittut illoqarfik qimassavaat, nunaannarmiittullu illoqarfimmut isissanngillat.“ (Lukasi 21:20, 21) Jiisusip taamatut oqarneranit ukiuni 30-ni qaangiuttuni Jerusalemimi kristumiut ilaasa piffissap ilungersunartuunera eqqumaffigiunnaarsimavaat allamullu saasartissimallutik. Soorlulusooq aqqutissartik nakkutigiunnaarsimagaat. Eqqarsartaasertik allanngortinngikkunikku ajunaanngitsoorsinnaanngillat. Upperippassuk upperinngippassulluunniit Jerusalemi aserugaangajalerpoq! * Neriunaraluarpoq Jerusalemimi kristumiut anersaakkut aanngaasut ilaat Paulusip mianersoqqussutaanit eqeertinneqarsimassasut.

Tusakkatit ’sianigilluaqqissaarniakkit’

8. Sooq sallusuissut Guutip oqaasianeersoq ’sianigilluaqqissaarniartariaqarparput’?

⁸ Ukiuni hundredelinni siullerni kristumiutut sallusuissut Guutip oqaasianeersoq eqqumaffigilluinnartariaqarparput. Sooq? Uaguttaaq aseruinermik, inuiaat ataasiinnaanngitsut silarsuarmili aaqqissuussinerup tamarmiusup aserugaanissaanik, nalaataqangajaleratta. (Saqqummersitat 11:18; 16:14, 16) Soorunami ulloq suna nalunaaquttap-akunneralu qassinut Jehova akuliutissanersoq ilisimanngilarput. (Matthæusi 24:36) Biibilimili siulittuutit eqquuttut takusatta paasitilluarpaatigut „ullussani kingullerni“ inuusugut. (2 Timotheusi 3:1-5) Taamaattumik allamut saasaarisinnaasut tamaasa mianersorfigisariaqarpavut. Guutip oqaasia eqqumaffigisariaqarparput piffissallu ilungersunarnera sianigiuartariaqarlugu. Aatsaat taamaaliorutta ’pisussat suut tamaasa qimarratigisinnaavavut’. — Lukasi 21:36.

9, 10. (a) Anersaamut tunngasunik qanoq sianiginnilluartuusinnaavugut? (b) Guutip oqaasia qanoq ’naneruutaava isikkatsinnut qaammaqqutaallunilu aqqutitsinnut’?

 ⁹ Piffissami pingaarutilimmi matumani anersaamut tunngasut qanoq ’sianigilluaqqissaarniarsinnaavavut’? Ilaatigut kristumiut ataatsimiinneri ataatsimeersuarnerilu aalajangersimasumik najuuffigisarlugit. Aammattaaq eqiasuilluta Biibili atuaqqissaartariaqarparput atuakkiortua, Jehova, qanillisinnaajumallugu. (Jaaku 4:8) Taamaalilluta Jehovamik ilisarsinerugutta tussiaasiortutut, Guutimut ima oqartutut, misigissaagut: „Oqaatsitit naneruaraakka isikkannut, qaammaqqutigalugillu aqqutinni.“ — Tussiaat 119:105.

¹⁰ Biibilimi siunissaq pillugu Guutip siunertaa atuartarutsigu Biibili ’qaammaqqutigissavarput aqqutitsini’. Aamma ’naneruaraarput isikkatsinnut’. Allatut oqaatigalugu aqquterput qaammarsarsinnaavaa ingerlaqqissinnaatillutalu ajornartorsiuteqaraangatta misilinneqaraangattalu. Taamaattuminguna pingaaruteqaqisoq ilikkakkatta ’sianigilluaqqissaarniarnissaat’ iliniartitaaniarluta uppeqativut katerisimaaqatigigaangatsigit namminerlu Guutip oqaasia atuaraangatsigu. Ilinniakkatta silatusaartunik iluaqutaasunillu aalajangiisinnaatissavaatigut, taamatut Jehova nuannaartissavarput uummataalu tipaatsutsillugu. (Ussatit 27:11; Esaja 48:17) Ataatsimiinnerni namminerlu atuaqqissaarnitsinni Guutip anersaakkut tunissutai iluaqutigilluarnerpaaniarlugit qanoq allamut saaqqajaannginnerusinnaavugut?

Ataatsimiinnerni tusarnaaqqissaarnerusinnaaneq

11. Sooq kristumiut ataatsimiinneranni tusarnaaqqissaarnissaq unamminiarnarsinnaava?

¹¹ Kristumiut ataatsimiinneranni tusarnaaqqissaarnissaq ilaannikkut unamminiarnarsinnaavoq.  Allamut saasarneqariaannaavugut, immaqa meeraq qiavoq, inortuisorluunniit issiavissarsiorpoq. Aamma ulloq naallugu sulereerluta qasoqqaannarsinnaavugut. Immaqa saqqummiussisoq tiguartinnarnerpaajunngilaq, tassanngaannarlu allarluinnarmik eqqarsaateqalersinnaavugut, allaalluunniit uernalersinnaalluta. Saqqummiunneqartut pingaaruteqarnerat eqqarsaatigalugu pitsaassaaq ataatsimiinnerni tusarnaaqqissaarsinnaanerput pitsanngorsarutsigu. Qanorli ililluta?

12. Ataatsimiinnerni malinnaanissatsinnut suna iluaqutigisinnaavarput?

¹² Ataatsimiinnerni eqqumalluarnarnerusarpoq sammineqartussanik misissuereersimagaanni, soormi piareersarnissannut piffissamik immikkoortitsiguit? Sapaatip-akunneranut Biibilimik atuagassat agguaraanni atuarneq eqqarsaatiginninnerlu ullormut minutsialuinnaassapput. Pilersaarusiulaarnikkut ilagiit atuakkamik atuaqqissaaqatigiinnerannut Napasuliaq Alapernaarsuiffimmillu atuaqqissaaqatigiinnermut piareersarnissamut aamma piffissaqartoqarsinnaavoq. Pilersaaruterput qanorluunniit ikkaluarpat, una qularnaappoq: Piareersarsimagaangatta ataatsimiinnerni malinnaalluarnerusinnaasarpugut.

13. Ataatsimiinnerni saqqummiunneqartut immaqa qanoq tusarnaaqqissaarnerusinnaavavut?

¹³ Piareersarluarsimanerup saniatigut ilaasa naalagaaffilersaarfimmi issiavinnut saarlernut ingittarnertik ataatsimiinnerni tusarnaaqqissaarnissaminnut iluaqutigisimavaat. Aamma allamik eqqarsaateqarnaveersaarsinnaavugut oqalugiartoq isaasigut isigigutsigu, allassimaffinnik atuaasoqaraangat Biibilimi malinnaagutta allattuiguttalu. Aalajangersimasumilli periaaseqarnermit pingaaruteqarnerungaarpoq uummatikkut tusarnaarusussuseqarnissarput. Ataatsimiinnerit suna siunertarigaat paasissallugu pingaaruteqarpoq. Uppeqativut katerisimaaqatigisarpavut pingaarnerpaamik Jehova pallorfiginiarlugu. (Tussiaat 26:12; Lukasi 2:36, 37) Ataatsimiinnerit anersaakkut immersorneqarnitsinni pingaaruteqartut ilagaat. (Matthæusi 24:45-47) Ataatsimiinnernilu periarfissaqangaarpugut ’isumageqatigiinnissatsinnut asaqatigiinnermut ajunngitsuliornermullu kajumissaaqatigiinnissatsinnut’. — Hebræerit 10:24, 25.

14. Ataatsimmiinerup pitsaasuuneranut suna aalajangiisuiua?

¹⁴ Ilaasa ataatsimiinnerit pitsaassusiat nalileqqajaasarpaat qatanngutit qanoq ilinniartitsillaqqitsiginerat tunngavigalugu. Oqalugiartut oqallorissorsuuppata immaqa ataatsimiinneq nuannersutut nalilerneqassaaq. Ilinniartitsinerli pitsaavallaanngippat immaqa pikkunaagissavarput. Ilumoorpoq ilinniartitsisut sapinngisartik tamaat ilinniartitsilluarniartussaasut tusarnaartullu uummataannik killiiniartussaasut. (1 Timotheusi 4:16) Ingasaassillutali isornartorsiuissanngilagut. Saqqummiussisut ilinniartitsillaqqissuunissaat pingaaruteqaraluartoq ataatsimiinnerit pitsaassusiannut tamanna kisimi aalajangiisuunngilaq. Qanoq tusarnaarnerluta eqqarsaatiginerusariaqarparput oqalugiartup qanoq oqalugiarneraninngarnit. Ataatsimiinnernut najuukkaangatta saqqummiunneqartunullu tusarnaaqqissaaraangatta Guutip piumasaa naapertorlugu pallorfigisarparput. Tamannaana ataatsimiinnerup pitsaasuuneranut aalajangiisuusoq. Guuti pillugu ilisarserusungaarutta oqalugiartoq qanorluunniit piginnaaneqaraluarpat ataatsimiinnerit iluaqutigissavavut. (Ussatit 2:1-5) Taamaattumik aalajangiusimatigu ataatsimiinnerni tusakkatta ’sianigilluaqqissaarniarnissaat’.

Nammineq atuaqqissaartarnerit tamakkiisumik pissarsiffigiuk

15. Atuaqqissaarneq eqqarsaatiginneqqissaarnerlu qanoq iluaqutigisinnaavavut?

¹⁵ Guutip oqaasianik nammineq atuaqqissaartarnitta ’sianigilluaqqissaartarnera’ iluaqutigingaarparput. Biibilimi kristumiullu atuagassiaataanni atuakkavut eqqarsaatigeqqissaaraangatsigit sallusuissut Guutip oqaasianeersoq uummammiugilersinnaavarput. Eqqarsarnitsinnut iliuuseqarnitsinnullu sunniuteqangaassaaq, Jehovallu piumasaatut iliorusulersissavaatigut. (Tussiaat 1:2; 40:9) Taamaattumik atuaqqissaartarnerput pissarsiffigilluarniarlugu aallussilluarneruniarluta iliuuseqartariaqarpugut. Allamut saasarneqariaannaavugut. Akornusersortilaarnerup, soorlu telefonip sianernerata assigisaasaluunniit,  aallussiunnaartissinnaavaatigut. Immaqa aallaqqaataaniilli sivikitsuinnarmik aallussisinnaavugut. Immaqa siunertaqarluarluta anersaakkut neriniarluta atuaqqissaalerpugut, sivitsunngitsorli eqqarsaativut allarluinnarmiilerput. Nammineq atuaqqissaaraangatta Guutip oqaasia qanoq ’sianigilluaqqissaarniarsinnaavarput’?

16. (a) Sooq nammineq atuaqqissaartarnitsinnut pilersaaruteqarnissaq pingaaruteqarpa? (b) Guutip oqaasiata atuaqqissaarnissaanut qanoq piffissarsivit?

¹⁶ Pitsaassaaq qaqugukkut atuaqqissaarnissaq pilersaarusioraanni, atuaqqissaarnermilu avatangiiseqarluaraanni. Amerlanersavut piffissaqarpallaanngillat qaqutigullu kisimiittarlutik. Immaqa misigivugut ulluinnarni ulapinnermit kuussuarmi kaavittuliortumi sarfaatitittutut illuta. Sarfarli akiortariaqarparput qeqertannguamullusooq eqqissisimanartumut ingerlaniarsaraluta. Atuaqqissaarnissamut periarfissaqaleriataarnissap utaqqinissaa naammanngilaq. Atuaqqissaarneq piffissaqarfiginiarlugu iliuuseqartariaqarpugut. (Efesosimiut 5:15, 16) Ilaasa ullaakkut piffissaqarfigilaartarpaat eqqissisimanarnerusarmat. Allat unnukkut pitsaanerutippaat. Pingaarnerpaavoq Guuti erneralu pillugit eqqortumik ilisarsinissamik pisariaqartitatta inuunermut pingaarutillit sumiginnannginnissaat. (Johannesi 17:3) Taamaattumik nammineq atuaqqissaartarnerput pilersaarusiortigu aalajangiusimallugulu.

17. Eqqarsaatiginneqqissaarneq qanoq isumaqarpa, qanorlu iluaqutigisinnaavarput?

¹⁷ Atuaqqissaarnikkut ilikkakkanik eqqarsaatiginneqqissaarneq nalissaqanngilluinnarpoq. Tamanna Guutip eqqarsaataasa uummammiugilernissaannut iluaqutigisinnaavarput. Aammattaaq paasissavarput Biibilimi siunnersuutit qanoq atorsinnaanerlugit ’oqaatsimik tusaaginnarnata maleruaasunngorluta’. (Jaaku 1:22-25) Aamma Jehovamut qaninnerulissaagut pissusii atuaqqissaakkatsinnilu qanoq ersersinneqarnersut eqqarsaatigeqqissaaraangatigik.

18. Ilikkakkatsinnik eqqarsaatiginneqqissaassagutta suna pisariaqarpa?

¹⁸ Piffissaq atuaqqissaarnermut eqqarsaatiginninnermullu atugarput tamakkiisumik iluaqutiginiarlugu allamut saasartinnaveersaartariaqarpugut. Eqqarsaatiginneqqissaaraangatta ulluinnarni allamut saasaarisut soqutiginaveersaartariaqarpavut paasissutissat nutaat isummatsinniitilersinnaajumallugit. Taamaaliussagaanni piffissartornarlunilu kisimiittariaqarpoq. Imminulli akilersinnaavoq anersaakkummi nerineq sallusuissutsillu ernganik Guutip oqaasianeersumik imerneq inuummarissinartuuvoq.

19. (a) Ilaasa aallussilluarsinnaanerulernissaminnut suna iluaqutigisimavaat? (b) Atuaqqissaarneq pillugu qanoq isiginnittaaseqartariaqarpugut, atuaqqissaarnerlu qanoq iluaqutigisinnaavarput?

¹⁹ Allarluinnarnik eqqarsaateqalertinnani sivikitsuinnarmik atuaqqissaarsinnaagaanni qanoq iliortoqassava? Ilaat aallussilluarsinnaalersimapput aallaqqaammut sivikitsumik atuaqqissaartarlutik atuaqqissaartarnertillu sivitsortikkiartuaarlugu. Anguniagarisariaqarparput atuaqqissaarnerup naammattumik piffissaqarfiginissaa tuaviuutipilunnginnissaalu. Sammineqartunik soqutiginnilluarnissarput ineriartortittariaqarparput. Paasissutissanillu amerlanerusunik ujarlersinnaavugut atuagassiarpassuarni kiffaqatigiit ilumoortut silatuullu pilersitaanni. ’Guutip itissusiinut’ itsuartorneq naleqangaarpoq. (1 Korinthimiut 2:10) Taamaaliorutta Guuti pillugu ilisarsinerussaagut paasinnissinnaanerpullu sungiusassallugu. (Hebræerit 5:14) Guutip oqaasia eqiasuilluta atuaqqissaartarutsigu aamma ’allanik ajoqersuisinnaalissaagut’. — 2 Timotheusi 2:2.

20. Qanoq Jehova Guutimut qanimut attaveqalersinnaavugut attaveqartuarlutalu?

 ²⁰ Kristumiut ataatsimiinnerinut najuuttarnitta namminerlu atuaqqissaartarnitta Jehovamut qanimut attaveqalersissavaatigut attaveqartuartillutalu. Erseqqippoq tussiaasiortup, Guutimut ima oqartup, taamaannera: „Ilami inatsisitit nuannareqaakka, eqqarsaatinniipput ulloq tamaat.“ (Tussiaat 119:97) Taamaattumik aalajangersimasumik ataatsimiinnerit ataatsimeersuarnerillu najuuffigisartigit. Aamma Biibilimik atuaqqissaartarneq atuakkattalu eqqarsaatiginissaat piffissaqarfigisartigik. Taamaalilluta Guutip oqaasia ’sianigilluaqqissaarniarutsigu’ akissarsisinneqangaassaagut.

[Quppernerup ataani ilanngussaq]

Eqqaamavigit?

• Sooq juutit kristumiunngorsimasut ilaat upperisamit ilumoortumit qimagukkiartulerpat?

• Kristumiut ataatsimiinneranni qanoq ililluta tusarnaaqqissaartuarsinnaavugut?

• Biibilimik atuaqqissaarnerput ilikkakkatsinnillu eqqarsaatiginneqqissaarput qanoq iluaqutigissavavut?

[Atuaqqissaarnermi apeqqutit]

[Qupp. 21-mi assiliartaq]

Angajoqqaat qitornatik ikiorsinnaavaat kristumiut ataatsimiinnerannik iluaqutiginnilernissaannut