„Diaavulu akerartorsiuk“

„Diaavulu akerartorsiuk, taava ilissinnit qimaassaaq.“ — JAAKU 4:7.

1. Ullumikkut silarsuaq qanoq oqaatigineqarsinnaava, aamma sooq tanitat suleqataallu eqqumasariaqarpat?

„GUUTI tammarpoq, Diaavululi suli tamassa.“ Atuakkiortup franskiusup André Malrauxip oqaasii taakku silarsuarmut inuuffigisatsinnut atorneqarluarsinnaapput. Inuit suliaanni Guutip piumasaa pinnani Diaavulup peqqusersusaarneri takuneqarsinnaanerugunarput. Saatanip inuit tammartittarpai ’pissaanersuaqarluni salluliuutaasunik nalunaaqutiliaqarluni tupinnartuliaqarlunilu iluaatsuliorluni tammartunik peqquserluffiginninnermigut’. (2 Thessalonikamiut 2:9, 10) ’Ullussanili kingullerni’ makkunani Saatanip pingaartumik Guutip kiffai tunniulluinnarsimasut ilungersorfigai. Kristumiut tanitat, „Guutip inassutaanik Jiisusillu nalunaajaataanik aalajangiussisut“, sorsuffigai. (2 Timotheusi 3:1; Saqqummersitat 12:9, 17) Taamaattumik Guutimut kiffaasut tanitat taakku suleqataallu nunami inuunissamik neriugisallit eqqumasariaqarput.

2. Saatanip Eva qanoq nakutippaa, apustili Paulusillu suna annilaangassutiginerarpaa?

² Saatani peqqusersusaallaqqilluinnartuuvoq. Pulateriaarsuusaarluni Eva salloqittarpaa isumaqalersillugu Guutimut attaveqarani pilluarnerulersinnaasoq. (1 Mosesi 3:1-6) Ukiut 4000-t missaat tamatuma kingorna apustili Paulusip Korinthimi kristumiut tanitat Saatanimit peqqusersusaarfigitinnissaat annilaangassutiginerarpaa, ima allalluni: „Annilaanngatigaara eqqarsaatisi Evap pulateriaarsummit peqqusersusaartumit nakutitaaneratut tammartitaassasut Kristusimut peqqusersuikkunnaarnissassinnik minguitsuujunnaarnissassinnillu kinguneqartussamik.“ (2 Korinthimiut 11:3) Saatanip inuit isumaat ajortunngortittarpai eqqarsartaasiallu mumingalersittarlugit. Evamik nakutitsinermisulli kristumiut eqqunngitsumik tunngavilersuuteqalersissinnaavai isumaqalersillugit Jehovap erneratalu iluarinngisaat pilluarnissaannut aalajangiisuusut.

3. Jehova Diaavulumut sernissorniarluta sumik neqerooruteqarpa?

³ Saatani timmiarniartumut sianigisaqanngitsunik nigarniaasumut assersuunneqarsinnaavoq. Saatanimit nigarneqarumanata oqqiffissarsiortariaqarpugut „Qutsinnerussaartup toqqorsimaffiani“, sumiiffimmi assersuutaasumi Jehovap silarsuarmi kisimi oqartussaaneranik akuersillutik suliamikkut takutitsisunik Jehovap sernissuiffiani. (Tussiaat 91:1-3) Guutip oqaatsini, anersaani peqatigiissortanilu aqqutigalugit sernissuinera tamaat pisariaqartipparput, ’atasinnaaqqulluta Diaavulup qoqassiniaraangatigut’. (Efesosimiut 6:11) Grækerit oqaasiat uani ’qoqassiiniarnermik’ nutserneqarsimasoq aamma ’peqqusersusaarnermik’ nutserneqarsinnaavoq. Qularutissaanngilaq Diaavulu qoqassiniuterpassuaqartartoq Jehovap kiffaanik pisarinninniarnermini.

Saatanip kristumiunut siullernut nigai

4. Kristumiut siulliit nalaanni pissutsit qanoq ittuuppat?

⁴ Ukiuni hundredelinni siullerni aappaanilu kristumiut Romamiut naalagaaffissuata pissaaneqaleruttorfiani inuupput. Pax Romana-p (Romamiut eqqissisitsisimanerata) niuerneq ingerlallualersippaa. Tamatuma kingunerisaanik pisuujuneq innuttaaqatigiinni nuimanerusunut sulinngiffeqangaartitsivoq, piitsullu akornanni pikitsitsisoqaleqqunagu piitsut aliikkutassaqartinneqangaarput. Piffissat ilaanni nalliuttorsuit ullunit suliffiusunit amerlanerusarput. Innuttaasut naalagaaffimmit ’nerisassaqartinneqarput aliikkutassaqartinneqarlutillu’ qaarsilaarniassammata sukisaarsaateqarniassammatalu.

5, 6. (a) Sooq Romamiut isiginnaartitsiviini kristumiut najuunnissaat naleqqutinngila? (b) Saatanip suna peqqusersusaarutigaa, kristumiullu tamatumannga nigartinnissartik qanoq pinaveersaartissinnaavaat?

⁵ Pissutsit taamaannerat kristumiunut siullernut navianartorsiortitsiva? Atuakkiortut, apustilit  kinguninngua inuusut, soorlu Tertullianip, mianersoqqussutaat naapertussagutsigik taamani sunngiffimmi sammisartakkat amerlanerit kristumiunut ilumoortunut anersaakkut ileqqussatigullu navianangaarput. Navianartut ilaat tassaavoq nalliuttorsuit amerlanersaat guutimik nalusut guutiinut ataqqinaataatinneqarnerat. (2 Korinthimiut 6:14-18) Isiginnaartitsisarfinni allaat isiginnaartitsissutit qatsussassaanngitsut (klassiskiusut) ileqqorluttuliortortaqangaarput imaluunniit nakuusernertaqangaarlutik aammillu kuisinertaqangaarlutik. Piffissap ingerlanerani isiginnaartitsissutit qatsussassaanngitsut (klassiskiusut) soqutigineerupput, pantomimenillu kanngunartunik taarserneqarlutik. Jérôme Carcopino atuakkiamini Dagligt liv i antikkens Rom-imi ima allappoq: „[Pantomimeni] taakkunani isiginnaartitsisartut arnat tamataajartarneq sungiussimavaat . . . Aak kuuinnavippoq. . . . [Pantomimet] ajortunngorluinnarsimapput, Romami inuppassuarnik tiguaasut. Maajuginngilluinnarpaat, ukiunimi amerlavallaartuni isiginnaartitsivinni toqutsisarnerit amiilaarnartut misikkarlersunngortitsisimapput inunnguuseralugulu misigissusiinik mumingalersitsisimallutik.“ — Matthæusi 5:27, 28.

⁶ Isiginnaartitsivissuarni akiuuttartut inuunertik akigeriaannaallugu imminut uumasunulluunniit nujuartanut akiuuttarput, akerartik toqunngikkunikku nammineq toqutaasarlutik. Pinerluttut toqumut pillagaasut kingusinnerusukkullu aamma kristumiorpassuit uumasunut qaasuttunut iginneqartarput. Allaat taama siusitsigisukkut Saatanip peqqusersusaarluni inuit inuunerlunnermut nakuusernermullu akerliuallaarunnaarsittarpai taamaaliortarnerit nalinginnaasumik akuersaarneqaleriartuaartillugit; allaat inuit piumasaraat aliikkusersuinerit taamaattortaqassasut. Romamiut isiginnaartitsiviinit isiginnaartitsivissuinillu nigorsimaneq tamatumannga nigartinnissamik pinaveersaartitsisinnaasutuaavoq. — 1 Korinthimiut 15:32, 33.

7, 8. (a) Qamutit hestinik qimuttullit sukkaniuttarnerat kristumiup najuuffigiguniuk sooq silatusaassanngila? (b) Saatanip Romamiut uffariartarfii atorlugit kristumiut qanoq pisariniarsarisimasinnaavai?

⁷ Isiginnaartitsisarferujussuarni tumaasani takisuuni, cirkusinik taaneqartartuni, qamutit hestinik qimuttullit sukkaniuttarput, qularnanngitsumik pissanganavissumik. Sukkaniunnerilli taamaattut kristumiunut najuuffissaanngillat, isiginnaartummi nakuuserajuttarput. Ukiuni 200-kkunni atuakkiortoq oqaluttuarpoq isiginnaartut akornanni paasoqartartoq, Jérôme Carcopinolu oqarpoq cirkusimi issiaviit sukaasa ataa „ullorissat najoqqutaralugit siulittuiniartartut atortittartullu najugannaarigaat“. Erseqqippoq Romamiut cirkusii kristumiunut najuuffissaanngitsuusut. — 1 Korinthimiut 6:9, 10.

⁸ Romamiummi uffariartarfii tusaamasaasut? Soorunami eqqiluitsuuniarluni uffarneq ajortuunngilaq. Romamiulli uffariartarfippassui immikkoortortarpassuaqarput tagiartuisarfeqarlutik, timersortarfeqarlutik, eqquiniaasarfeqarlutik neriniartarfeqarlutillu imerniartarfeqartut. Arnat angutillu uffarnissaat immikkut piffissaligaagaluartut, ataatsikkut uffarnissaat akuerineqarajuppoq. Clemens Alexandriameersoq allappoq: „Uffariartarfinni  angutit arnallu ataatsikkut uffarsinnaapput; tassani tamataajartarput noqissinnaassuseqaratillu inuulluataartarlutik.“ Tassa tamanit orninneqarsinnaasut inerteqqutaanngitsut Saatanimit nigatut atorneqariaannaapput. Ilisimassuseqartut sumiiffiit taamaattut nigorsimasarpaat.

9. Kristumiut siulliit niganit qanoq ittunit pisaritinnaveersaartariaqarpat?

⁹ Romamiut naalagaaffissuata pissaaneqarnerpaaffiata nalaani aningaasanoorneq sukisaarsaatit nuannarineqartut ilagisimavaat. Kristumiut siulliit sukkaniuttarfinni aningaasanoornerit ingalassimasinnaavaat cirkusit nigorsimanerisigut. Imerniartarfiit ilua-tungaanni annikinnerusumik aamma aningaasanoortoqartarpoq, naak inerteqqutaagaluartoq. Ujaraaqqat saanimerngilluunniit, aappaata itummamini isertugai, „lige eller ulige“-rluni aningaasanoorutigineqartarput. Ajornanngitsumik aningaasarsinissamik neriulersitsisarami, aningaasanoorneq inuunermik pissanganarnerulersitsisarpoq. (Efesosimiut 5:5) Aammattaaq sumiiffinni taamaattuni arnat saqisut atortittartuugajupput, kinguaassiuutitigut inuunerlutsitseriaannanerulersitsisut. Ilaatigut taamaattunik nigaqarluni Saatanip kristumiut Romamiut naalagaaffissuata illoqarfiini najugaqartut pisariniartarpai. Ullumikkut pissutsit allaaneruppat?

Ullumikkut Saatanip nigai

10. Ullumikkut pissutsit Romamiut naalagaaffissuani pissutsinut qanoq eqqaanarpat?

¹⁰ Ukiut hundredellit ingerlanerini Saatanip peqqusersusaartarneri pingaarnertigut allanngorsimanngillat. Kristumiut illoqarfimmi ajortunngorsimasumi Korinthimi inuusut ’Saatanimit nakutinneqaqqunagit’ apustili Paulusip ilungersortumik siunnersorpai. Ima allappoq: „Nalunngilarput taanna qanoq ittumik pilersaaruteqartoq.“ (2 Korinthimiut 2:11) Nunani siuarsimanerusuni amerlasuuni ullumikkut pissutsit Romamiut naalagaaffissuata pissaaneqarnerpaaffiata nalaani pissutsinut eqqaanarput. Inuit aatsaat taama sulinngiffeqartigilerput. ’Klasselotterit’ allaat inuit piitsut neriuutissilaartarpaat. Aliikkutassiarpassuit akikitsut inunnik ulapisitsipput. Timersortarfissuit ulikkaartarput, inuit aningaasanoortarput, isiginnaartut timersortullu nakuuserajuttarput. Nipilersuutit aserorsaataasut tusarsaajuaannarput, isiginnaartitsisarfinnilu, filmini tv-milu kanngunartunik isiginnaagassiaqartarpoq. Nunat ilaanni tamataqarani sissami nalunnguarneq nuannarineqarpoq, sumiiffinnilu allani angutit arnallu ataatsikkut saunartarput uunartuniluunniit tamataqaratik uffarlutik. Kristumiuussutsip ukiuni hundredelinni siullernisorluinnaq Saatanip Guutip kiffai sukisaarsaatit silarsuarmi nalinginnaasut atorlugit pisariniartarpai.

11. Qasuersaarusunnermut atatillugu suut nigartiffiusinnaappat?

¹¹ Silarsuarmi uippakajaarfioqisumi qasuersaarnissamik avinngarunnissamilluunniit pisariaqartitsineq nalinginnaavoq. Romamiulli uffariartarfiini kristumiunut siullernut navianartoqarsinnaaneratut, ullumikkut feriartarfiit nuannaarniartarfiillu ilaanni sammineqarsinnaasut Saatanip kristumiunik inuunerlutsitsiniarnermini imerpallaartitsiniarnerminiluunniit atortarsimavai. Paulusi Korinthimi kristumiunut ima allappoq: „Tammarnaveeritsi! Ikinngutipalaaqarneq  ileqqorikkaluartunut aseruutissiisarpoq. Pimoorullugu silattorniaritsi ajortuliorunnaarlusilu! Inoqarpoq Guutimik soqutigisaqanngilluinnartunik.“ — 1 Korinthimiut 15:33, 34.

12. Ullumikkut Saatanip Jehovap kiffaanut nigarniutigisartagaanik taasaqarit.

¹² Soorlu takoreeripput Saatanip Eva peqqusersusaarfigalugu eqqarsartaasia ajortunngortippaa. (2 Korinthimiut 11:3) Ullumikkut Diaavulup nigaasa ilaat tassaavoq kristumiunik ima isumaqalersitsiniarneq: Jehovap Nalunaajaasui inuttulli allatut ittuunerannik sapinngisaq tamaat takutitsigaanni, sallusuissumut kajungilersitsisoqarsinnaavoq. Ilaannikkut ingasaassivallaartoqartarpoq akerlerluinnaanik kingunilimmik. (Haggaji 2:12-14) Saatanip peqqusersusaarutigisartagaa alla tassaavoq kristumiunik tunniulluinnarsimasunik, inuusuttunik inersimasunillu, marloqiusamik inooriaaseqarnissamut ’Guutillu Anersaavanik illernartumik aliasutsitsinissamut’ sapiillisitsineq. (Efesosimiut 4:30) Inuit ilaat taama pisaritittarsimapput interneti atornerlukkamikku.

13. Diaavulup suna peqqusersusaarutigisarpaa, tamatumunngalu tunngatillugu Ussatit-ni siunnersuut suna naleqquppa?

¹³ Malunnaarsaartumik anersaarsiorneq Saatanip nigarniutaasa ilagaat. Kristumiu ilumoortoq kinaluunniit piaaraluni Saatanisiornermik anersaarsiornermilluunniit sammisaqarnavianngilaq. Ilaalli sianiginagu mianersunnginnerulersimapput filminut, tv-mi isiginnaagassianut, videospilinut, aap, allaat meeqqanut atuakkanut titartakkanullu, nakuusernertalinnut anersaarsiornertalinnullu tunngatillugu. Anersaarsiornermulli tunngasinnaasut tamaasa nigorsimasariaqarpavut. Ima ussateqarpoq: „Peqquserluttup ingerlavianiipput kapinartut nigaarniutillu, inuunerminik pigisaqaannarumasup taakku nigorsimasassarai.“ (Ussatit 22:5) Saatani ’pissutsit aaqqissuussaanerannut matumunnga guutiugami’ silarsuarmi nuannarineqartut malunnaarsaarutigigajuttassavai. — 2 Korinthimiut 4:4, NV; 1 Johannesi 2:15, 16.

Jiisusip Diaavulu akiorpaa

14. Diaavulup ussiinera siulleq Jiisusip qanoq akiorpaa?

¹⁴ Jiisusi Diaavulumik akiuinermigut qimaatitsinermigullu maligassaalluarpoq. Jiisusi kuisereerluni ulluni 40-ni iisinnginniareersoq Diaavulumit usserneqarpoq. (Matthæusi 4:1-11) Ussiinermini siullermi Saatanip Jiisusip iisinnginniareerluni pissusissamisoortumik kaannera atornerloriarpaa. Jiisusi kajumissaarpaa siullermik tupinnartuliornermini timikkut pisariaqartitaminik  matussuseeqqullugu. Mosesimik allakkat tallimaat 8:3 issuarlugu Jiisusip piginnaanini namminissarsiornermut atorumanngilai. Anersaakkut nerisassat timikkut nerisassanit pingaartinneruai.

15. (a) Jiisusip pisariaqartitaa pissusissamisoortoq suna Saatanip atornerluppaa? (b) Saatanip Guutip kiffai ullumikkut qanoq qoqassiniartarpai, qanorlu akiorsinnaavarput?

¹⁵ Ussiinermut tamatumunnga atatillugu soqutiginarpoq Diaavulup Jiisusi kinguaassiuutitigut ajortuliortinnianngimmagu. Kaanneq pissusissamisoortumik nererusutsitsisoq piffissami tassani Jiisusip timimigut pisariaqartinnerpaagunarpaa Saatanip ussiiniutigisinnaasaa. Diaavulup Guutip innuttaanut ullumikkut suut ussiiniutigisarpai? Amerlaqaat assigiinngitsuullutillu, Jehovalli innuttaanik assuarnaatsuujunnaarsitsiniarluni Saatanip peqqusersusaarutiginerpaasartagaasa ilagaat kinguaassiuutitigut ussernartorsiortitsineq. Jiisusip ilaarneratigut Diaavulu akiorsinnaavarput ussiataarinerilu itigartillugit. Jiisusip Saatanimit usserneqaraangami allassimaffinnik naleqquttunik eqqaasaqarluni akiuineratut inuunerlunnissamut ussernartorsioraangatta Korinthimiunut allakkat siulliit 6:18-imi aamma Mosesimik allakkat siulliit 39:9-mi oqaatsit eqqaasarsinnaavavut.

16. (a) Saatanip Jiisusi aappassaanik qanoq usserpaa? (b) Saatanip qanoq ussersinnaavaatigut Jehovamik misileeqqulluta?

¹⁶ Aappassaanik kajumissaarlugu Diaavulup Jiisusi naalaffiup qammarsuanit pisseqquaa Guutip inngilini atorlugit sernissuisinnaanera misileqqullugu. Jiisusip Mosesimik allakkat tallimaat 6:16 issuarlugu Ataatani misilikkumanngilaa. Saatanip naalaffimmit portusuumit pisseqqulluta kajumissaanngikkaluarluta Jehova misileqqullugu ussernartorsiortissinnaavaatigut. Atisat eqqiluisaarnerullu tungaatigut silarsuarmi mutiusut oqaaqqissaarneqarata qanoq ilaarsinnaatiginerlutigik ussernartorsiorfigisarparput? Aliikkutassialluunniit nalorninartut kajungeraavut? Taamaakkutta imaassinnaavoq Jehova misilikkipput. Taamaaqqajaagutta Saatanip nigornavianngilaatigut, qaninniassavaatigulli imminullu tapersersuisunngortinniartuarluta.

17. (a) Diaavulup Jiisusi pingajussaanik qanoq usserpaa? (b) Jaaku 4:7-imi oqaatsit ilumoorneri qanoq misigisinnaavavut?

¹⁷ Saatanip ataasiaannarluni pallorfigippani silarsuarmi tamarmi naalagaaffinnik tuniumallugu Jiisusi neqeroorfigimmagu, Jiisusip Guutip oqaasia issuarlugu akiorpaa Ataatamilu pallorfigineqarnera minguitsoq illersorlugu. (5 Mosesi 5:9; 6:13; 10:20) Saatanip silarsuarmi naalagaaffiit uagutsinnut neqeroorutiginaviarunanngilai, pigisatigulli alutornassuseq kusanassuserlu ussiiniutigiuarpai immaqalu allaat ’kunngeqarfeerannguaqalernissarput’ pilerisaarutigalugu. Jiisusitut qisuariartarpugut Jehovalu tunniusimalluinnarfigalugu? Taamaaliorutta Jiisusimut pisoqarneratut pissaagut. Matthæusi ima oqaluttuarpoq: „Taava Diaavulup Jiisusi qimappaa.“ (Matthæusi 4:11) Saatani akiorniarlugu aalajangiusimalluinnarutsigu Biibilimi najoqqutassiat naleqquttut eqqaamanerisigut inuunitsinnilu atornerisigut qimassavaatigut. Ajoqersugaq Jaaku ima allappoq: „Diaavulu akerartorsiuk, taava ilissinnit qimaassaaq.“ (Jaaku 4:7) Qatanngut angut kristumiu Jehovap Nalunaajaasuisa Frankrigimi immikkoortortaqarfiannut ima allappoq: „Saatani peqqusersusaallaqqeqaaq. Ajunnginnerpaaq siunertarigaluarlugu misigissutsikka kissaatikkalu aqukkuminaatseqaakka. Aalajangerluinnarsimallungali nikallujuillungalu, pingaarnerpaamillu Jehovamik ikiorneqarlunga, assuarnaattuarpunga sallusuissullu aalajangiusimallugu.“

Diaavulup akiornissaanut piginnaanngorsagaalluarneq

18. Anersaakkut sakkutuussutit suut Diaavulumik akiuisinnaatippaatigut?

¹⁸ Jehovap anersaakkut sakkutuussutinik tamarmiusunik  tunisimavaatigut ’atasinnaaqqulluta Diaavulup qoqassiniaraangatigut’. (Efesosimiut 6:11-18) Sallusuissummut asanninnerput qiterutitut issaaq, kristumiutullu kiffartorsinnaatissavaatigut. Jehovap najoqqutassiaanik naapertuilluartunik aalajangiusimanninniarluta aalajangerluinnarsimanerput saattuaasatut uummaterput sernissussavaa. Nutaarsiassaq nuannersoq kamippattut ingerlassisussatut atigutsigu aalajangersimasumik oqaluusseqataasassaagut, tamatumalu anersaakkut nakussatsissavaatigut sernigalutalu. Upperluarnitta eqqornaveeqqutitut illersussavaatigut ’Ajortup qarsuinut ikumasunut’, qoqassiiniarnerinut ussiiniarnerinullu. Jehovap neriorsuutiminik naammassinninnissaanik tatiginnilluinnarnerput niaqorornaveeqqutitut issaaq eqqarsarsinnaanitsinnik illersuisoq isumatsinnillu eqqissisitsisoq. (Filippimiut 4:7) Guutip oqaasianik atuillaqqissigutta panatut atorsinnaassassavarput inuit Saatanimit anersaakkut parnaarussaasut aniguisinniaraangatsigik. Aamma illersuutitut atorsinnaavarput, Jiisusip usserneqarami iliorneratut.

19. ’Diaavulup akerartornerata’ saniatigut suna pisariaqarpa?

¹⁹ „Guutip sakkutuussutai tamarmiusut“ atorutsigit qinujuaruttalu, tatigisinnaavarput Jehovap Saatanip saassussineranut illersussagaatigut. (Johannesi 17:15; 1 Korinthimiut 10:13) Jaakulli uparuarpaa ’Diaavulup akerartornissaa’ naammanngitsoq. Pingaarnerpaamik Guutimut, uagutsinnut isumassuisumut, ’naalatsigitittariaqarpugut’. (Jaaku 4:7, 8) Qanoq taamaaliorsinnaasugut allaaserisami tullermi sammineqarpoq.

Qanoq akissavit?

• Kristumiut siulliit Saatanip qanoq pisariniarpai?

• Jehovap kiffai pisariniarlugit Saatanip ullumikkut suut qoqassiiniutigisarpai?

• Jiisusip Diaavulup ussiineri qanoq akiorpai?

• Anersaakkut sakkutuussutit suut Diaavulumik akiuisinnaatippaatigut?

[Atuaqqissaarnermi apeqqutit]

[Qupp. 23-mi assiliartaq]

Jiisusip Diaavulu akiorpaa

[Qupp. 24-mi assiliartaq]

Kristumiut ukiuni hundredelinni siullerni aliikkutassiat nakuusernertallit kanngunartortallillu ingalassimavaat

[Suminngaanneernera]

The Complete Encyclopedia of Illustration/J. G. Heck