Guuti pillugu ilisimasaqarluarneq tuppallersaataavoq

INUIT ilaasa Guutip asanninnera naakkinninneralu pillugit Biibilimi allassimasoq paasiuminaatsittarpaat. Ima aperisarput: Ajortoq Guutip soraarsinniarpagu, qanoq iliussalluni nalunngikkuniuk, taamaaliornissaminullu pissaaneqaruni, soormiuna ajussuseq ingasatsikkaluttuinnartoq? Taakkununnga tulleriit ataani taaneqartut imminnut naleqqunnissaat ajornartorsiutaavoq: (1) Guuti ajugaqanngitsuuvoq, (2) Guuti asannittuuvoq ajunngitsuullunilu, kisiannili (3) ajortunik pisoqartuaannarluni. Kingulleq taaneqartoq assortorneqarsinnaanngimmat isummertarput marlunni allani minnerpaamik ataaseq ilumoorsinnaanngitsoq. Isumaqarput Guutip ajussuseq soraarsissinnaanngikkaa imaluunniit soqutiginngilluinnaraa.

New Yorkimi World Trade Centerip pinerliivigineqarneranit ullualuit qaangiummata USA-mi upperisarsiornermi siuttoq nuimasoq ima oqarpoq: „Hundredeleriarlunga aperineqarpunga sooq Guutip ajunaarnerit naalliuutillu atuutitinnerai. Uangalu nassuerutigissavara akissutaa nammineq ilisimalluinnannginnakku; uannulluunniit akissut naammaginarsinnaasoq naluara.“

Oqaatsit taakku oqaaseqarfigalugit upperisarsiornermi professori allappoq palasip „upperisarsiornermut tunngasumik nassuiaalluarnera“ tupigusuutigalugu. Aamma ilisimatuup allap oqaasiinut ukununnga isumaqataavoq: „Naalliuutit paasissaannginnerata Guutip paasissaannginnera ilagaat.“ Ilumulli paasiuminaalluinnartuua sooq Guutip ajortut atuutitinnerai?

Ajortumut aallaaviusoq

Upperisarsiornermi siuttut oqarnerisa akerliannik, Biibilimi paasiuminaatsutut allaatigineqanngilaq sooq Guutip ajortut atuutitinnerai. Sooq ajortoqarnera paasiumallugu paaseqqaartariaqarpoq Jehova ajortoqartillugu silarsuarmik pinngortitsinngimmat. Inuit siulliit naammalluinnartutut ajorteqanngitsutullu pinngortippai. Jehovap pinngortitani tamaasa isiginnaaramigit ’takuai ajunngingaartut’. (1 Mosesi 1:26, 31) Siunertaraa Adamip Evallu paratiisi Edenimiittoq nunarsuaq tamakkerlugu alliartortissagaat inunnik nuannaartunik asannittumik naalakkersuineranit illersorneqartunik ineqarfigineqartussanngorlugu. — Esaja 45:18.

Ajortoq aallartippoq anersaaq, aallaqqaammut Guutimut ilumoorfiginnilluinnaraluartoq, pallorfigineqalernissaminik kissaateqaleriartuaarmat. (Jaaku 1:14, 15) Pikitsitsinera nunami erserpoq Guuti akerlilersorumallugu inuit aappariit siulliit tapersersoqqulluni sunneramigit. Orpiup ajunngitsumik ajortumillu ilisimalersitsisup paarnaanik nereqqusinnginnermik attoqqusinnginnermillu Guutip siunnersuutaa ersarissoq naalannagu Adamip Evallu neriffigaat. (1 Mosesi 3:1-6) Taamaalillutik naalanngiinnanngillat, aammali takutippaat Guutimik aqunneqarnissartik kissaatiginngikkaat.

Ileqqussatigut apeqqutaalersinneqartoq

Edenimi pikitsitsineq qilammut nunarsuarmullu pingaarutilimmik ileqqussatigut  akerleriissuteqalersitsivoq. Jehovap pinngortitaminut naalakkersuinini eqqortumik ajunngitsumillu atorneraa inuit pikitsitsinerata apeqqutaalersippaa. Pinngortitsisoq inunnit naalanneqarluinnarnissaminik piumasaqarnissaminut pisussaava? Inuit namminiiginnarpata pitsaanerussava?

Jehovap naalagaassusianut pikitsitsisoqarneranut qisuariarnerata takutippaa asanninnera, naapertuilluarnera, ilisimassusia pissaaneralu oqimaaqatigiilluinnartuusut. Pissaanini atorsinnaagaluarpaa ingerlaannaq pikitsitsineq suujunnaarsillugu. Tamanna naapertuilluassagaluarpoq, taamaasiussallunimi pisussaalluinnarpoq. Kisiannili ileqqussatigut apeqqutaalersinneqartut akissutissarsineqarsimassanngikkaluarput. Guutip inuit ajortuliornerat aamma isiginngitsuusaaginnarsinnaagaluarpaa. Tamanna immaqa ullumikkut inuit ilaasa aaqqiissutissatut asannittutut isigissagaluarpaat. Kisiannili inuit nammineerluarsinnaanerarlugit Saatanip oqaasiisa eqqunnginnerat uppernarsarneqarsimassanngikkaluarpoq. Aamma allat Jehovap ingerlavigeqqusaanit nigortissimassagaluarpai. Naalliuutit soraarfeqanngitsut kingunerisimassagaluarpai.

Ilisimassutsimigut Jehovap inuit piffissami aalajangersimasumi piumasaminnik iliornissaat akueraa. Naak ajussuseq akuerineqarallartariaqaraluartoq, inuit Guutimik ikiorteqaratik nammineerlutik, suup ajunngitsuunera suullu ajortuunera namminneq aalajangerlugu, imminnut ajunngitsumik aqussinnaanerlutik paasiniassallugu tassuuna periarfissarsipput. Suna kinguneraa? Inuiaqatigiit oqaluttuarisaanerat sorsunnernik, naapertuilluanngissutsimik, naqisimanninnermik naalliunnermillu ulikkaarsimavoq. Naggataatigut uppernarsisinneqarluinnarpat Jehovamut pikitistsineq iluatsinngitsoortoq, Edenip naatsiiviani apeqqutaalersinneqartut inaarutaasumik akineqareersimassapput.

Taamaattoqannginnerani Guutip asannissutsi takutissimavaa ernini, Jiisusi Kristusi, inuunerminik utertitsissutissatut tunniussisoq, aallartillugu. Tamatumuuna inuit naalattut ajortimik toqumillu, Adamip naalannginnerata kingunerisaanik, pillagassaatinneqarnermit aniguisitaasinnaanngorput. Utertitsissutissap tamatuma  Jiisusimut upperinnittunut tamanut inuuneq naassaanngitsoq anguneqarsinnaalersippaa. — Johannesi 3:16.

Jehovap tuppallersarluta neriorsorpaatigut naalliuutivut sivikitsuinnarmik atuukkallartussaasut. „Iluanngitsoq erniinnaq peeruttussaavoq,“ tussiaasiortoq allappoq. „Inaani takuniaraluarukku peerutereersimassaaq. Kisianni qanilaartut nuna kingornutissavaat pilluangaarnertillu nuannaarutigissallugu.“ — Tussiaat 37:10, 11.

Siunissaq toqqissisimanartoq pilluarnartorlu

Biibilimi siulittuutit eqquunnerisa takutippaat piffissaq nappaatinik, aliasunnermik toqumillu Guutip atorunnaarsitsinissaa qanillisoq. Apustili Johannesip takorruuisitaalluni pissutsit nuanningaartut piumaartussat takuai. Allappoq: „Takuakka qilak nutaaq nunalu nutaaq, tassami qilak siulleq nunalu siulleq peermata imarlu peerluni. . . . Guutilu nammineq [inunniikkumaarpoq]. Qulliillu tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.“ Johannesi oqaatsini imaattuni uppernarsaavigineqarpoq neriorsuutit tamakku tutsuiginartuusut: „Allagit, oqaatsit tamakku uppernarlutillu ilumoormata.“ — Saqqummersitat 21:1-5.

Taakkumi pisuussuteqanngitsut milliardillit Edenimi pikitistsineqalermalli toqusimasut? Jehova neriorsuivoq sinippaartut uummarteqqikkumaarlugit. Apustili Paulusi oqarpoq: ’Guutimut neriugisaqarpunga, tassa toqusut makikkumaartut — iluartut iluaatsullu.’ (Apustilit Suliaat 24:15) Silarsuarmi ’naapertuilluassuseqarfiusumi’ inuunissaminnut periarfissinneqassapput. — 2 Petrusi 3:13, NV.

Soorlu ataataasup asannittup meeqqami pilatsinnissaa annernartoq, meeqqamut kingusinnerusukkut iluaqutaassappat, akueriumassagaa, taamatuttaaq Jehovap naalliukkallarnerit, ajussutsip nassatarisai, inunnut misigitippai. Guutilli piumasaanik iliorusuttut naassaanngitsumik pilluaqqusaassapput. Tamanna Paulusip oqaatsimini ukunani nassuiarpaa: „Pinngortitammi naalatsigititaapput piunngitsuussusermut namminneq piumasarinngisaminnik naalatsigititsisorli pissutaalluni, neriullutillu pinngortitattaaq namminneq aniguisitaajumaartut nungujassusermi inussiaataanermit kiffaanngissuseq Guutip qitornaasa naalannarsiffissami pisassaat pigilerlugu.“ — Romamiut 8:20, 21.

Tamanna nutaarsiassaavoq — fjernsynikkut takusartakkatut aviisiniluunniit atuartakkatut inngitsoq, nutaarsiassarli nuannersoq. Taanna ’Guutimit tuppallersaajuartumit’, uagutsinnik isumassuingaartumit, nutaarsiassaavoq nuannersoq. — 2 Korinthimiut 1:3.  (wE 10/01 02)

[Qupp. 6-mi assiliartaq]

Piffissap ingerlanerani takutinneqarpoq inuit Guutimik ikiorteqaratik nammineq aqutsiniarnerigaluat iluatsisinnaanngitsoq

[Suminngaanneernerat]

Ilaqutariit Somaliamiut: UN PHOTO 159849/M. GRANT; atombombi: USAF photo; tigusanut inissiarsuaq: U.S. National Archives photo