„Ornissinga, . . . nukissaqalerseqqissavassi“

Inuusuttut kanertut inuummarissaataasut

JIISUS KRISTUSIP qularnanngitsumik ajoqersukkani inuusunnerusut ilanngullugit eqqarsaatigai oqarami: „Ornissinga . . . nukissaqalerseqqissavassi.“ (Matthæusi 11:28) Inuit meerartatik Jiisusimukaattalermatigik ajoqersugaasa unitsinniaraluarpaat. Jiisusili oqarpoq: „Meerannguit uannut qaaginnarlit, akornuseqinasigillu“. Allaat eqqaaneqarpoq Jiisusip meerannguit ’pakkullugillu assamminik patikkai pilluaqqullugillu’. (Markus 10:14-16) Aap, qularutissaanngitsumik Jiisusip meeqqat inuusuttullu naleqangaartutut isigai.

Biibilimi oqaluttuarineqarpoq angutit arnallu inuusuttut, meeqqat ilanngullugit, Guutimut aalajaallutik kiffartornerminni maligassaalluartuusut. ’Inuusuttut kanernertut issapput’ tussiaatini allassimavoq. Aamma oqaluttuaraa „nukappiaqqat niviarsiaqqallu“ Jehovap aqqa unnersiutigigaat. — Tussiaat 110:3, NV; 148:12, 13.

Inuusuttut ineriartornartumiittut

Kanerneq sallaatsoq inuummarissaataasorlu Biibilimi peqangaarnermut pilluaqqusaanermullu assersuunneqartarpoq. (1 Mosesi 27:28) Inuusuttut kristumiut ima amerlatigisut Kristusip najuunnerani kajumillutik nuannaarlutillu ikiuukkumatutigaat allaat kanertut assersuunneqarsinnaallutik. Inuusuttut angutit arnallu amerlaqisut Guutimut kiffartornerminnut uppeqataallu kanertut inuummarissaataasutut ipput. — Tussiaat 71:17.

Kristumiut inuusuttu allanut inuummarissaataaginnanngillat, kiffartornermikkut aamma namminneq nutaamik nukissaqalertarput. Guutip peqatigiiffia kristumiut inuusuttut ineriartorfigisinnaasaannik avatangiiseqartitsipput. Qutsissunik inuunermi najoqqutaqarnermikkut inuusuttut angutit arnallu Guutimut qanimut attaveqarnertik nuannaarutigisinnaavaat. (Tussiaat 119:9) Kristumiut ilagiivini suliassanut iluaqutaasunut peqataasarput pitsaasunillu ikinngutissarsisarlutik — nalerisimaarnartumik siunertaqangaartumillu inuuneqalersitsisunik.

’Katsorsaat nukittorsaallu’

Inuusuttut namminneq aamma kanertut ittuullutik misigippat? Siullermik Tania, qatanngut inuusuttoq nuannaartoq suliniuteqartorlu, qaammatit tamaasa nalunaaqquttap akunneri 70-t sinnerlugit oqaluussisartoq, tusarnaalaariatigu. Qanoq misigiva? Oqarpoq: „Misigaanga nukissaqalersinneqartarlunga kajumissisineqartarlungalu. Jehova taassumalu peqatigiiffia qanillugit uannut tassavoq ’katsorsaat nukittorsaallu’“. — Ussatit 3:8.

Arieli, piffissaq tamaat atorlugu oqaluussisartoq inuusuttoq alla, ilagiinni anersaakkut nukissaqalertarnini pingaartillugu ima oqarpoq: „Kristumiut ataatsimiinnerinut ataatsimeersuarnerinullu peqataagaangama Jehovallu anersaakkut  nerriviani nerersuaqataasinnaallunga, tamanna anersaakkut inuummarisaatigingaartarpara. Aamma silarsuarmi tamarmi suleqateqarlunga nalunnginnakku nukissaqalersinneqartarpunga.“ Nutaamik nukissaqalernissamut pissutaanerpaaq pillugu oqarpoq: „Jehovamik ikinnguteqarluni nukissaqarnaqaaq, ingammik silarsuup inununnut sunniipiluttarneri tusartarlugit takusarlugillu.“ — Jaaku 2:23.

Abishai 20-nik ukiulik piffissaq tamaat atorlugu oqaluussisartuuvoq ilagiinnilu kiffartortuulluni. Eqqarsaatini ima oqaatigai: Uanga nukissaqalertarpunga ajornartorsiuterpassuit ullumikkut inuusuttut nalaattagaat qanoq ilillunga pakkersimaarsinnaanerlugit paasigaangakku. Sallusuissutsip Biibilimeersup ikiorpaanga Jehovamut uummammik tamakkiisumik kiffartorniarninni qanoq iliornissama eqqarsaatigeqqissaarnissaanut.“

Inuusuttuaraalluni Antoine kamajasoorujussuuvoq. Ataasiarluni atuaqatini issiavimmik anaalersuataarpaa, allalu aqerluusamik kapillugu. Antoine allanik nukissaqalersitsisutut imaluunniit inuummarissaataasutut oqaatigineqarsinnaanngilaq. Biibililli siunnersuutai ilikkaramigit pissutsini allanngortippaa. Maannakkut 19-nik ukioqarpoq, ilagiinni kiffartortuulluni piffissarlu taamaat atorlugu oqaluussisartuulluni. Oqarpoq: „Nuannaarutigaara Jehovap imminik ilisarsilersimmanga kamajasuunermalu aqqunneqartariaqarneranik takusinnaalersillunga inooriaaseralu allanngortillugu. Taamaalillunga ajornartorsiuterpassuit pinngitsoortalerpakka.“

Allat malugisimavaat kristumiut inuusuttut ilorraap tungaanut sunniuteqarluartartuusut. Matteo Italiami oqaluussisartuuvoq inuusuttoq. Ilinniartitsisua aalajangersimavoq klassimi oqaasipiluttoqaraanga, oqaasipiluttoq annikitsunnguamik akiliisinneqartassasoq. Sivitsulaarmat meeqqat oqaasipilunnik atueqqusinnginneq atorunnaarseqqullugu noqqaapput — Oqarnerattut „oqaasipilunnik atuinngitsoornissaq ajornakusoortorujussuuvoq“. „Kisiannili,“ Matteo nassuiaavoq, „ilinniartitsisup tamanna ilumuunnginnerarpaa, taava uanga, Jehovap Nalunaajaasua, klassimiittunullu tamanut assersutigaanga oqaasipilunnanga oqaluttarama.“

Thailandimi klassimi aqutassaanngitsumi ilinniartitsisup Racha aqqanilinnik ukiulik qaaqquaa perorsarsimalluartuuneralu pillugu atuaqataanut nersualaarlugu. Ilinniartitsisoq oqarpoq: „Sooq tamassi taanna malinnianngilisiuk? Suliassani pimooruttarpai perorsarsimalluartuullunilu. Ilinniartitani oqarfigai: „Immaqa aatsaat naalannerulissaasi Rachatut Jehovamut Nalunaajaasunngorussi.“

Inuusuttut kristumiut tusindillit Jehovamik ilisarsinerulernissartik pillugu peqqusaanillu iliorniarlutik ilungersortut takullugit nuannertaqaaq. Taamaalillutik inuusuttut ukiuminnut naleqqiullugit ilisimassuseqarnertik ersersippaat. Guutimik ikiorneqarlutik maannamiit inuunerissaalersinnaapput, aamma silarsuassami nutaassami siunissamik nuannersumik neriorsorpai. (1 Timotheusi 4:8) Aaqqissuussaanermi anersaakkut inerititaqanngitsumi maannakkut atuuttumi inuusuttunik naammagittaalliortunik paatsiveerussimaartunillu ulikkaartumi, kristumiut inuusuttut akerlerluinnaanik inuummarissaataasuupput. (wE 9/15 02)