Guutip Naalagaaffianik Oqaluussissutiginninnermit Nutaarsiassat

Naalagaaffilersaarfiit tamanut ammapput

JIISUS KRISTUSIP ajoqersukkani tamanut oqaluusseqataasarnissaannik ilinniartikkamigit, kajumissaarpai ’illut qaaviniit oqaluusseqqullugit’. (Matthæusi 10:27) Aap, kristumiutut kiffartornertik ammasumik, tamarmik takkuanni, suliarisussavaat. Siunnersuummi tamatumani anersaaq naapertorlugu Jehovap Nalunaajaasuisa suliaat aamma tamarmik takkuanni suliarineqartarput. Nalunaajaasut taamaalillutik assortorneqarnerit ajugaaffigisarpaat suliaminnillu inuit paasisimasaqarnerulersittarlugit.

Jehovap Nalunaajaasuisa ilagiinni ataatsimiinneri tamanut ammasuupput, paqumigisaqarnerli pissutigalugu inuit ilaasa naalagaaffilersaarfimmukarnissartik tunuarsimaarfigisarpaat. Finlandimi taamaappoq. Allat ilisimanngisaminnut ornigunnissartik annilaangassutigiinnartarpaat. Taamaattuminguna naalagaaffilersaarfik naammassineqaraangat iluarsartuussineqareeraangalluunniit tamanut ammasumik takuniaatitsisoqartartoq. Immaqa immikkut iliuuseqartoqarpoq sanilit naalagaaffilersaarfimmut qaaqquniarlugit Jehovap Nalunaajaasuisa sulinerat pillugu paasisaqarneroqqullugit.

Nunap ilaani ullormi naalagaaffilersaarfittaaminni tamanut ammasumik takuniaatitsiffiminni Jehovap Nalunaajaasui aamma atuagassianik siaruarterinersuaqarniarput. Oqaluussisartut marluk naapippaat angut utoqqaq oqartoq Napasuliaq Alapernaarsuiffik Iteritsi!-lu atuarlugit nuannaralugit. Qatanngutit naalagaaffilersaarfimmi tamanut ammasumik takuniaatitsineq pillugu oqaluttuuppaat neqeroorfigalugulu taakunga ilagiumallugu. Angut ilaajumavoq. Nulia, oqaloqatigiinnerannut tusarnaartoq, oqarpallappoq: „Ilagitinnanga taakunnassanngilatit!“

Angut naalagaaffilersaarfimmut iserami, qimerloorpoq oqarlunilu: „Maani qernertuunngivippoq. Qaamasuullunilu kusanarpoq. Tusartaraluarakku naalagaaffilersaarfik qernertuusoq.“ Aappariit isersimangaatsiarput atuagassiallu sassarneqarsimasut ilaannik piumallutik.

Ilagiit allat naalagaaffilersaarfittaaminnik atoqqaartitsinermut tunngatillugu tamanut ammasumik takuniaasoqarsinnaanera illoqarfiup aviisiani nalunaarutiginiarpaat. Aaqqissuisup akisussaasup qanoq pisoqarniartoq paasigamiuk, tamatuma allaaserineqarnissaa erngerluni siunnersuutigaa. Qatanngutit akuersipput, sivitsunngitsorlu aviisimi quppernerup affaani pisimasoq illoqarfimmilu Jehovap Nalunaajaasuisa ilagiivini sammineqartartut pillugit ajunngitsumik allaaserisaqarpoq.

Allaaserisaq saqqummersinneqareermat oqaluussisartup utoqqaap naapippaa sanilini ima oqartoq: „Aviisi ullumi Jehovap Nalunaajaasui pillugit nuanningaartumik allaaserisaqarpoq!“ Qatanngut arnaq periarfissarsivoq upperisani pillugu oqaluttuutissallugu, kingusinnerusukkullu sanilini atuagassiaaqqamik Jehovas Vidner i det tyvende århundrede (kalaallisuunngortitaanngitsoq) tunivaa.

Tamanut ammasumik takuniaatitsinernut naalagaaffilersaarfinnillu atoqqaartitsinernut atatillugu aaqqissuussinerit taamaattut pissutigalugit Jehovap Nalunaajaasui pillugit paatsoornerit aaqqinneqaannarneq ajorput. Oqaluussisartunuttaaq aaqqissuussinerit tamakku kaammattuutaapput kajumissaataallutillu suli amerlanerusunik ataatsimiinnermut qaaqqusisarnissaannut. Aap, nunani amerlasuuni, ilaatigut Finlandimi, inuit paasilersimavaat Jehovap Nalunaajaasuisa naalagaaffilersaarfii tamanut ammasuusut. (wE 11/01 02)