Pissuserissaartuaritsi inuit inuianneersut akornanni

„Inuit assigiinngitsut tamaasa ataqqisigik, qatanngutigiissutut peqatigiit tamaasa asasigik.“ — 1 PETRUSI 2:17, NV.

1, 2. (a) Jehovap Nalunaajaasui pillugit aviisiliortoq qanoq oqarpa? (b) Sooq pissuserissaarnermut qutsissunik najoqqutaqarnissartik Jehovap Nalunaajaasuisa ilungersuutigaat?

UKIUALUIT matuma siornatigut Amerikami Texasip illoqarfiani Amarillomi aviisiliortup upperisarsioqatigiit assigiinngitsut orneqattaarpai, misigisanilu allaaseralugit. Taassuma upperisarsioqatigiit ataatsit immikkuullarissutut isigai. Oqarpoq: „Ukiuni pingasuni Jehovap Nalunaajaasuisa Amarillo Civic Centerimi ukiumoortumik ataatsimeersuartarneri najuuffigisarpakka. Akornanniikkaangama ataaserluunniit sikaritsimik kukutsisoq imaluunniit immiaaqqamik simeersisoq takunngisaannarpara, oqaasipiluttumillu tusagaqanngisaannarpunga. Inuit naapissimasama eqqiluinnersaraat, perorsagaalluarnersaraat, atisamikkut pilimaniannginnersaralugit inussiarnernersaralugillu.“ Jehovap Nalunaajaasui pillugit tusagassiuutini assingusunik allaaserisaqartoqartarpoq. Sooq upperisaqatiginngisaminnit taama nersorneqakulatigippat?

² Guutip kiffai nersualaarneqaraangamik pissuserissaarnertik pillugu nersualaarneqartarput. Ileqqussatigut najoqqutassiat ersarlussigaluttuinnarput, Jehovalli Nalunaajaasuisa pissuserissaarnermut qutsissunik najoqqutaqarnissaq pisussaaffimmittut guutisiornermillu ilaatut isigaat. Nalunngilaat pissutsimikkut Jehova qatanngutillu kristumiut ajunngitsumik ajortumilluunniit isigineqartilissallugit, aamma nalunngilaat pissuserissaarneq sallusuissummut oqaluussissutigisaminnut kajumissaarutaasoq. (Johannesi 15:8; Titusi 2:7, 8) Taamaattumik Jehovap taassumalu nalunaajaasuisa tusaamasaalluarnerat illersorniarlugu qanoq pissuserissaartuarsinnaanerluta misissoriartigu. Misissussavarputtaaq tamanna uagutsinnut qanoq iluaqutaassanersoq.

Ilaqutariit kristumiut

3. Ilaqutariit kristumiut sumut sernissorneqartariaqarpat?

³ Siullermik ilaqutariit iluanni inooriaaserput misissussavarput. Gerhard Besierip aamma Erwin K. Scheuchip atuakkiaanni Die Neuen Inquisitoren: Religionsfreiheit und Glaubensneid-imi (Upperisarsiornernik naliliisartut nutaat: Upperisarsiornikkut kiffaanngissuseq upperisarsiornikkullu sinnganeq) oqaatigineqarpoq: „Taakkua [Jehovap Nalunaajaasuisa] ilaqutariit immikkut sernissortariaqartutut isigaat.“ Tamanna ilumoorpoq, aamma ullumikkut sorpassuarnut ilaqutariit sernissorneqartariaqarput. ’Angajoqqaaminnut naalanngitsunik’ meeraqarpoq, aamma ’asanniuitsunik’ imaluunniit ’naammatsiuitsunik’ inersimasoqarluni. (2 Timotheusi 3:2, 3) Aappariit nakuusertarput, angajoqqaat meeqqatik naalliutsillugilluunniit sumiginnartarpaat, meeqqallu pikitsitsisarput, ikiaroorniutinik atuisarput, kinguaassiuutitigut inuunerluttarput angerlarsimaffimminniilluunniit qimaasarlutik. Tamakku tamarmik ’silarsuup anersaavata’ aserornartup sunniinerata kingunerai. (Efesosimiut 2:1, 2) Ilaquttavut anersaamut tassunga illersortariaqarpavut. Qanoq taamaaliorsinnaavugut? Jehovap ilaqutariit iluanni ataasiakkaanut siunnersuutaanik malinninnikkut taamaaliorsinnaavugut.

4. Ilaqutariit kristumiut imminnut qanoq pisussaaffeqarpat?

⁴ Aappariit kristumiut nalunngilaat misigissutsitigut, anersaakkut timikkullu imminnut pisussaaffigeqatigiillutik. (1 Korinthimiut 7:3-5; Efesosimiut 5:21-23; 1 Petrusi 5:7) Aamma angajoqqaat kristumiut meeqqaminnut annertuunik pisussaaffeqarput. (Ussatit 22:6; 2 Korinthimiut 12:14; Efesosimiut 6:4) Ilaqutariit kristumiut meeraasa alliartortillutik aamma namminneerlutik akisussaassuseqarnertik ilikkariartortarpaat. (Ussatit 1:8, 9; 23:22; Efesosimiut 6:1; 1 Timotheusi 5:3, 4, 8) Ilaqutariinni pisussaaffiit naammassissagaanni ilungersuaneq, aalajangersimalluinnarneq imminullu pilliutigeriaannaaneq pisariaqarput. Ilaqutariilli tamarmik pisussaaffitik Guutimeersut naammassippatigik, tamanna iluminni iluaqutigiinnarnagu aamma ilagiit iluaqutigissavaat. Sulili pingaarneq tassaavoq taamaaliornermikkut ilaqutariinnik pilersitsisoq, Jehova Guuti, ataqqinartimmassuk. — 1 Mosesi 1:27, 28; Efesosimiut 3:15.

Kristumiut qatanngutigiissutut peqatigiit

5. Uppeqatitsinnik peqateqaraangatta qanoq pilluaqqusaasarpugut?

⁵ Kristumiutut ilagiinni uppeqatitsinnut aamma pisussaaffeqarpugut, naggataatigullu ’qatanngutitsinnut silarsuarmiittunut’. (1 Petrusi 5:9) Ilagiinnut pitsaasumik attaveqarneq anersaakkut peqqissuujuarnissatsinnut aalajangiisuuvoq. Kajumissinartumik peqatigiinnerput anersaakkullu nerisassat ’inussiap ilumoorlunilu silatuup’ sassaalliutigisai nuannaarutigisarpavut. (Matthæusi 24:45-47, NV) Ajornartorsiuteqarutta najoqqutassiat Biibilimeersut tunngavigalugit qatanngutitsinnut silatusaartunik siunnersortisinnaavugut. (Ussatit 17:17; Oqaluussisartup oqaasii 4:9; Jaaku 5:13-18) Qatanngutitta annikilliornitsinni sumiginnassanngilaatigut. Guutip peqatigiissortaanut ilaanerup ila pilluaqqusaanassusia!

6. Kristumioqatitsinnut pisussaaffeqartugut Paulusip oqaasiini qanoq ersersinneqarpa?

⁶ Ilagiinnulli aggertanngilagut tunineqarnissaannaq siunertaralugu, aamma tunisiartortarpugut. Jiisusimi oqarpoq: „Tunisineq pilluarnarneruvoq tigusinermit.“ (Apustilit Suliaat 20:35) Aamma apustili Paulusip tunisineq tigusinermit pingaarnerutippaa, allakkami: „Neriugisatsinnik nassueruterput nikisitassaanngitsumik aalajangiunniartigu, neriorsuiserput unneqqarissuummat. Immitsinnut isumageqatigiinniarta asaqatigiinnermut ajunngitsuliornermullu kajumissaaqatigiittarluta, ilagiittut katisimasarnivut tamatigut peqataanngitsoorfigisarnatigit, soorlu ilaat taama ileqqoqartut, oqaaqqissaaqatigiittarniartali taamaaliornissaq suli pisariaqarnerulermat nalunnginnassiuk ullussaq qanillisoq.“ — Hebræerit 10:23-25.

7, 8.Ilagiinni nunanilu allani kristumioqatitsinnut qanoq tukkortuusinnaavugut?

⁷ Ataatsimiinnerni oqaaseqaraangatta imaluunniit allatigut sammineqartunut peqataagaangatta ’neriugisarput nassuerutigisarparput’. Tamanna uppeqatitsinnut kaammattuutaangaartarpoq. Ataatsimiinnerup aallartinnginnerani ataatsimeereernerullu kingorna qatanngutit oqaloqatigalugit kaammattorsinnaavavuttaaq. Periarfissaqarpugut sanngiitsut nukittorsassallugit, ernumasut tuppallersassallugit napparsimasullu kaammattussallugit. (1 Thessalonikamiut 5:14) Kristumiut ilumoorusuttut tamarmik tamakku tungaasigut tukkorlutik tunisisarput, asanninnerallu ataatsimiigiaqqaartorpassuit killitsissutigingaartarpaat. — Tussiaat 37:21; Johannesi 15:12; 1 Korinthimiut 14:25.

⁸ Ilagiitsinniittulli kisiisa asasanngilavut. Nunarsuaq tamakkerlugu qatanngutigiit peqatigiit asavavuttaaq. Tamannaana pillugu Europap Kangianut tunissuteqartartugut. Uagut naalagaaffilersaarfipput immaqa ajoquteqanngilaq, nalunngilarpullu nunani allani qatanngutivut naalagaaffilersaarfinnik naleqquttunik amigaateqartut. Ilisarisimanngikkaluarlugit tunissuteqaraangatta asannittuliorfigisarpavut.

9. Jehovap Nalunaajaasuisa imminnut asaqatigiinnerannut suna pissutaava pingaarneq?

⁹ Sooq Jehovap Nalunaajaasui asaqatigiippat? Pingaarnerpaatut Jiisusip asaqatigeeqqullugit peqqusimavai. (Johannesi 15:17) Inuttut ataasiakkaatut peqatigiittullu asaqatigiinnerat Guutip anersaavata sunniineranut uppernarsaataavortaaq. Asanninneq ’anersaap inerititaasa’ ilagaat. (Galatiamiut 5:22, 23) Jehovap Nalunaajaasuisa Biibili atuaqqissaaraangamikku, kristumiutut ataatsimiinnerit najuuffigigaangamikkik Guutimullu kipisuitsumik qinugaangamik asannittuliornissartik pissusissamisoortutut isigisarpaat, naak silarsuarmi inuugaluarlutik ’asanninnerup amerlanerni nillertunngorsimaffiani’. — Matthæusi 24:12.

Avatangiisitsinnut attaveqarneq

10. Avatangiisitsinnut sumik pisussaaffeqarpugut?

¹⁰ ’Neriugisatsinnik tamanut nassuerutiginninnissarput’ pillugu Paulusip oqaasiisa pisussaaffitsinnik allamik eqqaasippaatigut. Suli kristumiunngorsimanngitsunut nutaarsiassamik nuannersumik oqaluussissutiginninneq tamanut nassuernermut ilaavoq. (Matthæusi 24:14; 28:19, 20; Romamiut 10:9, 10, 13-15) Oqaluussineq tukkortuliorneruvortaaq. Oqaluussinermut peqataassagaanni piffissaq, nukiit, piareersarneq, sungiusarsimanissaq namminerlu pigisanik atuisariaqarneq pisariaqarpoq. Paulusili aamma allappoq: „Grækerit barbarillu, ilisimasut ilisimaatsullu pisussaaffigaakka. Taamaattumik pilerivunga ilissinnuttaaq Romamiittunut iivangkiiliu nalunaajaatigiumallugu.“ (Romamiut 1:14, 15) Pisussaaffipput taanna naammassiniarlugu Paulusitut imminut pilliuteqariaannaasa.

11. Allassimaffiit marluk sorliit silarsuarmut pissuseqarnissatsinnut pingaaruteqarpat, sunali nassuerutigaarput?

¹¹ Uppeqatiginngisatsinnut allanik pisussaaffeqarpugut? Ilumut, taamaalluinnarpoq. Nalunngilarpummi „silarsuaq tamaat ajortup pissaaneqarfigigaa“. (1 Johannesi 5:19, NV) Nalunngilarput ajoqersukkani pillugit Jiisusi oqarsimasoq: „Silarsuarmut ilaanngillat, soorlu uanga silarsuarmut ilaanngitsunga.“ Silarsuarmili inuuvugut, silarsuarmi sulisarluta silarsuarmillu kiffartuutitittarluta. (Johannesi 17:11, 15, 16, NV) Tamanna pillugu silarsuarmut pisussaaffeqarpuguttaaq. Sunik? Apustili Petrusip tamanna akivaa. Jerusalemi aserugaanngitsiartoq Asiaaqqami kristumiunut allappoq, allakkaminilu ersersippaa silarsuarmut oqimaaqatigiissumik qanoq pissuseqarsinnaanersugut.

12. Qanoq kristumiut ’allamiuullutillu takornartaappat’, suullu ingalassimasariaqarpaat?

¹² Petrusi aallartippoq: „Asasakka! Oqaaqqissaarpassi allamiuusutut takornartaasutullu inuutillusi uinngup pilerigisai tarnimut sorsuttut ileqqoreqqunagit.“ (1 Petrusi 2:11) Kristumiut ilumoortut inuunermik naassaanngitsumik neriuut pingaarnerutikkamikku anersaakkut ittumik ’allamiuupput takornartaallutillu’ — tanitat qilammi ’savallu allat’ nunarsuarmi paratiisissami inuunissartik neriuutigalugu. (Johannesi 10:16; Filippimiut 3:20, 21; Hebræerit 11:13; Saqqummersitat 7:9, 14-17) Petrusimuna uinngup pilerigisai suut mianersoqqussutigigai? Ilaatigut tassaapput pisuunngorusunneq tusaamasanngorusunnerlu, kinguaassiuutitigut kanngunartuliornissamik pilerissutsit pilerigisallu allat soorlu ’sinnganeq piumatuunerlu’. — Kolossemiut 3:5; 1 Timotheusi 6:4, 9; 1 Johannesi 2:15, 16.

13. Pilerigisat imaluunniit kissaatigisat uinngup pii qanoq inuunitsinnut ’tarnimut sorsuttuuppat’?

¹³ Pilerigisat imaluunniit kissaatigisat taakku ’tarnimut sorsuttuupput’. Guutimut attaveqarnitsinnut aserorsaataapput kristumiutullu neriugisatsinnut (’tarnitsinnut’ imaluunniit inuunitsinnut) navianartorsiortitsisuullutik. Assersuutigalugu kanngunartuliornernik soqutigisaqarneq ineriartortikkutsigu qanoq ililluta Guutimut ’pilliutitut uumasutut illernartutullu’ immitsinnut sassaassinnaavugut? Aningaaseritunermut nakkaassimagutta qanoq ’naalagaaffik salliutittuaannarsinnaavarput’? (Romamiut 12:1, 2; Matthæusi 6:33, NV; 1 Timotheusi 6:17-19) Iliuuserisinnaasarput pitsaanerpaaq tassaavoq Jehovamut kiffartornermik inuunitsinni salliutitsineq, Mosesip maligassiaanik malinnilluta silarsuup matuma pilerinartui tunullugit. (Matthæusi 6:19, 20; Hebræerit 11:24-26) Tamanna silarsuarmut oqimaaqatigiissumik pissuseqarnissatsinnut aalajangiisuuvoq.

„Pissuserissaartuaritsi“

14. Kristumiut pissuserisaarnissartik sooq ilungersuutigaat?

¹⁴ Petrusip ilitsersuut alla pingaarutilik tulliullugu oqaatigaa: „Guutimik nalusut akornanni [pissuserissaartuaritsi, NV], tamatumuunarpiaq taakkua ilissinnik pinerluttuuneraallutik mamarliisartut takusinnaaniassammatigit suliasi ajunngitsut taakkunuunatigullu Guuti unnersiutigisinnaaniassammassuk ullormi takusarneqarfissami.“ (1 Petrusi 2:12) Kristumiutut maligassiuilluarnissarput ilungersuutigaarput. Atuarfimmi eqiasuitsuuvugut. Suliffitsinni aallussilluartuullutalu unneqqarissuuvugut — aamma sulisitsisorput naapertuilluanngikkaluartoq. Aappariit aappaannaa uppertuuppat angutip arnalluunniit uppertup kristumiutut najoqqutassiat malinnissaat immikkut ilungersuutigissavaa. Tamanna oqitsuinnaanngilaq, maligassaalluartumilli inooriaaseqarutta Jehova nuannaartillugulu ilaginngisatta ajunngitsumik killinneqaatigisassavaat. — 1 Petrusi 2:18-20; 3:1.

15. Jehovap Nalunaajaasuisa ileqqussatigut qutsissunik najoqqutaqarnerat inunnit malugineqarsimasoq qanoq nalunngissinnaavarput?

¹⁵ Ukiut ingerlanerini tusagassiuutitigut allaaserineqartartut takutippaat Jehovap Nalunaajaasuisa amerlanersaat maligassaalluartumik pissuseqartuarsimasut. Assersuutigalugu Italiami aviisimi Il Tempo-mi ima allassimavoq: „Suleqataasa sulisutut unneqqarissutut, upperisamillu eqqortuunerannik ima qulanngitsigigamik allaat tiguartissimasutut isikkoqarsinnaasutut Jehovamut Nalunaajaasut eqqaasarpaat; taamaakkaluartorli ileqqussatigut minguitsuunertik pillugu ataqqineqartariaqarput.“ Argentinami illoqarfimmi Buenos Airesimi aviisimi Herald-imi allassimavoq: „Ukiut ingerlanerini Jehovap Nalunaajaasuisa eqiasuitsuunertik, silassorissuunertik, sipaallaqqissuunertik guutimillu mianerinnittuunertik uppernarsarsimavaat.“ Ilisimatuutut misissueqqissaartartoq russeq Sergej Ivanenko Jehovap Nalunaajaasui pillugit ima oqarpoq „nunarsuarmi sumiluunniit inatsinik malinnilluartuusut, sualummik akileraarutinik akiliinissaminnik aallussilluartutut ilisimaneqartut“. Zimbabwemi Jehovap Nalunaajaasuisa ataatsimeersuarfigisaanni pisortaasoq oqarpoq: „Nalunaajaasut ilaat pappiaqqanik katersisut perusuersartarfinnillu eqqiaasut takunikuuakka. Manna qimakkaangassiuk tikiunnissinniit eqqiluinnerusarpoq. Inuusuttortasi perorsarsimalluartuupput. Nunarsuaq tamarmi Jehovap Nalunaajaasuinik ulikkaassagaluarami.“

Kristumiut naalatsigitipput

16. Oqartussaasunut qanoq attaveqarpugut, aamma sooq?

¹⁶ Oqartussaasunut attaveqarnerput Petrusip eqqaavaattaaq. Allappoq: „Naalagaq pillugu naalatsigitigitsi inuit aaqqissuusaannut sunulluunniit, naalagaasoq kunngiuppat naalagaatitaappataluunniit aallartinneqarsimasut pinerluttut pillassallugit naalattullu nersualaassallugit. Guutimmi piumasaraa ajunngitsuliornissigut inuit sianiitsut siuneqanngitsullu qarngi matussagisi.“ (1 Petrusi 2:13-15) Inuiaqatigiit torersumik aaqqissuussaappata pitsaaqutaat takusinnaavavut. Petrusip oqaasii naapertorlugit inatsisit malillugillu akileraarutit akiligassavut akilertarpavut. Paasivarput oqartussaasut inatsisinik unioqqutitsisunik guutimit pillaasinnaatitaasut, pingaarnerpaamilli ’Naalagaq pissutigalugu’ oqartussaasunut naalatsigitittarpugut. Tamanna Guutip piumasaraa. Aammattaaq inatsinik unioqqutitsilluta pillagassanngortitaanitsigut Jehovap aqqa kanngunarsarusunngilarput. — Romamiut 13:1, 4-7; Titusi 3:1; 1 Petrusi 3:17.

17. ’Inuit sianiitsut’ akornusersuigaangata suna tatigisinnaavarput?

¹⁷ Ajoraluartumik uatsinnik malersuisunik allatulluunniit akornusersuisunik pisortani ’inunnik sianiitsoqarpoq’ — soorlu mamarliisunik. Jehovalli piffissarititaa nalliuppat salluliuutaat paasineqanngitsuussanngillat, ’siuneqanngitsumillu’ oqalunnerat nipangersineqarluinnarumaarpoq. Kristumiutut pissuserissaarnerput nassuiarneqartariaqanngilaq. Tamannarpiaq pissutigalugu pisortani atorfilinnit unneqqarissunit nersualaarneqartarpugut. — Romamiut 13:3; Titusi 2:7, 8.

Guutimut kiffartorneq

18. Kristumiut kiffaanngissusertik qanoq atornerlunnaveersaarsinnaavaat?

¹⁸ Petrusi maanna mianersoqqusivoq: „Kiffaanngitsuuvusimi, tamannalu iluaatsuliornermut isertuiniutigissanngilarsi, Guutilli kiffaasut atussavarsi.“ (1 Petrusi 2:16; Galatiamiut 5:13) Sallusuissummik Biibilimeersumik ilisimasaqarnerput maannakkumiit upperisarsiornikkut ajoqersuutinit eqqunngitsunit inussiaajunnaarsinneqaatigereerparput. (Johannesi 8:32) Aammattaaq kiffaanngissuseqarpugut namminerlu aalajangiisinnaalluta. Kiffaanngissuserlu taanna atornerlunngilarput. Ikinngutit, atisat, nutsat, aliikkutassat — aap, allaat nerisassat imigassallu — pillugit aalajangiiniaraangatta eqqaamasarparput kristumiut ilumoortut Guutimut kiffartortuusut, namminnerlu iluarisaminnik iliornianngitsuusut. Timikkut kissaatigisatsinnut imaluunniit silarsuup pilerinartuinut atisanullu nutaalianut kiffaanissatsinnut taarsiullugu, Jehovamut kiffaanissarput qinerparput. — Galatiamiut 5:24; 2 Timotheusi 2:22; Titusi 2:11, 12.

19-21. (a) Oqartussaasunut qanoq isiginnittaaseqarpugut? (b) ’Qatanngutigiissutut peqatigiit asallugit’ ilaasa qanoq takutissimavaat? (c) Pisussaaffitsinni suna pingaarnerua?

¹⁹ Petrusi nangippoq: „Inuit assigiinngitsut tamaasa ataqqisigik, qatanngutigiissutut peqatigiit tamaasa asasigik, Guuti mianerisiuk, kunngi ataqqisiuk.“ (1 Petrusi 2:17, NV) Inuit oqartussaassuseqarnissaat Jehova Guutip akuerisimammagu, tamanna naapertorlugu inuit taakku ataqqisarpavut. Allaat eqqissilluta guutimullu tunniusimalluta kiffartorsinnaajumalluta qinnuttarpavut. (1 Timotheusi 2:1-4) Aammattaaq ’qatanngutigiissutut peqatigiit tamaasa asavavut’. Qatanngutitsinnut kristumiunut ajunngitsumik iliornissarput ajoqusiinnginnissarpullu ilungersuutigiuarparput.

²⁰ Assersuutigalugu Afrikami nunat ilaanni inuiaassutsikkut akersuuttoqalermat tamanna erserpoq. Kristumiutut pissuseqarnertik Jehovap Nalunaajaasuisa immikkuullarissutigaat. Schweizimi aviisimi Reformierte Presse-mi allassimavoq: „1995-imi [kattuffiup] African Rights-ip . . . uppernarsarpaa upperisarsioqatigiit tamarmik, Jehovamut Nalunaajaasut kisimik pinnatik, [akerleriissuteqarnermi] peqataasimasut“. Pisimasut alianartut nunanut allanut anngummata Europami Jehovamut Nalunaajaasut nerisassanik nakorsaatinillu Afrikami qatanngutiminnut allanullu ingerlaannaq nassiussipput. (Galatiamiut 6:10) Ny Verden-nutsigaq naapertorlugu kajumissaarut Ussatit 3:27-miittoq malippaat: „Ajorsartut ajunngitsuliorfigikkit, sapinngikkuit ikiuiumanngitsooqinak.“

²¹ Oqartussaasulli ataqqinissaannit qatanngutittaluunniit asanissaannit pingaaruteqarnerusumik pisussaaffeqarpugut. Sunaava? Petrusi allappoq: „Guuti mianerisiuk.“ Inummut kimulluunniit akiitsorisinnaasatsinnit annerungaartunit Jehova akiitsoqarfigaarput. Qanoq? Qanoq aamma Guutimut pisussaaffivut oqartussaasunullu pisussaaffivut oqimaaqatigiissaarsinnaavavut? Apeqqutit taakku allaaserisami tulliuttumi akineqassapput.

 Eqqaamavigit?

• Ilaqutariit iluanni kristumiut qanoq pisussaaffeqarpat?

• Qanoq ilagiinni tukkortuusinnaavugut?

• Avatangiisitsinnut qanoq pisussaaffeqarpugut?

• Pissuserissaarnermut qutsissunik najoqqutassianik aalajangiusimaninnerput qanoq uatsinnut iluaqutaava?

 [Atuaqqissaarnermi apeqqutit]

 [Qupp. 9-mi assiliartaq]

Qanoq ilaqutariit kristumiut pitsaanerpaamik ingerlasinnaappat?

 [Qupp. 10-mi assiliartaq]

Sooq Jehovamut Nalunaajaasut asaqatigiippat?

[Qupp. 10-mi assiliartaq]

Qatanngutivut ilisarisimanngikkaluarlugit asasinnaavavut?