Suleqatigiilluarluta kiffartortuarta

„Taamanikkussamummi inuiaat nutaanik oqaaseqalersissavakka, oqaatsinik minguitsunik, tamarmik Jehovap aqqanik torlorfiginnissinnaaqqullugit suleqatigiilluarlutillu kiffartorfiginnissinnaaqqullugit.“ — SEFANIA 3:9, NV.

1. Sefania 3:9 ullumikkut qanoq eqquuppa?

SILARSUARMI tamarmi oqaatsit assigiinngitsut 6000-t missaanniipput, aamma sumiorpaluutsit amerlaqaat. Arabiamiutut zulutullu assigiinngitsigisunik oqaaseqaraluaraanni, oqaatsit immikkorluinnaq ittut ilinniarneqarsinnaapput. Guutip inuit sumiikkaluartulluunniit oqaatsit minguitsutuat atorlugit oqalussinnaalersissimavai. Tamanna pivoq Guutip pruffiiti Sefania aqqutigalugu neriorsuutaata eqquunneratut: „Taamanikkussamummi [uanga, Jehova Guutiusunga,] inuiaat nutaanik oqaaseqalersissavakka, oqaatsinik minguitsunik [nutsiinnavillugu: qarlumik minguitsumik], tamarmik Jehovap aqqanik torlorfiginnissinnaaqqullugit suleqatigiilluarlutillu kiffartorfiginnissinnaaqqullugit.“ — Sefania 3:9, NV.

2. ’Oqaatsit minguitsut’ suuppat, taakkulu iluaqutigalugit suna ajornarunnaarsimava?

² ’Oqaatsit minguitsut’ tassaapput Guutip sallusuissutaa oqaasiani, Biibilimi, allassimasoq. Ingammik sallusuissut Guutip Naalagaaffia, Naalagaaffik Guutip aqqanik illernarsisitsisussaq, kisimi oqartussaaneranik qutsissisitsisussaq inuiaallu pilluaqquneqarfissaat, pineqarpoq. (Matthæusi 6:9, 10) Nunarsuarmi tamarmi anersaakkut oqaasituaapput minguitsut, inuiannillu tamaneersunit naggueqatigiinnillu tamaneersunit oqaaserineqarput. Taamaattumik Jehova „suleqatigiilluarlutik“ kiffartorfigisinnaavaat. Guuti kiffartorfigaat ataasiussuseqarlutik imaluunniit, Biibilimi kalaallisut atortussaatitaasumi allassimaneratut, „isumaqatigiillutik“.

 Kristumiut kinaassusersiortuunngillat

3. Sooq ataasiussuseqarluta Jehova kiffartorfigisinnaavarput?

³ Kristumiutut qujamasuutigaarput assigiinngitsunik oqaaseqarluta suleqatigiissinnaanerput. Guutip Naalagaaffia pillugu nutaarsiassap nuannersup oqaluussissutiginerani assigiinngitsorpassuarnik oqaaseqaraluarluta ataasiussuseqarluta Guuti kiffartorfigaarput. (Tussiaat 133:1) Taamaattoqarsinnaavoq Jehovap unnersiutiginerani tamatta, nunarsuarmi sumiluunniit najugaqaraluarutta, oqaatsinik minguitsunik oqaaseqaratta.

4. Sooq Guutip kiffai kinaassusersiortuussanngillat?

⁴ Guutip kiffai kinaassusersiortuusussaanngillat. Tamanna apustili Petrusip erseqqissarpaa ukiumi 36-mi sakkutuut naalagaata Corneliusip juutiunngitsup angerlarsimaffiani oqaluussigami imalu oqarnissaminut killinneqarami: „Ilumut paasilerpara Guuti kinaassusersiortuunngitsoq, tassaasorli inuiaqatigiinni kikkuusuniluunniit imminik mianerinnittumik iluartuliortumillu ilassinnittartoq.“ (Apustilit Suliaat 10:34, 35) Taamaammat kristumiut ilagiivini kinaassusersiortoqassanngilaq, immikkoortukkuutaarluni allanik avataaniittutut misigititsisoqassanngilaq nakerisarsiortoqassananilu.

5. Ilagiinni immikkoortukkuutaarluni allanik avataaniittutut misigititsineq sooq eqqunngitsuliornerua?

⁵ Ilinniartoq naalagaaffilersaarfimmut pulaareerluni ima allappoq: „Upperisarsiortut assigiinngitsut naggueqatigiinnit imaluunniit inuiaqatigiinnit aalajangersimasunit kajungerineqartarput. . . . Kisianni Jehovap Nalunaajaasui immikkuutaarnatik tamarmik ataatsimoorput.“ Ukiunili hundredelinni siullerni Korinthimi ilagiinni immikkoortukkuutaartoqalersimavoq. Taamatut saqitsaatsitsilernermikkut Guutip anersaava illernartoq, eqqissinermik ataasiussusermillu siuarsaasoq, akornuserpaat. (Galatiamiut 5:22) Ilagiinni immikkoortukkuutaarluta allanik avataaniittutut misigititsisarutta, uaguttaaq anersaap siulersuinera akornusissavarput. Taamaattumik apustili Paulusip Korinthimiunut ima allannera eqqaamatigu: „Oqaaqqissaarpassi, qatanngutit, Naalakkatta Jiisusi-Kristusip aqqagut  isumaqatigeeqqullusi akornassinni avissaartuunneqaleqqunagu eqqarsaatissigulli isumassigullu ataasioqatigeeqqullusi.“ (1 Korinthimiut 1:10) Ataasiussuseqarnerup pingaaruteqarnera Paulusip aamma Efesosimiunut allakkamini erseqqissarpaa. — Efesosimiut 4:1-6, 16.

6, 7. Assigiinngisitsineq pillugu Jaaku qanoq siunnersuiva, tamannalu qanoq maleruarsinnaavarput?

⁶ Kinaassusersiortuunnginnissaq kristumiunut piumasaqaataajuaannarsimavoq. (Romamiut 2:11) Ukiuni hundredelinni siullerni kristumiut ilaasa pisuut allanit pingaartinnerummatigik, ajoqersukkap Jaakup ima allaffigai: „Qatanngutikka, Naalakkatsinnut Jiisusi-Kristusimut naalannartitaasumut uppertuusinnaanngilasi kinaassusersiortuugussi. Katisimasarfissinnut isertoqarpat angummik akisuunik atisalimmik kuultimillu assammiulimmik aammalu angummik allamik piitsumik ipertuunik atisalimmik, angullu akisuunik atisalik kisiat ilassiorussiuk oqarfigalugulu: ’Uunga issialluarnartumut inginniarit,’ piitsumulli oqarlusi: ’Tamaani nikorfaniarit, natermulluunniit inginniarit,’ taava immissinnut akerlilinnginnerpisi eqqartuussisunngortillusilu ajortunik eqqarsaateqartut?“ — Jaaku 2:1-4.

⁷ Pisuut uppinngitsut kuultimik assammiullit kusanartunillu atisallit ataatsimiigiartut piitsunit uppinngitsunit ipertuunik atisalinnit ajunngingaarnerusumik pineqartarput. Pisuut „issialluarnartumut“ issiavissinneqartarput, piitsulli nikorfaannaqquneqartarput natermulluunniit ingeqquneqartarlutik. Guutilli kinaassusersiorani Jiisusip utertitsissutitut pilliutaa pisuunut aammattaaq piitsunut iluaqutissanngortippaa. (Jobi 34:19; 2 Korinthimiut 5:14) Taamaattumik Jehovamut iluarisaassagutta suleqatigiilluarlutalu kiffartorfigissagutsigu, kinaassusersiortuussanngilagut ’inuilluunniit iluaqutissarsiorfigalugit qujanarniarfigissanagit’. — Judasi 4, 16.

Oqalorujunnaveersaartariaqarpugut

8. Israelikkut oqalorujuttut qanoq pineqarpat?

⁸ Ataasiussuseqartuarumalluta Guutimullu iluarisaajuarumalluta, Paulusip siunnersuutaata malinnissaa pingaaruteqarpoq: ’Suliasi nungullugit oqalorujunnasi . . . suliarisigik.’ (Filípimiut 2:14, 15) Israelikkut uppinngitsut Egyptenimit inussiaajunnaarsitaasimasut Mosesimut Aronimullu oqalorujupput, taamaalillutillu Jehova Guutimut. Tamatuma kingunerisaanik angutit aalajaatsut Josva Kalebilu levikkullu kisimik nunamut neriorsuutigisamut iserput. Angutit allat 20-nik ukioqalereersimasut tamarmik Israelikkut ukiuni 40-ni inoqajuitsumi angalaarneranni toqupput. (4 Mosesi 14:2, 3, 26-30; 1 Korinthimiut 10:10) Oqalorujunnertik akisunaarpaat!

9. Mirjami oqalorujukkami suneqarpa?

⁹ Tamatuma takutippaa inuiaqatigiit oqalorujuttut qanoq pineqarsinnaasut. Inuimmi ataasiakkaat oqalorujuttartut qanoq pineqartarpat? Mosesip qatanngutai Mirjami Aronilu ima oqalorujupput: „[Jehovap] Mosesi kisiat oqaluussimanerpaa? Aamma uatsinnut oqalussimannginnerpa?“ Oqaluttuarlu ima nangippoq: „[Jehovap] taama oqarnerat tusaavaa.“ (4 Mosesi 12:1, 2) Tamanna qanoq kinguneqarpa? Mirjami, naammagittaalliornermi akisussaanerpaajugunartoq, Guutimit nikanarsagaavoq. Pupissunngorpoq ullunilu arfineq-marlunni tammaarsimaffiup avataaniittariaqarluni pupeerunnissami tungaanut. — 4 Mosesi 12:9-15.

10, 11. Oqalorujunneq qanoq kinguneqarsinnaava? Assersuuteqarit.

¹⁰ Oqalorujunneq naapertuilluanngitsuliorfigineqarnermik naammagittaalliuutiginninnerinnaanngilaq. Oqalorujuttuaannartut isumammaminnik inissisimaffimminnillu pingaartitsivallaarput. Imminnut malugeqqusaartuupput Guuti malugititassartik malugineqartinnagu. Taamaaqqajaanertik akiunngikkunikku  anersaakkut qatanngutimik akornanni avissaartuutsisissapput suleqatigiilluarlutillu Guutimut kiffartorniarnerat akornusissallugu. Oqalorujuttartummi isumaqatissarserusullutik naammagittaannertik ersersittuaannarpaat.

¹¹ Imaassinnaavoq utoqqaanertap saqqummiusseriaasia suliassaminilluunniit nakkutiginninnera isornartorsiorneqartoq. Isornartorsiuisoq tusarnaarutsigu taassumatut eqqarsalersinnaavugut. Naammagittaannerup naatsiiassartaa isummatsinnut ikkunnissaata tungaanut immaqa utoqqaanertaq isornartoqartinngilarput, maannali isornartoqartilerparput. Naggataatigut isumarput malillugu eqqortumik iliorsinnaajunnaassaaq, uagullu aamma naammagittaalliuutigilersinnaavarput. Jehovap innuttaani taamaattoqassanngilaq.

12. Oqalorujuttarutta Guutimut attaveqarnerput qanoq sunnerneqarsinnaava?

¹² Angutit Guutip savaataanik paarsisuutitaasut pillugit oqalorujuttarutta mitaatigilersinnaavavut. Perloqqugutsigik Jehovamut attaveqarnerput ajoqusingaarsinnaavarput. (2 Mosesi 22:27) Mitallersut allamik isumataanngitsut Guutip Naalagaaffia kingornutissanngilaat. (1 Korinthimiut 5:11; 6:10) Ajoqersukkap Judasip oqalorujuttut pillugit allappoq ’naalagaasut asiginnaraat naalannartullu mitallugit’, tassa ilagiinni qatanngutit angutit akissussaaffillit. (Jûdase 8) Guutip oqalorujuttartut iluarinngilai, silatusaassaagullu ajortitsiniaallutik oqaluttut qanillinaveersaarutsigik.

13. Sooq naammagittaalliornerit tamarmik ajortuunngillat?

¹³ Soorunami imaanngilaq naammagittaalliuutit tamaasa Guutip ajorigai. Sodoma Gomorralu pillugit maalaarluni ’nipitoqisumik nilliasoqarnera’ tusaanngitsuusaanngilaa, illoqarfiilli guutiitsut taakku piuneeruppai. (1 Mosesi 18:20, 21; 19:24, 25) Ukiumi 33-mi piinsip ulluata kinguninngua Jerusalemimi „hellenistit hebræerit oqalorujuutigilerpaat ullut tamaasa nerisassanik agguaanermi uillarnertamik tunulliunneqartarnerat“ pillugu. Tamanna apustilit aaqqippaat „angutinik arfineq-marlunnik iluarisaasunik“ nerisassanik agguaanermik suliamik pisariaqartumik suliaqartitassaminnik toqqaanermikkut. (Apustilit Suliaat 6:1-6) Ullumikkut utoqqaanertat naammagittaalliuutinut pissutissaqartunut ’siutitik milissanngilaat’. (ússatit 21:13) Aamma uppeqatitik isornartorsiussanngilaat, nakussatsittariaqarpaalli ineriartortittariaqarlugillu. — 1 Korinthimiut 8:1.

14. Oqalorujunnaveersaassagutta pissuseq suna immikkut pingaaruteqarpa?

¹⁴ Tamatta oqalorujunnaveersaartariaqarpugut, naammagittaallioqqajaanermi anersaakkut peqqinnanngilaq ataasiussuseqarunnaarsitsisarlunilu. Akerlianik anersaaq illernartoq uagutsinni asanninnermik inerititaqartittuartariaqarparput. (Galatiamiut 5:22) Asanninneq pillugu „inatsit akimasoq“ maleruarutsigu, suleqatigiilluarluta Jehova kiffartorfigiuarsinnaassavarput. — Jaaku 2:8; 1 Korinthimiut 13:4-8; 1 Petrusi 4:8.

Mamarliineq mianersorfigiuk

15. Oqaatissuaanerup mamarliinerullu assigiinngissutaat qanoq nassuiassaviuk?

¹⁵ Oqalorujunneq ajoqutaasumik oqaatissuaaninngoriaannaavoq, taamaattumillu oqaatsivut mianersuuttariaqarpavut. Oqaatissuaaneq allat taakkualu kisimik susassaat pillugit asuliinnaq oqalunneruvoq. Mamarliinerli tassaavoq alla tusaamasaanerlutsinniarlugu eqqunngivissunik piaaraluni ingerlatsitseqqinneq. Ajoqusiiniarneruvoq Guutillu piumasaanut akerliulluni. Taamaattumik Guutip Israelikkut ima peqquai: ’Mamarliisutut angalassangilatit innuttavit akornanni.’ — 3 Môrsase 19:16.

16. Oqaatissuaasut pillugit Paulusi qanoq allappa, siunnersuutaatalu qanoq iliortittariaqarpaatigut?

¹⁶ Asuliinnaq oqalunneq mamarliininngorsinnaammat, oqaatissuaasut Paulusip mianersoqqussutigai. Uillarnerit ilagiinnit ikiortariaqartut taareerlugit, eqqaavai uillarnerit ’illunut pulaaqattaartuarnertik tarfiinnartunnguutigisaraat, allaallumi oqalukkumavallaartunngortartut susassarinngisaminnut akuliuttarlutik kusanaatsunillu oqaaseqartarlutik’. (1 Timotheusi 5:11-15) Arnap kristumiup paasiguniuk mamarliinermik kinguneqarsinnaasumik oqalunneq sanngiiffigalugu, arnat ’titsiitsuunissaat mamarliisuunnginnissaallu’ pillugu Paulusip siunnersuutaa eqqaamajuartariaqarpaa. (1 Timûtiuse 3:11) Soorunami aamma angutit kristumiut ajoqutaasumik  oqaatissuaaneq mianersorfigisariaqarpaat. — Ussatit 10:19.

Eqqartuussissaarit

17, 18. (a) Qatanngummik eqqartuussineq pillugu Jiisusi qanoq oqarpa? (b) Siunnersuutaa qanoq maleruarsinnaavarput?

¹⁷ Allaat allanik mamarliisanngikkaluarutta, imaassinnaavoq ilungersortariaqartugut eqqartuusseqqajaasarunnaarniarluta. Taamaaqqajaaneq Jiisusip ima assuaraa: „Eqqartuusseqinasi eqqartuunneqaqqunasi. Eqqartuussissutigisassinnimmi eqqartuunneqarumaarpusi, uuttuutigisassinnillu uuttuiffigineqarumaarpusi. Sooq qatanngutivit issiutaa makiarninnguaq isiginiarpiuk, paakkarut illit isinniittoq maluginagu? Imaluunniit qatanngutinnut qanoq oqarsinnaavit: Issiutit peerallarlara uffa paakkarummik illit isinniittoqartoq. Ilumoortuusaartutit uumaa, paakkarut illit isinniittoq peeqqaarallaak, taava isigilluarsinnaassaatit qatanngutivit issiutaata peernissaanut.“ — Matthæusi 7:1-5.

¹⁸ Imminut tatigivallaarluta qatanngutitta issiutaa ’makiarninnguaq’ peerniassanngilarput nammineq naliliisinnaanerput assersuutaasumik ’paakkarummit’ sanngiillisinneqarsimappat. Guuti qanoq nallittuitigisoq paasilluarsimagutsigu, anersaakkut qatanngutivut eqqartuuteqqajaassanngilavut. Qanoq ililluta ataatatsitut qilammiusutut paasilluartigisinnaassavavut? Tupinnanngilaq Jiisusip ima peqqummatigut: „Eqqartuusseqinasi eqqartuunneqaqqunasi.“ Naammalluinnanngissutitsinnik unneqqarilluta naliliinitta Jehovap isaani naapertuilluanngitsumik eqqartuussinaveertissavaatigut.

Qajannartut — siunertamulli ataqqinartumut atugassat

19. Uppeqativut qanoq pissuseqarfigisariaqarpavut?

¹⁹ Uppeqativut suleqatigilluarlugit Guuti kiffartorfiginiarlugu aalajangiusimagutsigu, eqqartuunnaveersaaginnassanngilavut. ’Ataqqeqatigiissaagut immitsinnut akimorniulluta’. (Romamiut 12:10) Uagutsinnut pitsaanerpaaq pinnagu taakkununnga pitsaanerpaaq noqqaassutigissavarput, nuannaarutigalugulu suulluanngitsunik allaat kiffartuutissavavut. (Johannesi 13:12-17; 1 Korinthimiut 10:24) Qanoq ililluta taamatut pissuseqartuaannarsinnaavugut? Taamaaliorsinnaavugut Jehovamut uppertut tamarmik taassumunnga erlinnangaartuusut eqqaamajuarutsigu. Aammattaaq eqqaamasariaqarparput immitsinnut pisariaqartilluta, inuup timaata pisataasa imminnut  pinngitsoorsinnaannginnerattut. — 1 Korinthimiut 12:14-27.

20, 21. Timotheusimut allakkat aappaat 2:20, 21-mi oqaatsit uagutsinnut qanoq isumaqarpat?

²⁰ Kristumiut ’immersagaapput marraasut’ qajannartut erlinnartuummik naalannartumik, Guutimut kiffartornermik, paarsisitaasut. (2 Korinthimiut 4:7) Suliareqqusaq illernartoq tamanna Jehovap ataqqinaatissaanik suliarissagutsigu, Guutip erneratalu isaanni ataqqinartuujuartariaqarpugut. Aatsaat ileqqussatigut anersaakkullu minguitsuugutta, ’puugutaasinnaavugut ataqqinartut’ Guutimit atorneqarsinnaasut. Tamatumunnga tunngatillugu Paulusi ima allappoq: „Illorujussuarmimi kuultinik sølvinillu puugutaqaannanngilaq, aammattaarli qisunnik marrarnillu puugutaqarpoq, ilaat siunertamut ataqqinartumut allalli siunertamut ataqqinanngitsumut atugassat. Taamaammat taaneqartunut kingullernut ilaanngitsoq puugutaassaaq siunertamut ataqqinartumut atugassaq, illernartitaasoq, naalakkaminut iluaqutaasoq, ajunngitsuliornissanut tamanut piareersimasoq.“ — 2 Timotheusi 2:20, 21, NV.

²¹ Pissusilersornermikkut Guutip piumasaqaataanik sumiginnaasut ’siunertamut ataqqinanngitsumut atugassaapput’. Guutilli piumasaatut iliorutta, ’puugutaassaagut siunertamut ataqqinartumut atugassat, illernartitaasut imaluunniit Jehovamut kiffartortussatut immikkoortitaasut ajunngitsuliornissanullu tamanut piareersimasut’. Taamaattumik imminut ima aperisariaqarpugut: ’Uanga puugutaavunga „siunertamut ataqqinartumut“ atugassaq? Uppeqatikka ajunngitsumik sunnertarpakka? Ilagiinni allat suleqatigilluarpakka?’

Suleqatigiilluarluta kiffartortuarta

22. Ilagiit kristumiut sumut assersuunneqarsinnaappat?

²² Ilagiit kristumiut ilaqutariinnut assingusumik aaqqissuussaapput. Ilaqutariinniittut tamarmik Jehova pallorfigigunikku, asannittuussapput ikiuiumatuujullutillu, pissutsillu nuannersuussapput. Ilaqutariinniittut assigiinngilluinnartunik pissuseqarsinnaapput, tamarmilli ataqqinartumik inissisimaffeqarput. Ilagiinni pissutsit aamma taamaapput. Assigiinngitsuuvugut naammalluinnanngitsuullutalu, Guutilli Kristusikkut imminut kajungilersippaatigut. (Johannesi 6:44; 14:6) Jehovap Jiisusillu asavaatigut, ilaqutariittullu ataasiussuseqartutut asaqatigiinnissarput pingaaruteqarluinnarpoq. — 1 Johannesi 4:7-11.

23. Suna eqqaamasariaqarparput, sunalu aalajangiusimasariaqarparput?

²³ Aammattaaq ilagiit kristumiut ilaqutariinnut assingullutik ilumoorfigeqatigiinnissamik naatsorsuutiginnissinnaaffiupput. Apustili Paulusi ima allappoq: „Taamaattumik piumasaraara angutit sumiikkaluarunilluunniit qinujuassasut, assaat ilumoorfiginnittut qullarlugit, kamannatik saqitsaannatillu.“ (1 Timotheusi 2:8, NV) Paulusi naapertorlugu ’sumiikkaluarluniluunniit’ kristumiut katerisimasarfianni nipituumik qinugaanni ilumoorfiginnittuusariaqarpoq. Angutit ilumoorfiginnittut kisimik ilagiit sinnerlugit qinusariaqarput. Soorunalimi Guutip naatsorsuutigaa tamatta ilumoorfigissagitsinni ilumoorfigeqatigiissasugullu. (Oqaluussisartup oqaasii 12:13, 14) Taamaattumik, timip avataasa suleqatigiilluarnerattut, suleqatigiilluarnissarput aalajangiusimatigu. Aammattaaq Jehovamut pallorfiginnittutut taassuma anersaakkut ilaqutariissortaanut ilaasutut ataasiussuseqarluta kiffartorta. Pingaarnerpaamillu eqqaamatigu immitsinnut pisariaqartittugut Jehovamillu iluarisaassasugut pilluaqqusaassasugullu suleqatigiilluarluta taanna kiffartorfigiuarutsigu. (wE 11/15 02)

Qanoq akissavit?

• Suna pissutigalugu Jehovap innuttaasa suleqatigiilluarlutik kiffartorfigisinnaavaat?

• Sooq kristumiut kinaassusersiortuunngillat?

• Oqalorujunnerup eqqunngitsuunera qanoq nassuiassaviuk?

• Sooq uppeqativut ataqqisariaqarpavut?

[Atuaqqissaarnermi apeqqutit]

[Qupp. 27-mi assiliartaq]

Petrusip paasivaa „Guuti kinaassusersiortuunngitsoq“

[Qupp. 28-mi assiliartaq]

Nalunngiliuk sooq Guutip Mirjami nikanarsaraa?

[Qupp. 30-mi assiliartaq]

Kristumiut ilumoorfiginnittut nuannaarlutik Jehova kiffartorfigaat suleqatigiilluarlutik