Ulluni kingullerni kristumiut kalluunnaveersaartut
Ulluni kingullerni kristumiut kalluunnaveersaartut
„Silarsuarmut ilaanngillat, soorlu uanga silarsuarmut ilaanngitsunga.“ — JOHANNESI 17:16, NV.
1, 2. Ajoqersukkami silarsuarmut attaveqarnerat pillugu Jiisusi qanoq oqarpa, suullu apeqqutaalerpat?
UNNUMMI inuttut naammalluinnartutut inuuffigisamini kingullermi Jiisusi ajoqersukkani tusaatillugit takisuumik qinuvoq. Qinnutsimini kristumiut ilumoortut tamarmik inuunerat eqqaavaa. Ajoqersukkani pillugit oqarpoq: „Illit oqaatsinnik tunivakka, silarsuulli uumissorpai silarsuarmut ilaanngimmata, soorlu uanga silarsuarmut ilaanngitsunga. Qinnutinngilakka silarsuarmit peerseqqullugit, ajortorli pissutigalugu paareqqullugit. Silarsuarmut ilaanngillat, soorlu uanga silarsuarmut ilaanngitsunga.“ — Johannesi 17:14-16, NV.
2 Jiisusip marloriarluni oqaatigaa ajoqersukkani silarsuarmut ilaanngitsut. Tamanna akerleriissuteqarnernik kinguneqarsinnaasarpoq — silarsuup uumissussavai. Kristumiulli qunusariaqanngillat, Jehovammi sernigissavai. (Ussatit 18:10; Matthæusi 24:9, 13) Jiisusilli oqaasiisa makku apeqqutaalersippaat: ’Sooq kristumiut ilumoortut silarsuarmut ilaanngillat? Silarsuarmit avissaarsimanissaq qanoq isumaqarpa? Kristumiut silarsuarmit uumissorneqassasut eqqarsaatigalugu, silarsuaq qanoq isigaat, ingammik silarsuarmi maani oqartussaatitaasut?’ Apeqqutinut akissutit Biibilimeersut pingaarutilerujussuupput, tamatsinnummi attuumasuteqaramik.
’Guutimit pivugut’
3. (a) Sooq silarsuarmut ilaanngilagut? (b) ’Silarsuup tamarmi ajortumit pissaaneqarfigineqarneranut’ sunik uppernarsaateqarpugut?
3 Silarsuarmut ilaannginnitsinnut pissutaasut ilagaat Jehovamut qanittumik attaveqarnerput. Apustili Johannesi allappoq: „Ilisimavugut Guutimit pisugut, silarsuarli tamaat ajortup pissaaneqarfigigaa.“ (1 Johannesi 5:19, NV) Johannesip silarsuaq pillugu oqaasii ilumoortuusut tamanut erseqqilluinnarpoq. Saatanip, Guutiunngitsup, sunniinerata kingunerai ullutsinni atugaaqisut sorsunnerit, pinerluttuliorneq, peqqarniitsuuneq, naqisimanninneq, unneqaserlunneq kanngunartuliornerillu. (Johannesi 12:31; 2 Korinthimiut 4:4; Efesosimiut 6:12) Jehovap Nalunaajaasuinut ilanngukkaanni iliuutsit eqqunngitsut tamakku iliuuserinagilluunniit akuerineqassanngillat, taamaaliornerlu silarsuarmit avissaarsimatitsivoq. — Romamiut 12:2; 13:12-14; 1 Korinthimiut 6:9-11; 1 Johannesi 3:10-12.
4. Jehovap pigigaatigut qanoq takutipparput?
4 Johannesi nangilluni allappoq kristumiut, silarsuaq assiginagu, ’Guutimit pisuusut’. Tunniulluinnartut tamaasa Jehovap pigai. Apustili Paulusi allappoq: „Inuugutta [Jehovamut] inuuvugut, toquguttalu [Jehovamut] toquvugut. Tassa inuugutta toquguttaluunniit [Jehovap] pigaatigut.“ (Romamiut 14:8; Tussiaat 116:15) Jehovap pigimmatigut tunniusimalluinnarfigaarput. (2 Mosesi 20:4-6) Tamanna isumaqarpoq kristumiut silarsuarmi suliniuteqarnermut sumulluunniit inuunertik tunniulluinnassanngikkaat. Inuiattut ilisarnaatit ataqqivaat, pallorfigisussaanngilaalli, eqqarsaatimikkut iliuutsimikkulluunniit. Timersullammassuit ullutsinniluunniit nuannaartorineqartut ingasattumik nuannaartorineq ajorpaat. Soorunami allat iluarisaminnik iliorsinnaanerat kristumiut ataqqivaat, namminnerli Pinngortitsisoq kisiat pallorfigaat. (Matthæusi 4:10; Saqqummersitat 19:10) Tamatumuunattaaq silarsuarmit allaanerupput.
„Naalagaaffiga silarsuarmit matumannga pinngilaq“
5, 6. Guutip naalagaaffiani innuttaanerput pissutigalugu qanoq silarsuarmit allaaneruvugut?
5 Kristumiut silarsuarmit allaanerussutaat alla tassaavoq Jiisusi Kristusimut ajoqersugaanerat, Guutillu naalagaaffiani innuttaanerat. Jiisusi Pontiusi-Pilatusimit killisiorneqarluni oqarpoq: „Uanga naalagaaffiga silarsuarmit matumannga pinngilaq. Uanga naalagaaffiga silarsuarmit matumannga pisuugaluarpat kiffama akiuullutik illersussagaluarpaannga juutinut pisinneqaqqunanga; kisiannili naalagaaffiga silarsuarmit matumannga pinngilaq.“ (Johannesi 18:36) Naalagaaffik aqqutigalugu Jehovap aqqa illernarsisinneqarumaarpoq, kisimi oqartussaanera atuuttussanngortinneqarumaarluni nunarsuarmilu qilammisut piumasaa naammassineqarumaarluni. (Matthæusi 6:9, 10) Jiisusip kiffartornini tamaat Naalagaaffik pillugu nutaarsiassaq nuannersoq oqaluussissutigaa, oqarporlu aaqqissuussaanerup ajortup matuma naggatissaa tikillugu ajoqersukkami tamanna oqaluussissutigissagaat. (Matthæusi 4:23; 24:14) Oqaatsit siulituuttaasut Saqqummersitat 11:15-imiittut 1914-imi eqquupput: „Silarsuarmi naalagaassuseq Naalakkatta tanitaatalu maanna pigilerpaat, kunngiussaarlu naassaanngilluinnartumik.“ Ungasinngitsukkut naalagaaffik taanna qilammeersoq inunnut kisermaassilluni naalakkersuilissaaq. (Danieli 2:44) Naalagaaffiup taassuma kisimi oqartussaanera silarsuarmi aqutsisut allatut ajornartumik akuerisariaqassavaat. — Tussiaat 2:6-12.
6 Tamakku tamaasa eqqarsaatigalugit kristumiut ullumikkut Guutip nalagaaffiani innuttaapput, aamma Guutip ’naalagaaffianik naapertuilluassusermillu taassuma pianik salliutitsiuarnissamik’ Jiisusip siunnersuutaa malippaat. (Matthæusi 6:33, NV) Imaanngilaq nunamut innuttaaffigisaminnut ilumuunngitsuusut, anersaakkulliuna silarsuarmit avissaarsimasut. Ukiuni hundredelinni siullerni kristumiut pisarnerattut ullumikkut ’Guutip naalagaaffianik nassuiaaneq nalunaajaanerlu’ pingaarnertut pisussaaffigaat. (Apustilit Suliaat 28:23) Nunarsuarmi naalakkersuisut kikkulluunniit suliap Guutimeersup tamatuma akornusernissaanut pisinnaatitaanngillaat.
7. Sooq kristumiut kalluunnaveersaartuuppat, qanorlu tamanna takutissimavaat?
7 Jehovap Nalunaajaasui Jehovamit pigineqaramik, Jiisusimut ajoqersugaagamik Guutillu naalagaaffiani innuttaagamik 1900-kkunni 2000-ikkunnilu nunarsuarmi aaqqiagiinngissutinut suugaluartunulluunniit kalluunnaveersaartuupput. Illersugaqaratillu silamiut sulissutigisaannik sumilluunniit tapersersuisimanngillat, kimulluunniillu sakkulersorsimanatik. Akiugassaanngippasittumik akerlilersorneqartaraluarlutik sakkortuumik uppersuseqarsimapput, 1934-milu Tysklandip naalakkersuisuinut nazistiusunut nalunaarutigisartik aalajangiusimajuarpaat: „Politikkikkut suliassat soqutiginngilavut, Guutilli naalagaaffianut, kunngip Kristusip ataani, tamakkiisumik tunniusimavugut. Kinaluunniit ajoquserusunngilarput. Iluarissaqaarput eqqissilluta najugaqarsinnaagutta tamanullu ajunngitsuliorfigisinnaasatsinnut ajunngitsuliorluta.“
Kristusi sinnerlugu aallartitat
8, 9. Aallartitatut kiffartornerat Jehovap Nalunaajaasuinut qanoq sunniuteqarpa, inuiannullu attaveqarnerannut tamanna qanoq sunniuteqarpa?
8 Paulusi imminut pilluni kristumioqatinilu tanitat allat pillugit oqarpoq ’Kristusi sinnerlugu oqariartortitaallutik Guuti imminnut oqaaqqissaarimmat’. (2 Korinthimiut 5:20; Efesosimiut 6:20) 1914-imiilli kristumiut tanitat ’qitornatut’ Guutip naalagaaffiata aallartitaatut taagorneqarluarsinnaalersimapput. (Matthæusi 13:38; Filippimiut 3:20; Saqqummersitat 5:9, 10) Aammattaaq Jehovap ’savat allat’ ’amerlangaartut’ inuianneersut katersorsimavai. Taakkua kristumiuupput nunarsuarmi inuunissaminnik neriugisallit, qitornallu tanitat aallartitatut kiffartorneranni tapersersuisuupput. (Saqqummersitat 7:9; Johannesi 10:16) ’Savat allat’ Guutip naalagaaffiata ’aallartitaanik’ taaneqarsinnaapput.
9 Aallartitap suleqataasalu nunami kiffartorfigisaminni pisut akuliuffigisanngilaat. Taamatuttaaq kristumiut nunat assigiinngitsut politikkikkut suliniutaannut kalluunnaveersaartuupput. Naggueqatigiissuseq, inuiaassuseq, inuttut aningaasarsiornikkullu suliniutit assigiinngitsut isummerfigineq ajorpaat. (Apustilit Suliaat 10:34, 35) Akerlianik ’tamanut ajunngitsuliornissartik’ ulapputigaat. (Galatiamiut 6:10) Jehovap Nalunaajaasui kalluunnaveersaartuummata oqariartuutaat kikkunnilluunniit itigartinneqarsinnaanngilaq, ammip qalipaataa, inuiaassuseq naggueqatigiissuserluunniit pissutigalugu aaqqiagiinngissutinut illuatungiliuttunik tapersersuinerarlugit.
Asanninneq ilisarnaatigaat
10. Asanninneq kristumiumut qanoq pingaaruteqartigaa?
10 Kristumiunut allanut attaveqarnertik pissutigalugu kristumiut silarsuarmut tunngassutilinnut kalluunnaveersaartarput. Jiisusi ajoqersukkaminut oqarpoq: „Asaqatigiikkussi tamatumuuna tamarmik paasissavaat ajoqersugarigissi.“ (Johannesi 13:35) Qatanngutigiittut asaqatigiinneq kristumiuunerup ilagaa pingaarutilik. (1 Johannes 3:14) Jehovamut Jiisusimullu qanittumik attaveqarnermigut kristumiu qatanngutiminut qanittumik attaveqartarportaaq. Qatanngutit ilagiinniittuinnaat asanngilai. Aamma ’qatanngutit silarsuarmiittut’ tamaasa asavai. — 1 Petrusi 5:9.
11. Jehovap Nalunaajaasuisa asaqatigiinnerat qanoq pissusiinut sunniuteqartarpa?
11 Esaja 2:4 eqquutitillugu Jehovap Nalunaajaasuisa qatanngutigiittut asanninnertik ullumikkut takutittarpaat: „Saffiussavaat panatik assallatserummut savissaliaralugit, qalugiusatillu saviliaralugit viinnequtilerissutit. Inuiaat panamik imminnut silugutissaassapput, sorsunnissamut sungiusarunnaassallutik.“ Kristumiut ilumoortut Jehovamit ilinniartinneqartarput, taamaattumillu taanna eqqisseqatigalugulu imminnut eqqisseqatigiipput. (Esaja 54:13) Guuti qatanngutitillu asagamikkit inoqatiminnut nunani allaniittunut — uppeqatiminnut allamiunulluunniit — sakkulersornissartik eqqarsaatigisinnaanngilaalluunniit. Eqqissineq ataasiussuseqarnerlu guutisiornerannut ilaavoq pingaarutilik, Guutip anersaavata ilumut pigineranut uppernarsaataasoq. (Tussiaat 133:1; Mika 2:12; Matthæusi 22:37-39; Kolossemiut 3:14) Nalunnginnamikku ’[Jehovap] isaasa sammivigigaat iluartut, eqqissineq ujarpaat piniarlugulu’. — Tussiaat 34:15, 16.
Kristumiut silarsuaq qanoq isigigaat
12. Silarsuarmiunut Jehova qanoq isiginnittaaseqarpa, qanorlu Jehovap Nalunaajaasuisa tamanna ilaarpaat?
12 Jehovap silarsuaq manna eqqartuussimavaa, silarsuarmili inuit tamaasa suli eqqartuutinngilai. Piffissani nalliuppat Jiisusi aqqutigalugu taamaaliorumaarpoq. (Tussiaat 67:4, 5; Matthæusi 25:31-46; 2 Petrusi 3:10) Maannamulli inunnut asannittuliungaartarpoq. Tamaasa inuunermik naassaanngitsumik periarfissaqarsinnaaqqullugit ernituani allaat tunniussimavaa. (Johannesi 3:16) Kristumiutut Guutip asanninnera ilaarparput, annassinnaaqqulluta Guuti qanoq iliorsimanersoq allat oqaluttuullugit, itigartinneqakulagaluaraangattalu nikallorneq ajorpugut.
13. Silarsuarmi maani naalakkersuisut qanoq isigisariaqarpavut?
13 Silarsuarmi maani naalakkersuisut qanoq isigisariqarpavut? Tamanna Paulusip akivaa allakkami: „Tarnit tamarmik oqartussaasunut qulliunerusunut naalattaalit, oqartussaassuseqanngimmat Guutimit pinngitsumik; oqartussaasut piusut atorfimminnut annerusumik minnerusumilluunniit oqartussaassuseqarfiusunut Guutimit ivertitaapput.“ (Romamiut 13:1, 2, NV) Inuit ’oqartussaassuseqarallartitaammata’ (ilaat atorfikkaajunerullutik pingaanginnernilluunniit atorfeqarlutik, tamatigulli Jehovap ataani), Ajugaqanngitsup akuerimmagu taamaattoqarsimassaaq. Kristumiu Jehovamut naalakkusukkami silamiut oqartussaatitaannut naalatsigitittarpoq. Taavami Guutip uatsinnut ilimagisai silamiullu oqartussaatitaasa uatsinnit piumasarisaat akerleriippata?
Guutip inatsisai kaasarillu inatsisai
14, 15. (a) Kina naalanneqassanersoq pillugu akerleriissuteqarnissaagaluaq Danielip qanoq pinngitsoortippaa? (b) Kina naalanneqassanersoq pillugu akerleriinneq pinngitsoortissinnaannginnamikku hebræerit pingasut qanoq iliorpat?
14 Danielip ikinngutaasalu pingasut maligassiuilluarnermikkut takutippaat qanoq nunami naalakkersuisunut Guutillu oqartussaaneranut naalatsigitittoqarsinnaasoq. Hebræerit inuusuttut sisamat taakku Babylonimi aallarussaaqqanermik nalaani nunap inatsisai naalappaat, sivitsunngitsorlu immikkut ilinniartinneqartussatut qinerneqarput. Danielip paasigamiuk ilinniartitaaneq taamaattoq Jehovap inatsisaanut akerliulissasoq, pisortaq tamanna pillugu oqaloqatigaa. Tamatuma kingorna hebræerit sisamat taakkua nalunngeqatiginnissutaat ataqqillugit immikkut aaqqiisoqarpoq. (Danieli 1:8-17) Pisariaqanngitsumik ajornartorsiutit pinaveersaarniarlugit Jehovap Nalunaajaasuisa ileqqorissaarlutik oqartussaatitaasut oqaloqatigigaangamikkit Danielip maligassiaa malittarpaat.
15 Naalatsigitinnissarli pillugu akerleriinneq kingusinnerusukkut pinngitsoortinneqarsinnaasimanngilaq. Babylonip kunngiata inuusaliarsuaq Durap qooruani nappartippaa, pisortanilu atoqqaarfissiortitsinermut peqataajartoqqullugit naalakkerpai. Taamaalinerani Danielip ikinngutai pingasut Babylonip immikkoortortaani pisortaapput, taamaattumillu naalakkiut taakununngattaaq naalakkiutaavoq. Atoqqaarfissiortitsinerup ingerlanerani najuuttut tamarmik inuusaliarsuup saavanut pallussapput. Hebræerilli nalunngilaat taamaliorneq Guutip inatsisaanut naapertuutinngitsoq. (5 Mosesi 5:8-10) Allat tamarmik inuusaliarsuaq pallorfigimmassuk nikorfaannarput. Kunngip naalakkiutaa naalannginnamikku naalliutsitaallutik toqutaasinnaapput, tupinnartuliornerinnakkullumi inuunerat annaanneqarpoq; Jehovamulli naalannginnissaminnut taarsiullugu toqoriaannaapput. — Danieli 2:49–3:29.
16, 17. Apustilit oqaluusseqqusaajunnaaramik qanoq akippat, aamma sooq?
16 Ukiuni hundredelinni siullerni Jerusalemimi juutit aqutsisuisa Jiisusip Kristusip apustilii aggersarpaat naalakkerlugillu Jiisusip aqqani oqaluussiunnaaqqullugit. Qanoq qisuariarpat? Nunani tamani, soorunami aamma Judæami, ajoqersuganngortitsinissaminnik Jiisusimit pisinnaatinneqarsimapput. Aammattaaq oqaluuppai Jerusalemimi silarsuullu sinnerani nalunaajaasorissallugit. (Matthæusi 28:19, 20; Apustilit Suliaat 1:8) Apustilit ilisimavaat Jiisusip peqqussutai Guutip piumasaanut ersiutaasut. (Johannesi 5:30; 8:28) Taamaattumik oqarput: „Guuti naalakkatsitut inunnit naalattariaqarneruarput.“ — Apustilit Suliaat 4:19, 20; 5:29, NV.
17 Apustilit pikitsitsiumatuujunngillat. (Ussatit 24:21) Guutilli piumasaanik iliornissartik nunami naalakkersuisut inerteqqutigigaangassuk, ima oqaannartarput: ’Guuti naalattussaavarput, inuit pinnagit.’ Jiisusi oqarpoq ’kaasari tunissagipput kaasarip piinik, Guutilu Guutip piinik’. (Markusi 12:17) Inuit Guutip inatsisaanik unioqqutitsisippatigut, Guutip pisassaralua inunnut tunniutissavarput. Kaasarip pisassaa tunniutissavarput, akueraarpulli Jehova annermik oqartussaassuseqartuusoq. Silarsuarmi kisimi Oqartussaavoq, Pinngortitsisoq, aap, oqartussaassutsip pilerfia. — Saqqummersitat 4:11.
Aalajaanniarpugut
18, 19. Qatanngutitta ilarpassui nersortarialimmik qanoq isummersimappat, maligassiaallu qanoq malissinnaavarput?
18 Ullumikkut pissutsit taama ittuutillugit nunani amerlanerni oqartussaatitaasut Jehovap Nalunaajaasuisa kalluunnaveersaarnerat akueraat, qujamasuutigaarpullumi. Nunalli ilaanni sakkortuumik akerlilersorneqartarpugut. 1900-kkulli aallartinneranniit ulloq manna tikillugu qatanngutitta anersaakkut ittumik ’uppernerup sorsunnera ajunngitsoq sorsuutigaat’. — 1 Timotheusi 6:12, NV.
19 Taakkunatut qanoq aalajaassinnaavugut? Siullermik eqqaamasariaqarparput akerlilersorneqarsinnaalluta. Akerlilersorneqassagutta tupaallallutaluunniit tuparujussuartariaqanngilagut. Paulusi mianersoqquserpaluttumik Timotheusimut allappoq: „Kristusi-Jiisusimi Guutimut tunniusimallutik inuujumasut tamarmik aamma malersorneqassapput.“ (2 Timotheusi 3:12, NV; 1 Petrusi 4:12) Sooq silarsuarmi Saatanip anersaavanit sunnerneqapilussimasumi akerlilersorneqassanngilagut? (Saqqummersitat 12:17) Aalajaattuartilluta ’tupigusuttunik mitattunillu’ inoqartuassaaq. — 1 Petrusi 4:4.
20. Suut qiimmassaatigalugit eqqarsaatigisinnaavavut?
20 Aappassaanik qularinngilluinnarparput Jehovap taassumalu inngiliisa tapersersussagaatigut. Eliasip oqarneratut „uagut ilivut akeqqatta iliinit amerlanerupput“. (2 Kunngit 6:16; Tussiaat 34:8) Akerlilersuineq ilaannikkut Jehovap siunertaanut iluaqutaasarpoq. Aalajaannissatsinnulli nukissaqalersittuaannarpaatigut. (Esaja 41:9, 10) Ilaasa inuunertik annaasimavaat, avaarutiginngilarpulli. Jiisusi oqarpoq: „Ersigeqinasigit timimik toqutsisut tarnimilli toqutsisinnaanatik. Ersigisiulli tarnimik timimillu Anniarfimmi aserortitsisinnaasoq.“ (Matthæusi 10:16-23, 28) Pissutsit aaqqissuussaaneranni matumani ’allamiuusutut inuugallarpugut’. Guutip silarsuassaani nutaami „inuunivik pigilersinnaaqqullugu“ piffissarput atorparput. (1 Petrusi 2:11; 1 Timotheusi 6:19) Guutimut aalajaattuarutta inuup kialuunniit akissarsiassamik taassumannga arsaarsinnaanngilaatigut.
21. Suna tamatigut eqqaamasariaqarparput?
21 Taamaattumik ajunngisaarfigineqarluta Jehova Guutimut attaveqarnerput eqqaamaniartigu. Kristusimut ajoqersugaasinnaagatta Naalagaaffimmilu innuttaasinnaagatta tamatigut qujamasunissatsinnut pissutissaqarluarpugut. Uppeqativut qamuuna asaniartigit, asanninnerallu nuannaarutigisigu. Tamanit pingaarnerutillugu tussiaasiortup kajumissaarutaa malinniartigu: „[Jehova] neriuffiguuk, nikallornatit tatitusaarit, [Jehova] neriuffiguuk!“ (Tussiaat 27:14; Esaja 54:17) Taamaaliorutta sioqqulluta kristumiorpassuartut tunngavissaqarluartumik neriuuteqarluta aalajaassinnaavugut — kristumiutut kalluunnaveersaartutut aalajaatsutullu silarsuarmut ilaanngitsutut. (wE 11/01 02)
Uku akisinnaavigit?
• Jehovamut attaveqarnerput pissutigalugu qanoq silarsuarmit allaaneruvugut?
• Guutip naalagaaffiani innuttaasutut silarsuarmi maani kalluunnaveersaartuulluta qanoq takutipparput?
• Qatanngutitsinnut asanninnerup qanoq kalluunnaveersaartillutalu silarsuarmut ilaatinngilaatigut?
[Atuaqqissaarnermi apeqqutit]
[Qupp. 15-mi assiliartaq]
Guutip naalagaaffiani innuttaanitta silarsuarmut attaveqarnerput qanoq sunnerpaa?
[Qupp. 16-mi assiliartaq]
Hutu tutsilu nuannaarlutik suleqatigiittut
[Qupp. 17-mi assiliartaq]
Juuti Arabiamiulu — qatanngutigiit kristumiut
[Qupp. 17-mi assiliartaq]
Kristumiut Serbiamiu, Bosniamiu Kroatiamiulu nuannaaqatigiittut
[Qupp. 18-mi assiliartaq]
Guutip inatsisaa unioqquteqqullugu naalakkersuisut naalakkerpatigut qanoq iliortariaqarpugut?