Atuartartut apeqqutaat

Saqqummersitat 20:8-mi allaatigineqartoq tunuliaqutaralugu isumaqarsinnaavugut naggataamik misilinneqarneq pippat Saatanimit amerlasoorparujussuit tammartitaassasut?

Kristusip ukiuni 1000-ini naalakkersuinera naappat Saatanip nunami inuusunut saassussinera kingulleq Saqqummersitat 20:8-mi allaatigineqarpoq. Tassani Saatani pillugu imatut allassimasoqarpoq: „Aallassallunilu inuiaqatigiit nunarsuup sammiviini sisamani tamaniittut tammartinniassallugit, Gogi aamma Magogi, sorsunnissamullu katersorniassallugit, sissap sioraasut amerlatigisut.”

Naak uuttuutitigut uuttortaariaatsitigullu ilisimatusaatikkut siuariarneqaraluartoq ’sissami sioqqat’ amerlassusii suli ilisimaneqanngilaq. Taamaattumik oqartoqarsinnaavoq oqariaaseq amerlassutsinut ilisimaneqanngitsunut aalajangerneqanngitsunullu atorneqartoq. Kisianni amerlassusii killeqanngitsut aamma amerlasoorparujussuit, allaat paasissaanngingajattut, pineqarpat, imaluunniit amerlassusii ilisimaneqanngiinnarpat ikigisassaanatilli?

Biibilimi oqariaaseq „sissap sioraasut” assigiinngitsunik isumaqartillugu atorneqarpoq. Assersuutigalugu Mosesimik allakkat siulliit 41:49-mi allassimavoq: „Josefi karrinik amerlasoorsuarnik sissap sioraasut amerlatigisunik katersuivoq, kiisa kisikkunnaarpat amerlanermik kisinneq ajornarsimmata.” Uani karrit kisinneqarsinnaannginnerat pingaarnerutinneqarpoq. Taamattaaq Jehova oqarpoq: „Soorlu qilaap perpassui kisinneqarsinnaanngitsut sissallu siorai amerlassusersiorneqarsinnaanatik, taamatut kiffama Daavip kinguaavi . . . uannut kiffaasut amerlisarumaarpakka.” Soorlu qilaap ulloriaasa kisinneqarsinnaannginnerat immallu sioraasa amerlassusersiorneqarsinnaannginnerat Jehovap Daavimut neriorsuutiminik eqquutitsinissaa taakkutulli qularnaatsigaaq. — Jeremia 33:22.

Amerlanertigut oqariaaseq ’sissami sioqqat’ isumaqarpoq amerlasoorpassuit, tupinnaannartumik amerlasuut. Gilgalimi Israelikkut filisterit sakkutuuinit Mikmasimi katersuussimasunit ernumatinneqarput. Filisterit ’sioqqatut sissamiittutut amerlatigisutut’ allaatigineqarput. (1 Samueli 13:5, 6; Eqqartuussisut 7:12) Salomo pillugu allassimasoqarpoq: „Guutip Salomo tunivaa ilisimassusermik, paasisimasaqangaarnermik misilittagaqaarnermillu annertussutsiminni sissap sioraasut killisissaanngitsunik.” (1 Kunnginik 5:9) Taakkunani amerlaqisut kisiannili killilimmik amerlassusillit pineqarput.

Oqariaaseq „sioqqat sissamiittut” aamma isumaqarsinnaavoq amerlassusii ilisimaneqanngitsut amerlasoorujussuarnilli isumaqartinnagu. Jehova Aaperaamut oqarpoq: „Pilluaqqussavakkit, kinguaassatillu qilaap ulloriaasut sioqqatullu sissamiittutut amerlisingaarumaarpakka.” (1 Mosesimik 22:17) Neriorsuut Aaperaap ernutaanut Jaakumut issuaramiuk oqariaaseq ’nunap pujoralaa’ atorpaa, Jaakup allanngortippaa ’sioqqat sissamiittunut’. (1 Mosesimik 28:14; 32:13) Maannakkut ilisimalikkatsitut Aaperaap „kinguaavi” — Jiisusi Kristusip saniatigut — 144.000-iupput, Jiisusip ’savarpannguanik’ taasai. — Lukasi 12:32; Galatiamiut 3:16, 29; Saqqummersitat 7:4; 14:1, 3.

Assersuutit taakku qanoq ilinniarfigisinnaavavut? Oqariaaseq „sissap sioraasut“ isumaqartuaannanngilaq amerlassusii killeqanngitsut, paasissaanngingajattut; isumaqanngilartaaq killeqanngitsumik amerlassusillit imaluunniit amerlasoorparujussuit. Amerlanertigut isumaqartarpoq amerlassusii ilisimaneqanngitsut kisiannili amerlaqisut. Tamanna tunngavigalugu eqqortuussaaq isumaqassalluni Guutip innuttaanik naggataamik saassussinerani pikitsitsiumatuut Saatanimik tapersersuisut amerlasoorpassuunavianngitsut, sioorasaarutaanissaminnulli naammattumik amerlassuseqarlutik. Taamaattorli amerlassusii maannakkorpiaq ilisimaneqanngillat. (wE 12/1 02)