Guutip oqaasianik atuaqqissaartarneq nuannaarutissarsiffigiuk

„Isumaliutigaara piliarsuit tamaat, eqqarsaatigaakkalu suliatit tamaasa.“ — TUSSIAAT 77:13.

1, 2. (a) Sooq eqqarsaatiginneqqissaarneq piffissaqarfigisariaqarparput? (b) Isumaliutiginninneq imaluunniit eqqarsaatiginneqqissaarneq qanoq isumaqarpa?

JIISUSI Kristusip ajoqersugaatut Guutimut attaveqarnerput kiffartorfigineranullu pissutiginiakkavut eqqarsaatigilluartariaqarpavut. Ullumikkulli inuit amerlanersaat ulapputeqarnermik isumaliutiginninnissaminnut, imaluunniit eqqarsaatiginneqqissaarnissaminnut, imminnut piffissaqartinngillat. Pigisalerineq, atuineq suulluanngitsunillu nuannaarniuteqarneq kiserluinnaasa sammivaat. Taama siunertaqanngitsigisunik qanoq ililluta ulapputeqarnaveersaarsinnaavugut? Inuunermut pisariaqartunik, soorlu nerinermut sininnermullu, aalajangersimasumik piffissaliisarnitsitut Jehovap piliaanik suliaanillu ullut tamaasa eqqarsaatiginneqqissaarnissatsinnut piffissaqartariaqarpugut. — 5 Mosesi 8:3; Matthæusi 4:4.

² Sunaluunniit arlaat eqqarsaatigeqqissaartarpiuk? Eqqarsaatiginneqqissaaneq qanoq isumaqarpa? Ordbogi naapertorlugu isumaqarpoq „itisuumik isumatusaarluni eqqarsaatiginninneq“. Uagutsinnut qanoq isumaqarpa?

3. Anersaakkut siumukassagaanni suna pisariaqarpa?

³ Tamanna apustili Paulusip suleqatiminut Timotheusimut oqaasiini akissutissarsisinnaavarput: „Takkunnissama tungaanut eqiasuillutit atuffassiuartarit, kajumissaariuartarit ilinniartitsiuartarillu. . . . Tamakku eqqarsaatigeqqissaartakkit, itisilertakkit, siumukarnerit tamanit takuneqarsinnaaqqullugu.“ Aap, Paulusip Timotheusip siumukarnissaa naatsorsuutigaa, oqaasiisalu ersersippaat anersaamut tunngasunik eqqarsaatiginneqqissaarneq siumukarnerlu toqqaannartumik imminnut atassuteqartut. Ullumikkut aamma taamaappoq. Anersaakkut siumukarnerup nalerisimaarnarnera misigissagutsigu, Guutip oqaasianut tunngasut ’eqqarsaatigeqqissaartuartariaqarpavut itisilertuartariaqarlugillu’. — 1 Timotheusi 4:13-15, NV.

4. Jehovap oqaasianik aalajangersimasumik eqqarsaatiginneqqissaarnissannut suna iluaqutigisinnaaviuk?

⁴ Eqqarsaatiginneqqissaarnissannut qaqugukkut eqqissillutit piffissaqarnersutit ulluinnarni sammisartakkannit aalajangerneqartarpoq. Inuppassuit eqqarsaatiginnittarput ullaakkut ullormut allassimaffik Ullut tamaasa Allakkat misissortakkit-mi atuaraangamikku. Nunarsuarmi sumi tamaani Betelini suleqataasut 20.000-t missaasa ulloq aallartittarpaat minutsini 15-ini ullormut allassimaffimmik eqqartuillutik. Betelimi najugallit ikittuinnaat oqaaseqartarput, sinnerisali oqaaserineqartut atuarneqartullu eqqarsaatigeqqissaartarpaat. Jehovap Nalunaajaasuisa allat suliartortillutik Guutip oqaasia eqqarsaatigeqqissaartarpaat; Biibili, Vagttårnet aamma Vågn op! kassettebåndinut immiunneqarsimasut tusarnaarlugit. Illumi ningiorpassuit angerlarsimaffimmi suliitigalutik båndit tusarnaartarpaat. Asafip iliorneratut  iliorput, tussiaasiami ilaanni ima oqarpoq: „Taagussavakka [Jahp] naammassisai, eqqaamavakka tupinnartuliatit itsarsuummat. Isumaliutigaara piliarsuit tamaat, eqqarsaatigaakkalu suliatit tamaasa.“ — Tussiaat 77:12, 13.

Eqqortumik isiginnittaaseqarneq iluaqutaavoq

5. Sooq nammineq atuaqqissaarneq pingaartittariaqarparput?

⁵ Innuttaaqatigiinni mutiusuni tv-mik, videomik qarasaasiamillu atuiffiusuni inuit amerlanerit atuarpallaarunnaarsimapput. Jehovap Nalunaajaasuili taamaattussaanngillat. Ilumoortumik oqassagaanni Biibilimik atuarneq Jehovamut atassutaavoq inuunermut pingaarutilik. Ukiut tusindillit matuma siorna Josvap Mosesi Israelikkut siulersortaattut kingoraarpaa. Josva Jehovamit pilluaqqusaassaguni Guutip oqaasia atuartariaqarpaa. (Josva 1:8; Tussiaat 1:1, 2) Ullumikkut tamanna uagutsinnut aamma piumasaqaataavoq. Inuilli ilaat naammattumik ilinniartinneqarsimannginnertik pissutigalugu atuffarluttuupput atuarnerlu qasunaralugu. Suup Guutip oqaasianik atuarusussuseqalersissinnaavaatigut atuaqqissaarusussuseqalersillutalu? Kunngi Salomop oqaasiini Ussatit 2:1-6-mi allassimasuni akissutissarsisinnaavavut. Biibili qupperlugu versit taakku atuariartigik. Taava eqqartussavavut.

6. Ilisarsinermut Guutimeersumut qanoq isiginnittaaseqartariaqarpugut?

⁶ Ima kajumissaarneqaqqaarpugut: „Ernera, oqaatsikka ilassiniakkit inassutikkalu pigiliullugit, ilisimassusermut naalaarlutit uummatillu siuneqassusermut saatsillugu, . . .“ (Ussatit 2:1, 2) Versini taakkunani suna ilikkarparput? Tamatta immikkut akisussaaffeqartugut. Malugiuk allassimanera „ilassiniakkit“ inatsiniutaasoq inuit amerlanerit Guutip oqaasianik soqutiginninngimmata. Atuaqqissaartarneq nuannaarutissarsiffiginiarlugu oqaatsit Jehovameersut ilasserusuttariaqarpavut, erlinnartutullu annaajumanngisatsitut pillugit. Ulluinnarni sammisartakkavut ima piffissamik atuiffigitigissanngilavut allamullu ima saasaatigitigissanngilavut Guutip oqaasia suusupagilerlugu allaallu immaqa qularilerlugu. — Romamiut 3:3, 4.

7. Sooq ajornanngikkaangat kristumiut ataatsimiinneri najuuffigisariaqarpavut saqqummiunneqartullu maluginiartariaqarlugit?

⁷ Kristumiut ataatsimiinnerini Guutip oqaasia nassuiarneqaraangat ilumut ’naalaartarpugut’ tusarnaaqqissaarlutalu? (Efesosimiut 4:20, 21) Siuneqassuseqalerniarluta uummaterput ’saatsipparput’? Immaqa oqalugiartoq misilittagaqarnerpaajunngilaq, Guutip oqaasiali nassuaraangagu tusarnaaqqissaartariaqarparput. Soorunami Jehovap ilisimassusia maluginiassagutsigu ajornanngikkaangat kristumiut ataatsimiinneri najuuffigisariaqarpavut. (Ussatit 18:1) Takorlooriaruk Jerusalemimi ukioq 33-mi piinsip ulluani ataatsimiinneq ilaasa najuffiginngitsooraat. Pakatsinassaqaaq! Soorunami ullumikkut ataatsimiittarnivut taama maluginiarnartiginngillat, tassanili ilinniuterput tunngaviusoq, Biibili, nassuiarneqartarpoq. Taamaattumik ataatsimiinnerit tamarluinnaasa anersaakkut iluaqutigisinnaavavut, saqqummiunneqartut maluginiarutsigik Biibilitsinnilu malinnaasarutta. — Apustilit Suliaat 2:1-4; Hebræerit 10:24, 25.

8, 9. (a) Nammineq atuaqqissaassagutta suna pisariaqarpa? (b) Kuulti ilisimassusermut Guutimeersumut qanoq naleqqiutissaviuk?

⁸ Kunngi silatooq ima nangippoq: „Paasisimasaqassuseq qaaqqugukku siuneqarnerlu aggeqqullugu nipituumik torlulaffigalugu, . . .“ (Ussatit 2:3) Versimi tassani qanoq isiginnittaaseqaqquneqarpugut, imaluunniit anersaaqaqquneqarpugut? Tassa Jehovap oqaasia ilumoorluta paaserusuttariaqarparput. Siuneqassuseqarniarluta, Jehovap piumasaa ilumut paasiniarlugu, atuaqqissaarusussuseqartariaqarpugut. Soorunami tamaviaarnartuuvoq, Salomollu oqaasii tulliuttut assersuusiaalu sammisussanngorpavut. — Efesosimiut 5:15-17.

⁹ Ima nangippoq: „[Siuneqarneq, paasinnissinnaaneq] ujarukku sølvisiortoq assigalugu, erlinnartunik nassaarniartutut ilungersorlutit, . . .“ (Ussatit 2:4) Tamatuma eqqaasippaatigut ukiuni hundredelinni inuit saffiugassanik soorlu sølvinik kuultinillu nassaarniarlutik qanoq iliortarnersut. Ilaat kuultinnanniarlutik toqutsisimapput, allat inuunertik tamaat atorlugu kuultisiorsimapput. Kuultili qanoq naleqartigaa? Inoqajuitsumi tammarlutit qilaleruit suna perusunnerussagaluarpiuk: kuultiminersuaq imerluunniit? Taamaakkaluartoq  inoqarpoq kuultisiorlutik, piviusuunngitsumik allanngorartumillu nalilimmik, ilungersungaarsimasunik! * Guutimut piumasaanullu tunngasunik ilisimassuseqalerniarluta, siuneqassuseqalerniarluta paasisaqarniarlutalu ilungersornerusariaqarpugut, ilaa! Aap, ujarlerneq taamaattoq qanoq iluaqutissarsiffigissavarput? — Tussiaat 19:8-11; Ussatit 3:13-18.

10. Guutip oqaasia atuaqqissaarutsigu suna paasisinnaavarput?

¹⁰ Salomo ima nangippoq: „Taava paasilissavat Guutimik mianerinninneq sunaasoq, taava Guuti ilisimalissavat.“ (Ussatit 2:5) Eqqarsaat tupinnangaarami — uagut inuit ajortiliusugut Jehova, qilammi nunamilu kisimi oqartussaalluni Naalagasoq, ’Guuti ilisimalersinnaavarput’! (Tussiaat 73:28; Apustilit Suliaat 4:24) Silarsuup isumaliutersortartui ilisimasuinillu taaneqartartut inuunerup silarsuullu paasiuminaatsortaannik ukiuni hundredelinni paasiniaasarsimagaluarput, taamaakkaluartoq ’Guutimik ilisimasaqarneq’ naleqangaartoq paasisimanngilaat. Sooq? Guutip oqaasiani, Biibilimi, ukiuni tusindilinni atuarneqarsinnaasimagaluartoq paasiuminarpallaarsoralugu itigartippaat, taamaattumillu paasinagu. — 1 Korinthimiut 1:18-21.

11. Nammineq atuaqqissaarnerup iluaqutissartaanik taasaqarit.

¹¹ Maanna Salomop Guutip oqaasianik atuaqqissaarusulersitsisoq alla uparuarpaa: „[Jehova] ilisimassuseqalersitsisarpoq, ilisimasaqarneq sianissuseqarnerlu qarnanit pilersarput.“ (Ussatit 2:6) Jehova tukkorluni ilisimassuseqalersitsisarpoq siuneqassuseqarlersitsisarlunilu erlinnartunik taakkuninnga piumassuseqarlutik ujarlersunut tamanut. Aap, Guutip oqaasianik atuaqqissaarnerup, ilungersunaraluartup, imminut piumaffiginaraluartup pilliuteqarfigisariaqaraluartullu, pingaartinnissaanut pissutissaqarluarpugut. Ullumikkut Biibilit naqitikkat pissarsiarisinnaavavut, itsarlu iliortariaqarnerattut assammik nammineq allaqqittariaqarnagit. — 5 Mosesi 17:18, 19.

Jehovap piumasaa malillugu inuusinnaalerluta

12. Guuti pillugu ilisimasaqalerniarnermut suna pissutigissavarput?

¹² Nammineq atuaqqissaarnermut suna pissutigissavarput? Allanit ajornerujumannginneq? Ilisimasaqarnerunerup malugeqqusaarutiginera? Biibili  pillugu ujarlerfissianngorniarneq angalaannartoq? Naagga. Anguniagaraarput kristumiutut oqaatsitigut iliuutsitsigullu Jiisusip pissusiinik ersersitsinissaq, allanik ineriartortitseqataanissatsinnut nakussatsitseqataanissatsinnullu piareersimajuarnitsigut. (Matthæusi 11:28-30) Apustili Paulusi ima mianersoqqusivoq: „Ilisimasaqarneq imminik angisuutitsisarpoq, asanninnerli ineriartortitsivoq.“ (1 Korinthimiut 8:1) Taamaattumik maniguuttuusariaqarpugut Mosesitut, Jehovamut ima oqartutut: „Aqqutinnik nalunaarfiginnga ilisimaleqqullutit ilinnillu iluarisaajuaqqullunga.“ (2 Mosesi 33:13) Aap, Guuti nuannaartinniarlugu, inuit kakkanniarfiginagit, ilisimasaqalerniartariaqarpugut. Guutimut kiffaasutut maniguulluta Jehovap piumasaa malillugu inoorusuppugut. Anguniagarput qanoq angusinnaavarput?

13. Qanoq ililluni Guutimut qinngaqqunnanngitsumik kiffanngortoqarsinnaava?

¹³ Paulusip Timotheusi oqaluttuuppaa qanoq ililluni Guuti nuannaartissinnaaneraa, ima oqarluni: „Sapinngisannik iliorit iluarisatut, sulisutut kanngusuutissaqanngitsutut, oqaatsimik sallusuissutaasumik eqqortumik atuisutut, Guutimut sassarniarlutit.“ (2 Timotheusi 2:15, NV) Oqaatsit „eqqortumik atuisutut“ grækerit oqaluutaannit katitigaasumit „sikkigissumik kilitsineq“-mik isumaveqartumit nutsigaavoq. (Kingdom Interlinear) Misissueqqissaartartut ilaat naapertorlugit mersortartup ilisserut atorlugu annoraaminermik qiortaaneranut, naasorissaasulluunniit narsaammik assallatserineranut, eqqaanarpoq. Suliarineqartoq tamatigut sikkigissuussaaq, imaluunniit eqqoqqissaassaaq. Isumaa tassaavoq Timotheusi Guutimut kiffatut qinngaqqunnanngitsuussaguni iluarisaassagunilu ’sapinngisaminik’ qulakkeertariaqaraa ilinniartitsinini inuuninilu sallusuissutip oqaasiinut naapertuunnersut. — 1 Timotheusi 4:16.

14. Nammineq atuaqqissaarnitta oqaatsivut iliuutsivullu qanoq sunnertariaqarpai?

¹⁴ Paulusip eqqarsaat tamanna erseqqissarpaa Kolossæmi uppeqatini kajumissaaramigit Jehovap ’piumasaa malillugu inuusinnaaleqqullugit, tamatigut iluarisaanik ilioqqullugit ajunngitsulianillu tamanik inerititaqaqqullugit, Guutimik ilisimasaqarnerat alliartuinnaqqullugu’. (Kolossemiut 1:10) Uani Paulusip Jehovap piumasaa malillugu inuuneq ’ajunngitsulianik tamanik inerititaqarnermut’ aamma ’Guutimik ilisimasaqarnermik alliartuinnarnermut’ atassuserpaa. Allatut oqaatigalugu Jehovap pingaartitaa tassaaginnanngilaq ilisimasaqarneq qanoq pingaartitsigineripput aammali oqaatsitsigut iliuutsitsigullu Guutip oqaasia qanoq maleruartigineripput. (Romamiut 2:21, 22) Imaappoq Guuti nuannaartissagutsigu nammineq atuaqqissaarnitsinnit eqqarsartaaserput pissutsivullu sunnerneqartariaqartut.

15. Qanoq ililluta isumarput sernissorsinnaavarput eqqarsaativullu aqussinnaalersinnaallugit?

¹⁵ Ullumikkut Saatanip aalajangiusimavaa anersaakkut peqqissuujunnaarnissarput, taamaattumillu sorsuppoq isumarput ajugaaniutigalugu. (Romamiut 7:14-25) Tamanna pissutigalugu isumarput eqqarsaativullu sernissortariaqarpavut aqussinnaalluinnartariaqarlugillu Jehovamut qinngaqqunnanngitsumik inuussagutta. Sakkussarput tassaavoq ’Guutimik ilisimasaqalerneq’ ’eqqarsaatinik tamanik tigusatut kiffartortunngortitsisussarput Kristusimut naalattunngortillugit’. Taamaattumik pissutissaqarneruvugut ullut tamaasa Biibilimik atuaqqissaarnissatta eqqumaffiginissaanut, eqqarsaatinik namminissarsiortunik uinnimmullu tunngasunik isumarput minguiarsinnaajumallugu. — 2 Korintumiut 10:5.

 Paasinninnerulernissamut iluaqutaasoq

16. Jehovap uagutsinnik ilinniartitsinera qanoq iluaqutigisinnaavarput?

¹⁶ Jehovamit ilinniartitaanerput anersaakkut timikkullu iluaqutigaarput. Teologii soqutaanngitsoq atuagarsornerinnaasorlu pineqanngilaq. Ima allassimavoq: „Uanga tassa [Jehova], Guutit, iluaqutaasunik ilinnik ajoqersuisoq, illit ingerlavigisassakkut ingerlatitsisoq.“ (Esaja 48:17) Ingerlavigisassatsigut Jehovap qanoq ingerlappaatigut? Pingaarnertut oqaasia, Biibili, isumassarsiarititaasoq pigaarput. Taanna tunngaviusumik ilinniutigaarput najoqqutassarsiorfigiuagarput. Taamaattumik pitsaassaaq kristumiut ataatsimiinnerini Biibilimi malinnaasarutta. Iluaqutaanera Etiopiamiut dronngianni atorfilik pillugu oqaluttuami Apustilit Suliaat kapitali 8-mi atuarneqarsinnaavoq.

17. Etiopiamiut dronninngiata atorfilittaa qanoq piva, tamatumalu suna ersersippaa?

¹⁷ Etiopiamiut dronngianni atorfilik juutinut ilasiaavoq. Ilumoorluni Guuti upperaa Allakkallu atuaqqissaartarlugit. Qamutimini Esajap siulittuutaa nipituumik atuartoq Filipip arpalluni anguaa aperalugulu: „Atuakkatit paasivigit?“ Dronninngip atorfilittaa qanoq akiva? „’Qanoq ilillunga paasisinnaassavakka ilitsersorneqanngikkuma?’ Filipilu qinnuigaa qamutimut qaqeriarluni saniminut ingeqqullugu.“ Taava Filipip, anersaaq illernartumit siulersorneqartup, dronninngip atorfilittaa Esajap siulittuutaanik paasitippaa. (Apustilit Suliaat 8:27-35) Tamatuma suna ersersippaa? Biibilimik nammineerluni atuarneq naammanngilaq. Ullumikkut Guutip oqaasianik paasinninnissatsinnik piffissaq eqqorlugu kiffaqatigiit aalajaallutillu silatuut, anersaaq illernartumit siulersorneqartut, ikiortarpaatigut. Qanoq ilillutik? — Matthæusi 24:45-47; Lukasi 12:42.

18. Kiffaqatigiit aalajaallutillu silatuut qanoq ikiorpaatigut?

¹⁸ Kiffaqatigiit ’aalajaatsunik silatuunillu’ taaneqaraluartut Jiisusi oqanngilaq kukkusinnaanngitsut. Qatanngutit tanitat aalajaatsut taakku kristumiunik naammalluinnanngitsunik suli inuttaqarput. Pitsaanerpaaq siunertarigaluarlugu kukkusinnaapput, ukiuni hundredelinni siullerni kukkusarsimanerattut. (Apustilit Suliaat 10:9-15; Galatiamiut 2:8, 11-14) Pissutiginiagaalli minguitsuuvoq, Biibilimillu atuaqqissaarutissatsinnik Guutip oqaasianik neriorsuutaanillu upperinninnitsinnik ineriartuutaasunik uagutsinnut Jehovap pilersuinermini atorpai. Atuaqqissaarnermi atugassarput pingaarnerpaaq kiffaqatigiinnit pisarput tassaavoq Ny Verden-Oversættelsen af De Hellige Skrifter. Maanna Biibili taanna tamaat ilaaluunniit oqaatsinut 42-nut nutserneqarsimavoq assigiinngitsunngorlugulu 114 millioninngorlugu naqiterneqarsimalluni. Nammineq atuaqqissaaraangatta qanoq atorluarsinnaavarput? — 2 Timotheusi 3:14-17.

19. Atuaqqissaarnermi atugassiaq Ny Verden-nutsigaq sunik imaqarpa, namminerlu atuaqqissaarnitsinni qanoq iluaqutigisinnaavarput?

¹⁹ Assersuutigeriartigu Ny Verden-nutsigaq atuaqqissaarnermi atugassiaq. Innersuussutinik, quppernerup ataani nassuiaatinik, ujarlerfissiaaqqamik bibelordbog-mik taasamik quppernerullu  ataani nassuiaatit allattorsimaffiinik imaqarpoq. Aammattaaq ilassutaani sammineqarsinnaasut assigiinngitsut 43-upput nunallu assinginik nalunaarsuutinillu imaqarluni. Aamma siulequtaani Biibilip taassuma nutserneqarnerani atorneqartut nassuiarneqarput. Atuaqqissaarnermi atugassiaq taanna qallunaatuujummat qallunaatoorsinnaaguillu taava sapinngisannik ilisimasaqarfigilluarniaruk atorluartarlugulu. Biibili atuaqqissaarnitsinnut tamatigut tunngaviuvoq, Ny Verden-nutsikkamilu Guutip aqqa eqqortumik pingaartinneqarpoq Guutillu naalagaaffiata aqutsinera erseqqissarneqarluni. — Tussiaat 149:1-9; Danieli 2:44; Matthæusi 6:9, 10.

20. Nammineq atuaqqissaarnermut tunngatillugu apeqqutit suut akineqartariaqarpat?

²⁰ Maanna immaqa ima apererusupputit: ’Biibilimik paasisaqarniarluta suna alla iluaqutigisinnaavarput? Nammineq atuaqqissaartarneq qanoq piffissaqarfigisinnaavarput? Atuaqqissaartarneq qanoq pissarsiffiginerpaasinnaavarput? Atuaqqissaartarnerput allanut qanoq sunniuteqassava?’ Allaaserisap tulliani apeqqutit tamakku pingaarutillit kristumiutut siumukarnitsinnut pingaaruteqartut sammissavavut.

[Quppernerup ataani ilanngussaq]

Eqqaamavigit?

• ’Isumaliutiginninneq’ imaluunniit ’eqqarsaatiginneqqissaarneq’ qanoq isumaqarpa?

• Guutip oqaasianik atuaqqissaartarnermut qanoq isiginnittaaseqassaagut?

• Nammineq atuaqqissaarnissamut pissutiginiagarput suusariaqarpa?

• Biibilip paasinissaanut suut iluaqutigisinnaavavut?

[Atuaqqissaarnermi apeqqutit]

[Qupp. 11-mi assiliartaq]

Betelimi najugallit ullut tamaasa ullormut allassimaffimmik eqqartuisarnertik anersaakkut nakussatsinnaraat

[Qupp. 11-mi assiliartaq]

Biilertilluni båndit Biibililersaarutit tusarnaarlugit piffissamik atorluaasoqarsinnaavoq

[Qupp. 12-mi assiliartaq]

Inuit kuultisiorlutik sivisuumik suleruloortarsimapput. Guutip oqaasianik atuaqqissaarniarlutit qanoq ilungersuuteqartigaat?

[Suminngaanneernera]

Inussiarnersumik akuersisut: California State Parks, 2002

[Qupp. 13-mi assiliartaq]

Biibili erlinnartuuvoq uagutsinnik naassaanngitsumik inuuneqarlersitsisinnaasoq