Umiarsuup naalagaata nerriviani nerersuarneq
Umiarsuup naalagaata nerriviani nerersuarneq
INUIT soqutiginartut, nerisassat mamartut nuannersumillu oqaloqatigiinneq umiarsuarmi naalagaasup nerriviani nereqatigiinneq nuannersunngortittarpaat. Ungasiliataammili, umiarsuaatileqatigiit White Star Line-p umiarsuaataasa ilaanni, naalagaasup Robert G. Smithip nerriviani oqaloqatigiinneq anersaakkut nerersuarnertut oqaatigineqarsinnaavoq. — Esaja 25:6
1894-imi, 24-inik ukioqarluni, Robert Smith tingerlaataannalimmi Kinclune of Dundee-imi naalagaalerpoq siullerpaamillu nunarsuarmik kaajallaasussanngorluni. Kingusinnerusukkut White Starip umiarsuaataanni, ilaatigut Cedricimi, Cevicimi Runicimilu naalagaalerpoq. * Umiarsuit ilaanni naalagaatilluni New Yorkimiit Liverpoolimut Atlantikoq ikaartillugu Charles Taze Russell umiarsuup naalagaani pulaartuusimavoq. Robertip Russellimik oqaloqateqarnerata Biibilip oqariartuutaanik soqutiginnilersippaa. Paasisaqarnerorusukkami atuakkat Studier i Skriften (kalaallisuunngortitaanngitsoq) Russellip tunniussai nuannaarluni tiguvai.
Russellip Robert allakkatigut attavigiuartarpaa, tamatumalu Robert Biibilip oqariartuutaanut soqutiginninnerulersippaa. Ilikkakkaminik nuliani oqaluttuuppaa, sivitsunngitsorlu marluullutik Biibilimik atuaqqissaartartunngorput, soorlu taamani Jehovap Nalunaajaasui taaneqartartut. Kingorna Robert Biibilimut tunngasumik oqalugiarsinnaatitaalerpoq. Assersuutigalugu Australiami Brisbanemi ”balsam fra Gilead” („tipigissaatiliassaq Gileadimeersoq“) eqqartorpaa nassuiarlugulu qanoq Guutip oqaasiani ”silarsuup ajussusianut akiuussutissamik“ oqariartuuteqartoq. Nunamini Tuluit Nunaanni nulia meeraalu „Skabelsens Fotodrama“-mik takutitseqqaarnermi peqataapput. Assit seqersitakkat takutinneqarmata nuutit Russellimit oqaasertalerneqarsimasut tusarnaartippaat.
Robertip Biibilip sallusuissutaa ilisimalersimavaa, meeqqaminullu tamanna ingerlateqqillugu. Ullumikkut, kinguaariit tallimassaani, ilaqutariinni 18-t Naalagaaffik pillugu nutaarsiassaq nuannersoq allanut oqaluussissutigalugu ulapputeqarput, qujamasuutigaallu qanga umiarsuup naalagaata nerriviani sassaalliutigineqarsimasoq.
Jehovap Nalunaajaasuisa atuagassiaataat Biibilimillu ilinniartitsinerat iluaqutigalugit inuit silarsuarmi tamaneersut Biibilip oqariartuutaanik ilisimasaqalersimapput, oqariartuut taanna umiarsuup naalagaanut Smithimut soqutiginnilersitsisoq. Immaqa aamma illit tamanna soqutiginartissavat? (wE 12/1 02)
[Quppernerup ataani ilanngussaq]
^ imm. 3 E.J. Smith angalaqqaarnermi ajunaartumi Titanic-mi naalagaavoq (Robert Smithip ilaqutarinngilaa).
[Qupp. 8-mi assiliartaq]
Robert G. Smith
[Qupp. 8-mi assiliartaq]
Charles T. Russell