„Eqqumagitsi!“
„Eqqumagitsi!“
„Ilissinnut oqaaserisara una tamanut oqaaseraara: Eqqumagitsi!“ — MARKUSI 13:37.
1, 2. (a) Pigisami paarinissaat eqqarsaatigalugu angutip suna paasilerpaa? (b) Jiisusip tillinniamik assersuusiaa eqqumaniarnissaq pillugu sumik ilinniarfigisinnaavarput?
JUANIP pigisani nalillit angerlarsimaffimminiitippai. Siniffiup ataanut toqqorpai — isumaqarami tassaasoq illumi isumannaannerpaasoq. Unnuilli ilaanni nulianilu sinitsillugit, tillinniaq sinittarfimmut iserpoq. Tillinniap nalusimagunanngilaa sumerpiaq ujaasissanerluni. Nipaqanngivissumik siniffiup ataaniittut tamaasa peerpai, aningaasallu Juanip siniffiup killinganiittumut amusartumut ilisimasai aamma tiguai. Aqaguani ullaakkut Juanip tillinniartoqarsimanera paasivaa. Misigisimasaminit ajungaartumit paasisani puigussanngilaa: Sinittup pigisani paarisinnaanngilai.
2 Anersaakkut ittut eqqarsaatigalugit aamma taamaappoq. Neriunnerput uppernerpullu illersorsinnaanngilavut anersaakkut ’sinilerutta’. Taamaattumik Paulusi ima kajumissaarivoq: „Sineqinata inuit allat ileqquattut, eqqumaniartali aalakoornatalu.“ (1 Thessalonikamiut 5:6) Eqqumaniarnissaq qanoq pingaaruteqartigisoq takutinniarlugu, Jiisusip tillinniamik assersuusiaq atorpaa. Eqqartuussisutut tikiunnissani sioqqullugu pisussat oqaatigai nangillunilu mianersoqqusilluni: „Taamaattumik eqqumagitsi, naluarsimi ulloq Naalakkassi tikiuffissaa. Imaattorli ilisimavarsi: Illumi ittuusup nalunngikkaluaruniuk tillinniaq pigaarfimmi sorlermi takkutissasoq eqqumassagaluarpoq illuminut isertoqarnissaa pinaveersaartinniarlugu. Taamaattumik ilississaaq piareersimassaasi Inuup Ernera tikiutissammat nalunaaquttap-akunnerani ilimasuffiginngisassinni.“ (Matthæusi 24:42-44) Tillinniaq siumut nalunaaruteqartanngilaq qaqugu takkutissanerluni. Neriuppoq piffissami kialuunniit ilimasuffiginngisaani takkutissalluni. Jiisusi oqarpoq taamatuttaaq pissutsit aaqqissuussaanerata matuma naggatissaa nalliutissasoq ’nalunaaquttap-akunnerani ilimasuffiginngisatsinni’.
„Eqqumagitsi, uppernissinni aalajaagitsi“
3. Assersuusiaq suna atorlugu Jiisusip eqqumaniarnissap pingaaruteqarnera erseqqissarpaa?
3 Lukasip iivangkiiliuani Jiisusip kristumiut inussianut naalakkamik katitorsiornerminngaanniit angerlarnissaanik utaqqisunut assersuuppai. Misissortuusariaqarput tikiunnissaanut eqqumasinnaajumallutik mappiussinnaajumallugulu. Tamatumunnga assingusumik Jiisusi oqarpoq: ’Inuup Ernera piffissakkut ilimaginngisassigut tikiutissaaq.’ (Lukasi 12:40) Ukiorpassuarni Jehovamut kiffartortut ilaasa piffissap inuuffigisatta qanoq nukiginnartiginera sianigiunnaarsinnaavaat. Immaqa allaat isummerput naggatissaq suli siunissami ungasissumiittoq. Taamatulli eqqarsartaaseqarunik, anersaakkut nalillit pingaartikkunaarlugit allamut saasarneqarsinnaapput nunallu piinik anguniagaqalerlutik, taamaalillutillu anersaakkut puungalersinnaapput. — Lukasi 8:14; 21:34, 35.
4. Sumik qularutiginninnginneq eqqumanialissutigissavarput, tamannalu Jiisusip assersuusiaanit qanoq erserpa?
4 Jiisusip assersuusiaa aamma allamik ilinniarfigisinnaavarput. Inussiat nalugaluarlugu nalunaaquttap-akunnerani sorlermi naalagartik tikiutissanersoq, nalunanngitsumik unnuami sorlermi tikiunnissaa nalunngilaat. Unnuaq taanna tamaat eqqumaniarnissaat sapernassagaluarpoq isumaqarsimasuugunik naalagartik immaqa unnuaq alla tikiutissasoq. Nalunngilaalli unnuami sorlermi tikiutissanersoq, tamatumalu eqqumanialersippai. Tamatumunnga assingusumik Biibilimi siulittuutinit paasinarsivoq naggatissap nalaani inuusugut, paasitinneqanngilagulli ullormi sorlermi imaluunniit nalunaaquttap-akunnerani sorlermi naggatissaq nalliutissanersoq. (Matthæusi 24:36) Upperigatsigu naggatissaq nalliukkumaartoq, eqqumaniarnissatsinnut iluaqutigaarput, qularinngilluinnarutsiguli Jehovap ullussaa qanillilluinnartoq, tamanna misissornerulissutigissavarput. — Sefania 1:14.
5. Paulusip eqqumaniaqqusilluni kajumissaarutaa qanoq maleruarsinnaavarput?
5 Korinthimiunut allakkamini siullerni Paulusi ima kajumissaarivoq: „Eqqumagitsi, uppernissinni aalajaagitsi.“ (1 Korinthimiut 16:13) Aap, eqqumaniarneq kristumiut upperneranni aalajaannermut attuumassuteqarpoq. Qanoq ililluta eqqumaniarsinnaavugut? Guutip oqaasianeersunik ilisimasaqarnerujartornitsigut. (2 Timotheusi 3:14, 15) Atuaqqissaartarutta, aalajangersimasumillu ataatsimiinnerit najuuffigisarutsigik, uppernikkut nakussatsinneqassaagut, Jehovallu ullussaata eqqarsaatigisarnera uppernermut ilaavoq pingaarutilik. Ilaannikkut pissutsit aaqqissuussaanerata matuma naggatissaata nalaani inuunitsinnut uppernarsaataasut Biibilimeersut misissoqqittarutsigik, tamanna naggatissap qanillinera pillugu ilumoortut pingaarutillit puigunnginissaannut iluaqutigissavarput. * Aamma ajussanngeqaaq Biibilimi siulittuutit silarsuarmi pisutigut qanoq eqquunnissaat maluginiassallugu. Qatanngut angut Tysklandimiu allassimavoq: „Nutaarsiassat — sorsunnerit, nunap sajuttarneri, nakuuserfiginninnerit nunarsuarmillu mingutsitsineq pillugit — isiginnaaraangakkit, eqqaasinneqartarpunga naggatissap qanoq qanitsigineranik.“
6. Assersuusiorluni Jiisusip qanoq takutippaa piffissap ingerlanerani misissorunnaarsinnaasugut?
6 Markusip iivangkiiliuani, kapitali 13-imi, aamma oqaluttuaqarpoq Jiisusip ajoqersukkani qanoq eqqumaniaqqugai. Kapitalimi tassani Jiisusi matumik paarsisumik naalakkami nunami allaminngaanniit uternissaanik utaqqisumik assersuusiorpoq. Matumik paarsisup naluaa naalakkani qaqugu tikiutissanersoq. Eqqumaniaannartariaqarpoq. Jiisusip unnuami pigaartuuffiit assigiinngitsut sisamat naalakkap tikiuffigisinnaasai eqqaavai. Unnuami pigaartuuffiit sisamaat tassaavoq nalunaaqutaq pingasut missaaniit seqerngup nuineranut. Unnuami pigaartuuffimmi kingullermi tamatumani matumik paarsisoq puungaqqajaasinnaavoq. Oqaluttuarineqarpoq sakkutuut seqerngup nuilinngitsiarnera akeqqanik pakasaanissamut piffissaalluarnerpaatut isigigaat. Anersaakkut ittut eqqarsaatigalugit aamma taamaappoq. Unnuami matumani kingusissukkut silarsuaq avatitsinniittoq anersaakkut itisuumik sinitsillugu, uagut eqqumaniarluta aatsaat taama tamaviaartigisariaqalinnguatsiarpugut. (Romamiut 13:11, 12) Taamaattumik Jiisusi assersuusiamini arlaleriarluni kajumissaarivoq: „Mianersoritsi! Eqqumagitsi! . . . Taamaattumik eqqumagitsi . . . Ilissinnut oqaaserisara una tamanut oqaaseraara: Eqqumagitsi!“ — Markusi 13:32-37.
7. Suna navianarluinnartuua, tamannalu pillugu Biibilimi qanoq oqaaqqissaarneqarpugut?
7 Kiffartornermi ingerlanerani makinnermilu kingorna Jiisusip arlaleriaqaluni erseqqissarpaa misissortuunissaq qanoq pingaaruteqartigisoq. Aap, Biibilimi pissutsit aaqqissuussaanerata matuma naggatissaata eqqaaneqarnerini tamangajanni eqqumaniaqqulluta eqqaasinneqartarpugut. * (Lukasi 12:38, 40; Saqqummersitat 3:2; 16:14-16) Erseqqippoq anersaakkut puunganissaq navianarluinnartuusoq, taamaammat tamatta oqaaqqissaarutit tamakku pisariaqartippavut! — 1 Korinthimiut 10:12; 1 Thessalonikamiut 5:2, 6.
Apustilit pingasut eqqumaniarsinnaanngitsut
8. Apustilit pingasut Getsemanep Naatsiiviani Jiisusimit eqqumaniaqquneqartut qanoq pippat?
8 Eqqumaniassagaanni, ajunngitsumik siunertaqarnerinnaq naammanngilaq, soorlu Petrusi, Jaaku Johannesilu pillugit pisimasumi takusinnaagipput. Tamarmik angutaapput anersaakkut nukittuut, Jiisusimik ilumoorlutik malinnittut asanningaartullu. Ukiumili 33-mi nisanip ulluisa 14-ianni unnukkut kingusissukkut eqqumaniarsinnaajunnaarput. Apustilit taakkua pingasut poorskisioreeramik, Jiisusi Getsemanep Naatsiivianukaqatigaat. Tassani Jiisusip oqarfigai: „Tarniga aliasungaarpoq toqumut allaat. Maaniigitsi pigaaqatigalunga.“ (Matthæusi 26:38) Pingasoriarluni Jiisusip qamannga pisumik Ataatani qilammiusoq qinnuigaa, pingasoriarlunilu ikinngutini uterfigisarpai, aasiit sinittut. — Matthæusi 26:40, 43, 45.
9. Apustilit puungalersimanerannut suna pissutaannguatsiarpa?
9 Sooq angutit aalajaatsut taakkua unnummi tassani Jiisusi pakatsisippaat? Ilaatigut nukillaaramik. Unnuakkuuvoq, qularnanngitsumik unnuap qeqqata kingorna, qasunermillu ’uisaneq sapilersimapput.’ (Matthæusi 26:43) Taamaattoq Jiisusip oqarfigai: „Eqqumagitsi, qinugitsilu usserneqaqqunasi. Anersaaq kajumikkaluarpoq, uinilli qajannarpoq.“ — Matthæusi 26:41.
10, 11. (a) Jiisusip qasugaluarluni Getsemanep Naatsiiviani eqqumaniarnissaminut suna iluaqutigaa? (b) Apustilit pingasut Jiisusip eqqumaniaqqusaasa sinilersimanerat qanoq ilinniarfigisinnaavarput?
10 Qularnanngitsumik Jiisusi aamma unnummi pingaarutilimmi tassani qasuvoq. Qasunermilli nakkaannarnissaminut taarsiullugu kiffaanngissuseqarallaarnini pingaarutilik tamanna Ataataminut qamannga pisumik qinunermut atorpaa. Ullualuit tamatuma siorna tusarnaartini qinunissaannik kajumissaarpai ima oqarluni: „Eqqumajuarniaritsi, qinugitsilu nukissaqartitaaqqullusi pisussat suut tamaasa qimarratigisinnaaqqullugit Inuullu Ernerata saavani atasinnaaqqullusi.“ (Lukasi 21:36; Efesosimiut 6:18) Jiisusip siunnersuutaa maleruarutsigu, qinunerlu pillugu maligassiuilluarnera malikkutsigu, Jehovamut qamannga pisumik maniguullutalu qinnutivut anersaakkut eqqumaniarnissatsinnut iluaqutigissavavut.
11 Soorunami Jiisusip ajoqersukkami taamanikkut suli paasisimanngisaat paasisimavaa, tassa qanittukkut parnaarunneqartussaallunilu toqumut eqqartuunneqartussaalluni. Nappakkami anniartitaaffimmi misilinneqarnerpaasimassaaq anniartitaanerpaasimassallunilu. Jiisusip apustilini tamanna pillugu mianersoqqusimavai, paasisimanngilaalli. Taamaattuminguna sinilersut, Jiisusi eqqumaniarlunilu qinutillugu. (Markusi 14:27-31; Lukasi 22:15-18) Apustilit uinikkut qajannartuunerattut uaguttaaq uinipput qajannartuuvoq, sulilu paasinngisaqarpugut. Piffissalli qanoq nukiginnartiginera sianigiunnaarutsigu, anersaakkut sinilersinnaavugut. Misissortuarutta aatsaat eqqumaniarsinnaavugut.
Pissuserisassat pingasut pingaarutillit
12. Pissuserineqartussat pingasut sorliit Paulusip ’aalakuunnginissamut’, tassa eqqumanissamut eqqarsallaqqinnissamullu, attuumassuteqartippai?
12 Piffissap nukinginnarnera qanoq sianigiuarsinnaavarput? Eqqartoreerparput qinusarnissaq Jehovallu ullussaata eqqarsaatigisarnissaa qanoq pingaaruteqartigisut. Tamatuma saniatigut Paulusip pissuserisassavut pingasut ineriartortittariaqakkavut eqqaavai. Oqarpoq: „Uagulli ullup pigimmatigut aalakoorniaqinata, uppernerli asanninnerlu saattuaasatut atiniartigit annaanneqarnissamillu neriuut niaqorortinnaveeqqutigalugu.“ (1 Thessalonikamiut 5:8) Misissulaariartigu upperneq, neriunneq asanninnerlu anersaakkut eqqumaniarnissatsinnut qanoq pingaaruteqartiginersut.
13. Upperneq eqqumaniarnissatsinnut qanoq iluaqutaava?
13 Jehovap piunera „ujarlersinilu akissarsisissagai“ upperilluinnartariaqarparput. (Hebræerit 11:6) Ukiuni hundredelinni siullerni Jiisusip siulittuutaasa eqquunnerat ullutsinni pingaarnerusumik eqquunnissaanik upperinninnitsinnut nakussatsitsivoq. Uppernittalu Jehovap ullussaanik qilanaarisaqartittuarpaatigut takorruukkap siulittuutaasup piviusunngornissaa qularinnginnatsigu. ’Eqquutinngitsoorani piviusunngorumaarpoq.’ — Habakkuki 2:3.
14. Neriunneq qanoq eqqumaniarnissatsinnut iluaqutigaarput?
14 Neriuuterput qularnaatsoq „tarnimut kitsatut ippoq“, tamannalu iluaqutigalugu ajornartorsiutit naammagalugit atorsinnaavavut Guutip neriorsuutaasa eqquunnissaat allaat utaqqisariaqaraluarutsigu. (Hebræerit 6:18, 19) Margaretip, qatanngutip arnap tanitap 90-it qaangerlugit ukiullip ukiut 70-it sinnerlugit matuma siorna kuisittup, miserratiginngilaa: „1963-imi uiga kræfteqarluni toqulermat, eqqarsarpunga naggatissaq nalliutipallattuuppat nuannissagaluartoq. Maannali paasivara taamani imminut eqqarsaatiginerusimallunga. Taamanikkut naluarput nunarsuaq tamakkerlugu qanoq oqaluussisoqartigissanersoq. Allaat maannakkut sumiiffinni amerlasuuni aatsaat oqaluussisoqalerpoq. Taamaammat nuannaarutigaara Jehovap erinitsajuitsuunera.“ Apustili Paulusip neriorsoqqissaarpaatigut: „Nikallujuissutsip [pilersittarpaa] aalajaatsunngorneq, aalajaassutsillu neriugisaqarneq. Neriunnerlu taanna pakatsisitsissanngilaq.“ — Romamiut 5:3-5.
15. Asanninneq qanoq kajumississutaasarpa, aamma sivisuumik utaqqisutut misigisimagaangatta?
15 Kristumiutut asanninneq pissusiuvoq pingaarutilik iliuutsitsinnut tamanut kajumississutaagami. Jehova kiffartorfigaarput asagatsigu, pisussanik piffissalersuinera apeqqutaatinnagu. Tullitsinnut asannikkatta, Naalagaaffimmik nutaarsiassaq nuannersoq oqaluussissutigaarput qanorluunniit sivisutigisumik Guutip taamaaliornissarput piumasarissagaluarpagu, qanorluunniillu amerlatigisunik angerlarsimaffiit aalajangersimasut uterfigeqqittariaqassagaluarutsigit. Soorlu Paulusi allattoq, „atajuassapput upperneq, neriunneq asanninnerlu — taakku pingasut. Asanninnerli taakkua pingaarnersaraat.“ (1 Korinthimiut 13:13) Asanninneq ingerlaannarnissatsinnut eqqumaniarnissatsinnullu iluaqutigaarput. „[Asanninneq] tamatigut neriuttarpoq, tamatigut ilalaartarpoq. Asanninneq soraanngisaannassaaq.“ — 1 Korinthimiut 13:7, 8.
„Pigisat aalajangiunniaruk“
16. Unikaallannissamut taarsiullugu isiginnittaaseq qanoq ittoq ineriartortittariaqarparput?
16 Piffissami pingaarutilimmi inuuvugut, silarsuarmilu pisut eqqaasittuarpaatigut ullut kingulliit naalerneranni inuusugut. (2 Timotheusi 3:1-5) Unikaallannissamut piffissaanngilaq, ’pigisattali aalajangiunnissaanut’ piffissaavoq. (Saqqummersitat 3:11) Qinusarneq eqqarsaatigalugu eqiingagutta, aamma upperneq, neriunneq asanninnerlu ineriartortikkutsigik, misilinneqarfissanngorpat piareersimassaagut. (1 Petrusi 4:7) Naalakkap suliaanik naammassisaqangaarpugut, iliuutsillu Guutimut tunniusimanermut naapertuuttut ulapputigigutsigik, eqqumalluarsinnaavugut. — 2 Petrusi 3:11.
17. (a) Sooq pakatsinerit nikalluutigisariaqanngilavut? (Qupperneq 17-imi ungalusaq takuuk.) (b) Qanoq Jehova ilaarsinnaavarput, aalajaallutalu qasusuikkutta qanoq pilluaqquneqassaagut?
17 „[Jehova] tassa agguagarsiara,“ Jeremia allappoq, „utaqqivaralu taamaattumik. [Jehova] ajunngitsuliortarpoq neriuffiginnitsiminut imminillu ujarlersunut. Pilluaataasarpoq [Jehovap] annaassinissaa nipangersimalluni utaqqigaanni.“ (Upputit 3:24-26) Ilaqarpugut sivikitsuinnarmik utaqqissimasunik. Allat ukiorpassuarni Jehovap annaassinissaa utaqqisimavaat. Naassaanngissuserli siunitsinniittoq eqqarsaatigalugu utaqqiffik sivikitsuinnaavoq! (2 Korinthimiut 4:16-18) Aamma Jehovap piffissarititaanik utaqqitilluta, kristumiutut pissuserisassat pingaarutillit ineriartortissinnaavavut allallu Jehovap kamagittarneranik iluaqutiginninnissaannut sallusuissummillu ilassinninnissaannut ikiorsinnaallugit. Taamaammat tamatta qanortoq eqqumaniarisa. Jehova ilaarniarlugu erinitsajuinniarta, neriunneq tunniussaa qujamasuutigalugu. Inuunissamillu naassaanngitsumik neriuut pigiliunniartigu aalajaalluta kiffartortilluta. Taamaaliorutta, neriorsuutip siulittuutaasup eqquunnissaa qilanaarisinnaassavarput: „[Jehovap] nunamik kingornussisussanngortikkumaarpaatit, takujumaarpallu iluanngitsut piiagaanerat.“ — Tussiaat 37:34. (wE 1/1 03)
[Quppernerup ataani ilanngussat]
^ imm. 5 Vagttårnet 15. januaari 2000-imoortumi, quppernerit 12-13-imi, ’ulluni kingullerni’ inuunitsinnut uppernarsaatissat qularunnaarsitsisut arfinillit sammineqartut misissoqqinnissaat iluaqutaasinnaavoq. — 2 Timotheusi 3:1.
^ imm. 7 Grækerit oqaasiat ’eqqumaniarneq’-mik nutserneqartoq pillugu W.E. Vine Testamentitaami oqaatsinik ordbogiliamini nassuiaavoq isumaqavissoq ’sininnissamik qimaatitsineq’, aamma „eqqumaniarnerinnaanngitsoq, kisiannili misissortuulluni aalajangersimasumik eqqumaffiginninnerusoq“.
Qanoq akissavit?
• Pissutsit aaqqissuussaanerata matuma naggatissaata qanillineranik qularutiginninnginnerput qanoq nakussatsissinnaavarput?
• Petrusi, Jaaku Johannesilu pillugit pisimasoq qanoq ilinniarfigisinnaavarput?
• Pissuserineqartussat pingasut suut anersaakkut eqqumaniarnissatsinnut iluaqutigisinnaavavut?
• Sooq maannakkut ’pigisatta aalajangiunnissaanut’ piffissaava?
[Atuaqqissaarnermi apeqqutit]
[Qupp. 17-mi ungalusaq]
„Pilluarpoq ilimasuttuartoq.“ — Danieli 12:12, NV
Takorlooriaruk pigaartup pigaartuuffimmini tillinniartoqarnissaa pasitsaakkaa. Unnuanngormat pigaartup tusarnaaqqissaarpai nipit tillinniartoqarneranut malunnaataasinnaasut tamaasa. Unnuaq naallugu pasinapiluttoqarsinnaaneranik malussarniaannavippoq. Pissutissaqanngitsumik kalerrinneqariaannaavoq — orpiit anorimit siorsutsinneqarneranit imaluunniit qitsuup arlaannik uppititsineranit. — Lukasi 12:39, 40.
Aamma taamaassinnaavoq ’Naalakkatta Jiisusi-Kristusip saqqummernissaanik utaqqisunut’. (1 Korinthimiut 1:7) Apustilit isumaqarput Jiisusip toqusunit makinnermi kingunitsianngua ’Israelikkunnut naalagaaffik kingumut pilersinniaraa’. (Apustilit Suliaat 1:6) Ukiulli arlallit tamatuma kingorna kristumiut Thessalonikamiittut eqqaasinneqartariaqarput Jiisusip najuunnissaa aatsaat siunissami piumaartoq. (2 Thessalonikamiut 2:3, 8) Jehovalli ullussaa pillugu ilimagisamik eqquutinnginnerat pissutigalugu Jiisusimut ajoqersukkat siulliit taakkua aqqut ameqisoq inuunermut sammisoq qimanngilaat. — Matthæusi 7:13, 14.
Ullumikkut pissutsit aaqqissuussaanerata matuma naggatissaata nalliukkumaataartutut inneranit pakatsisinneqarneq anersaakkut puungalissutigisariaqanngilarput. Pigaartoq misissortoq pissutissaqanngitsumik kalerrinneqarsinnaavoq, eqqumaniartuartariaqarporli sissuertuartariaqarlunilu! Tamannami suliassaraa. Kristumiut aamma taamaaliortussaapput.
[Qupp. 14-mi assiliartaq]
Jehovap ullussaata qanillinera qularutiginngilluinnarpiuk?
[Qupp. 15-mi assiliartaq]
Ataatsimiinnerit, qinuneq atuaqqissaartarnerlu eqqumaniarnissatsinnut iluaqutigaavut
[Qupp. 18-mi assiliartaq]
Margaretitut erinitsajuinniarta, eqqumaniarlutalu iliuuseqarniarta