Maannakkut eqqumaniarnissaq aatsaat taama pingaaruteqartigaaq!

„Sineqinata inuit allat ileqquattut, eqqumaniartali aalakoornatalu.“ — 1 THESSALONIKAMIUT 5:6.

1, 2. (a) Pompeji Herculaneumilu illoqarfittut qanoq ittuuppat? (b) Mianersoqqussut suna Pompejimiut Herculaneumimiullu amerlasuut sumiginnarpaat, qanorlu kinguneqarpa?

UKIUNI hundredelinni siullerni Pompeji Herculaneumilu illoqarfiupput pigissaarfiusut qaqqap Vesuvip ataaniittut. Tassani Romamiut pisuut feeriarumasarput. Illoqarfiit isiginnaartitsisarfiini tamani isiginnaartut tusindit sinnerlugit inissaqarsinnaapput, Pompejimilu immikkut isiginnaartitsisarfeqarpoq illoqarfiup inuinut tamangajannut inissalimmik. Pompejimi assaanerni imerniartarfiusimasut 118-it nassaarineqarput, taakkua ilaat aningaasanoortarfiusimasut atortittartulluunniit illuutigisimasaat. Iikkani qalipakkat allallu itsarnisarsiuunit nassaarineqartut takutippaat kanngunartuliorneq nunallu piinik pingaartitsivallaarneq nalinginnaasorujussuusimasut.

² Ukiumi 79-imi aggustip ulluisa 24-anni Vesuv innermik anitsilerpoq. Qaqqanik innermik anitsisartunik ilisimasallit isumaqarput siullermik anitsimmat arsakullu anngallu illoqarfinnut marlunnut nakkaammata inuit qimaanissartik suli angumerisimasinnaagunaraluaraat. Inuppassuit aniguisimagunarput. Allalli navianartoqarneranik sumiginnaasut mianersoqqussummilluunniit soqutiginninngitsut uninngaannarput. Unnuap qeqqata missaani gassi kissangaartoq, anngat qaarsumerngillu Herculaneumimut sisoorput, inuillu tassaniiginnartut tamarmik ipipput. Aqaguani ullaaralaakkut taamatut sisooqqimmat Pompejimiittut tamarmik toqupput. Mianersoqqussutinik sumiginnaarnerup kingunerata ila alianassusia!

Juutit pissutsinik aaqqissuussaanerata naggataa

3. Jerusalemip aserugaanera Pompejip Herculaneumillu aserugaanerat qanoq assigiissuteqarpat?

³ Pompeji Herculaneumilu amiilaarnartumik naggateqarput arlalitsigut Jerusalemip aserugaaneranut ukiut qulingiluat tamatuma siorna pisimasumut assingusumik, naak Jerusalemip aserugaanera ajornerungaaraluartoq inunnillu pilersinneqaraluartoq. Juutit millionit sinnerlugit toqusimassagunarput, illoqarfiullu ungusaanera ’oqaluttuarisaanermi ungusaanerit amiilaarnarnerpaartaattut’ allaatigineqarsimavoq. Pompejimili Herculaneumimilu pisimasutut Jerusalemi aserugaalermat mianersoqqusisoqaqqaarsimavoq.

4. Jiisusip ajoqersukkani pissutsit aaqqissuussaanerata naggatissaata qanillineranik mianersoqquniarlugit nalunaaqqut siulittuutaasoq suna eqqaavaa, siulittuullu tamanna ukiuni hundredelinni siullerni qanoq pingaannginnerusumik eqquuppa?

⁴ Jiisusi Kristusip illoqarfiup aserugaanissaa tamannalu sioqqullugu pisussat siulittuutigisimavai. Sorsuttoqarumaarpoq, kaannersuaqarumaarluni, nuna sajuttarumaarluni inatsisaatsuliornerillu amerligaluttuinnarumaarlutik. Pruffiitioqqusersut saqqummerumaarput, Guutilli naalagaaffianik nutaarsiassaq nuannersoq silarsuaq tamakkerlugu oqaluussissutigineqassaaq. (Matthæusi 24:4-7, 11-14) Jiisusip oqaasii ullumikkut inaarutaasumik eqquupput, taamanikkulli pingaannginnerusumik eqquussimapput. Oqaluttuarisaaneq malillugu Judæami ilungersunartumik kaannersuaqarpoq. (Apustilit Suliaat 11:28) Oqaluttuarisaanermik ilisimatooq juuteq Josefus oqaluttuarpoq Jerusalemi aserugaanngitsiartoq illoqarfiup eqqaani nuna sajussimasoq. Jerusalemip aserugaanissaa qanilliartortillugu pikitsitsinerit amerliartuinnarput. Juutit politikkikkut isumaqatigiinngissutitik pillugit imminnut sorsuupput, illoqarfinnilu arlalinni juutit juutiunngitsullu najugaqarfigisaanni toqoraanersuaqarpoq. Tamakkualu saniatigut Guutip naalagaaffianik nutaarsiassaq nuannersoq ’qilaap ataani pinngortitanut tamanut oqaluussissutigineqarpoq’. — Kolossemiut 1:23.

5, 6. (a) Jiisusip oqaasii siulittuutaasut suut ukiumi 66-imi eqquuppat? (b) Jerusalemi ukiumi 70-imi kiisami aserugaammat, sooq inuit taama amerlatigisut ajunaarpat?

 ⁵ Juutit ukiumi 66-imi naggataatigut Romamut pikitsitsipput. Cestius Gallus sakkutoorpassuani ilagalugit Jerusalemi unguniarlugu qanilliartulermat, Jiisusip oqaasii ajoqersugaasa eqqaamavaat: „Takugussiuk Jerusalemi sakkutuunit unguneqarsimasoq, taava nalussanngilarsi piuneerussaaffissaa qanillisoq. Taava Judæamiittut qaqqanut qimaassapput; illoqarfimmiittut illoqarfik qimassavaat, nunaannarmiittullu illoqarfimmut isissanngillat.“ (Lukasi 21:20, 21) Jerusalemip qimannissaanut piffissanngorpoq — qanorli taamaaliorsinnaappat? Ilimagineqanngitsumik Cestius Gallusip sakkutoorpassuani illoqarfimmit tunuartippai, kristumiullu Jerusalemimiittut Judæamiittullu Jiisusip oqaasii naalallugit qaqqanut qimaasinnaanngorput. — Matthæusi 24:15, 16.

⁶ Ukiut sisamat tamatuma kingorna poorskip nalaani Romamiut sakkutuui Titusimit, juutit pikitsitsinerat unitsinniarlugu aalajangersimasumit, siulersorneqartut uterput. Sakkutuuisa Jerusalemi unguaat ’kaajallallugulu ippiliugaliorfigalugu’, taamaalillutik qimaasinnaajunnaarsippaat. (Lukasi 19:43, 44) Sorsunnissamik sioorasaarisoqaraluartoq juutit Romamiut naalagaaffissuannit tamaneersut Jerusalemimukaasimapput poorskisioriartorlutik. Maanna Jerusalemimit anisinnaajunnaarput. Josefus naapertorlugu Romamiut ungusineranni ajunaartut amerlanersaat tikeraajupput. * Jerusalemi aserugaammat juutit Romamiut naalagaaffissuanniittut tamarmik arfineq-marlorarterutaasa missaat toqupput. Jerusalemip naalaffiullu aserugaanerat juutit naalagaaffiata taassumalu upperisarsiornikkut aaqqissuussaanerata Mosesip Inatsisaanik tunngaveqartup naggatigaat. * — Markusi 13:1, 2.

7. Sooq kristumiut aalajaatsut Jerusalemip aserugaanera anigorpaat?

⁷ Ukiumi 70-imi juutit kristumiut toqunneqarsimasinnaagaluarput tigusatulluunniit aallarunneqarsimasinnaagaluarlutik allat Jerusalemimiittut tamaasa ilagalugit. Oqaluttuarisaanermili uppernarsaataasut naapertorlugit Jiisusip ukiut 37-it tamatuma siorna mianersoqqussutaa eqqumaffigisimavaat. Illoqarfik qimassimavaat uterfiginagulu.

Apustilit naleqqulluartumik mianersoqqussutaat

8. Petrusip suna pisariaqartinneqartoq paasivaa, Jiisusillu oqaasii suut qularnanngitsumik eqqarsaatigai?

⁸ Ullumikkut aseruinissarsuaq annerungaartoq, pissutsit aaqqissuussaanerata maanna atuuttup naggatissaa, siuninnguatsinniippoq. Ukiut arfinillit Jerusalemip aserugaanissaa sioqqullugu apustili Petrusip kristumiut naleqqulluartumik oqaaqqissaarpai eqqumaniaqqullugit. Mianersoqqussut taanna aamma ullumikkut atuuppoq. Petrusip paasivaa kristumiut ’isummamikkut eqeersarneqarnissaat’ qanoq pingaaruteqartigisoq ’Naalakkap annaassisup, Jiisusi Kristusip, inassutai’ sumiginnaqqunagit. (2 Petrusi 3:1, 2) Petrusip kristumiut  eqqumaniaqqugamigit, qularnanngitsumik Jiisusip toqunissani ullualunnik sioqqullugu apustiliminut oqaasii eqqarsaatigai: „Mianersoritsi! Eqqumagitsi! Naluarsimi taamaaliffissaa qaqugu nalliukkumaartoq.“ — Markusi 13:33.

9. (a) Ilaat qanoq navianartumik isiginnittaaseqalerumaarpat? (b) Qularneq sooq ingammik navianarpa?

⁹ Ullumikkut ilaat mitallerlutik aperisarput: „Tikiunnissaaninguna neriorsuut qanoq piniartoq?“ (2 Petrusi 3:3, 4) Isumaqarunarput pissutsit allanngortinneqanngisaannassasut, silarsuup pinngortinneqaqqaarneraniilli taamaattuaannassasut. Qularneq taama ittoq navianartuuvoq. Qularutta, piffissap nukinginnassusia sianigiunnaarsinnaavarput nunallu piisigut pisariaqartitavut kisiisa matussusernialerlugit. (Lukasi 21:34) Petrusip uparuarpaattaaq mitallersut taamaattut Noap nalaani ulersuaqarsimanera, nunarsuaq tamakkerlugu pissutsit aaqqissuussaanerannik aseruisoqarsimanera, puigoraat. Silarsuaq taamanikkut ilumut allanngorluinnarpoq! — 1 Mosesi 6:13, 17; 2 Petrusi 3:5, 6.

10. Petrusip naammagittaalliulersinnaasut qanoq kajumissaarpai?

¹⁰ Petrusip allakkaminik atuartussat utaqqisinnaassuseqarnissaannut ikiorpai sooq Guuti qaqutiguinnaq ingerlaannartumik akuliuttarneranik eqqaasikkamigit. Siullermik allappoq: „Ulloq ataaseq [Jehovamut] ukiutut 1000-itut immat, ukiullu 1000-it ullortut ataatsitut illutik.“ (2 Petrusi 3:8) Jehova naassaanngilluinnartuugami, suut tamaasa eqqarsaatigisinnaavai piffissamilu pitsaanerpaami akuliussinnaalluni. Nangilluni Petrusip eqqaavaa Jehovap kissaatigigaa inuit sumiluunniit ittut allamik isumataarnissaat. Guutip kamagittarnera amerlasuut annassutigiumaarpaat, siusinaarlunili akuliukkaluarpat, taakku ajunaassagaluarput. (1 Timotheusi 2:3, 4; 2 Petrusi 3:9) Jehovalli kamagittarnera isumaqanngilaq akuliutinngisaannassasoq. „[Jehovap] ullussaa tillinniatut nalliutissaaq,“ Petrusi allappoq. — 2 Petrusi 3:10.

11. Suna anersaakkut eqqumaniarnitsinnut iluaqutigissavarput, taamaalillutalu qanoq Jehovap ullussaa ’siuarsarsinnaavarput’?

¹¹ Petrusip assersuusiaa soqutiginarpoq. Tillinniaq  tigusariuminaappoq, pigaartulli unnuaq naallugu eqqumaniartup pigaartumit ilaannikkut sinilersoortartuminngarnit tigusariuminartinnerusinnaavaa. Pigaartoq qanoq ililluni eqqumaniarsinnaava? Angalaarneq unnuaq naallugu issiaannarnermit iluaqutaaneruvoq. Taamatuttaaq kristumiutut eqqumaniarsinnaavugut anersaakkut suliniuteqarutta. Taamaattumik Petrusip kajumissaarpaatigut ’iliuutsit iluartumik ileqqoqarnermut Guutimullu tunniusimanermut naapertuuttut’ ulapputigeqqullugit. (2 Petrusi 3:11, NV) Taamatut suliniuteqarutta, ’Jehovap ullussaata nalliuffissaanik eqqarsaatiginnittuaannarnissatsinnut’ iluaqutigissavarput. Grækerit oqaasiat ’eqqarsaatigiuaannarpaa’-mik nutserneqartoq eqqortumik nutserneqarsinnaavoq ’siuarsartuarpaa’. (2 Petrusi 3:12, NV; Ny Verden-Oversættelsen-imi quppernerup ataani ilanngussaq) Soorunami Jehovap piffissalersuinera allanngortissinnaanngilarput. Ullussaa piffissarititaani nalliutissaaq. Piffissarli akuliunnissaata tungaanut uagutsinnut sukkanerungaassaaq taassumunnga kiffartorneq ulapputigigutsigu. — 1 Korinthimiut 15:58.

12. Inuttut ataasiakkaatut qanoq Jehovap kamagittarnera iluaqutigisinnaavarput?

¹² Taamaammat Jehovap ullussaanik mullussisorinnittut tamarmik kajumissaarneqarput Petrusip oqaasii maleruaqqullugit Jehovap piffissarititaa erinitsajuillutik utaqqeqqullugu. Guutip kamagittarnera pissutigalugu piffissap sivisunerunera silatuumik atorluarsinnaavarput. Assersuutigalugu kristumiut pissusissaat pingaarutillit ineriartortittuarsinnaavavut periarfissaqalerlutalu inuit amerlanerungaartut nutaarsiassamik nuannersumik oqaluttuunnissaannut. Eqqumajuarutta, Jehovamut minguitsuullutalu assuarnaatsuulluta eqqissisimassaagut pissutsit aaqqissuussaanerat manna naappat. (2 Petrusi 3:14, 15) Akissarsiassap nuannerluinnassusia!

13. Kristumiunut Thessalonikamiittunut oqaatsit suut ingammik ullumikkut naleqquppat?

¹³ Kristumiunut Thessalonikamiittunut allakkamini siullerni Paulusip aamma erseqqissarpaa eqqumaniarnissaq qanoq pingaaruteqartigisoq. Ima oqaaqqissaarivoq: „Sineqinata inuit allat ileqquattut, eqqumaniartali aalakoornatalu.“ (1 Thessalonikamiut 5:2, 6) Maanna silarsuaq tamakkerlugu pissutsit aaqqissuussaanerat qanittukkut suujunnaarsinneqartussaammat, tamanna pingaaruteqarluinnarpoq! Jehovap kiffai inuupput silarsuarmi amerlanerit anersaakkut ittunik soqutigisaqanngiffianni, tamatumalu sunnersinnaavaatigut. Taamaattumik Paulusi ima kajumissaarivoq: „Aalakoorniaqinata, uppernerli asanninnerlu saattuaasatut atiniartigit annaanneqarnissamillu neriuut niaqorortinnaveeqqutigalugu.“ (1 Thessalonikamiut 5:8) Guutip oqaasianik aalajangersimasumik atuaqqissaartarneq qatanngutinillu aalajangersimasumik ataatsimeeqateqartarneq kajumissaarutip tamatuma maleruarnissaanut piffissallu nukinginnassusiata sianigiuarnissaanut iluaqutigissavavut. — Matthæusi 16:1-3.

Millionilikkuutaat eqqumaniarput

14. Kisitsisit suut takutippaat ullumikkut amerlasuut Petrusip kajumissaarutaa maleruarlugu eqqumaniartut?

¹⁴ Ullumikkut kajumissaarummik isumassarsiarititaasumik maleruaallutik eqqumaniartut amerlappat? Aap. Ukiumi kiffartorfiusumi 2002-mi oqaluussisartut 6.304.645-t amerlanerpaagamik — tassa 2001-imi oqaluussisartunit 3,1 procentimik amerlanerullutik — takutippaat anersaakkut eqqumallutik akunnernik 1.202.381.302-nik atuinermikkut allat Guutip naalagaaffianik oqaluttuullugit. Taakkununnga taamaaliorneq soqutaanngitsutut inngilaq. Tassaammat inuuneranni pingaarnerpaaq. Amerlanersaasa isiginnittaasiat assersuunneqarsinnaavoq Eduardomut Noemimullu El Salvadorimiunut.

15. Misigisap El Salvadorimeersup suup takutippaa amerlasuut anersaakkut eqqumaniartut?

¹⁵ Ukiualuit matuma siorna Eduardop Noemillu Paulusip oqaasii ilumoorutilerpaat: „Silap matuma pissusia nikittarpoq.“ (1 Korinthimiut 7:31, NV) Inooriaasertik pisariillisarpaat pioneritullu piffissaq tamaat kiffartulerlutik. Ukiut ingerlaneranni arlalitsigut pilluaqqusaapput allaallu ilageeqatigiinni ataatsini arlalinnilu angalasartutut kiffartorsinnaalerlutik. Naak ilungersunartunik ajornartorsiuteqarsimagaluarlutik Eduardop Noemillu qularinngivippaat pigisat ilorrisimaarnartut pilliutigalugit piffissaq tamaat kiffartuleramik eqqortuliorlutik. El Salvadorimi oqaluussisartut 29.269-t ilaat amerlasuut — ilaatigut pionerit 2454-t — tamatumunnga assingusumik imminnut pilliutigeriaannaapput,  nunamilu tassani oqaluussisartut siorna 2 procentinik amerleriarsimanerannut pissutaasut tamanna ilagaat.

16. Nagguaatsup Tuugaavata Sineriaani qatanngut angut inuusuttoq qanoq isiginnittaaseqarpa?

¹⁶ Nagguaatsup Tuugaavata Sineriaani qatanngut angut inuusuttoq aamma taama isiginnittaaseqarpoq. Immikkoortortaqarfimmut ima allappoq: „Ilagiinni kiffartortuuvunga. Qatanngutilli kajumissaarsinnaanngilakka pionerinngoqqullugit, nammineq suli pionerinngortinnanga. Taamaattumik suliffiga akissaatigissoq taamaatillugu namminersortunngorpunga, taamaalillungalu oqaluussinermut piffissaqarnerulerpunga.“ Angut inuusuttoq taanna Nagguaatsup Tuugaavata Sineriaani pionerinut 983-usunut ilannguppoq, siornalu nunami tassani oqaluussisartut 6701-iupput, 5 procentinik amerleriarlutik.

17. Belgiami Jehovap nalunaajaasuata inuusuttup qanoq takutippaa allat paqumisunnerat qunulissutiginagu?

¹⁷ Belgiami paasinnikkusunnginneq, paqumisunneq naqisimanninnerlu oqaluussisartunut 24.961-usunut ajornartorsiutaajuarpoq. Taamaattorli oqaluussisartut aallussilluarlutillu sapiitsuupput. Atuarfimmi ileqqorissuseq sammineqartillugu, Jehovap nalunaajaasuisa ilaata 16-inik ukiullip tusaramiuk Jehovap Nalunaajaasui immikkut upperusiortutut oqaatigineqartut, illuatungiliilluni oqaaseqarumavoq. Videofilmi Jehovas Vidner og deres organisation aamma atuagassiaaraq Jehovas Vidner — Hvem er de? Hvad tror de på? atorlugit Nalunaajaasut kikkuiunersut nassuiaasinnaavoq. Paasissutissat ilassilluarneqarput, sapaatillu akunnerata tulliani ilinniartut allattariarsornermi misilitsipput, apeqqutillu tamarmik Jehovap Nalunaajaasuisa upperisaannut tunngapput.

18. Qanoq takuneqarsinnaava Argentinami Mocambiquemilu oqaluussisartut aningaasarsiornikkut ajornartorsiorneq allamut saassutigisanngikkaat?

¹⁸ Ulluni kingullerni makkunani kristumiut amerlanersaat erloqissuteqartarput. Allamulli saasartikkumanatik sapinngisaminnik iliortarput. Naak Argentinami aningaasarsiornikkut ajornartorsiortoqangaaraluartoq, siorna oqaluussisartut amerlanerpaaffitsik qaangerlugu 126.709-nngorput. Mocambiquemi suli piitsorpassuaqarpoq. Taamaattorli 37.563-t oqaluusseqataapput, tassa 4 procentimik siuariarneq. Albaniami 12 procentinik siuariartoqarpoq, oqaluussisartullu amerlanerpaaffitsik qaangerlugu 2708-nngorput, naak inuuneq amerlasuunut erloqinaraluartoq. Erseqqippoq Jehovap anersaava atukkanit erloqinartunit akornusertittanngitsoq, kiffaasa Naalagaaffiup soqutigisai salliutikkaangatigik. — Matthæusi 6:33.

19. Suup takutippaa suli eqqortuliorusuttunik sallusuissummut Biibilimeersumut kaattorpassuaqartoq?

¹⁹ Agguaqatigiissillugu siorna silarsuaq tamakkerlugu qaammatit tamaasa 5.309.289-inik Biibilimik atuaqqissaaqateqartoqarmat, erseqqippoq suli sallusuissummut Biibilimeersumut kaattorpassuaqartoq. Eqqaaniaalluni nalliuttorsiorneq najuuffigineqarpoq 15.597.746-nit — aatsaat taama amerlatigisunit — taakkuali amerlanersaat suliamikkut suli Jehovamut kiffartulersimanngillat. Ilisimasaqarnermikkut Jehovamullu qatanngutigiissuarnullu asanninnermikkut ineriartortuarnissaat kissaatigaarput. Nuannersorujussuuvoq takullugu ’amerlangaartut’ ’savanut allanut’ ilaasut, qatanngutitik tanitat ilagalugit, Guuterput Pinngortitsisorpullu ’naalaffiani ullukkut unnuakkullu’ kiffartorfigitillugu, inerititaqartuartut! — Saqqummersitat 7:9, 15; Johannesi 10:16.

Loti qanoq ilinniarfigisinnaaneripput

20. Lotimik nulianillu assersuutit qanoq ilinniarfigisinnaavavut?

²⁰ Soorunami allaat Guutimut kiffaasut aalajaatsut  piffissap nukinginnassusia sianigiunnaallatsiarsinnaavaat. Eqqarsaatigiuk Aaperaap jorngua Loti! Inngilinit marlunnit pulaartunit paasitinneqarpoq Guuti Sodomamik Gomorramillu aseruinnialersoq. Lotip tamanna tupigusuutigisimassanngilaa nammineq ’inuit soqqusaatsut inuunerlunnerannit atugarliortitaagami’. (2 Petrusi 2:7) Taamaattorli inngilit marluk Sodomap avataanukaannialermanni, Loti ’piumaataalerpoq’. Inngilit Loti ilaqutaalu illoqarfimmit anisinniarlugit ’tasissiuttariaqarpaat’. Tamatuma kingorna Lotip nuliata inngilit kingumut qiviaqqusinatik mianersoqqussutaat sumiginnarpaa. Qasungasumik isiginnittaaseqarnera akisoqaaq. (1 Mosesi 19:14-17, 26) „Lotip nulia eqqaamasiuk,“ Jiisusi mianersoqqusivoq. — Lukasi 17:32.

21. Sooq ullumikkut eqqumaniarnissaq aatsaat taama pingaaruteqartigiva?

²¹ Pompejimi Herculaneumimilu ajunaarnersuit, Jerusalemip aserugaanera, Noap nalaani ulersuaq Lotillu nalaani pisimasut, taakkua tamarmik takutippaat mianersoqqussutit ilumoorunnissaat qanoq pingaaruteqartigisoq. Jehovap kiffaasut takusinnaavarput naggatissap nalaani inuunitsinnut nalunaaqqut. (Matthæusi 24:3) Eqqunngitsumik upperisarsiornermit qimagussimavugut. (Saqqummersitat 18:4) Kristumiutullu ukiuni hundredelinni siullerni inuusutut ’Jehovap ullussaata nalliuffissaa eqqarsaatigiuaannartariaqarparput’. (2 Petrusi 3:12, NV) Aap, ullumikkut eqqumaniarnissarput aatsaat taama pingaaruteqartigaaq! Eqqumaniarluta qanoq iliorsinnaavugut, pissutsillu suut ineriartortittariaqarpavut? Tamanna allaaserisami tulliuttumi sammineqarpoq.

[Quppernerup ataani ilanngussat]

Qanoq akissavit?

• Pisut suut juutit kristumiut periarfissippaat Jerusalemimit qimaanissaannut illoqarfik aserugaatinnagu?

• Petrusip Paulusillu allagaanni mianersoqqussutit qanoq eqqumaniarnissatsinnut iluaqutigaavut?

• Ullumikkut kikkut takutippaat eqqumalluarlutik?

• Loti nulialu pillugit oqaluttuaq qanoq ilinniarfigisinnaavarput?

[Atuaqqissaarnermi apeqqutit]

[Qupp. 9-mi assiliartaq]

Ukiumi 66-imi kristumiut Jerusalemimiittut Jiisusip mianersoqqussutaa eqqumaffigaat

[Qupp. 10-mi assiliartaq]

Kristumiutut suliniuteqarutta, eqqumaniarnissatsinnut iluaqutigissavarput