Naalliuttunut tuppallersaat
Naalliuttunut tuppallersaat
UKIUNI hundredelikkuutaani apeqqut sooq Guutip naalliunnartut atuutitinnerai, isumaliutersortartunit teologinillu soqutigineqarsimaqaaq. Ilaasa oqaatigisarpaat ajugaqanngitsumik Guuteqaruni naalliunnartunut inaarutaasumik akisussaasuusimassasoq. Ilagiit clementinikkut allagaataanni, biibilip atuagartaannut ilaanngitsuni, ukiut hundredelillit aappaanneersuni, allassimavoq Guutip assani illuttut atorlugit silarsuaq aqukkaa. „Assaminik saamerlermik”, Diaavulu, naalliuutsitsilluni perloqqusisarpoq, ”assaminik talerperlermik”, Jiisusi, annaassilluni pilluaqqusisarpoq.
Allat Guuti naalliuutinik atuutititsisinnaanera imaluunniit taakkununnga pisuusinnaanera akueriuminaatsillugu naalliunnartoqarneranik miserratiginnittunngorsimapput. „Ajortoq eqqarsaataannaavoq, tamannalu piviusumik tunngaveqanngilaq,“ Mary Baker Eddy allappoq. „Ajorti, nappaatit toqulu suunngitsuusorineqarunik peerutissapput.“ — Videnskab og Helse med Nøgle til Skriften.
Oqaluttuarisaanermi alianartorpassuit, ingammik sorsunnersuarmi siullermili pisimasut malitsigisaannit, inuppassuit isummersimapput Guuti naalliuutinik pitsaaliisinnaanngitsoq. Atuakkiortoq juutiusoq David Wolf Silverman allassimavoq: „Juutinik toqoraanersuaqarnerup, holocausteqarnerup, takutippaa, uanga isumaga malillugu, ajugaqanngissuseq Guutip pissutsimi ilaattut pigiunnaarsimagaa. Guuti paasilaarsinnaassagutsigu, ajortoqarnera ajunngissusiata naligisimassavaa, ajunngitsuunera ajortup piuneranut atassuteqarsimassaaq, taamaattumillu Guuti ajugaqanngitsuunngilaq.“
Guuti naalliuutinut pisooqataasuunerarlugu tamakkuninngalu pinngitsoortitsissinnaannginnerarlugu oqaatigineqartarnera, naalliuutilluunniit eqqarsaatersuutaannaanerarneqarnerat naalliuuteqartunut tuppallersaataasinnaanngillat. Ajornerusorli: Paasinnittaatsit taamaattut Biibilimi Guuti naapertuilluartutut, sulisinnaassuseqartutut isumassuisuusutullu allaatigineqarneranut, akerliulluinnarput. (Jobi 34:10, 12; Jeremia 32:17; 1 Johannesi 4:8) Sooq Guutip naalliuutinik atuutititsinera pillugu Biibilimi qanoq allassimava?
Naalliuutinut pissutaasoq
Guutip siunertarinngisaannarsimavaa inuit naalliuuteqassasut. Adami Evalu timikkut eqqarsartaatsitigullu naammalluinnartuutillugit pinngortippai, naatsiivimmut nuannersumut angerlarsimaffissaannut inissillugit, nalerisimaarnartumik siunertaqarluartumillu suliassillugit. (1 Mosesi 1:27, 28, 31; 2:8) Guutip naalagaassusianut suullu ajunngitsuuneranik ajortuuneranillu aalajangiisussaaneranut ataqqinninnerat pilluarnissaannut aalajangiisuuvoq. Guuti taamatut oqartussaassuseqarneranut orpik „ajunngitsumik ajortumillu ilisimalersitsisoq“ assersuutaavoq. (1 Mosesi 2:17) Adamip Evallu orpimmit neriffigeqqusaanngitsumit nerinnginnermikkut Guutimut naalatsigitinnertik takutissinnaagaluarpaat. *
Ajoraluartumik Adami Evalu Guutimut naalanngipput. Pinngortitap anersaajusup, kingusinnerusukkut Saatan Diaavulumik ilisimaneqalersup, Eva qularunnaarsippaa Guutimut naalatsigitinneq iluaqutaannginnerarlugu. 1 Mosesi 3:1-6; Saqqummersitat 12:9) Oqartussaaffigineqarnani inuunermut kajungilersisitaalluni Evap naatitaq inerteqqutaasoq nerivaa, erniinnarlu Adami nereqataavoq.
Diaavulup oqaatigaa pisassarisaraluaminik, tassa oqartussaaffigineqarnani inuunermik, suup ajunngitsuuneranik suullu ajortuuneranik nammineq aalajangiisinnaassusermik Guutip tuninaveersaaraa. Saatani oqarpoq orpik neriffigiguniuk ’isai uisitaajumaartut Guutisullu ilerumaartoq ajunngitsoq ajortorlu nalujunnaarlugit’. (Ullormi tassanerpiaq Adamip Evallu pikitsitsinerisa kinguneri misigilerpaat. Guutip naalagaassusia akueriumannginnamikku sernissugaaneq Guutimullu naalatsigitinnermikkut pilluaqqusaarneq annaavaat. Paratiisimiit anisippai Adamimullu oqarluni: „Narsaat perloqqunarsissaaq illit pisuullutit; erloqillutit inuutissarsiorfigissavat inuunerit naatserlugu. Kiakkiullugu nerisassarsiussaatit issumut uterserlutit.“ (1 Mosesi 3:17, 19) Taamaalillutik Adami Evalu nappaatinik, anniaatinik, utoqqalinermik toqumillu tatisimaneqalerput. Taamaalilluni naalliuutit inuit inuunerannut ilaagiinnalerput. — 1 Mosesi 5:29.
Apeqqut akerleriissutaasoq akineqartariaqartoq
Ilaat immaqa oqarumassapput: ’Guutip Adamip Evallu ajortuliaat isiginngitsuusaaginnarsinnaannginnamigit?’ Aap, taamaaliorsinnaanngilaq, taamaalioraluaruni oqartussaassusia ataqqiumaneqarunnaassaaq siunissamilu pikitsitsinissanut allanut kaammattuutaaginnassalluni taamalu naalliuutinik suli annertunerusumik kinguneqalersitsilluni. (Oqaluussisartup oqaasii 8:11) Pikitsitsineq taamaattoq Guutip isiginngitsuusaaginnarsimagaluarpagu pisumut eqqunngitsumut tamatumunnga pisooqataasimassagaluarpoq. Biibilimik allattut ilaat Mosesi Guuti pillugu oqarpoq: „Naammalluinnartuupput suliai, innarluitsuupput aqqutigisai tamarmik. Guutiuvoq aalajaatsoq, salloqittaanngisaannartoq; naapertuilluartuuvoq peqqusersuitsuullunilu.“ (5 Mosesi 32:4) Guuti nammineq najoqqutassiani naapertorlugit iliorniaruni, Adamip Evallu naalannginnerisa kinguneri atuutitsittariaqarpai.
Sooq Guutip inuit siulliit marluk pikitsitsinermillu aallarniisoq, Saatani, erngerluni piinngilai? Taamaaliornissaminut pissaaneqarpoq. Taamaalillutik Adami Evalu naalliuutinik toqumillu kingornussisussanik kinguaassiorsimassanngikkaluarput. Guuti pissaanerminik taamatut atuisimasuuppat, pinngortitaminut silassorissusilinnut eqqortumik naalakkersuisussaviunera uppernarsarneqarsimassanngikkaluarpoq. Adami Evalu meerartaarnatik toqusimagaluarunik Guutip siunertaa, kinguaanik naammalluinnartunik nunarsuaq ulikkaarumaartoq, qatangiinnarsimassagaluarpoq. (1 Mosesi 1:28) „Guuti tassaanngilaq inuk . . . Oqaaserisani naammassisarpai, neriorsuutigisani eqquutitittarpai“. — 4 Mosesi 23:19.
Jehova Guuti ilisimassutsimigut naammalluinnartukkut aalajangerpoq pikitsitsineq piffissami killiligaasumi atuutitinniarlugu. Pikitsitsisut Guutimik oqartussaaffigineqarusunnginnerisa kinguneri misigissallugit naammattumik periarfissaqarput. Oqaluttuarisaanerup inaarutaasumik uppernarsarumaarpaa inuiaat Guutimik aqunneqarnissartik pisariaqartikkaat, Guutillu naalakkersuinera inuit Saatanilluunniit naalakkersuinerannit pitsaanerusoq. Tamanna ilutigalugu Guuti iliuuseqarpoq nunarsuarmut aallaqqaammulli siunertarisaminik piviusunngortitsiniarluni. Neriorsuutigaa „kinguaassaq“ saqqummerumaartoq ’Saatanillu niaqua aserorlugu’ aammalu pikitsitsinera tamatumalu kinguneri ajortut suujunnaarsillugit. — 1 Mosesi 3:15
Kinguaassaq neriorsuutigisaq tassaavoq Jiisusi Kristusi. Johannesip allagaani siullerni atuarparput ’Guutip ernera saqqummersinneqartoq, . . . Diaavulup suliai suujunnaarsissagamigit’. Taamaaliorpoq inuunini naammalluinnartoq, ajortimik toqumillu Adamip kinguaassaanik Johannesi 1:29; 1 Timotheusi 2:5, 6) Jiisusip akiliutaanik ilumoorlutik upperinnittut neriorsorneqarsimapput naassaanngitsumik naalliuutaarukkumaartut. (Johannesi 3:16; Saqqummersitat 7:17) Qaqugu tamanna pissava?
aniguisitsisussaq, akigalugu. (Naalliuutinut tamanut naggatissaq
Inuit siulliit Guutip oqartussaaneranik sumiginnaanerat naalliuterpassuarnik kinguneqarpoq. Naalliuutit soraarsinniarlugit nunamilu aallaqqaataaniilli siunertaminik piviusunngortitsiniarluni, Guutip oqartussaanini immikkut ittumik ersersippaa, tassa aaqqissuussakkut Jiisusip ajoqersukkaminik qinunermik ilinniartitsigami eqqaasaasigut: „Ataatarput qilanniittutit . . . Naalagaaffiit tikiulli, piumasat qilammisut nunamissaaq pili.“ — Matthæusi 6:9, 10.
Inuit namminneq naalakkersuillutik misileraanerannut Guutip piffissarititaa qaangiutilerpoq. Biibilimi siulittuutigineqartutut naalagaaffia 1914-imi pilersinneqarpoq Kristusi kunngigalugu. * Qanittukkut kunngeqarfiit inuit pilersitaat tamaasa aserortissavai suujunnaarsillugillu. — Danieli 2:44.
Jiisusip sivikitsumik nunamiinnermini pilluaqqussutissat, Guutip naalagaaffiata pilerseqqitap inuiannut atulersitassai qilanaartuutitut misigitinneqallatsiarput. Iivangkiiliulersaarutini ersersinneqarpoq Jiisusi inuiaqatigiinni piitsunik naapertuilluanngitsumillu pineqartunik misiginneqataasoq. Napparsimasut ajorunnaarsippai, kaattut nerisippai toqusullu makitillugit. Allaat nipaa pinngortitap naalappaa. (Matthæusi 11:5; Markusi 4:37-39; Lukasi 9:11-16) Taava eqqarsaatigeriaruk utertitsilluni akiliutaata tamakkiisumik inunnut naalattunut tamanut iluaqutaasumik sunniuteqarnissaa! Biibilimi neriorsuuteqarpoq Guutip Kristusi naalakkersortigalugu „qulliit tamaasa isaannit allarterumaarai, toqulu peerukkumaartoq, aliasuttoqarunnaarlunilu nilliasoqarunnaarlunilu anniartoqarunnaarumaartoq“. — Saqqummersitat 21:4.
Naalliuttunut tuppallersaat
Qiimmaallannanngila paasillugu Guutitta Jehovap asannittup ajugaqanngitsullu isumassoraatigut erniinnarlu inuiaat anniaataat iluarsiivigiumaarai? Inuup peruluttumik nappaatillup ajorunnaarusulluni qanorluunniit annernartigissagaluarpat suliaritinnissani akuerisarpaa. Nalunngikkutsigu Guutip pissutsinik aaqqiiniarnermini periaasia naassaanngitsumik pilluaqqussutissanik kinguneqarumaartoq, ilungersunartunik atugaqarutta taamaattumik ilisimasaqarnitta napatissavaatigut.
Ricardop, allaaserisami siullermi eqqaaneqartup, paasivaa Biibilimi neriorsuutinik tuppallersaatissaqartoq. „Nuliama toqunerata kingorna imminut mattusimaannarusukkaluarpunga,“ oqarpoq. „Nassuerutigisariaqarparali taamaaliornikkut nuliara utertissinnaanagu, misigissutsikkulli anniaatikka ajorsigaluttuinnassasut.“ Tamatumunnga taarsiullugu Ricardop kristumiut ataatsimiittarneri najuuffigisarpai Biibilillu neriorsuutaannik inuit allat oqaloqatigisarlugit. „Jehovap asannittumik annertoqqusersuinera misigigakku, qinnutikkalu allaat annikitsunnguit akisarai malugigakku, tassunga qaninneruleriaannarpunga,“ Ricardo oqarpoq. „Tassaana Guutip
asanninneranik ilisimasaqarnerma, inuuninni misilinneqaatima annersaattut taasinnaasannik, atugaqarninnik ikioraanga.“ Nassuerpoq: „Nuliara suli maqaaseqaara, qulariunnaarparali aqqusaagassatta suugaluartulluunniit Jehovamit akuerineqartut naassaanngitsumik ajoqusersinnaanngikkaatigut.“Ricardotut allallu millionillit naalliuutit inuiaat maannakkut atugaat ’eqqaamaneerunnissaat eqqaaqqinneqannginnissaallu’ qilanaaraajuk? (Esaja 65:17) Tatigilluinnarsinnaavat Guutip naalagaaffiata pilluaqqussutai iluaqutigilluarumaaritit kajumissaarut Biibilimeersoq malikkukku: „[Jehova] ujarsiuk nanisassaatillugu, torlorfigisiuk qanitsillugu.“ — Esaja 55:6.
Taamaattumik Guutip oqaasianik atuarneq atuaqqissaarnerlu inuuninni pingaartittariaqarpatit. Guuti erneralu Jiisusi Kristusi ilisarilertariaqarpatit. Guutip najoqqutassiai inuuninni maleruarniarlugit ilungersuutiguuk, taamaalillutit Guutip kisimi oqartussaaneranut naalatsigitikkusullutit takutissavat. Taamaalioruit maannangaaq pilluarnerulissaatit — allaat aamma misilinneqassagaluaruit. Taava silarsuarmi naalliuuteqanngiffiusumi inuunissaq qilanaarilersinnaassavat. — Johannesi 17:3. (wE 1/1 03)
[Quppernerup ataani ilanngussat]
^ imm. 7 The New Jerusalem Bible-p 1 Mos 2:17-mut nassuiaataa naapertorlugu ’ajunngitsumik ajortumillu ilisimasaqarneq’ tassaavoq ”suup ajunngitsuuneranik suullu ajortuuneranik nammineq aalajangiisinnaassuseqarneq, tamannalu naapertorlugu iliuuseqarluni. Ileqqussatigut oqartussaaffigineqarusunnginnermikkut inuup pinngortitaanini miserratigaa.“ Nangipporlu: „Ajortuliorneq siulleq Guutip kisimi oqartussaaneranut saassussineruvoq.“
^ imm. 17 Ukioq 1914-ni pillugu Biibilimi siulittuutit atuakkami Ilisarsineq inuunermut naassaanngitsumut sammisoq-imi kapitali 10, 11-milu sukumiinerusumik sammineqarput. Jehovap Nalunaajaasuinit saqqummersinneqartoq.
[Qupp. 6, 7-mi ungalusaq]
NAALLIUUTIT QANOQ ATORUMINARTINNERULERSINNAAVAVUT?
„Isumakuluutisi tamaasa [Guutimut] pisissigit isumassormasi.“ (1 Petrusi 5:7) Uagut nammineq asasavulluunniit naalliuuteqaraangata pakatsisarnerput kamattarnerput nikallortarnerpulluunniit pissusissamisuuginnarpoq. Ilisimatinneqarpugulli Jehovap misigissutsivut paasilluarsinnaagai. (2 Mosesi 3:7; Esaja 63:9) Angutit aalajaatsut qanga inuusimasut assigalugit uummammiutsinnik aniatitsivigisinnaavarput, annilaangatigisatsinnik ernummatigisatsinnillu paasitillugu. (2 Mosesi 5:22; Jobi 10:1-3; Jeremia 14:19; Habakkuk 1:13) Ilimagissanngilarput misilinneqaativut tupinnartuliornikkut peerumaarai, atorneranili iluunngarluta qinnutitsinnut akissutitut ilisimassusermik nukissatsinnillu tunissavaatigut. — Jaaku 1:5, 6.
„Innikkut misilinneqarneq atugarsi tupigusuutigissanngilarsi pineqarnersi immikkuuissutut isumaqarfigalugu.“ (1 Petrusi 4:12) Uani Petrusip malersugaaneq eqqartorpaa, oqaasiili uppertup naalliuutaanut qanoq ittunulluunniit tunngatinneqarsinnaalluarput, nappaateqaraanni, aliasuuteqaraanni allatigulluunniit ujariatsigaanni. Biibilimi allassimavoq ’suut tamarmik periarfissatigut nalaatsornertigullu pisartut’. (Oqaluussisartup oqaasii 9:11, 1990) Tamakku inuunerup matuma ilagai. Tamanna akuerigutsigu naalliuutit ajunaarnerillu uagutsinnik eqquisut atoruminartinnerussavavut. (1 Petrusi 5:9) Pingaarnerusumik eqqarsaatigisarutsigu ’Jehovap isai iluartunut sammisut siutaalu qinusarnerinut,’ tuppallersaatigissavarput. — Tussiaat 34:15; Ussatit 15:3; 1 Petrusi 3:12.
„Neriunnissinni tipaatsugitsi.“ (Romamiut 12:12) Siornatigut qanoq nuannertigisunik atugaqarsimanerput eqqarsaatigiinnarnagu, naalliuutinik atorunnaarsitsinissaanik Guutip neriorsuutaa eqqarsaatigisinnaavarput. (Oqaluussisartup oqaasii 7:10) Tamatuma neriuutip tunngavissaqarluartup illersussavaatigut, soorlu niaqorutip niaqoq illersortaraa. Neriuutitta atukkatsinnik nuanniitsunik oqilisaatissavaatigut taamaalillunilu eqqarsartaatitsigut, misigissutsikkut anersaakkullu peqqissutsikkut innarlerneqarnissaraluarput pinngitsoortillugu. — 1 Thessalonikamiut 5:8.
[Qupp. 5-mi assiliartaq]
Adamip Evallu Guutip oqartussaassusia akueriumanngilaat
[Qupp. 7-mi assiliartaq]
Guuti neriorsuivoq silarsuarmi naalliuutaarukkumaartoq