Nutaarsiassamik nuannersumik upperinninnerit piviusuua?
Nutaarsiassamik nuannersumik upperinninnerit piviusuua?
„Piffissaq nalliuppoq, Guutillu naalagaaffia qanillivoq; allamik isumataaritsi, iivangkiiliulu upperisiuk!“ — MARKUSI 1:15.
1, 2. Markusi 1:14, 15 qanoq nassuiassaviuk?
UKIUUVOQ 30 ukiunik naatsorsuisalerfitta kingorna. Jiisusi Kristusip kiffartornini pingaaruteqangaartoq Galilæami aallartissimavaa. „Guutip iivangkiiliua“ oqaluussissutigaa, Galilæamiorpassuillu oqaasii uku killissutigaat: „Piffissaq nalliuppoq, Guutillu naalagaaffia qanillivoq; allamik isumataaritsi, iivangkiiliulu upperisiuk!“ — Markusi 1:14, 15.
2 Maanna ’piffissanngorsimavoq’ Jiisusip kiffartornissaanut inuillu Guutimik iluarisaassutigisassaminnik aalajangernissaanut. (Lukasi 12:54-56) ’Guutip naalagaaffia qanillisimavoq’ Jiisusimi Guutip kunngitut toqqagaatut tikiussimavoq. Oqaluussinerata eqqortumik isumaqarfiginnittut allamik isumataartippai. Qanorli takutippaat ’iivangkiiliu upperalugu’, uagullu qanoq taamaaliorsinnaavugut?
3. Inuit qanoq iliuuseqarlutik takutippaat nutaarsiassaq nuannersoq upperalugu?
3 Jiisusip kajumissaarineratut apustili Petrusip inuit allamik isumataarnissaannik kajumissaarpai. Piinsip ulluani ukiumi 33-mi juutinut Jerusalemimiittunut ima oqarpoq: „Allamik isumataaritsi, Jiisusi-Kristusillu aqqani tamassi kuisigitsi ajortissi isumakkeerneqaatissaannik, taava Anersaaq Illernartoq tunissutisiarissavarsi.“ Tusindilikkuutaat allamik isumataarput, kuisillutik Jiisusimullu ajoqersuganngorlutik. (Apustilit Suliaat 2:38, 41; 4:4) Ukiumi 36-mi juutiunngitsut peqqissimisut aamma taamaaliorput. (Apustilit Suliaat 10:1-48) Ullumikkut nutaarsiassamik nuannersumik uppernermik killinneqarlutik inuit tusindilikkuutaat aamma allamik isumataartarput ajortuliatillu peqqissimissutigisarlugit, Guutimut tunniulluinnartarlutik kuisittarlutillu. Annaanneqarnissaq pillugu nutaarsiassaq nuannersoq ilassivaat Jiisusillu utertitsissutitut pilliutaanik upperinninnertik ersersillugu. Aammattaaq naapertuilluartuliorput Guutillu naalagaaffia aalajangiulluinnarlugu.
4. Upperneq suua?
4 Uppernerli suua? Apustili Paulusi ima allappoq: „Upperneq tassaavoq neriugisamik tatiginnilluinnarneq, takunngisamik qularuteqannginneq.“ (Hebræerit 11:1) Upperneq qularunnaassutigaarput Guutip oqaatsimini neriorsuutai tamarmik eqquukkumaartut. Assigiinnarpaa illumik aalajangersimasumik piginnittuunitsinnut uppernarsaammik allagartaateqartugut. Aammattaaq upperneq tassaavoq takussaanngitsunik „qularuteqannginneq“, imaluunniit takussaanngitsut pillugit uppernarsaat nakimaallinartoq. Nammineq paasinninnitta uummatikkullu qujamasunnitta qularunnaarsippaatigut taamaattut takusimanngikkaluarlutigit piviusuusut. — 2 Korinthimiut 5:7; Efesosimiut 1:18.
Upperneq pisariaqartipparput!
5. Sooq upperneq taama pingaaruteqartigaa?
5 Anersaakkut pisariaqartitaqarneq inunnguuseraarput, uppernerli inunnguuserinngilarput. Allaammi allassimavoq ’imaanngitsoq tamarmik upperneq pigigaat’. (2 Thessalonikamiut 3:2) Kristumiulli uppertuusariaqarput Guutip neriorsuutaanik kingornussissagunik. (Hebræerit 6:12) Uppernikkut maligassaalluartorpassuit eqqaareerlugit, Paulusi ima allappoq: „Uagut nalunaajaasunik taama amerlatigisunik avatangerneqartugut nanertuisitsinnit tamanit ajortimillu uagutsinnik tigumminninniartumit peerniarta, angusassamullu siunitsinniittumut arpannitsinni tamatumani nikallujuilluta Jiisusi uppernerup aqqutissiuussisua naammassisitsisualu tunaaralugu.“ (Hebræerit 12:1, 2) ’Ajorti uagutsinnik tigumminninniartoq’ suua? Tassaavoq uppinngissuseq, aammattaarli tassaasinnaavoq upperisaraluatsinnik upperinnikkunnaarneq. Upperluartuujuarniarluta ’Jiisusi tunaarisariaqarparput’ maligassiaalu malillugu. Aamma inuunerlunnaveersaartariaqarpugut, uinngup suliai akiortariaqarlugit pigisanillu pingaartitsivallaarnaveersaarluta, silamiorpaluttunik isumaliutersornaveersaarluta Biibilerpalaanngitsunillu ileqqoqarnaveersaarluta. (Galatiamiut 5:19-21; Kolossemiut 2:8; 1 Timotheusi 6:9, 10; Judasi 3, 4) Aammattaaq upperisariaqarparput Guutip najoraatigut oqaasianilu siunnersuutit ilumut iluaqutigalutigik.
6, 7. Uppertuunissamik qinuneq sooq pissusissamisoorpa?
6 Uppertunngorniarluta aalajangernerinnatsigut uppertunngorsinnaanngilagut. Upperneq Guutip anersaavata illernartup, pissaanerata sulissutiginnittup, inerititaata ilagaa. (Galatiamiut 5:22, 23) Uppernerpulli nakussatsinneqartariaqarpat qanoq iliussaagut? Jiisusi ima oqarpoq: „Qitornasi tunissutinik ajunngitsunik tunisinnaagassigit, taava qularnannginnerungaarpoq Ataatap qilammiittup imminut qinusut Anersaamik Illernartumik tuniumaarai.“ (Lukasi 11:13) Aap, anersaaq illernartoq qinnutigisigu, misilinneqarnerpaaffigisatsinnimi Guutip piumasaatut iliornissatsinnut pisariaqartumik uppissuseqalersissinnaavaatigut. — Efesosimiut 3:20.
7 Uppernerulernissamik qinuneq pissusissamisoorpoq. Jiisusip anersaapiluk nukappiaqqamit anisilermagu, nukappiaqqap angutaa ilungersorluni ima qinuvoq: „Upperpunga, uppinngissutsikkut ikiunnga!“ (Markusi 9:24) Jiisusip ajoqersugai ima qinupput: „Uppernermik annerusumik tunisigut!“ (Lukasi 17:5) Taamaattumik uppertuunissarput qinnutigisigu, tatigalugu qinnutit taamaattut Guutip akiumaarai. — 1 Johannesi 5:14.
Guutip oqaasia upperisariaqarparput
8. Guutip oqaasianik upperinninneq qanoq iluaqutigisinnaavarput?
8 Jiisusip inuunini pilliutiginngitsiarlugu, ajoqersukkaminut ima oqarpoq: „Uummatisi annilaanngikkilit. Guutimut upperitsi, uannullu upperitsi.“ (Johannesi 14:1) Kristumiutut Guuti erneralu upperaarput. Guutip oqaasiami? Uagutsinnut pitsaanerpaamik siunnersuuteqartoq tatigilluinnarlugu atuaqqissaartarutsigu maleruartarutsigulu inuunitsinnut iluaqutaasumik sunniuteqangaarsinnaavoq. — Hebræerit 4:12.
9, 10. Upperneq pillugu Jaaku 1:5-8-mi allassimasoq qanoq nassuiassaviuk?
9 Inuttut naammalluinnanngitsutut inuunerput ajornartorsiuterpassuaqarpoq. Iluaqutigingaarsinnaavarpulli Guutip oqaasianik upperinninneq. (Jobi 14:1) Oqariarta misilinneqarneq aalajangersimasoq qanoq naammagalugu atorsinnaanerlugu nalugipput. Guutip oqaasiani ima siunnersorneqarpugut: „Ilisimassutsimigut inorsartumik ilaqarussi taassuma [qinnutigiuassavaa, NV] ilisimassuseq Guutimit avoqqaarlernani naammalluinnartunik tamanut tunisisartumit, taava piumaarpaa. Upperlunili [qinujuassaaq, qulanngilluinnarluni, NV]; qulartummi assigaa immap malinga anorip aalatitaa qaraartitaalu. Inuk taama ittoq isumaqanngikkili [Jehovamit] sumik tunineqassalluni, isummani saqittuartuummat inuuserisanilu allanngorartuartuulluni.“ — Jaaku 1:5-8.
10 Jehova Guutip avoqqaarinavianngilaatigut ilisimassuseqanngikkutta qinnutigigutsigulu. Akerlianik ikiussavaatigut misilinneqarnerup eqqortumik isiginissaanut. Immaqa allassimaffiit iluaqutaasinnaasut malugaavut uppeqatitta innersuussisarnerisigut namminerluunniit Biibili atuaqqissaarneratigut. Aamma imaassinnaavoq allatut Jehovap anersaavanit siulersorneqartugut. ’Upperluta qinujuarutta, qulanngilluinnarluta’, Ataatatta qilammiusup ilisimassusermik pisariaqartumik misilinneqarnerit naammagalugit atornissaannut tunissavaatigut. Akerlianik immap malinga anorip aalatitaa qaraartitaalu assigigutsigu, Jehovamit tunineqarnissarput naatsorsuutigisinnaanngilarput. Sooq? Taamaakkutta assigiinnassagamiuk isumarput saqittuartuusoq qinunermilu allatigullu allanngorartuartuusugut — aap, allaat uppernitsigut. Taamaattumik Guutip oqaasianik siunnersuutaanillu upperinnilluinnartariaqarpugut. Misissoriartigik Biibilip qanoq iluaqutaaneranik assersuutit ilaat Biibilimilu qanoq siunnersorneqarnersugut.
Upperneq ullormullu inuussutissat
11. Ullormut pisariaqartitatsinnut atatillugu Guutip oqaasianik upperinninnitta sumik qularunnaarsippaatigut?
11 Piitsuugaannimi ullormulluunniit inuussutissaqanngikkaanni? Guutip oqaasianik upperinninnitta qularunnaarsippaatigut Jehovap ullormut pisariaqartitavut isumagissagai naggataatigullu asasini tamaasa naammangaartunik inuussutissaqartikkumaarai. (Tussiaat 72:16; Lukasi 11:2, 3) Kajumissinassaaq eqqarsaatigalugu kaannersuaqarnerata nalaani Jehovap pruffiitini Elia qanoq nerisassaqartikkaa. Kingusinnerusukkut Guutip uillarneq, ernera Elialu inuuginnartippai tupinnartuliornikkut qajuusat uulialu nungutsaalillugit. (1 Kunngit 17:2-16) Aammattaaq Jehovap pruffiiti Jeremia isumassorpaa Babylonimiut Jerusalemimik ungusinerisa nalaani. (Jeremia 37:21) Jeremia Elialu nerisakikkaluartut erseqqippoq Jehovap imminiiginnanngikkai. Aammattaaq ullumikkut uppertini isumassorpai. — Matthæusi 6:11, 25-34.
12. Pisariaqartitavut pingaarnerit matussutissinniarlugit uppernerput qanoq iluaqutigissavarput?
12 Biibilimi najoqqutassianik upperinninnitta maleruaanittalu immaqa pisuunngortinngilaatigut, pisariaqartitattali pingaarnersaannik matussusiinissatsinnut iluaqutigissavarput. Assersuutigalugu Biibilimi siunnersorneqarpugut unneqqarissuussasugut, pikkorissuussasugut eqiasuitsuussasugullu. (Ussatit 22:29; Oqaluussisartup oqaasii 5:18, 19; 2 Korinthimiut 8:21) Sullerissutut tusaamasaanerup pingaaruteqarnera suusupaginngisaannartariaqarparput. Akilerluakkanik suliffissakilliorfiugaluartoq inuit unneqqarissut, pikkorissut eqiasuitsullu allanit atugarissaarnerusarput. Immaqa pigisakikkaluarlutik ullormut pisariaqavissunik amigaateqarajunngillat namminnerlu sulinermikkut pissarsiaminnik nerinertik nuannaarutigisinnaallugu. — 2 Thessalonikamiut 3:11, 12.
Upperneq iluaqutigissavarput aliasunnitta naammagalugu atornissaanut
13, 14. Upperneq qanoq iluaqutigisinnaavarput aliasunnitta naammagalugu atornissaanut?
13 Guutip oqaasiani piviusorsiortumik takutinneqarpoq asasamik annaasaqaraanni aliasunneq pissusissamisoortoq. Ataataanerpaap aalajaatsup Aaperaap nuliami asasami Sarap annaanera aliasuugigaa. (1 Mosesi 23:2) Daavip erni Absalomi toqusimasoq tusaramiuk artorsaatigingaarpaa. (2 Samueli 18:33) Allaat inuk naammalluinnartoq Jiisusi qiavoq ikinngunni Lazarusi toqummat. (Johannesi 11:35, 36) Asasatsinnik toqusoorutta immaqa aliasunnermik artorsinneqartutut misigisarpugut, neriorsuutinilli Guutip oqaasianeersunik upperinnikkutta aliasunnitta naammagalugu atornissaanut iluaqutigisinnaavarput.
14 ’Guutimut neriugisaqarpunga,’ Paulusi oqarpoq, ’tassa toqusut makikkumaartut — iluartut iluaatsullu.’ (Apustilit Suliaat 24:15) Inuppassuit toqusunit makitinniarlugit Guutip neriorsuutaa upperilluinnartariaqarparput. (Johannesi 5:28, 29) Makititaasussat ilagissavaat Aaperaat Saralu, Iisaaq Rebekkalu, Jaaku Lealu. Maannakkut tamarmik toqumi sinipput, Guutilli silarsuassaani nutaami toqusunit makitinneqassapput. (1 Mosesi 49:29-32) Asasavut toqumi sininnerannit nunarsuarmi maani inuunermut itertinneqarpata nuanningaassusissaa eqqarsaatigeriaruk! (Saqqummersitat 20:11-15) Uppernitta immaqa maannakkorpiaq aliasukkunnaartivissinnaanngilaatigut, Guutimulli qaninnerulersissavaatigut, taassumalu ikiussavaatigut annaasaqarnitta naammagalugu atornissaanut. — Tussiaat 121:1-3; 2 Korinthimiut 1:3.
Upperneq nikallungasut nakussatsissutigaat
15, 16. (a) Uppertunik nikallortoqaraangat sooq oqarsinnaavugut siornatigut pisimasunik assersuutissaqartoq? (b) Nikallunganeq anigorniarlugu qanoq iliortoqarsinnaava?
15 Aammattaaq Guutip oqaasiani takutinneqarpoq allaat uppertut nikallorsinnaasut. Jobi misilinneqarujussuarami misigivoq Guutip qimakkaani. (Jobi 29:2-5) Nehemiap nikallungassutigaa Jerusalemip illukuinnanngorsimanera qarmaarussimaneralu. (Nehemia 2:1-3) Petrusi ’qiangaarpoq’ Jiisusimik miserratiginninnini isumatsassutigigamiuk. (Lukasi 22:62) Paulusillu Thessalonikami ilagiinni uppeqatini kajumissaarpai ’tuppallersaqqullugit nikallortut’. (1 Tásalûníkamiut 5:14) Taamaattumik ullumikkut kristumiunik nikallortoqaraangat siornatigut pisimasunik assersuutissaqarpoq. Misigissutsilli taamaattut akiorniarlugit qanoq iliorsinnaavugut?
16 Imaassinnaavoq nikallungasugut ilungersunartunik arlalinnik ataatsikkut ajornartorsiuteqaratta. Ajornartorsiutilli ataatsitut artorsartitsingaartutut isiginagit immaqa Biibilimi najoqqutassiat atorlugit ataasiakkaarlugit aaqqissinnaavavut. Oqiliallaatigisinnaavarput. Aammattaaq pingaaruteqarpoq oqimaaqatigiissumik inooriaaseqarneq naammattumillu qasuersaartarneq. Ataaserli qularnaappoq: Guutimik oqaasianillu upperinninneq anersaakkut ilorrisimaarnarpoq Guutip ilumut isumassuineranik upperinninnerput nakussatsinneqartarmat.
17. Jehovap isumassoraatigut qanoq nalunngilarput?
17 Petrusip ima isumalluarsaarpaatigut: „Guutip assaata pissarsuup ataani qanilaartuugitsi, taava taassuma piffissaq nalliuppat akitsisissavaasi, isumakuluutisilu tamaasa taassumunnga pisissigit isumassormasi.“ (1 Petrusi 5:6, 7) Tussiaasiortoq ima allappoq: „[Jehovap] najummisarpai orlulersut tamaasa, massitsittarlugillu taaqqungasut tamaasa.“ (Tussiaat 145:14) Neriorsuutit taakku tatigisariaqarpavut, Guutip oqaasianiippummi. Immaqa nikallungajunnaavissinnaanngilagut, uppernikkulli nakussatsinnarpoq nalunagu isumakuluutivut tamaasa Ataatatsinnut asannittumut qilammiusumut tunniussinnaagivut!
Upperneq misilinneqarnerillu allat
18, 19. Nappaatip naammagalugu atornissaanut uppeqatitsinnillu napparsimasunik tuppallersaanissatsinnut upperneq qanoq iluaqutigaarput?
18 Nammineq ilaqutarpulluunniit ilungersunartumik nappaateqalerpat uppernerput misilinneqangaarsinnaavoq. Biibilimi oqaluttuaqanngilaq kristumiut soorlu Epafroditusi, Timotheusi Trofimosilu tupinnartuliornikkut ajorunnaarsinneqarsimanerannik, qularnanngitsumilli nappaatip naammagalugu atornissaanut Jehovap ikiorsimassavai. (Filippimiut 2:25-30; 1 Timotheusi 5:23; 2 Timotheusi 4:20) ’Nikanartunut ilisimasutut iliortoq’ pillugu tussiaasiortoq ima allappoq: ’[Jehovap] nakussatsikkumaarpaa napparsimaffiani innangatillugu, nalaffia tamaat allanngortippat napparsimanerani.’ (tugsiaut 41:2-4) Tussiaasiortup oqaasii taakku uppeqatitsinnik napparsimasunik tuppallersaanissamut qanoq iluaqutigisinnaavavut?
19 Anersaakkut ikiuisinnaanitta ilagaat napparsimasumik qinoqatiginninneq qinnussinerlu. Guuti qinnuigineq ajorparput ullumikkut tupinnartuliornikkut ajorunnaarsitseqqullugu, qinnuigisinnaavarpulli napparsimasut nappaatertik naammagalugu atornissaanut nukissaqarteqqullugit sanngiiffiinilu anersaakkut nakussatsittaqqullugit. Jehovap napatissavai, uppernerulertarpullu oqaatsinik imaattunik qilanaarisaqarunik: „Innuttaasoq kinaluunniit oqassanngilaq: ’Napparsimavunga!’“ (Esaja 33:24) Tuppallernaqaaq nalunagu inuit naalattut Jiisusi Kristusi toqusunit makititaasoq aqqutigalugu Guutillu naalagaaffia iluaqutigalugu naassaanngitsumut ajortimit, nappaatinit toqumillu aniguisitaajumaartut. Neriugisanut nuanningaartunut taakkununnga qutsavigaarput Jehova, ’nappaatitsinnik tamanik katsorsaasussaq’. — Tussiaat 103:1-3; Saqqummersitat 21:1-5.
20. Sooq oqartoqarsinnaava upperneq iluaqutigalugu utoqqalinerup ’ullui ajortut’ naammagalugit atorsinnaagivut?
20 Aamma upperneq iluaqutigalugu utoqqalinermi peqqiilligutta nukeerukkiartuleruttalu „ullut ajortut“ naammagalugit atorsinnaavavut. (Oqaluussisartup oqaasii 12:1-7) Utoqqartavut tussiaasiortutut utoqqalisutut qinusinnaapput: „Illimmi neriuffigaakkit, [Jehova] . . . Ilinnit igeqinanga utoqqaliguma, qimaqinanga nukeerutileruma.“ (Tussiaat 71:5, 9) Tussiaasiortoq Jehovamit annertoqqusersorneqartariaqarluni misigivoq, uppeqaterpassuatta ukiorpassuarni Guutimut kiffartorsimasut maannalu utoqqalisut misiginerattut. Uppernertik pissutigalugu qularutiginngissinnaavaat Jehovap taliisa ittuinnartut napatissagaatik. — 5 Mosesi 33:27.
Guutip oqaasia upperiuaannaruk
21, 22. Upperneq Guutimut attaveqarnitsinnut qanoq sunniuteqarpa?
21 Nutaarsiassamik nuannersumik Guutip oqaasianillu tamarmiusumik upperinninnerup Jehovamut qanilliartortittuassavaatigut. (Jaaku 4:8) Ilumoorpoq uagutsinnut kisimi oqartussaalluni Naalagaasoq, aammattaarli Pinngortitsisigaarput Ataatagalugulu. (Esaja 64:8; Matthæusi 6:9; Apustilit Suliaat 4:24) „Illit tassaavutit ataataga, Guutiga, qaarsorlu annaffiga,“ tussiaasiortoq allappoq. (Tussiaat 89:27) Jehovamut oqaasianullu isumassarsiarititaasumut upperutta, ’qaarsutut annaffitsitut’ aamma isigisinnaassavarput. Immikkut pisinnaatitaaffeqalernerput uummatikkut nuannaajallannarpoq!
22 Jehova Ataataavoq kristumiunut tanitanut suleqataannullu nunami inuunissamik neriugisalinnut. (Romamiut 8:15) Ataatatsinnullu qilammiusumut upperneq pakatsissutaanngisaannarpoq. Daavi ima oqarpoq: „Ataatamami anaanamalu qimakkaluarpannga Jehovap ilasiarissavaanga.“ (Tussiaat 27:10, 1989) Aammattaaq ima neriorsorneqarpugut: „[Jehovap] atini naalannangaartoq pissutigalugu innuttani ajattunngitsoorpai.“ — 1 Samueli 12:22.
23. Jehovamut ataavartumik attaveqalissagutta sumik piumaffigineqarpugut?
23 Jehovamut ataavartumik attaveqarumalluta soorunami nutaarsiassaq nuannersoq upperisariaqarparput akueralugulu Biibili ilumut taamaanneratut — Guutip oqaasiatut. (1 Thessalonikamiut 2:13) Jehova upperilluinnartariaqarparput aqquterpullu oqaasianit qaamatillugu. (Tussiaat 119:105; Ussatit 3:5, 6) Uppernerulissaagut Jehovap misiginneqataanera, nallittuinera tapersersuineralu tatigalugu qinnuigigutsigu.
24. Eqqarsaat tuppallernartoq suna Romamiut 14:8-mi allassimava?
24 Upperneq killissutigalugu Guutimut naassaanngitsumik tunniulluinnarpugut. Taassuma kiffaasut tunniulluinnarsimasutut upperluartuaannarutta allaat neriuutigaarput toqussagutta toqusunit makititaanissarput. Aap, „inuugutta toquguttaluunniit [Jehovap] pigaatigut.“ (Romamiut 14:8) Eqqarsaat tuppallernartoq tamanna uummatitsinni toqqortigu Guutip oqaasianik tatiginnittuinnartilluta nutaarsiassamillu nuannersumik upperinnittuinnartilluta.
Qanoq akissavit?
• Upperneq suua, pissuserlu taanna sooq pisariaqartipparput?
• Sooq pingaaruteqarpa nutaarsiassamik nuannersumik aamma Guutip oqaasianik tamarmiusumik upperinninnissaq?
• Upperneq qanoq iluaqutigaarput misilinneqarnerit assigiinngitsut naammagalugit atornissaannut?
• Uppertuaannarnissatsinnut suna iluaqutigissavarput?
[Atuaqqissaarnermi apeqqutit]
[Qupp. 21-mi assiliartaq]
Jehovap Jeremia Elialu uppertuummata tapersersorpai
[Qupp. 22-mi assiliartaq]
Jobi, Petrusi Nehemialu upperluartuupput
[Qupp. 24-mi assiliartaq]
Jehovamut ataavartumik attaveqalerniarluta nutaarsiassaq nuannersoq upperisariaqarparput