Qanoq uppertigaat?
Qanoq uppertigaat?
’Aalajangerlusi upperpusi.’ — 2 KORINTUMIUT 1:24.
1, 2. Sooq uppertuusariaqarpugut, uppernerpullu qanoq nakussatsisinnaavarput?
JEHOVAP kiffaasut nalunngilarput uppertuusariaqarluta. Uppertuunatami ’Guutimit iluarisaasinnaanngilagut’. (Hebræerit 11:6) Taamaattumik silatusaassaagut Guutip anersaava uppernerlu, anersaap inerititaata ajunngitsup ilaa, qinnutigigutsigik. (Lukasi 11:13; Galatiamiut 5:22, 23) Aammattaaq kristumioqatitsinni upperneq takusarput ilaarlugu pissuserput taanna nakussatsissinnaavarput. — 2 Timotheusi 1:5; Hebræerit 13:7.
2 Guutip oqaasiani kristumiunut tamanut aqqutigeqqusaq aalajaalluta malittuarutsigu uppernerulissaagut. Aammattaaq uagut nammineq uppernerput ineriartortissavarput ullut tamaasa Biibilimi atuartarutta atuagassiallu ’pilittaasup ilumoortup silatuullu’ pilersitai atorluartarutsigit. (Lukasi 12:42-44; Josva 1:7, 8) Kristumiut ataatsimiinneri ataatsimeersuarnerilu najuuffigigaangatsigik uppernitsigut kajumissaaqatigiittarpugut. (Romamiut 1:11, 12; Hebræerit 10:24, 25) Uppernerpullu nakussatsinneqaqqittarpoq oqaluussinermi allanut oqaatigigaangatsigu. — Tussiaat 145:10-13; Romamiut 10:11-15.
3. Uppernermut atatillugu utoqqaanertanit kristumiunit asannittunit qanoq ikiorneqarsinnaavugut?
3 Utoqqaanertat asannittut Biibilimeersunik siunnersuinerat kajumissaarinerallu uppernitsinnik aamma ineriartortitseqataavoq. Utoqqaanertat taakku apustili Paulusitut, Korinthimiunut ima allattutut, isumaqarput: ‘Tipaatsussutsinnilli suleqatigaatsigut aalajangerlusi upperassi.’ (2 Korintumiut 1:23, 24) Nutsikkami allami ima allassimavoq: „Nuannaartinniarlusi suleqatigaassi upperluartuugassi.“ (Contemporary English Version) Aap, naapertuilluartoq uppernini pissutigalugu inuuvoq. Soorunami kialuunniit uppissussinnaanngilaatigut, ilumoorfiginnittunngortissinnaanngilaatigut assuarnaatsunngortissinnaanatalu. Tamatumunnga atatillugu ’kialuunniit nammagassani nammineq nammattussaavaa’. — Galatiamiut 3:11; 6:5.
4. Guutimut kiffat aalajaatsut pillugit Biibilimi oqaluttuat qanoq uppernerulissutigisinnaavavut?
4 Inunnik uppertunik Biibilimi oqaluttuarpassuaqarpoq. Immaqa eqqaamavarput pissutsini immikkorluinnaq ittuni qanoq iliortut. Ullummi tamaasa, immaqa inuunermi sivisuumi, uppernermik ersersitsisarnerat eqqaamavarput? Pissutsini uagut atukkatsinnut assingusinnaasuni ilaat qanoq uppernermik takutitsisimasut misissoriartigik. Tamanna uppernerulissutigisinnaavarput.
Upperneq sapiillissutigaarput
5. Biibilimi oqaluttuap suup takutippaa Guutip oqaasiata oqaluussissutiginissaanut upperneq sapiissuseqalersitsisartoq?
5 Upperneq Guutip oqaasiata oqaluussissutiginissaanut sapiillissutigaarput. Guutip eqqartuussutsiminik naammassinninnissaa Enokip sapiilluni oqaluussissutigaa. „Takuat,“ oqarpoq, „[Jehova] aggerpoq illernartortaminit 10.000-ilippassuarnit iluneqarsimalluni tamanik eqqartuussiartorluni tarnillu tamaasa pillariartorlugit iliorsimaneri iluaatsut tamaasa pillugit iluaatsullu ajortuliortut akerlilersorluni oqaaserisaat soqqusaatsut tamaasa pillugit.“ (Judasi 14, 15) Oqaatsit taamaattut tusarlugit qularnanngitsumik assortuisut guutiitsut Enoki toqukkusussimassavaat. Qunusuillunili upperlunilu oqaluussivoq, allassimavorlu Guutip ’peerutsikkaa’, toqumi sinitsillugu, qularnanngitsumik peqqarniitsumik toqutaaqqunagu. (1 Mosesi 5:24; Hebræerit 11:5) Uagut taamaattunik misigisaqarneq ajorpugut, Jehovalli qinnutivut tusartarpai, upperlutalu sapiissuseqarlutalu oqaatsiminik oqalussinnaatilluta. — Apustilit Suliaat 4:24-31.
6. Upperneq sapiissuserlu Guutimeersut Noap qanoq iluaqutigai?
6 „Uppernikkut Noa . . . umiarsualiorpoq inoqutimi annaffissaannik.“ (Hebræerit 11:7; 1 Mosesi 6:13-22) Aammattaaq Noa ’iluarnermik nalunaariartortitaavoq’ sapiilluni Guutip mianersoqqussutaanik taamanikkut inuusunut tusarliisoq. (2 Petrusi 2:5) Qularnanngitsumik inuit taakkua ulersuaqarnissaanik tusarliussaq mitaatigaat. Aammattaaq ullumikkut mitallerluni akisoqartarpoq pissutsit aaqqissuussaanerata matuma erniinnaq atorunnaarsinneqarnissaanik uppernarsaatit Biibilimeersut oqaatigigaangatsigik. (2 Petrusi 3:3-12) Taamaakkaluartoq uppernerput sapiissuserpullu Guutimeersut pissutigalugit Enokitut Noatullu tusarliussassaq tusarliussinnaavarput.
Upperneq erinitsajuitsitsisarpoq
7. Aaperaap allallu uppernertik erinitsajuinnertillu qanoq takutippaat?
7 Upperneq erinitsajuinnerlu pisariaqartippavut, ingammik maannakkut aaqqissuussaanerup ajortup atorunnaarsinneqarnissaa utaqqitillugu. Ataataanerpaaq Aaperaat Guutimik mianerinnittoq ’uppernikkut nikallujuinnikkullu Guutip neriorsuutigisaanik kingornussisussat’ ilagaat. (Hebræerit 6:11, 12) Uppernikkut illoqarfik Ur ilorrisimaarnartuilu tamaasa qimappai nunamilu takornartatut Guutip neriorsuutigisaani najugaqalerluni. Neriorsuummik tamatuminnga Iisaaq Jaakulu kingornusseqataasussaapput. „Taaneqartulli tamakku tamarmik uppersuseqarnertik pigalugu toqupput neriorsuutit suli eqquutinngitsut.“ Uppernikkullu „nunavissaq pitsaanerusoq kipitsavigaat tassa qilammiittoq“. Akissarsiassaattut Guutip „illoqarfissaat tunngavilereersimavaa“. (Hebræerit 11:8-16) Aap, Aaperaap, Iisaap Jaakullu — nuliatillu Guutimik mianerinnittut — Guutip qilammi naalagaaffia, naalakkersuinerata ataani nunami inuunermut toqusunit makititaaffissartik, erinitsajuillutik utaqqivaat.
8. Aaperaap, Iisaap Jaakullu suna misiginngikkaluarlugu uppernertik erinitsajuinnertillu ersersippaat?
8 Aaperaat, Iisaaq Jaakulu upperunnaanngillat. Nuna neriorsuutigisaq naalatsigitilinngilaat, Aaperaallu kinguaavatigut inuiaat tamarmik pilluaqqunarsisut takunagit. (1 Mosesi 15:5-7; 22:15-18) Toqunerisa kingorna ukiut hundredelippassuit qaangiuppata aatsaat ’illoqarfik Guutip tunngaviligaa’ piviusunngortussaavoq, angutilli taakku inuunertik naallugu uppertuupput erinitsajuillutillu. Uagut taamaaliornissatsinnut minnerunngitsumik pissutissaqarpugut, maannami naalagaaffik Missiarsikkoortoq pilersinneqareerpoq qilammilu naalakkersuilluni. — Tussiaat 42:6, 12; 43:5.
Upperneq qutsinnerusunik anguniagaqartitsisarpoq
9. Upperneq anguniakkanut malitassaqarniarnermullu qanoq sunniuteqarpa?
9 Ataataanerpaat aalajaatsut Kanaanikkut inuunerlunnerattut inooriaaseqalinngisaannarput, qutsinnerusunimmi anguniagaqarput malitassaqarlutillu. Uagutsinnut aamma taamaappoq. Uppernitta anersaakkut ittunik anguniagaqartippaatigut, anguniagaqarnerpullu silarsuarmut ajortup, Saatani Diaavulup, pissaaneqarfigisaanut naleqqussannginnissamut illersuutigaarput. — 1 Johannesi 2:15-17; 5:19.
10. Qanoq nalunngilarput Josefi silarsuarmi matumani nuimasuunermit naleqarnerusumik anguniagaqartoq?
10 Jaakup ernera Josefi, Guutip siulersuineratigut, Egyptenimi inuussutissanik nakkutilliisuuninngorpoq. Josefilli silarsuarmi matumani tusaamasaanissani anguniagarinngilaa. Jehovap neriorsuutini eqquutitikkumaarai upperalugu, 110-nik ukioqarluni qatanngutiminut ima oqarpoq: „Uanga toqungajalerpunga; Guutilli isumagiumaarpaasi nunamit matumannga majuartillusi nunamut Aaperaamut Iisaamullu Jaakumullu neriorsuutigisaminut.“ Taava nunami neriorsuutigisami ilisaanissani qinnutigaa. Toqummat aanaveersarneqarpoq Egyptenimilu illerfissaanut ilineqarluni. Israelikkulli Egyptenimit inussiaajunnaarsitaammata, pruffiitip Mosesip ’Josefip saarni’ nunamut neriorsuutigisamut nassartippai ilisaatillugulu. (1 Mosesi 50:22-26; 2 Mosesi 13:19) Josefip upperneratut ittumik uppernitta kajumissisissavaatigut silarsuarmi matumani nuimasuunermit naleqangaarnerusumik anguniagaqarnissatsinnut. — 1 Korinthimiut 7:29-31.
11. Mosesip anersaakkut ittunik anguniagaqarluni qanoq ersersippaa?
11 Mosesip „Guutip innuttai naallioqatigiumanerungaarpai sivikitsuinnarmik ajortimi inuulluataarnissaminngarnit“ Egyptenimi kunngikkormiunut ilaasutut ilinniagaqarluartutut inuuserisimasinnaasaraluarmininngarnit. (Hebræerit 11:23-26; Apustilit Suliaat 7:20-22) Silarsuarmi tusaamasaanissaq immaqalu kusassagaangaartumik illerfeqarluni pingaartorsiortumik ilineqarnissaq isumakkeertariaqarpai. Tamakkuli qanoq naleqartigaat ’Guutimut kiffanngornermut’, Jehovamut pruffiitinngornermut, Biibilimik allattunngornermut Inatsisillu tunngavigalugit angerutsip atulernerani akunnermiuluttunngornermut naleqqiullugu. (Ezra 3:2) Illimmi? Silarsuarmi matumani tusaamasaarusuppit siumukarusullutillu, imaluunniit uppernerpit anersaakkut ittunik, taamaattumillu naleqarnerungaartunik, anguniagaqartippaatit?
Uppernerup inuuneq nalerisimaarnartunngortittarpaa
12. Upperneq Rahabip inuuneranut qanoq sunniuteqarpa?
12 Upperneq pitsaanerpaanik anguniagaqartitsiinnartanngilaq, aammattaarli inuuneq nalerisimaarnartunngortittarpaa. Rahabip Jerikomi atortittartutut inuunini siunertaqarluanngitsutut isigisimassagunarpaa. Upperninili takutimmagu allanngorneqassusia! ’Alapernaarsuiartortitanik ilassinnikkami aqqutikkullu allakkut [akeraannit Kanaanikkunnit] aniguisikkamigit suliamigut iluartuutitaavoq.’ (Jaaku 2:24-26) Rahabip paasivaa Jehova Guutiusoq ilumoortoq, atortittartuujunnaarnermigullu uppernini takutippaa. (Josva 2:9-11; Hebræerit 11:30, 31) Angut Jehovamut kiffartortoq aappartaaraa Kanaanikkuusumik uppinngitsumik aappartaarnani. (5 Mosesi 7:3, 4; 1 Korinthimiut 7:39) Rahabi Missiarsimut siuaasanngorneq immikkut pisinnaatitaaffigilerpaa. (1 Nalunaarsuutit 2:3-15; Ruthi 4:20-22; Matthæusi 1:5, 6) Akissarsisitaaqqilluni nunami paratiisimi inuunissamut toqusunit makititaassaaq. Taamatut akilerneqartut aamma ilagissavaat inuunerlukkunnaarsimasut allat.
13. Daavi Batsebamut atatillugu qanoq ajortuliorpa, qanorli isiginnittaaseqarluni ersersippaa?
13 Rahabi atortittartuujunnaarnermi kingorna eqqortumik ingerlasimagunarpoq. Allaqarporli Guutimut tunniulluinnareernermik kingunerujussua sualuttunik ajortuliortunik. Kunngi Daavip Batseba inuunerloqatigaa, uia sorsunnermi toqutaatillugu taavalu nulissiullugu. (2 Samueli 11:1-27) Aliasungaarluni peqqissimigami Jehovamut ima qinuvoq: „Anersaaq illernartoq uannit peerseqinagu!“ Daavillu Guutip anersaava annaanngilaa. Upperilluinnarpaa Jehovap, nallittuinermini, ’uummat peqqissimisoq artorsaateqangaartorlu itigartissanngikkaa’. (Tussiaat 51:13, 19; 103:10-14) Daavi Batsebalu upperamik akissarsipput; Missiarsimut siuaasanngorput. — 1 Nalunaarsuutit 3:5; Matthæusi 1:6, 16; Lukasi 3:23, 31.
Uppernerup uppernarsarneqarnera
14. Gideoni sumik uppernarsaavigineqarpa, uppernitsinnullu atatillugu oqaluttuaq taanna qanoq ilinniarfigisinnaavarput?
14 Upperluta inuugaluarluta, ilaannikkut Guutip ikiuinera uppernarserusuttarparput. Taamatut misigivoq eqqartuussisoq Gideoni, „uppernikkut naalagaaffinnik ajugaaffiginnissimasut“ ilaat. (Hebræerit 11:32, 33) Midjanikkut peqatigisaasalu Israeli tiguarmassuk, Guutip anersaava Gideonimut pivoq. Maanna Gideonip qulakkeerluinnarusuppaa Jehovap najoraani, taamaattumik uppernarsaaffigeqquvoq. Misiliinikkut tamanna pissaaq. Savap meqqui karrertaajaaffimmi unnuisippai. Misiliinerup immikkoortuani siullermi meqqut kanernermit isugutserput, nunali eqqaaniittoq panerluni. Misiliinerup immikkoortuata aappaani, aqaguani unnuakkut, killormut pisoqarpoq. Maanna Gideonip Jehovap siulersuinera qularutigiunnaarpaa, upperlunilu aallarpoq Israelillu akerai ajugaaffigalugit. (Eqqartuussisut 6:33-40; 7:19-25) Aalajangigassaqartilluta qulakkeerisariaqarluta misigigutta, imaanngilaq uppertuunngitsugut. Aalajangiitinnata Biibilimi atuagassianilu Biibililersaarutini siunnersuutissarsioraangatta Guutillu anersaava qinnutigigaangatsigu uppertuunerput ersersittarparput. — Romamiut 8:26, 27.
15. Barakip uppernerata eqqarsaatiginera qanoq iluaqutigisinnaavarput?
15 Eqqartuussisoq Baraki kajumissaarneqarluni uppernermigut nakussatsinneqarpoq. Pruffiitip Deborap kaammattorpaa siulliulluni iliuuseqaqqullugu Israelikkut kunngimit Kanaanikkuusumit Jabinimit naqisimaneqarunnaarsinniarlugit. Upperluni Guutillu najoraani qularinngilluinnarlugu Baraki angutinut atortuluttunut 10.000-nut siuttuuvoq, Jabinillu sakkutuui amerlanerungaartut, Siseramik siuttullit, ajugaaffigalugit. Debora Barakilu ajugaanersiorlutik nuannersumik erinarsorput. (Eqqartuussisut 4:1–5:31) Baraki Guutimit Israelimut siuttuusussanngortitatut iliuuseqaqqullugu Deborap kajumissaarinerata kingorna, Baraki Guutip kiffaasa uppernikkut ’akeqqamik sakkutoorpassuinik qimaatitsisut’ ilagilerpai. (Hebræerit 11:34) Jehovamut kiffartornitsinni unamminiarnartumik suliassaqarutta naammassiniarlugulu iliuuseqarnissarput nangaassutigigutsigu, nakussatsissutigisinnaavarput eqqarsaatigalugu Guutip Baraki upperluni iliuuseqarmat qanoq pilluaqqugaa.
Upperneq eqqissisitsisarpoq
16. Eqqissinermik ujartuinermi Aaperaat qanoq maligassiuilluarpa?
16 Soorlu upperneq iluaqutigisinnaagipput Guutimut kiffartornermi sulianik unamminiarnartunik naammassiniaanermi, uppernittattaaq eqqissinerput toqqissisimanerpullu siuarsartarpaa. Aaperaap jornguni Loti ivigaqarfinnik pitsaanerpaanik qinersisippaa, taamani nersutaatimik paarsisui saqitsaatilermata avissaartariaqaleramillu. (1 Mosesi 13:7-12) Ajornartorsiut aaqqinniarlugu Aaperaat upperluni Guutimut qinusimassaaq. Nammineq soqutigisani salliutinngilai, eqqissisimasumilli aaqqiilluni. Qatannguterput kristumiu aaqqiagiinngissuteqarfigilissagaluarutsigu, upperluta qinusa ’eqqissinerlu ujartorlugu’, Aaperaap asannittuunermik periaaserinnermillu maligassiunera eqqaamallugu. — 1 Petrusi 3:10-12.
17. Sooq oqarsinnaavugut Paulusip, Barnabap Markusillu isumaqatigiinnginnerat eqqissisimasumik qaangerneqarsimassasoq?
17 Uppernikkut kristumiunut najoqqutassiat maleruaraanni eqqissinermik qanoq siuarsaataasartoq malugiuk. Paulusi aappassaanik ajoqersuiartorluni aallalerluni Cypernimi Aasiaaqqamilu ilagiinnut tikeraaqqinnissamik siunnersuutaa Barnabap akueraa. Barnaballi illuni Markusi ilaatikkusuppaa. Paulusi taamaaliorusunngilaq, Markusimmi Pamfyliamiitillutik qimappaatsik. ’Assorsuaq isumaqatigiinngissutigilerpaat,’ tamatumalu kingunerisaanik avissaarput. Barnabap Markusi Cypernimukaqatigigaa Paulusip Silasi angalaqatsiullugu ’Syrialu Kilikialu angallavigai ilagiillu nakussatsillugit’. (Apustilit Suliaat 15:36-41) Piffissap ingerlanerani isumaqatigiinngissut aaqqissimassavaat, Markusimmi Paulusi Romameeqatigaa, apustilillu ajunngitsumik eqqartorpaa. (Kolossemiut 4:10; Fiilimuut 23, 24) Allaat ukiumi 65-imi Paulusi Romami parnaarussaaqqatilluni Timotheusi ima allaffigaa: „Markusi maannaqatiginiaruk, uanga kiffartortuuninni taanna ikiortigilluartarpara.“ (2 Timotheusi 4:11) Paulusip Barnabamut Markusimullu attaveqarnini pillugit Guutimut qinusimassaaq, uppernikkullu qinunini isummamigut eqqississutigaa, ’eqqissinermut Guutimit pisumut’ atassuteqartumik. — Filippimiut 4:6, 7.
18. Euodiap Syntykillu isumaqatigiinnginnerat qularnanngitsumik qanoq pisimassava?
18 Tamatta naammalluinnanngitsuuvugut ’amerlasuunillu kukkussuteqartarluta’. (Jaaku 3:2) Arnat kristumiut marluk isumaqatigiinngilermata, Paulusi ima allappoq: „Euodia oqaaqqissaarniarpara, Syntykilu oqaaqqissaarniarpara Naalakkami isumaqatigeeqqullugit. . . . Qinnuigaakkit taakku ikioqqullugit iivangkiiliu pillugu sorsussimammata uanga peqatigalunga.“ (Filippimiut 4:1-3) Qularnanngitsumik arnat Guutimik mianerinnittut taakku siunnersuut Matthæusi 5:23, 24-mi allassimasoq malillugu ajornartorsiutertik eqqissisimasumik aaqqippaat. Aamma ullumikkut eqqisseqatigiinnerput siuarsarsinnaavarput, Guutimut uppernikkut, Biibilimi najoqqutassiat atorlugit.
Upperneq naammagittartitsisarpoq
19. Iisaap Rebekkallu misilinneqarneq suna upperunnaassutiginngilaat?
19 Aamma atugarliornitsinni uppernitta naammagittartissinnaavaatigut. Imaassinnaavoq nikallungasoqartoq ilaqutartik kuisimasoq Guutip peqqussutaanut akerliusumik iliorluni uppinngitsumik aappartaarmat. (1 Korinthimiut 7:39) Iisaap Rebekkallu aliasuutigeqaat ernertik Esaui Jehovamik pallorfiginninngitsumik aappartaarmat. Nuliaasut Hittikkuusut ’aliasuutaangaalermata’, naggataatigut Rebekka ima oqarpoq: „Hittikkut arnartaat pissutaallutik inuunera uannut avaanngunarsilerpoq! Taamaattumik aamma Jaaku Hittikkut maanimiut paniisa ilaannik nuliartaaraluarpat taava toquinnaruma pitsaanerussaaq.“ (1 Mosesi 26:34, 35; 27:46) Misilinneqarnerli tamanna Iisaap Rebekkallu upperunnaassutiginngisaannarpaat. Qanortoq aamma uagut upperluartuujuarta arlaatigut misilinneqassagaluarutta.
20. No’omi Ruthilu uppernikkut qanoq maligassiuippat?
20 No’omi Judami uillarneruvoq utoqqasaaq. Nalunngilaa Judap naggueqatigiissortaani arnat aalajangersimasut ernertaarumaartut Missiarsimut siuaasanngortussanik. Namminerli ernini qitornaqaratik toqummata namminerlu qitornartaarsinnaajunnaareerami, Missiarsimut siuaasanngornissaminut periarfissaarussimagunarpoq. Ukuaatali Ruthip, aamma uillarnerusup, Boazi aappartaaraa. Ernertaarpullu, taamaalillunilu Jiisusimut, Missiarsimut neriorsuutigisamut, siuaasanngorluni! (1 Mosesi 49:10, 33; Ruthi 1:3-5; 4:13-22; Matthæusi 1:1, 5) No’omip Ruthillu atugarliornerminni uppernertik naammagittassutigaat nuannaassutigalugulu. Aamma uagut nuannaarneq taamaattoq misigisinnaavarput atugarliuutivut akiorutsigik.
21. Upperneq qanoq iluaqutigaarput, sunalu aalajangiusimasariaqarparput?
21 Arlattaluunniit aqagu qanoq pisoqassanersoq naluaa, upperuttali unamminiarnartut tamaasa anigorsinnaavavut. Upperneq sapiillinarpoq naammagittarnarlunilu. Nalerisimaartippaatigut qutsissunillu anguniagaqartilluta. Allanut attaveqarnitsinni ajunngitsumik sunniuteqartarpoq, ilungersunartunilu najummissavaatigut. Taamaattumik qanortoq ilaagisa „tarnitta annaanneqaatissaannik uppertunut“. (Hebræerit 10:39) Jehovap ataqqinaatissaanik upperluarnerput aalajangiusimatigu. Taamaaliorsinnaavugut Guutitta asannittup nakussatsitsineratigut. (wE 1/15 03)
Eqqaamavigit?
• Upperneq sapiillissutigisinnaagipput sunik Biibilimi uppernarsaateqarpa?
• Sooq oqarsinnaavugut uppernitta nalerisimaartikkaatigut?
• Upperneq eqqissinermik siuarsaanermi qanoq sunniuteqarpa?
• Atugarliornermi uppernerup iluaqutaaneranik sunik uppernarsaatissaqarpa?
[Atuaqqissaarnermi apeqqutit]
[Qupp. 25-mi assiliartat]
Noap Enokillu Jehovap tusarliussaata oqaluussissutiginissaanut upperneq sapiillissutigaat
[Qupp. 26-mi assiliartat]
Mosesitulli uppernitta anersakkut ittunik anguniagaqartippaatigut
[Qupp. 27-mi assiliartat]
Baraki, Debora Gideonilu uppernermikkut uppernarsivaat Guutimit najorneqarlutik