’Asaqatigiigitsi’

„Asaqatigiikkussi tamatumuuna tamarmik paasissavaat ajoqersugarigissi.“ — JOHANNESI 13:35.

1. Pissuseq suna Jiisusip toqunngitsiarluni pingaartillugu oqaatigaa?

„QITORNAKKA.“ (Johannesi 13:33) Toqunissani aqaguttoq unnukkut Jiisusip oqaaseq taanna asannippaluttoq atorlugu apustilini saaffigai. Oqaaseq taanna killitsinnartoq siusinnerusukkut taakkununnga atorsimaneraa iivangkiiliuni allassimasoqanngilaq. Unnulli immikkut ittuuvoq, ajoqersukkanilu qanoq asatigigini paasitinniarlugit Jiisusi qamannga pisumik oqalunnissaminut killinneqarpoq. Unnuup ingerlanerani asanninneq 30-riarluni eqqartorpaa. Sooruna pissuseq taanna taama pingaartitsigigaa?

2. Asaqatigiinnissaq kristumiunut sooq taama pingaaruteqartigaa?

² Sooq asanninneq taama pingaaruteqartiginersoq nammineerluni oqaatigaa. Oqarpoq: „Asaqatigiikkussi tamatumuuna tamarmik paasissavaat ajoqersugarigissi.“ (Johannesi 13:35; 15:12, 17) Aap, Kristusimut ajoqersugaaneq qatanngutinillu asanninneq ataqatigiilluinnarput. Kristumiut ilumoortut atisamikkut allaanerussuteqarnermikkut imaluunniit eqqumiitsunik pissusilersortarnermikkut ileqqoqarnermikkulluunniit ilisarineqassanngillat, ilisarineqassappulli imminnut asanninnermik ilumoortumik qamannga pisumik takutitsiviginermikkut. Jiisusimut ajoqersugaaniaraanni piumasaqaatit pingasuusut naammassineqartariaqartut allaaserisami siullermi asanninnermik taamaattumik pigisaqarneq taasatta aapparaat. Piumasaqaammik tamatumannga naammassinninnissatsinnut suna iluaqutigisinnaavarput?

„Suli annerusumik“

3. Asanninnermut tunngatillugu apustili Paulusi qanoq kajumissaariva?

³ Ukiuni hundredelinni siullerni asanninneq nalinginnaanngitsoq taamaattoq ullumikkut Jiisusip ajoqersugaasa akornanni nassaassaavortaaq. Apustili Paulusi taamanikkut kristumiunut allappoq: „Qatanngutigiittut asaqatigiinnissamik allaffigisariaqanngilassiluunniit, ilissi nammineq Guutimit ajoqersorneqarassi asaqatigeeqqullusi; qatanngutinummi tamarmi ittunut asanninnermik takutitsivusi.” Taamaakkaluartoq oqaatsini ima ilavai: ’Suli annerusumik taamaalioritsi.’ (1 Thessalonikamiut 3:12; 4:9, 10) Qatanngutigiit akornanni ’suli annerusumik’ asanninnissamik kajumissaarut tamanna ilassisariaqarparput.

4. Paulusi Jiisusilu naapertorlugit kikkut immikkut soqutigissavavut?

⁴ Allakkani isumassarsiarititaasuni taakkunani Paulusip ’ernumasut tuppallersaqqullugit sanngiitsullu isumageqqullugit’ uppeqatini kajumissaarpai. (1 Thessalonikamiut 5:14) Piffissami allami kristumiut eqqaasippai sanngisuut ’pisussaasut sanngiitsut sanngiissutaat ersussallugit’. (Romamiut 15:1) Aamma Jiisusip oqaatigaa sanngiitsut ikiortariaqartut. Tigusaanermi kingorna Petrusip miserratigissagaani siulittuutigereeramiuk taanna ima oqarfigaa: „Qaqugulu saakkuit qatanngutitit nakussatsikkigit.“ Sooq Petrusi taamaaliussava? Tassa aamma allat Jiisusimik miserratiginnillutik ikiortariaqalissammata. (Lukasi 22:32; Johannesi 21:15-17) Taamaammat Guutip oqaasiatigut peqquneqarpugut anersaakkut sanngiitsut immaqalu kristumiut ilagiivinut attaveqarunnaarsimasut asanninnermik takutitsivigisassagivut. (Hebræerit 12:12) Sooq taama pingaartigaa? Jiisusip assersuusiaani marlunni tamanna takorlooruminartumik nassuiarneqarpoq.

Sava tammaraluartoq aningaasarlu katataq

5, 6. (a) Assersuusiat naatsut suut Jiisusip oqaluttuarai? (b) Assersuusiat taakkua Jehova pillugu qanoq paasitippaatigut?

⁵ Tammartajaartunut Jehovap isiginnittaasianik  tusarnaartini ilinniartinniarlugit Jiisusi naatsunnguanik assersuusiorpoq. Assersuusiap aappaa savanik paarsisumut tunngasuuvoq. Jiisusi oqarpoq: „Arlarsi 100-nik savaateqaruni ilaallu ataaseq tammaallugu, taava taakku 99-it inuilaami qimaannarlugit tammaasani ujassannginnerpaa nanitserlugu? Naniguniullu nuannaarluni ersukkiutissavaa tikikkunilu ikinngutini sanilinilu qaaqqussavai oqarfigissallugillu: Sava tammaasaraluara nanigakku nuannaaqatigisinga. Oqarfigaassimi: Taamatuttaaq ajortuliortoq ataaseq allamik isumataartoq qilammi nuannaarutaanerussaaq iluartunit 99-init allamik isumataarnissamik pisariaqartitsinngitsunit.“ — Lukasi 15:4-7.

⁶ Assersuusiaq alla arnamik assersuusiaavoq. Jiisusi oqarpoq: „Imaluunniit arnaq qulinik drakmeuteqaruni ataaserlu tammaallugu, taava naneruut ikissannginnerpaa illullu naqqa sanerlugu ujarleqqissaarlunilu nanitserlugu? Naniguniullu ikinngutini sanilinilu qaaqqussavai oqarfigissallugillu: Drakme tammaasaraluara nanigakku nuannaaqatigisinga. Oqarfigaassimi: Ajortuliortoq allamik isumataartoq ataaseq Guutip inngiliini taamatut nuannaarutigineqarumaarpoq.“ — Lukasi 15:8-10.

7. Savamik tammaraluartumik aamma aningaasamik katatamik assersuusianit suut marluk ilinniarsinnaavavut?

⁷ Assersuusianit taakkunannga marlunnit suna ilinniarsinnaavarput? Takutippaatigut (1) sanngiillisimasunut qanoq misigisariaqartugut; aamma (2) taakku ikiorniarlugit qanoq iliortariaqartugut. Marluk taakku tamaasa misissoriartigit.

Tammarsimavoq — sulili pingaartinneqarpoq

8. (a) Annaasaqarsimanerminni savanik paarsisoq arnarlu qanoq qisuariarpat? (b) Qisuariarnerisa annaasaminnut isiginnittaasiannik qanoq paasitippaatigut?

⁸ Assersuusiani tamani tammartoqarsimavoq. Piginnittut qanoq qisuariarnerat malugeriaruk. Savanik paarsisoq oqanngilaq: ’99-nik savaateqarama sava ataaseq taanna soqutaavallaanngilaq. Pinngitsoorsinnaavara.’ Arnaq aamma oqanngilaq: ’Sooq aningaasaq ataasiinnaq isumakuluutigissavara? Allat qulingiluat pigaakka; taakkulu naammagaakka.’ Naamik, savanik paarsisoq anivoq sava tammarsimasoq ujarniarlugu, soorlulusooq taanna kisiat pigalugu! Aamma arnaq taanna misigivoq soorlu aningaasap katatami saniatigut allanik aningaasaateqarani! Taamaattumik pisuni taakkunani marlunni tammartut tammaasunit pingaartinneqartorujussuupput. Tamanna sumik ilinniarfigisinnaavarput?

9. Savanik paarsisup arnallu misigissusaasa suna oqaluttuaraat?

⁹ Pisuni marlunni taakkunani Jiisusip inerniliinera malugeriaruk: „Taamatuttaaq ajortuliortoq ataaseq allamik isumataartoq qilammi nuannaarutaanerussaaq“, aamma „oqarfigaassimi: Ajortuliortoq allamik isumataartoq ataaseq Guutip inngiliini taamatut nuannaarutigineqarumaarpoq“. Savanik paarsisup arnallu misigissusiisigut Jehovap pinngortitaasalu qilammiut misigissusii killeqaraluaqisumik takutinneqarput. Savanik paarsisup arnallu tammartunik pingaartitsingaarnerattut, tammarsimasut Guutillu innuttaanut attaveqarunnaarsimasut Jehovap isaani suli erlinnartuupput. (Jeremia 31:3) Anersaakkut sanngiitsuusinnaapput, immaqali pikitsitsiniartuunngillat. Immaqa Jehovap  piumasaqaataasa ilaat suli naammassisarpaat. (Tussiaat 119:176; Apustilit Suliaat 15:29) Jehovap ’kiinnami saanit ajattorasuartanngilai’, soorlu pissutsini assingusuni itsaq taamaaliorsimanngitsoq. — 2 Kunngit 13:23.

10, 11. (a) Ilagiinniit qimagussimasut qanoq isigissavavut? (b) Jiisusip assersuusiaasa marluk qanoq takutippaat isumassuinitsinnik takutitsivigalugit iliuuseqarsinnaanerput?

¹⁰ Sanngiitsut kristumiullu ilagiiviniit qimagussimasut Jehovatut Jiisusitullu isumassugarerusuppavut. (Ezekieli 34:16; Lukasi 19:10) Anersaakkut sanngiitsut savatut tammarsimasutut isigaavut, annaasatut ikiorneqarsinnaanngitsutut isiginagit. Ima eqqarsassanngilagut: ’Sooq inuk ataasiinnaq sanngiitsoq isumakuluutigissavara? Peqanngikkaluartoq ilagiit ingerlalluartorujussuupput.’ Naamik, tammarsimasut uterumasulli naleqaqisutut isigaavut, soorlu Jehovap taama isigigai.

¹¹ Taakkununngali isumassuinerput qanoq ersersissinnaavarput? Jiisusip assersuusiaani marlunni takutinneqarpoq taamaaliorsinnaasugut (1) nammineerluta iliuuseqarnitsigut, (2) qajassuussinitsigut, aamma (3) peqqissaartumik iliuuseqarnitsigut. Taakku pingasut tamaasa misissoriartigit.

Nammineq iliuuseqarit

12. Oqaatigineqarmat annaasani ’ujariartoraa’, savanik paarsisup isiginnittaasia qanoq ilinniarfigisinnaavarput?

¹² Assersuusiamini siullermi Jiisusi oqarpoq savanik paarsisup sava annaasani „ujariartussagaa“. Savanik paarsisoq siulliulluni iliuuseqassaaq, savalu tammarsimasoq naniniarlugu aalajangersimasumik iliuuseqassalluni. Ungasissutsimit, pisarissersuutinit navianartunillu tunuarsimaartinneqassanngilaq. Naamik, ’nanitserlugu’ ujartuassavaa.— Lukasi 15:4.

13. Sanngiitsut ikiorneqartariaqaraangata itsaq angutit aalajaatsut qanoq qisuariartarpat, uagullu maligassiat Biibilimeersut tamakku qanoq malissinnaavavut?

¹³ Qiimmassarneqarnissaminik pisariaqartitsisoq ikiussagaanni aamma taamaappoq; sanngisuunerup siulliulluni iliuuseqarnissaa pisariaqarpoq. Tamanna itsaq aalajaatsut paasisimavaat. Assersuutigalugu kunngi Saulip ernerata, Jonatanip, paasigamiuk ikinngutigilluakkani Daavi qiimmassarneqartariaqartoq, Jonatanip „ornippaa Horeshimi, Guutimi nutaamik sapiissuseqalersillugu”. (1 Samueli 23:15, 16) Ukiut hundredellit arlallit qaangiuttut nunaqqatimi ilaasa sanngiillisimanerat naalagaatitap Nehemiap takugamiuk ingerlaannaq ’sassarpoq Jehovalu eqqarsaatigeqqullugu’ kajumissaarlugit. (Nehemia 4:14, Testamentitoqaq, 1990) Sanngiillisimasoq nukittorsarneqartariaqarpat uaguttaaq ingerlaannaq ’sassassaagut’ — nammineq iliuuseqarluta. Kinaliuna ilagiinni taamaaliortussaasoq?

14. Ilagiinni kristumiuni kikkut assatik sanngiitsunut isaattariaqarpaat?

¹⁴ Utoqqaanertat kristumiut akisussaaffigaat ’assaat nukillaartut pissatsissallugit, seeqqut patajalersut patajaallisassallugit, uummatimikkullu qussalasut’ oqarfigissallugit „nukittoritsi, erseqinasi“. (Esaja 35:3, 4; 1 Petrusi 5:1, 2) Aammattaaq malugiuk apustili Paulusip ’sanngiitsut  tuppallersaqqullugit isumageqqullugillu’ oqaaqqissaarutaa utoqqaanertaannaanngitsunut oqaaqqissaarutaammat. Paulusip oqaasii „Thessalonikamiut ilagiivinut“ sammititaapput. (1 Thessalonikamiut 1:1; 5:14) Taamaattumik kristumiut tamarmik pisussaaffigaat sanngiitsut assamminnik isaatsivigissallugit. Tammarsimasup „ujarnissaanut” kristumiu kinaluunniit assersuusiami savanik paarsisutut killitsittariaqarpoq. Soorunami pitsaanerussaaq utoqqaanertaq peqatigalugu taamaaliortoqarpat. Ilagiinni ilaasortaaffigisanni sanngiitsumut assannik isaassinissannut periarfissaqarpit?

Mianersorlutillu qajassuarit

15. Savanik paarsisup iliuuserisaanut suna pissutaasinnaava?

¹⁵ Sava tammarsimasoq nanigaangamiuk savanik paarsisoq qanoq iliortarpa? ’Ersukkiutissavaa.’ (Lukasi 15:5) Paasissutissaq naatsoq attortinnartoq takorlooruminartorlu, ilaa? Sava nunami nalusamini immaqalu løvinit saassunneqarfigisinnaasamini unnuarpassuarni ullorpassuarnilu tammarsimasinnaavoq. (Jobi 38:39, 40) Nerisaqarsimannginnami qularnanngitsumik nukillaarsimavoq. Savat inaannut uterniarluni ilungersuanissaminut maanna nukissaarutivissimavoq. Taamaattumik savanik paarsisoq aquippoq savalu mianersortumik kivillugu, akornutaasinnaasullu tamaasa aqqusaarlugit savat inaannut ersullugu oqquppaa. Savanik paarsisup isumassuinerujussua taamaattoq uagut qanoq ilaarsinnaavarput?

16. Savanik paarsisup savamik tammaraluartumik qajassuussinera sooq ilumoorullugu eqqarsaatigisariaqarparput?

¹⁶ Ilagiinnut attaveqartarunnaarsimasoq anersaakkut qasusimasinnaalluarpoq. Savatut paarsisuminit tammaaneqartutut sanngiitsoq immaqa maani silarsuarmi avatangiisini akeqqersartuni tammarsimasinnaavoq. Savaateqatigiinni, ilagiinni kristumiuni, sernissorneqannginnami Diaavulumit ’løvitut uiannisaartutut iisassarsiorluni angalasartumit’ saassunneqarnissaminut aatsaat taama navianartorsiortigaaq. (1 Petrusi 5:8) Anersaakkut nerisaqarsimannginnami aamma sanngiippoq. Taamaattumik ilagiinnut utimut aqqutimini akornutit nammineerluni qaangernissaannut nukillaangavallaassannguatsiarpoq. Uagut ’aquilluta’ sanngiitsoq qajassuartumik ’ersukkiuteriarlugu’ oqquttussaavarput. (Galatiamiut 6:2) Qanoq taamaaliorsinnaavugut?

17. Sanngiitsoq pulaarutsigu apustili Paulusi qanoq ilaarsinnaavarput?

¹⁷ Apustili Paulusi oqarpoq: „Kina sanngiitsoq sanngiissutigilinnginnerpara?“, imaluunniit Peter Schindlerip nutsigaa naapertorlugu: „Arlaat imminut isumagisinnaanngippat, taava uanga atugaanik avitseqatigissavara.“ (2 Korinthimiut 11:29; 1 Korinthimiut 9:22) Aap, Paulusi, allat aamma sanngiitsut atugarisaannik, paasinnikkumasuuvoq. Uaguttaaq sanngiitsut atugaannik taamatut paasinnikkumasariaqarpugut. Kristumiu anersaakkut sanngiilliortoq pulaarutsigu, paasitinniassavarput Jehovap pingaartikkaa kristumioqataasalu maqaasigaat.  (1 Thessalonikamiut 2:17) Paasitiguk ilagiinni kinaluunniit tapersersuissalluni piareersimasoq, aap, ’qatanngutaassasoq erniusimalluni annikilliornermi ikiortissaalluni’. (Ussatit 17:17; Tussiaat 34:18) Ilumoorullugu taamatut oqaaseqarutta immaqa qajassuarluta arriitsunnguamik ersukkiuteriarlugu ingerlassinnaavarput, savaateqatigiinnut uternissaata tungaanut. Taavami qanoq iliussaagut? Tamanna arnamik aningaasamillu katatamik assersuusiami ersersinneqarpoq.

Peqqissaartumik iliuuseqarit

18. (a) Assersuummi arnaq sooq misiginngila ujarlernissaq iluaqutaassanngitsoq? (b) Qanoq peqqissaartumik iliuuseqarpa, tamannalu qanoq kinguneqarpa?

¹⁸ Arnap aningaasaatiminik katatsisimasup nalunngilaa aningaasaq naniuminaassasoq, naneqqinnissaali ajornavissanngitsoq. Aningaasaq asimi imaluunniit tatsimut marullulimmut katassimasuuguniuk qularnanngitsumik nanineqaqqissinnaanngivissutut isigisimassagaluarpaa. Nalunngilaali aningaasaq illup iluaniissasoq. Nanineqarsinnaavoq, taamalu sukumiisumik peqqissaartumillu ujarlilerpoq. (Lukasi 15:8) Siullermik qulleq ikippaa ini taartoq qaammarsarumallugu. Taava sanigutini tigoriarlugit nateq sanilerpaa, neriuutigalugu aviluarpallattoqassasoq. Naggataatigut qulleq tigullugu teqeqqut tamaasa ujarlerfigai — aningaasap sølviusup qillaallannissaata tungaanut! Peqqissaarnera akilerneqarpoq!

19. Arnap aningaasaatini naniniarlugu iliuuseqarnera sanngiitsut ikiornissaannut atatillugu qanoq ilinniarfigisinnaavarput?

¹⁹ Assersuusiami taamatut iluuseqarnerup eqqaasippaatigut sanngiitsumik ikiuinissamut pisussaaffitsinnik Biibilimeersumik naammassinninnissaq ajornanngitsoq. Iliuuseqartoqartariaqartorli takutinneqarpoq. Efesosimi utoqqaanertanut Paulusip oqarneratut ippoq: ’Taama sulinikkut sanngiitsut isumagisariaqarput.’ (Apustilit Suliaat 20:35a) Eqqaamajuk arnap illup iluani qinipajuinnarnermigut aningaasaatini naninngimmagu. Naamik, nanivaa ilumoorussilluni peqqissaarluni iliuuseqarnermigut, ’nanitserlugulu’ ujaasinermigut. Anersaakkut sanngiitsoq uternissaanik ikiorniaraangatsigu aamma taamaaliortariaqarpugut; ilumoorullugu iliuuseqartariaqarpugut. Qanoq iliorsinnaavugut?

20. Sanngiitsut ikiorniarlugit qanoq aalajangersimasumik iliuuseqarsinnaavugut?

²⁰ Sanngiitsoq uppernerulersinniarlugu pingaartitsinerulersinniarlugulu qanoq ikiorsinnaavarput? Atuagassiaq naleqquttoq atorlugu Biibilimik atuaqqissaarnissani imaassinnaavoq pisariaqartikkaa. Sanngiitsumik atuaqqissaaqatiginninnerup sukumiisumik akuttoqatigiissumillu ikiorsiinissatsinnut periarfississavaatigut. Kina pisariaqartumik tapersersuisinnaanersoq ilagiinni kiffartornermik nakkutilliisup naliliivigilluarsinnaanerugunarpaa. Aamma atuaqqissaarnermi sammineqarluarsinnaasut oqaatigisinnaassavai, atuagassiallu tunngavissaqqinnerusut innersuussutigisinnaavai. Soorlu assersuusiami arnap sakkut eqqortut atornerisigut angorusutani angugaa, ullumikkuttaaq uagut sakkuuteqarpugut sanngiitsut ikiornissaannik Guutip suliassiissutaanik naammassinniarnitsinni atorsinnaasatsinnik. Tamatumunnga naleqquttunik nutaanik marlunnik sakkussaqalerpugut, tassa atuakkat Tilbed den eneste sande Gud aamma Kom nær til Jehova. *

21. Sanngiitsunik ikiuineq qanoq tamaginnut pilluaqqussutaassava?

²¹ Sanngiitsunik ikiuineq tamaginnut pilluaqqusaassutaasarpoq. Ikiorneqartup ikinngutiminut  ilumoortunut utertinini pilluaatigissavaa. Uagut misigissavarput nuannaarneq immikkut ittoq tunissuteqarnikkuinnaq anguneqarsinnaasoq. (Lukasi 15:6, 9; Apustilit Suliaat 20:35b) Ilagiinni ilaasortat asannittumik allanut isumassuinerujartortillugit ilagiit ataatsimut isigalugit kissalaariartuinnassapput. Pingaarnerusumilli Savanik Paarsisuunerit sanngiitsunik ikiuerusunnerat nunarsuarmi kiffaanit ersersinneqaraangat tamanna Jehovamut Jiisusi Kristusimullu ataqqinaataassaaq. (Tussiaat 72:12-14; Matthæusi 11:28-30; 1 Korinthimiut 11:1; Efesosimiut 5:1) ’Asaqatigiittuassalluta’ ilumut pissutissaqarluarpugut!

[Quppernerup ataani ilanngussaq]

Makku nassuiarsinnaavigit?

• Sooq tamatta asanninnermik takutitsinissarput pisariaqarpa?

• Sooq sanngiitsut asanninnermik takutitsivigisariaqarpavut?

• Sava tammaraluartoq aningaasarlu katataq pillugit assersuusiat qanoq ilinniarfigaavut?

• Sanngiillisimasoq ikiorniarutsigu suut iliuuserisinnaavavut?

[Atuaqqissaarnermi apeqqutit]

[Qupp. 12, 13-mi assiliartat]

Sanngiitsunik ikiuinitsinni siulliulluta iliuuseqarniartassaagut, qajussuussissalluta peqqissaartuussallutalu

[Qupp. 12, 13-mi assiliartat]

Sanngiitsunik ikiuineq tamanut pilluaqqussutaasarpoq